Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Unsu-hati irumu 2014

 TÍTULU LE LUÁGUBEI TIDÁÜ: INARÜNI SAN ANIHEIN LAN MAFIA?

Lunti san wanufudedun luéi Mafia?

Lunti san wanufudedun luéi Mafia?

Peliguruti monóxido de carbono ani marihínwati—Kei Satanási

Anihein aban gasi péisiniti, méhemeti ani hénrenguti lasubudirúniwa anihein lan, gayarati láfaraguniña gürigia sin híchugun fe. Wayanuhaña luagu monóxido de carbono. Saminawati luagu gasi lan ligía lébunabei hóunwegun saragu gürigia ubouagu. Gama lumoun, mama mosu wanufudedun luéi. Anihein burí katei lun lasubudirúniwa anihein lan gasi ligía garabalirugu ani adügati lun madügün lan dañu houn gürigia.

Ítara liña Mafia kei gasi ligía: marihínwati, wéiriti peliguru lan ani hénrenguti lasubudirúniwa dan le ligía lan lanagangiñebei sun katei. Gama lumoun, mama mosu wanufudedun luéi, ladüga resibitiwa saragu ídemuei lúmagiñe Bungiu. Ariha wamá fiú lídangiñe.

Ubafu lun wanúadahan. Ariñagati Santiagu 4:7: “Gagibugua humá luma Mafia, ábame lanurahan huéi”. Íbini weiri lan lubafu Satanási, siñati lafosuruniwa lun wadügün katei le mabusenruntiwa wadügüni. Wagía lun desidírü wamá. Ánhawa úaragua lidan wafiñen, ábame lígiruniwa woungua (1 Féduru 5:9). Ráramati Hesusu lau úaraguni lun ǘrüwa óuchawaguni darí lun lígiruni Satanási Hesusu lungua (Matéu 4:11). Gayarati wadügüni ligiaméme.

Umadaguaü luma Bungiu. Ariñagati Santiagu 4:8: “Yarafa humá lun Bungiu”. Aban amisurahani le lun lumadagu wamá Heowá. Ida luba gamadagua wamá luma? Mosu wafurendeiruni sun le tarufudahabei Bíbülia woun luagu (Huan 17:3). Éibume wafurendeirun luagu Bungiu, hínsiñetimabei woun, ani éibume laweiridun línsiñe woun, busentimabadiwa weseriwidun lun (1 Huan 5:3). Ida luba lóunabun Wabungiute le siélubei lun wáfaagun? Sigiti Santiagu ariñaga: “Ábame giñe layarafadun hun”.

Góunigi lumutiwa Heowá

Ichouruni luagu lóunigirubadiwa lan. Ariñagati Ariñawagúni 18:10: “Aban wáyelesi héreti liri Bungiu, ñǘdüntiña ha richaguabaña aramudagua lidan”. Mama larufuduña dimurei burí le gayara lan wayusuruni liri Bungiu keisi aban lúyawa uraü, mini lan luagu ha lan inebehabutiña lun iri le gayarabei lan hayarafadun lun Bungiu danme le hemegeiruni lídehan.

Aban lubuidun hénpulu. Lidan Adügaü 19:19 daritiwa aban abahüdaguni le gayarati larufudahan saragu katei woun. Ayanuhati abahüdaguni  ligía luagu le meha hadügübei fiú éfesuna lárigiñebei kristiánugu hamá. Aliihatiwa ñein: “Saragu giñe burí hádangiñe ha meha gabiñarahadibaña, aba hanügünu burí haliburun, aba hágudunu hagibugiñe súngubei. Dan habahüdünbalin tebegi líburu burí tuguya, gebegitu kei burí dimí-san-milu murusun pülata”. * Aba háguruni kristiánugu hagía sun katei lánina abiñarahani le hámabei íbini seru lan. Buiti hénpulu le woun! Eibu dan gíbetimahali katei hani máfianu ubouagu. Anihein burí katei le genegeti mariban lan, gama lumoun achawaha lumutiña máfianu. Ligía súdini lubéi wadisedun luéi katei burí ligía sunsuinagubei (2 Lúrudu 18:10-12).

Dimí-san meha irumu lau Rogelio, wügüri le uágubei wayanuha lidan furumiñeti arütíkulu, dan le líchugunbei fe luagu anihein lan Mafia. Ka adügübei lun lasansirun lisaminan? Ariñagati: “Ligía meha furumiñeti wéiyaasu ñein tan aban Bíbülia numa, ani le naliihabei tidan ligía adügübei lun nachoururuni inarüni lan anihein lan Mafia. Íderagua láadina subudi ligía lun nóunigiragun nungua luéi”.

“Le naliihabei tidan [Bíbülia] ligía adügübei lun nachoururuni inarüni lan anihein lan Mafia. Íderagua láadina subudi ligía lun nóunigiragun nungua luéi”

Hinsiñeti hamuga san hun hawinwandun lidan aban ubóu le ídanbei ua lan Mafia? Gayarati lasuseredun. Chouru tumuti Bíbülia woun lagurúba lan Satanási, le eyeedalibei saragu gürigia, lidoun “lagunu le laubei watu gemeti luma súfuru” (Arufudúni 20:10). Aban sínbolu lagunu ligía, lugundun siñati ladügün watu luma súfuru dañu lun aban sífiri. Agünrinchawaguni le gumuti mini lubéi lagunu ligía. Lóunweba lubeiti Satanási lun súnwandan. Ma lanarime awalidaguni houn lubúeingu Bungiu!

Sigí humá afurendeira luagu Heowá luma luagu ligaburi lisaminan darime lachülürün weyu ligía. * Anhein hadüga ítara, harihibei weyu danme le gayarahali wariñagun: “Úati Mafia!”.

^ par. 8 Anhein luagu lubéi haseinsun rómana le meha gíribei denariu layanuhóua ya, wayanuhaña luagu saragu seinsu. Lun lagañeiruni aban gürigia sun seinsu ligía, mosu meha luadigimaridun 50,000 weyu.

^ par. 11 Anhein busén hubéi lanwoun ariñahani luagu Mafia luma luagu le lasaminarubei Bungiu luagu abiñarahani, akutiha huméi kapítulu 10 tidan líburu Kátima san tarufudahabei Bíbülia? Amuriaha humóun luma aban gefenti luagu Heowá.

Lanwoun ariñahani

UGANU BUITI LÚMAGIÑETI BUNGIU

Ka san lisuunibei Bungiu lun Ubóu?

Afuranguagüda tumuti Bíbülia ka lan uagu ladügei Bungiu Ubóu, ídaba lan lagidarei sun asufuriruni luma kaba lan asusereda hau gürigia luma lun Ubóu le ídanbei wawinwanda.

Kátima san tarufudahabei Bíbülia?

Ka efekütu hánibei sífirigu wawagu?

Adimurehatu Bíbülia hawagu ánheligu hama máfianu. Inarünitiña san? Gayaraati san gabafu hamá lidan wabagari?