Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2015

Gabafutu iñeñein: yusu humóun buidu

Gabafutu iñeñein: yusu humóun buidu

“Buidulá nererun [...] ligibugiñe bagu.” (SÁLUMU 19:14)

UREMU 21 LUMA 35

1, 2. Ka uagu tariñaga Bíbülia ítara tiña lan wañeñe kei watu gemeti?

LIDAN irumu 1871 aba lágudun aban óunwenbu dabíara Meriga. Lidan murusun oura aba lágudun 2,000 míñunu tídibu wewe ani hilatiña hóugiñe 1,200 gürigia. Ka adügübei lun lágudun? Genegeti ladüga lan igemeri le tígiragüdübei íngiini to ásügürüboun lídangiñe dabíara. Haritaguagüda lumutiwa le luagun dimurei le lariñagubei Santiagu 3:5: “Lau murusun watu gemeti, gayaraati lágudun aban óunwenbu áraabu”. Ka uagu lariñagei Santiagu dimurei le?

2 Ariñagati Santiagu: “Ítara tiña wañeñe kei aban watu gemeti” (Santiagu 3:6). Lidan bérusu le mini tan iñeñein ubafu le wawagubei lun wayanuhan. Ítara kei gayara lan ladügün watu gemeti saragu damichi, gayarati giñe ladügün le wariñagubei dañu houn amu. Mini lan san le moun lumuti lan wariñagun ni kata? Uá. Ma mígirun wamuti wayusuruni watu ladügarügü gayara lan ladügün dañu houn amu? Le wadügübei aba wachoururuni lun madügün lan damichi. Kei hénpulu, gayarati wayusuruni lun wábougun, lun wabacharagun luma lun líchugun leiti woun. Ítarameme, arufudahatu Bíbülia gayara lan ladügün le wariñagubei saragu damichi  o saragu buiti (Ariñawagúni 18:21). Ligía lunti lubéi wachoururuni buidu wayusuruñein lan ubafu lun wayanuhan lau aban igaburi le buiti. Gayarati wayusuruni lun wíchugun uéiriguni lun Heowá luma lun wíderaguniña amu (Sálumu 19:14).

3. Anhein busén wabéi wíchugun gurasu houn amu, ka lunbei wasubudiruni?

3 Ruti Heowá ubafu woun lun wasubudiragüdüni le wasandirubei luma le wasaminarubei, dandu lau dimurei ítara kei lau seini. Ida luba gayara lan wayusuruni idewesei le lun wíchugun gurasu hou amu? (Aliiha huméi Santiagu 3:9, 10.) Mégeitiwa wasubudiruni ídaba lan wayanuha, kaba lan wariñaga ani ida luba lan wariñaguni.

LIDAANI AYANUHANI

4. Ka dan moun lumuti lan wayanuhan?

4 Ayanuhatu Bíbülia luagu “lidaani ámanichuni” (Apurichihati 3:7). Mini lan le anihein lan dan moun lumuti lan wariñagun ni kata. Kéiburi dan le layanuhan aban gürigia, réideitiwa maniñu lun warufudun inebesei lun lau waganbuni le lariñagubei (Hobu 6:24). Dan le wíchugun fe anihein lan katei le moun lumuti hasubudiruni amu, moun lumuti wariñaguni ni ka un (Ariñawagúni 20:19). Ani dan le hariñagun amu katei le gáriti woun, mosu wakipurun darangilaü ani moun lumuti wariñagun ni kata (Sálumu 4:4).

5. Ida liña warufuduni lun Heowá seremei wamuti lan luagu ubafu le líchugubei woun lun wayanuhan?

5 Inarüni anihein lan dan lunti lan wayanuhan (Apurichihati 3:7). Gayarati wayanuhan dan le walawahani Heowá, wíchugun gurasu houn amu o dan le wariñaguni le wasandirubei luma le wemegeirubei (Sálumu 51:15). Ani ítara, warufudubei lun Heowá seremei wamani luagu líchuguni ubafu woun lun wayanuhan. Dan le ledewehan aban umadaü aban idewesei gebegiti woun busenbadiwa wayusuruni buidu.

6. Ka uagu súdini lubéi wanúadiruni dan lun wayanuhan?

6 Ka uagu súdini lubéi wasubudiruni ídaba lan wayanuha? Ariñagati Ariñawagúni 25:11 ítara liña lan dimurei buiti le ariñawagúbei lidan dan kei mansana lautu golu lidan aban ágeidinaü lauti pülata. Ka mini lubéi le? Buídumeraütu lan mansana lautu golu, ani anhoun wíchiga lidan aban ágeidinaü lauti pülata, buídutimabei tariawagún. Ítarameme, háfuga anihein dimurei buiti lunti wariñaguni lun somu gürigia. Gama lumoun anhein wanúadira dan lun wariñaguni, buídutimabei lani resultóu. Ariha wamá aban sügǘ le arufudubalin.

7, 8. Ida liña meha hasigiruni íbirigu haponna lani Hesusu hénpulu?

7 Ánhawa ayanuha dan le moun lumuti lan wadügüni, háfuga úabei gunfuranda hamaniwa gürigia o máhabaña lan lun le wariñagubei (aliiha huméi Ariñawagúni 15:23). Kei hénpulu, lidan ǘrüwa-hati irumu 2011 aba lagünrinchaguni hárabaganali luma aban durumandei saragu uburugu lidan ageiraü Hapón. Hilatiña hóugiñe 15,000 gürigia. Hilatiña giñe haduheñu saragu íbirigu, gama lumoun busentiña meha híderaguniña habesinanigu lau uganu le tídanbei Bíbülia. Gama lumoun, aba desidírü hamá mayanuhan hamá houn luagu águyuguni lidan dan ligía. Ka uagu? Lugundun lidan fulasu ligía afiñetiña saragu gürigia luagu Buda -aban bungiu mama inarüniti- ani míbeti hasubudin tuagu Bíbülia. Ligía aba lubéi desidírü hamá íbirigu híchugun gurasu houn lau hafuranguagüdüni houn ka lan uagu lasusereda saragu wuribani ubouagu.

8 Subudi lumuti meha Hesusu ídaba lan layanuha ani ídaba lan leredera maniñu (Huan  18:33-37; 19:8-11). Kei hénpulu, aguraba lumuti lidaani larufudahan fiú katei houn lani disipulugu (Huan 16:12). Sigí hamuti íbirigu haponna lani Hesusu hénpulu, ani aba hanúadiruni lidaani hayanuhan houn gürigia luagu águyuguni. Bián irumu lárigiñe durumandei, aba híchugunu tratadu to gíriboun Gayarati funa san habagaridunya gürigia ha hilaguaañabaña? Saragu hádangiñe ánhatiña tun, ani sanditiña awalidaguni lau uganu le tídanbei. Mosu giñe wasaminarun luagun hechun gürigia luma luagun ligaburi hawinwandun. Ítara luba wasubudiruni lidaani wayanuhan houn.

Lunti gagurabaguadi wamá, ani áluaha wameime dan le buídutimabei houn lun haganbuniwa

9. Ka amu dan lunbei wagurabahan lun wayanuhan?

9 Ka burí amu sügǘ ídanbei mosu lan wagurabahan lubá wayanuhan? Dan le hariñagun gürigia somu katei le gáriti woun. Ánhawa óunaba lau lóufudagun, gayarabei wariñagun somu katei le mabuidunti ani ábame wasakürihan lárigiñe. Ligíati, furumiñe álügüdagua wamá woungua: “Wéiriti san le ladügübei nun darí lun siñá lan násügüragüdüni?”. Anhein manarime lubéi lisudinin, gayarabei mariñagun wamá ni kata. Gama lumoun anhein genege lubéi mosu lan wayanuha luma gürigia ligía, lunti wagurabahan darangilu wamá (aliiha huméi Ariñawagúni 15:28). Mosu giñe wagurabahan lubá wayanuhan hama waduheñu ha mama Gefentiña lun wínchahaniña lun hafurendeirun luagu Heowá. Lubaragiñe wayanuhan houn, lunti gagurabaguadi wamá, samina wagíame buidu luagu le lunbei wariñaguni ani aluaha wameime dan le buídutimabei houn lun haganbuniwa.

LE LUNBEI WARIÑAGUNI

10. a) Ka uagu mosu lubéi wasaminarun buidu lubaragiñe wariñagun somu katei? b) Ka katei moun lumuti wadügüni dan le wayanuhan?

10 Gayarati ladügün le wariñagubei lun buidu lan hasandiragun amu houngua o lun wuriba lan hasandiragun houngua. Ligía mosu lubéi wasaminaruni buidu kaba lan wariñaga (aliiha huméi Ariñawagúni 12:18). Wuribatiña saragu gürigia ani yúsutiña dimurei gáriti le adügüti dañu kamá aban eféin o aban gimara (Sálumu 64:3). Furendei hamuti ayanuhani lira lídangiñe haríagun bigibigitu o pelikula. Ánhañati kristiánugu inarünitiña mayanuhatiwa ítara ni lidan siñagei. Maribanti lariñawagún dimurei le adügübei lun wéherahan ani gayarati ladügün lun buídutima lan laganbún yanu. Gama lumoun, moun lumuti wariñagun dimurei le gayarabei ladügün lun hasandiragun amu houngua wuriba o wadügün bula hau lúnrügü héherahan amu hau. Ariñagatu Bíbülia mabuidun lan wayanuhan bulagiadi, lunti wayanuhan katei le íchuguti gurasu houn gürigia (Éfesuna 4:29, 31).

11. Kaba íderaguawa lun wíchugun gurasu lau le wariñagubei?

11 Ariñagati Hesusu: “Katei le buinbei tidan anigi, ligía lariñagubei iyumaü” (Matéu 12:34). Mini lan le, le lan tídanbei wanigi ligíaba áfurida wayumulugugiñe. Anhein anihein lubéi ínsiñeni le inarüniti tidan wanigi hawagu amu gürigia, wayusuruba dimurei le íchugubei gurasu súnwandan.

12. Ka amu katei gayarabei líderaguniwa lun wanúadiruni le lunbei wariñaguni houn amu gürigia?

 12 Chuti meha lau urúei Salomón, gama lumoun mosu meha lasaminarun saragu lun labürühan dimurei buíduburiti (Apurichihati 12:9, 10). Arufudahati le woun mosu lan wáfaagun lun wadarirun lubuidun dimurei lun wayanuhan. Kaba íderaguawa adarirei dimurei burí ligía? Gayarati wafurendeirun iseri dimurei lau waliihanu Bíbülia tuma wani agumeiraguagüdüni. Ani anhein ibidiñe lubéi le mini lubéi somu dimurei woun, gayarati wáluahani lila tidan aban dimurei-agei. Gayarati giñe wetenirun lun le meha ladügübei Hesusu. Ariñagati arufudaha lan Heowá lun lun lariñagun dimurei le lánina gurasu houn gürigia ha asufurirubaña (Isaíasi 50:4). Mosu giñe wasaminarun kaba lan lani le wariñagubei efekütu hawagu amu (Santiagu 1:19). Gayarati wálügüdagun woungua: “Ánhana ariñaga somu katei, kaba hasaminara amu gürigia? Ani ida luba hasandiragun houngua?”.

13. Ka uagu mosu lubéi wáfaagun lun gunfuranda hamani amu le wariñagubei?

13 Mosu ménrengun lan ligaburi wayanuhan lun gunfuranda hamani ha híbiri. Lun warihini ka lan uagu, ariha waméi hénpulu le: yúsutiña meha ísüraelina fidu lun hóunahan seini houn amu. Seriwiti meha aban lídangiñe lun hóundaragun sun gürigia lidan somu fulasu. Anihein meha amu seini lun houdin súdaragu awuribuha. Ani anhein úa gunfuranda hamani súdaragu seini burí ligía, gayarati meha hayuridagun. Susereti aban katei ítarati dan le amu lan ligaburi wayanuhan. Ariñagatu Bíbülia mosu lan wayanuhan lidan aban igaburi sensiyuti lun gunfuranda hamani amu. Anhein madügün wamá ítara, wadügüba lun hayuridagun amu o lun ua lan gunfuranda hamaniwa. Íbini gunfuranda hamani amu le wariñagubei, lunti wóunigiruni lun madügün lan dañu ani lun marufudun wamá minebenehabuni houn amu (aliiha huméi 1 Korintuna 14:8, 9).

14. Ka hénpulu arufudubalin hínsiñe lan meha lun Hesusu layanuhan lidan aban igaburi sensiyuti?

14 Sensiyuti meha ligaburi layanuhan Hesusu. Samina wamá luagun yanu le wadeirubei lidan Matéu kapítulu 5 darí kapítulu 7. Mayusuruti dimurei burí le hénrenguti lun taweiridun hanigi gürigia. Madügünti giñe lun hasandiragun gürigia houngua wuriba. Afuranguagüdati saragu katei súdiniti lau dimurei sensiyuti. Kei hénpulu, arufudahati lidan yanu ligía houn lani disipulugu moun lumuti lan hadiheridun luagu kaba lan heiga kada weyu. Lun haritaguni arufudahani ligía ariñagati houn lun lan harihini ida liña lan léigagüdüniña Heowá dunuru. Lárigiñe, aba lálügüdüniña: “Ma funagia gebegitimatün sügǘ hau dunuru?” (Matéu 6:26). Lau dimurei sensiyuti ligía ruti dǘgüdaguaü houn ani arufudaha ligía aban leksióun súdiniti houn.

IDA LUBA WAYANUHAN

15. Ka uagu mosu lubéi warufudun ínsiñehabuni lau ligaburi wayanuhan?

15 Kei le aubei warihei, mosu wasaminarun buidu kaba lan wariñaga. Gama lumoun mosu giñe wasaminarun ida luba lan wariñaguni. Hínsiñeti meha houn gürigia haganbuni Hesusu lugundun ayanuhati meha lau ínsiñeni (Lúkasi 4:22). Ánhawa ayanuha lau ínsiñeni, busenbaña gürigia haganbuniwa ani hánharuba lun le wariñagubei (Ariñawagúni 25:15). Kaba íderaguawa lun wayanuhan lau ínsiñeni? Wasaminarun luagun le hasandirubei amu luma lun inebe hamá woun. Ligía meha ladügübei Hesusu. Kei hénpulu, dan le larihinbei Hesusu bandi gürigia ha adügübalin sun hayaraati  lun hadeiruni luma lun haganbuni, lau sun lugundan díreiti dan lun larufudahan saragu katei houn (Márükosu 6:34). Dan le hanabunbalin gürigia, móunabun lumutiña lau ligiaméme (1 Féduru 2:23).

16, 17. a) Ida luba wáyeihani Hesusu dan le wayanuhan hama waduheñu luma hama wamadagu? (Ariha humóun iyawaü to lídanboun lagumeseha arütíkulu.) b) Ka tibihibei aban úguchuru ladüga tayanuhan lau ínsiñehabuni?

16 Súngubei wagía hínsiñetiña waduheñu hama wamadagu woun. Ligía anihein lubéi dan aba wasaminarun moun lumuti lan warufudun duari dan le wayanuhan hama. Anihein dan gayarati íbini wariñagun somu katei le gáriti houn. Samina wamá luagun le ladügübei Hesusu. Súnwandan meha lóuseruniña lumadagu lau inebesei. Dan le meha hasigenehanbei luagu ka lan súdinitimabei hádangiñe, aba lererehan houn lau ínsiñehabuni. Darí líchugun aban irahü kei hénpulu houn lun líderaguniña asansirei igaburi le hawagubei (Márükosu 9:33-37). Lidan damuriguaü, lunti háyeihani wéiyaaña lidan afiñeni Hesusu lun hererehan lau ínsiñehabuni (Galasiana 6:1).

17 Ánhañati ariñaga gürigia somu dimurei le adügübei lun wasandiragun wougua wuriba? Le lunbei wadügüni lun wóunabuniña lau ínsiñeni (Ariñawagúni 15:1). Ariha waméi le asuseredubei tun aban úguchuru to agüriahabalin tisaani tábugua. Ladügüña meha nibureinti ligía katei wuribati aramudaguarügü. Aban weyu, aba tíchugun aban íbiri fe luagu le asuseredubei, aba busén tan tíchugun gurasu tun lúguchu nibureinti ligía. Masaminaruntu yebe tariñagun somu dimurei wuribati, ani ariñagatu tun: “Ma lirun siñá bani irahü le agumadira!”. Lubaragiñe tóunabun úguchuru, aba tararamagun asaminara ani áfaaguatu lun takipurun darangilaü. Lárigiñe, aba tóunabunu lau ínsiñehabuni ariñageina meferidirun tágili lan temenigin lau tisaani ani tasigiruba lan áfaagua lun tagüriaruni buidu. Seremei lubuidun tóunabun, durati hamadagua. Ani aganba lumuti giñe irahü ligía le tariñagubei lúguchu. Lau líchugun fe luagu meferidirun tágili lan lúguchu temenigin luagu, aba madügünhali lan katei wuribati, aba labadiseirun, dan lárigiñe aba leseriwidun tidan Beteli. Ka wafurendeirubei lidangiñe le? Meberesenga wayanuhaña lan hama íbirigu, waduheñu o gürigia ha ibidiñetiña woun, mosu wáfaagun lun “semé lan” wayanun. Lidan amu dimurei, mosu wayanuhan lau inebesei (Kolosana 4:6).

18. Ida luba wasigiruni lani Hesusu hénpulu?

18 Aban lubuidun idewesei lúmagiñe Heowá gayara lan wariñaguni houn amu ka lan wasandirubei luma ka lan wasaminarubei. Ligíati, falá waméi lani Hesusu hénpulu lun wanúadiruni buidu kaba lan dan wayanuha, kaba lan wariñaga luma ida luba lan wariñaguni katei. Ayanuha wamá súnwandan lau ínsiñehabuni ani áfaagua wamá giñe lun wíchugun gurasu houn ha híbiri lau le wariñagubei luma lun lagundaarun Heowá wau.