Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Unsu-hati irumu 2014

 TÍTULU LE LUÁGUBEI TIDÁÜ: INARÜNI SAN ANIHEIN LAN MAFIA?

Aban san sínbolu lánina wuribani Mafia?

Aban san sínbolu lánina wuribani Mafia?

Gíbetiña gürigia saminatiña dan le lan tayanuhan Bíbülia luagu Satanási o Mafia tayanuharügüña lan luagu aban sínbolu lánina le wuribabei. Gama lumoun, anhein inarüni lubéi le hasaminarubei, ka uagu tariñaga Bíbülia ayanuha lan Mafia luma Hesusu ayanuha ligía luma Bungiu? Akutiha waméi katei le buidu.

DAN LE LAYANUHANBEI LUMA HESUSU

Fiú dan lárigiñe labadiseirun Hesusu, aba lóuchaguni Mafia ǘrüwa wéiyaasu. Furumiñe, hóuchati Satanási ladügün lun layusuruni Hesusu ubafu le líchugubei Bungiu lun lun lubuidun guánarügü: ariñagati lun lun lasaliraguagüdün fiú dübü feinme. Lárigiñe, aba lariñagun lun lun láhureruni libagari lun taweiridun hanigi gürigia lau. Ani lagumuhóun, aba lariñagun lun líchugubei lan sun arúeihani le ubouagubei lun anhein áhuduragua lun. Méiguadunti Hesusu lidoun ni aban lídangiñe óuchawaguni ligía, ani lidan ǘrüwagubei kesi yúsuti dimurei tídangiñeti Lererun Bungiu (Matéu 4:1-11; Lúkasi 4:1-13).

Ka san uma layanuha Hesusu oura ligía? Luma san katei wuribati le múnadabei lun? Uá. Ariñagatu  Bíbülia mafigouhan lan íbini súfuri lan óuchawaguni libe le wásügürübei uguñe weyu (Ebüréu 4:15). Ítara liña, “madügünti Kristu ni aban figóu, meyeehan ligía ni aban wéiyaasu” (1 Féduru 2:22). Siñati meha layanuhaña lan Hesusu luma wuribani le múnadabei lun lugundun úati meha wuribani lidan, mafigounti ani súnwandan meha úaragua lan lun Bungiu. Ligíati, chóuruti meha layanuhaña lan luma aban gürigia kei ligía.

Lidan sun yanu ligía, anihein amu burí fánreinti le arufudubalin anihein lan Mafia:

  • Haritagua huméi ariñaga lan Mafia lun Hesusu líchugubei lan sun arúeihani le ubouagubei lun anhein áhuduragua lun (Matéu 4:8, 9). Lun hamuga mama lan aban sífiri inarüniti Mafia, mébunabei hamuga katei le. Ani mariñagunti Hesusu mabafu lan Mafia.

  • Lárigiñebei lásurun layanuhan Mafia luma Hesusu, “aba lígiruni lungua luagu átiri dan” (Lúkasi 4:13). Siñabei ladügüni aban sínbolu lánina wuribani katei le, luéidigia aban gürigia inarüniti.

  • Ariñagati Matéu 4:11 aba lan meha “hayabin ánheligu” lun híchugun dǘgüdaguaü lun Hesusu luma lun híderaguni. Chóuruti inarünitiña lan ánheligu hagía. Kábati uagu wasaminara luagu ua lan Mafia?

DAN LE LAYANUHANBEI LUMA BUNGIU

Guentó ariha waméi abahüdaguni luáguti aban lubúein Bungiu gíriti Hobu. Ayanuhóuati ñein luagu layanuhan Bungiu luma Mafia bián wéiyaasu. Lidan biángubei, ayanuhati Bungiu luagu úaraguni le larufudubei lubúein. Aba lóunabun Mafia kamá hamuga subuditi Hobu lun buidu. Aba lariñagun lun Bungiu luagu seriwi lan Hobu lun luágurügü katei le libihibei lúmagiñe, ani aba lariñagun agañeinharügü lani Bungiu húaragun gürigia. Ábati lígirun Heowá lun lagidaruni Mafia sun lúmati Hobu luéi: lirisin, lisaanigu luma lubuidun látuadi. * Lagumuhóun oura, rédeiti furangu luagu ye lan Mafia, ani ruti Bungiu lafayeiruaha Hobu luagu lawandun (Hobu 1:6-12; 2:1-7).

Layanuhaña meha san Heowá luma wuribani le múnadabei lun? Uá, lugundun ariñagatu Bíbülia luagu Bungiu “úaraguati [lan] lémeri” (2 Samueli 22:31). Ani ariñagatu giñe: “Sandu, sandu, sandu, Wabureme Bungiu, le Suntigabafu” (Arufudúni 4:8). Dimurei sandu mini lan aban katei sagüráuti, harumati, mafigounti. Ligíati, anhein sandu lubéi Heowá, siñati aniheinbei lan charati luagu ani siñati giñe ñein lan wuribani lidan.

Adügati meha liyanun Mafia luma Bungiu aban efekütu lidan libagari Hobu

Gama lumoun, añahein saminatiña luagu úati lan meha aban wügüri gíriti Hobu ani luagu ábanrügü lan úraga abahüdaguni le luáguti libagari. Inarüni san katei le? Uá. Lidan amu burí fánreinti tídangiñeti Bíbülia, ariñawagúati luagu winwan lan meha Hobu, kéiburi lidan Santiagu 5:7-11, yúsuati Hobu kei hénpulu lun híderawagun kristiánugu lun hakipurun úaraguni lidan lidaani óuchawaguni ani lun lachoururún houn labinirubaña lan Heowá luagu hawandun. Lun hamuga mama lan inarüni winwan lan Hobu ani hóuchagua lani Satanási, meseriwínti hamuga bérusu burí le. Luagu amu oubaü, lidan Esekiéli 14:14, 20 ayanuhóuati hawagu ǘrüwa wügüriña úaraguatiña. Danieli luma Noé bián hádangiñe, inarünitiña meha bián gürigia ha. Hobu hǘrüwan; ligía gayara lubéi wasaminarun winwan lan meha giñe. Ani anhein winwan lubéi, chóuruti winwan lan giñe le adügübei saragu wuribani lun.

Lau sun ariñahani le tídanbei Bíbülia, chóuruti luagu anihein lan Mafia. Ligía gayara lubéi wálügüdagun woungua: “Gayarati san ladügün dañu nun luma houn niduheñu?”.

KA SAN LADÜGÜBEI MAFIA?

Samina humá aba lan hachülürün fiú wuribatiña lidan uburugu le ñein lubéi hawinwanda. Kaba asusereda? Úabei hamuga saragu ichouruni ani aba hamuga heferidiruni gürigia lubuidun hagaburi. Guentó samina humá lun hamuga anihein lan Mafia waganagua hau sun lumafianu, ánheligu ha meha ebedaagubaña lun Bungiu ani falá haméi Mafia. Kaba hamuga asusereda? Lun wóunabun, samina wamá luagu le waganbubei lidan ñunsu.

  • Ma inarüni hanarime lan lawanserun wuribani lau sun lueirin áfaaguni le adügǘbei lun lararamúniwa?

  • Rutün san fe luagu gagana lan isebáhari le uguñebei weyu saragu katei le hani máfianu íbini weiri lan hadiheri saragu agübürigu?

  • Ariha humaali san le gádanbalin Ubóu íbini ladügǘña lan saragu katei lun lounigirúniwa?

  •   Menegeti san hun ítara liña lan katei kamá hamuga anihein aban erei le anügübalin ubóu lidoun günringuaü?

Arufuda tumuti Bíbülia anihein lan somubadi lanagangiñe sun turóbuli le, ariñaga tumuti giñe woun katei lan: “Aba lubeiti lasagarún óunwenbu düragón siélugiñe, le binadu hewe ligira le gíribei Mafia, o Satanási, le eyeehabalin sun ubóu. Ligía hau sun lani ánheligu, aba hachagarún múarugun [...]. Fugiabugu ha aganóubaña ubouagu luma baranaha! Lugundun ñǘdünha Mafia humoun lau óunwenbu igañi, ladüga subudi lumuti luagu murusunrügaali lan lidaani” (Arufudúni 12:9, 12). Lárigiñe hakutihani besafu gürigia ligaburi léibugun katei ubouagu, aba hasubudiruni houngua luagu Mafia lan agumadihabei ubouagu, aban ánheli peliguruti.

Garichati lubeiti busén wamá wóunigiragun woungua luéi aban gürigia ítarati. Ida luba san gayara lan wadügüni? Warihibei lidan le aban arütíkulu.

^ par. 12 Ariñagatu Bíbülia Heowá lan líribei Bungiu.