Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2015

Aban Bíbülia to achülürüboun tidoun hanigi gürigia

Aban Bíbülia to achülürüboun tidoun hanigi gürigia

“Wínwantu Lererun Bungiu.” (EBÜRÉU 4:12)

UREMU 37 LUMA 43

1. a) Ka wadagimanu líchugubei Heowá lun Adán? b) Ka un wayusurei wagía lubúeingu Bungiu ubafu le wawagubei lun wayanuhan?

ADÜGA lumutiwa Heowá lau ubafu lun wayanuhan. Lidan Paraísu ariñagati lun Adán lun líchugun hiri sun animaalugu. Ani yusu lumuti Adán ubafu ligía lun lanúadirun aban iri lun kada animaalu (Agumesehani 2:19, 20). Lúmagiñe dan ligía yusu wamaali wagía lubúeingu Bungiu ubafu ligía lun walawahani Heowá luma lun wayanuhan luagu houn amu. Uguñe weyu yusu wamaali ubafu le lun wásügüragüdünu Bíbülia luma lun wíderaguniña amu gürigia lun hasubudiruni Heowá.

2. a) Ka ǘrüwa katei hagunfulirubei ha ásügüragüdübarun Traducción del Nuevo Mundo? b) Kaba wariha lidan arütíkulu le?

2 Sügügüdawaaru saragu Bíbülia, ani anuhein fiú tídangiñe buítimati ligaburi tásügüragüdüni ariñahani sügǘ tau amu. Íbirigu ha adügübarun Traducción del Nuevo Mundo busentiña meha hadügün aban wadagimanu le buiti. Ligía aba lubéi desidírü hamá hagunfulirun lau 3 katei. Furumiñe, híchugun uéiriguni lun liri Bungiu luma lun habürüdüni iri ligía saragu wéiyaasu, ítara kei láfuachun lidan furumiñeti abürüdǘni  (aliiha huméi Matéu 6:9). Libiaman, hásügüragüdüni ariñahani dimurei luagu dimurei sagü gayara lan. Ani dan le siñá lan, hásügüragüdüni le mini lubéi. Ani le lǘrüwan, hayusurun dimurei le ménrengunti lun laliihóun luma lun gunfurandawa lan (aliiha huméi Neemíasi 8:8, 12). * Gúnfulihadiwa wagía gefentiña luagu Heowá lau 3 katei le lidan lóurate wásügüragüdünu Bíbülia lidan lóugiñe 130 iñeñein. Lidan arütíkulu le warihibei ida liña lan wafalaruni adundehani burí le dan le techekürünwabei Traducción del Nuevo Mundo to áfuriduboun lidan irumu 2013 lidan inglesi. Warihibei giñe ida liña lan hadügüni ha ásügüragüdübarun Traducción del Nuevo Mundo lidoun amu burí iñeñein.

ABAN BÍBÜLIA TO ÍCHUGUBOUN UÉIRIGUNI LUN LIRI BUNGIU

3, 4. a) Halía ladarirúa liri Bungiu lidan ebüréu? b) Ka adüga hamaalibei saragu ásügüragüdütiña Bíbülia lau liri Bungiu?

3 Lidan ebüréu abürühóuati liri Bungiu lidan gádürü létüra. Anihein iri le lidan saragu binadu kopia lánina Lererun Bungiu lidan iñeñein ebüréu, kéiburi tidan fiú dugumedu to adarirúboun yarafa lun barana Hilaali. Anihein giñe iri ligía lidan fiú kopia tani Septuaginta le adügǘbei labadinagua irumu 200 lubaragiñe Kristu luma irumu 100 lárigiñe Kristu. Añahein gürigia aba taweiridun hanigi dan le harihini anihein lan liri Bungiu saragu wéiyaasu lidan binadu abürüdǘni.

Añahein gürigia aba taweiridun hanigi dan le harihini anihein lan liri Bungiu saragu wéiyaasu lidan binadu abürüdǘni

4 Furanguti mosu lan ñein lan liri Bungiu tidan Bíbülia. gama lumoun, sagawaali tídangiñe saragu Bíbülia. Kei hénpulu, lidan irumu 1901 aba táfuridun Bíbülia American Standard Version. Anihein meha liri Bungiu tidan. Lidan irumu 1950 aba táfuridun Traducción del Nuevo Mundo de las Escrituras Griegas Cristianas lidan inglesi, anihein meha giñe liri Bungiu tidan. Lidan irumu 1952 furitu aban Bíbülia American Standard Version to cheküwaaru. Úaali meha liri Bungiu tidan. Ka uagu? Ladüga genegeti meha houn ásügüragüdütiña luagu mabuidun lan layusurúniwa. Gidawaali giñe tídangiñe burí saragu Bíbülia lidan inglesi luma lidan amu burí iñeñein.

5. Ka uagu súdini lubéi lun ñein lan liri Bungiu tidan Bíbülia?

5 Dan le lásügüragüdünu aban gürigia somu líburu lidoun amu iñeñein, mosu lasubudiruni ka lan labusenrubei le abürüdübarun líburu tuguya lun gabaroun lani danme lásügüragüdünu. Heowá abürüdagüdübarun Bíbülia. Arufuda lumuti saragu bérusu tídangiñeti Bíbülia ariha lani Heowá liri keisi aban katei súdiniti ani busén lan lun hasubudiruni gürigia liri ani inebe ligíame houn (Áfuriduni 3:15; Sálumu 83:18; 148:13; Isaíasi 42:8; 43:10; Huan 17:6, 26; Adügaü 15:14TNM). Ligía súdini lubéi lun ñein lan liri Bungiu tidan  Bíbülia. Adügati Heowá lun láfuachun liri saragu milu wéiyaasu lidan binadu abürüdǘni (aliiha huméi Esekiéli 38:23). Dan le hásügüragüdünu gürigia Bíbülia lidoun amu iñeñein ani aba hagidaruni liri Bungiu tídangiñe, harufuduña menebenehabuni lun Heowá.

6. Ka uagu lichugúa liri Bungiu sisi wéiyaasu lanwoun tidan Traducción del Nuevo Mundo to áfuriduboun lidan irumu 2013?

6 Mosu ñein lan liri Bungiu tidan Bíbülia ani guentó gíbetimahali katei le arufudubalin. Tidan Traducción del Nuevo Mundo to áfuriduboun lidan irumu 2013 lidan inglesi fuati liri Bungiu 7,216 wéiyaasu, mini lan le, furí lan sisi wéiyaasu lanwoun le áfuridubei tidan to tubaragiñeboun. Lidan 1 Samueli láfurida seingü lídangiñe sisi wéiyaasu ligía. Ka uagu? Ladüga dariwa lan liri Bungiu lidan bérusu burí le tidan hóuburatu to adarirúboun yarafa lun barana Hilaali to ichugúboun mameme binarü lun harihinu sun gürigia. * (Aliiha huméi furumiñeti abürüdǘni.) Tidan líburu Alidihatiña lichugúa liri Bungiu lisisin wéiyaasu. Lárigiñe takutihóun saragu abürüdǘni to binaduharu ani to gayaraati lafiñerúniwa tuagu ligíali lichugún. * (Aliiha huméi libiaman abürüdǘni.)

7, 8. Ka mini lubéi liri Heowá?

7 Súdiniti houn kristiánugu ha inarünitiña hasubudiruni ka lan mini lubéi liri Bungiu. Mini lan iri le “Ligía Adügübei lun Lasuseredun”. * (Aliiha huméi lǘrüwan abürüdǘni.) Luagu meha aban dan afuranguagüda tumuti wani agumeiraguagüdüni le mini lubéi iri le lau le lariñagubei Áfuriduni 3:14, le ariñagubei lidan abürüdǘni ǘnabu: “Nadügübei le nabusenrun”. Afuranguagüda tumuti Traducción del Nuevo Mundo to áfuriduboun lidan irumu 1984 lidan inglesi ladügübei lan Heowá le labuserunbei lun lagunfuliruni le füramase lubéi. * Gama lumoun afuranguagüdatu giñe Bíbülia to áfuriduboun lidan irumu 2013 mamarügüñein lan ligía mini lan liri Bungiu, ariñagatu:“Mini lan giñe gayara lan ladügün lun hadügüni ánheligu, gürigia, animaalugu luma sun katei le adüga láalibei sun le mégeiwabei lun lagunfulirun lisuuni”. (Ariha humóun giñe garüdia Adundehani lun taturiahóun Lererun Bungiu, páhina 5.)

8 Ida liña layusuruni Heowá katei burí le ladügübei lun lagunfuliruni lugundan? Adügati Heowá lun ladügün Noé aban árüka luma lun aban lan nadagimeinti buiti Besaléli. Adügati giñe lun aban lan gawuribuhati Hedeón ani adügati giñe lun ábanbei lan misioneru ganigiti Pábulu. Wéiriti lisudinin le mini lubéi liri Bungiu houn lubúeingu. Ligía híchugunbalin íbirigu ha awadigimaridubaña tidan Traducción del Nuevo Mundo liri Bungiu lidan lilugaarun.

9. Ka uagu busén lubéi musu úaraguati lun tásügürawagüdün Bíbülia lidoun saragu iñeñein?

9 Eibu dan gíbetimaharu Bíbülia to ídangiñeboun lasagarúa liri Bungiu. Ani lidan lilugaarun aba híchugun “Aburemei” ñein o liri somu bungiu le subudiwati hadan hagürigian. Ligía busén lubéi musu úaraguati lun ñein tan aban Bíbülia hama gürigia lidan hererun to íchugutu uéiriguni lun liri Bungiu  (aliiha huméi Malakíasi 3:16). Darí guentó rúharu Traducción del Nuevo Mundo uéiriguni lun liri Bungiu lidan lóugiñe 130 iñeñein.

BÍBÜLIA TO MÉNRENGUNTI GUNFURANDAWA TAN

10, 11. Ka burí lénrengunga úmabei hagagibudagua ha ásügüragüdübalun Traducción del Nuevo Mundo lidoun amu iñeñein?

10 Dúnguatiña ha ásügüragüdübarun Traducción del Nuevo Mundo lídangiñe inglesi lidoun amu burí iñeñein luma saragu turóbuli. Kéiburi lidan Apurichihati 9:10 luma lidan amu burí bérusu, tidan Traducción del Nuevo Mundo to lánina irumu 1984 lidan inglesi yúsuati dimurei ebüréu Seol. Yúsuati giñe tidan amu burí Bíbülia. Gama lumoun lidan saragu iñeñein, úati dimurei le tidan ni aban dimurei-agei ani ibidiñewati giñe. Ani gíbetiña gürigia saminatiña anihein lan Seol lidan somu fulasu ubouagu. Ligía lichugúnwabei üma lun lásügürawagüdün dimurei ebüréu Seol luma dimurei güriegu Hades kei “Umúahaü”. Buiti dimurei le ani ménrengunti giñe lun gunfurandawa lan.

11 Dimurei ebüréu luma güriegu le ásügürawagüdübei kei “uani” hénrenguti giñe lásügürawagüdün lidoun fiu iñeñein. Lidan iñeñein burí le, adügati dimurei uani lun lasaminarúniwa luagun aban katei le áfuridubei lídangiñe hágubu gürigia dan le hóunwegun o luagun aban úfioun. Lun úa lan turóbuli lau dimurei le, rúwati üma lun lásügürawagüdüniwa dimurei uani lidan ámuñegueinarügü igaburi, según halía lan láfuachun dimurei ligía. Lidan lanwoun ariñahani 4A tidan Biblia con referencias afuranguagüdawati ida liña ámuñegueinarügü  lan layusurún dimurei uani tidan Bíbülia. Lun gayara lan gunfurandawa lan bérusu lau lumenrengun, anihein ariñahani luagu dimurei ebüréu luma güriegu lidan abürüdǘni le ǘnabubei lun páhina tidan iseri Bíbülia lidan inglesi.

Íbirigu ha echekürübarun Bíbülia lidan inglesi aturiaha hamuti saragu álügüdahani le hóunahabei ásügüragüdütiña ha lídanbaña sun ubóu

12. Ka amu asansiruni adügǘbei tidan Bíbülia to áfuriduboun lidan irumu 2013? (Ariha huméi giñe arütíkulu “La revisión del 2013 de la Traducción del Nuevo Mundo en inglés” tidan garüdia lidan chumagü.)

12 Álügüdahani burí le hadügübei ha ásügüragüdübarun Bíbülia lidoun amu iñeñein arufudati anihein lan fánreinti tidan Bíbülia lidan inglesi le gayarabei gunfurandawa lan wuriba. Ligía aba lubéi desidírü lan musu úaraguati lidan nefu-hati irumu 2007 lun techekürǘn Traducción del Nuevo Mundo lidan inglesi. Íbirigu ha echekürübarun aturiaha hamuti saragu álügüdahani le hóunahabei ásügüragüdütiña ha lídanbaña sun ubóu. Sansi hamuti dimurei le binadu luagu le ayanuhóubei uguñe weyu. Áfaaguatiña lun ligiaméme lan gunfurandawa lan dimurei ani lau lumenrengun. Kei le aubei warihei, wadagimanu le hadügübei ásügüragüdütiña lidoun amu iñeñein lidan lagumuhóun irumu burí le ídehati lun buídutima tan Bíbülia lidan inglesi (Ariñawagúni 27:17).

GÚNDAATIÑA ÍBIRIGU

13. Ida liña hasandiragun ha aliihabarun Bíbülia to áfuriduboun lidan irumu 2013 lidan inglesi houngua?

13 Ida liña hasandiragun íbirigu houngua lárigiñe heresibirunu Traducción del Nuevo Mundo lidan inglesi? Óunahaaña saragu hádangiñe gárada lánina eteingiruni tidoun Beteli Brooklyn (Nueva York). Ariñagatu aban íbiri ítara tiña lan Bíbülia kei aban bágüsi to buinboun lau dübü buíduburiti, lererun lan Bungiu tídanbei. Ménrengunti taliihóun luma gunfurandawa tan Bíbülia to tun. Dan le taliihanu sandiguatu tungua kamá taríaguñein lubuidun burí dübü ligía. Dimurei ménrengunti le ayusurúbei tidan Bíbülia to íderagua laaru íbiri to lun tasubudiruni Bungiu buidu. Dan le taliihanu, ariha tumuti Heowá kei aban úguchili le óubura lumutiña lisaanigu ani ayanuha ligía houn lau ínsiñehabuni.

14, 15. Ida liña hasandiragun íbirigu ha gámabarun Traducción del Nuevo Mundo lidan hañeñe houngua?

14 Íbirigu ha mayanuhanbaña inglesi gúndaatiña luagu anuheinharu lan Traducción  del Nuevo Mundo lidan hañeñe. Ariñagati aban gürigia derebuguhali bulgariana barühali lan saragu irumu aliihoun Bíbülia, gama lumoun maliihañahagili lan aban Bíbülia to ménrengunti gunfurandawa tan ani to ánhingichubarun anigi kei to. Ariñagatu giñe aban íbiri to awinwanduboun Albania buidu lan laganbún taliihóun Bíbülia lidan iñeñein le. Ani ariñagatu giñe: “Ma lubuidun chansi waganbuni Heowá ayanuha lidan wañeñe”.

15 Lidan saragu ageiraü mama sun gürigia lun gabibülian hamá, ladüga sérutu o hénrengu lan tadarirún. Kei hénpulu, saragu gürigia ha aturiahabarun Bíbülia Ruanda, hama gefentiña luagu Heowá mawanseruntiña meha ladüga mabibülian hamá. Lugundun to talugurahaboun ligilisi to yarafaboun houn sérutu ani hénrenguti gunfurandawa tan. Dan le táfuridunbei Traducción del Nuevo Mundo lidan hañeñe, aba híchugun fiú iduheñu eteingiruni lun Heowá luma lun musu úaraguati. Ladüga siñati meha hagañeihan aban Bíbülia lun kada aban, ani guentó anuheinharu aban luma kada aban. Lun harufuduni heteingiradi lun Heowá, aliiha hamutu úara sagü weyu.

16, 17. a) Ka labuserunbei Heowá woun? b) Kaba wadüga?

16 Táfuriduba iseri Bíbülia to echekürüwaboun lidan amu burí iñeñein ámuñegü. Mabusenrunti Satanási lun táfuridun, ánheinti Heowá busenti lun haliihani sun lubúeingu uganu le tídanbei lidan aban iñeñein furanguti le ménrengunti gunfurandawa lan (aliiha huméi Isaíasi 30:21). Yarafa madise labuinchuba “sun fulasu lau lasubudirúniwa luéirigun Wabureme” (Isaíasi 11:9).

17 Yusu waméi sun idewesei le líchugubei Heowá woun, kei iseri Bíbülia to to íchuguboun uéiriguni lun liri. Aganba waméi sun le lariñagubei woun sagü weyu tidan Bíbülia. Ani laganbubei wafurieidun súnwandan. Anhein wadüga ítara, wasubudirubei buidu ani hínsiñetimabei woun (Huan 17:3).

“Ma lueirin chansi waganbuni Heowá ayanuha woun lidan wañeñe!”

^ par. 2 Ariha huméi arütíkulu “Cómo escoger una buena traducción de la Biblia”, tidan garüdia La Atalaya to lánina 1 lidan seingü-hati, irumu 2008. Ariha huméi giñe lanwoun ariñahani A1 le tídanbei Traducción del Nuevo Mundo to áfuriduboun lidan irumu 2013 lidan inglesi.

^ par. 6 Bürüwatu binadu abürüdǘni to adarirúboun yarafa lun barana Hilaali lóugiñe milu irumu lubaragiñe tadügǘn abürüdǘni ebüréu to ayusurúboun lun tadügǘn Traducción del Nuevo Mundo.

^ par. 6 Fidiwati liri Bungiu lidan 1 Samueli 2:25, 6:3, 10:26 luma 23:14, 16, luma giñe tidan haliburun Alidihatiña 19:18.

^ par. 7 Afuranguagüda hamuti fiú sásaamu ítara, íbini mama lan súngubei.

^ par. 7 Ariha huméi lanwoun ariñahani 1A tidan Biblia con referencias, páhina 1559, le gíribei “El nombre divino en las Escrituras Hebreas”.