Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2015

Lóunigirubadün Heowá

Lóunigirubadün Heowá

“Danme le gabanarugu hamá lau sandi; lasansirubei Bungiu hasandi lun átuadime!” (SÁLUMU 41:3)

UREMU 23 LUMA 138

1, 2. a) Ka meha ladügübei Heowá lidan tidaani Bíbülia? b) Ka san álügüdahani hadügübei fiú gürigia hóuniwagua uguñe weyu?

FURANGUTI busentiwa lan súngubei wagía lun buídubei lan wátuadi súnwandan. Anhein súfurihadün lubéi aban sandi le wéiriti, háfuga aba lan meha hálügüdagun hungua anhein hareidaguba lubéi. O háfuga adügañaha humaali álügüdahani le anhein sandi lubéi somu hiduhe o somu humada. Ayanuhatu Bíbülia hawagu fiú gürigia ha álügüdaguatiña houngua anhein lachülürüba lubéi dan lun hareidagun. Urúei Okosíasi aban hádangiñe, lisaani meha Aabü tabu Hesawéli. Aba meha léiguadun, bulesei ligía ani aba lálügüdahan anhein lareidaguba lubéi. Dan lárigiñe, busenti meha giñe lurúeite Siria Ben-adadü lasubudirun anhein lareidaguba lubéi (2 Urúeigu 1:2; 8:7, 8).

2 Lidan tidaani Bíbülia, anihein meha dan yusu lumuti Heowá lubafu lun lareidaguagüdün somu gürigia. Ruti ubafu houn fiú profeta lun háguyuguagüdün hilaaña (1 Urúeigu 17:17-24;  2 Urúeigu 4:17-20, 32-35). Ligía hálügüdagunbei fiú gürigia ha sánditiña houngua anhein layusurubei lubéi Bungiu lubafu lun lareidaguagüdüniña.

3-5. Ka gayarabei ladügüni Heowá luma Hesusu? b) Kaba san álügüdahani wóunaba?

3 Gayarati layusuruni Heowá lubafu lun lasandiragüdüniña gürigia. Kei hénpulu, aba labeichuni Heowá aban lurúeite Ehiptu ani adüga ligía lun tasandirun litu Moisesi (Agumesehani 12:17; 1 Lúrudu 12:9, 10; 2 Samueli 24:15). Ani dan le meha maganbadi habéi ísüraelina, siadi lumutiña Bungiu lau sandi luma íñanaü (2 Lúrudu 28:58-61). Gama lumoun, gayarati giñe layusuruni Heowá lubafu lun lóunigiruniña lubúeingu luma lun masandirun hamá (Áfuriduni 23:25; 2 Lúrudu 7:15). Areidaguagüdati fiú hádangiñe. Kei hénpulu, areidaguagüda lumuti Hobu dan le sandi lubéi ani busén ligía lounwen (Hobu 2:7; 3:11-13; 42:10, 16).

4 Ítara kei Heowá, gayarati giñe lareidaguagüdüniña Hesusu gürigia. Dan le ya lubéi ubouagu, areidaguagüdati gürigia gawagutiña lépüra, góunwehaditiña, marihintiña luma amu burí sandi (aliiha huméi Matéu 4:23, 24; Huan 9:1-7). Adügati milaguru burí le lun wasaminarun luagun le lunbei ladügüni Hesusu lidan Paraísu. Danme le wawinwandun ñein, mariñagunbei ni aban: “Sándiñadina” (Isaíasi 33:24).

5 Gama lumoun, anhein hanarime lubéi wasandi, gayarati san wagurabahan lareidaguagüdübadiwa lan Heowá luma Hesusu? Ka san katei lunbei gabaroun wamani dan le wanúadihan somu agaranihani?

AMURIAHA HUMÁ ÍDEMUEI LUMA HEOWÁ

6. Ka tariñagubei Bíbülia luagu milaguru le meha hadügübei furumiñetiña kristiánugu?

6 Ru lumuti meha Heowá lani sífiri sandu houn furumiñetiña kristiánugu, ani fiú hádangiñe gayarati meha hadügün milaguru (Adügaü 3:2-7; 9:36-42). Añahein hádangiñe areidaguagüdatiña sánditiña, ha híbiri ayanuhatiña lidan amu iñeñein le meha mayanuhan habéi (1 Korintuna 12:4-11). Gama lumoun, ariñaga tumuti Bíbülia lachülürüba lan dan lun masuseredun lan milaguru burí ligía, ani ítara liña lasuseredun (1 Korintuna 13:8). Ligíati, uguñe weyu siñati wagurabun lun ladügün Bungiu milaguru lun hareidagun waduheñu o lun wareidagun.

Gúndaatiwa wasubudiruni subudi lani Heowá le wasufurirubei ani mabulieidun lumutiwa

7. Ida liña líchugun Sálumu 41:3 gurasu woun?

7 Gama lumoun anhein weiri lubéi sandi le wawagubei líchuguba Heowá gurasu woun ani líderagubadiwa. Ligía meha ladügübei houn lubúeingu lidan dan le sügühalibei. Abürühati urúei Dawidi: “Fuleseiwatiña ha aritagubaña hawagun ha mérebaña hama ha gudemebaña, lesefurubaña Aburemei lidan lidere dan. Lóunigirubaña Aburemei, líchuguba ibagari luma lubuidun dan houn ubouagu” (Sálumu 41:1, 2). Le san labusenrubei Dawidi lariñagun anhein lan íchiga aban gürigia ídemuei lun amu lidan dan ligía móunwenbei lan gürigia ligía? Uá. Le labusenrubei lariñagun anhein lan asandira  gürigia ligía, líderagubei lan Bungiu ani góunigileime (Sálumu 41:3). Gúndaatiwa wasubudiruni subudi lani Heowá le wasufurirubei ani mabulieidun lumutiwa. Ruti ganigi luma lichú aau woun lun wagagibudagun luma sandi. Ani adüga lumuti Heowá wágubu lun gayara lan lareidagun lungua lídangiñe somu sandi.

8. Según Sálumu 41:4, ka lamuriahanbei Dawidi luma Heowá?

8 Ayanuhati Sálumu 41 luagu dan le sándiñein lubéi urúei Dawidi. Genegeti nidiheri lan meha saragu ladüga busén lan Abüsalón le liráü lagidaruni arúeihani luéi. Gama lumoun sánditi meha Dawidi saragu ani siñati ladügün ni kata lun lararamuni. Subudi lumuti meha ladüga lan figóu le ladügübei tuma Betüsawé líbebei turóbuli hadan liduheñu (2 Samueli 12:7-14). Kati ladügübei? Ariñagati lun Heowá: “Gudemená bun; agaranihabá nun lau sun afigouhaadina lan bigibugiñe”. Subudi lumuti meha Dawidi luagu feruduna laali lan Heowá lifigoun ani aba láluahani lídehan dan le sandi lubéi. Gama lumoun, agurabahati san ladügün Heowá milaguru lun lareidaguagüdüni?

9. a) Ida liña líderaguni Heowá urúei Esekíasi? b) Ida liña lagurabahan Dawidi lun líderaguni Heowá?

9 Lidan dan le sügühalibei, yusu lumuti Heowá lubafu lun lareidaguagüdüniña fiú gürigia. Kei hénpulu, dan le meha hilamémeeli urúei Esekíasi, areidaguagüda lumuti Heowá ani adüga ligía lun labagaridun keinsi irumu (2 Urúeigu 20:1-6). Agurabahati san urúei Dawidi lareidaguagüdübei lan giñe Heowá lídangiñe lisandi? Uá. Agurabahati líderagubei lan Bungiu kei líderaguniña gürigia ha “mérebaña hama ha gudemebaña”. Buiti meha lumadagua Dawidi luma Heowá, ligía gayara lubéi meha lamuriahan luma lun líchugun gurasu lun luma lun lóunigiruni dan le sandi lubéi. Amuriahati giñe luma lun líderaguni, gayara láamuga lareidagun lídangiñe lisandi. Gayarati giñe wadügüni ligiaméme (Sálumu 103:3).

10. Ka wafurendeirubei lidangiñe le asuseredubei lun Turofimu luma lun Epafurodítu?

10 Gabafuti meha apostolu Pábulu hama ha híbiri kristiánugu lun hareidaguagüdün sánditiña (aliiha huméi Adügaü 14:8-10). Kei hénpulu, areidaguagüdati meha Pábulu aban wügüri le laubei abiruaü luma aban sandi le hanarimeti. Ariñagati Adügaü 28:8 aba lan “lafurieidun lun Bungiu luagu, aba líchuguni lúhabu luagu, aba lareidagun”. Mareidaguagüdün lumutiña Pábulu sun gürigia ha lasubudirubaña. Kei hénpulu, gamadati meha aban wügüri le gíribei Turofimu, le meha aweiyasuhabei luma lidan lapurichihan (Adügaü 20:3-5, 22; 21:29). Dan le haweiyasuhanbei aba lasandirun Turofimu. Gama lumoun mareidaguagüdün lumuti Pábulu, adügati le lun masigihali lan aweiyasuha luma Pábulu (2 Timotéu 4:20). Anihein meha giñe ábanya lumada Pábulu, gíriti Epafurodítu. Ariñagatu Bíbülia aba lan lasandirun ani ítagaraü yebe lounwen, gama lumoun mariñaguntu areidaguagüda lani Pábulu (Filipuna 2:25-27, 30). Kei le aubei warihei, ni Pábulu ni amu kristiánugu mareidaguagüdün hamutiña sun kristiánugu ha lídanbaña hadaani.

GÓUNIGI HUMÁ LUÉI FIÚ ADUNDEHANI

11, 12. Ida liña meha líderaguni Lúkasi apostolu Pábulu? Ka meha san Lúkasibei?

11 Surusia meha Lúkasi ani aweiyasuhati  luma Pábulu lun hapurichihan (Adügaü 16:10-12; 20:5, 6; Kolosana 4:14). Háfuga íderagua lumuti Lúkasi Pábulu hama amu kristiánugu dan le hasandirubei lidan haweiyasun (Galasiana 4:13). Kei lariñaguni Hesusu, ha sándibaña mégeitiña lun líderaguniña aban surusia (Lúkasi 5:31).

Duari wamá dan le weresibirun ariñahani luáguti wátuadi

12 Aban meha surusia Lúkasi, mama ábanrügü gürigia le hínsiñeti lun líchugun adundehani luáguti átuadi. Ligía dan le labürüdünbarun líburu to gíriboun Adügaü tuma líburu to anügübalin liri, yúsuti meha dimurei le hayusurubei surusiagu ani abürüha ligía luagu fiú milaguru le meha ladügübei Hesusu. Halía ani ka dan lafurendeira agaraniha? Mariñagun tumuti Bíbülia. Gama lumoun háfuga tidan aban leskuela ñein lubéi hafurendeira surusiagu to meha Laodiséaboun, yarafa lun uburugu Kolosa. Háfuga ligía líridunbalin Pábulu Lúkasi tidan ligaradan to labürüdüboun houn kolosana ani aba lariñagun mábuiga liña lan Lúkasi houn.

13. Ka lunbei waritaguni libügürü adundehani luáguti átuadi?

13 Uguñe weyu, úati ni aban íbiri gayarati ladügün milaguru lun lareidaguagüdüniwa. Gama lumoun añahein fiú busentiña híderaguniwa lun labuidurun wátuadi ani háfuga híchugun adundehani woun, íbini mamuriahan wamani hama. Inarüni gayara lan buidu lan fiú adundehani le híchugubei woun. Kei hénpulu, subudi lumuti meha Pábulu gaturobulin lan Timotéu luma lurageirugu, háfuga ladüga latun duna le mabuidunti lun latún. Ligía lariñagubei lun lun latun murusun diwéin (aliiha huméi 1 Timotéu 5:23). * Lunti wóunigiragun woungua luéi adundehani le ichugúbei woun. Háfuga lálugun somu íbiri léredun wawagun lun wouchun somu árani. O lariñagun lunti lan o moun lumuti lan weigin ítaga éigini. Háfuga lariñagun ligía lan íderagubalin somu liduhe le gasandibalin ligiaméme sandi. Úati mini lan le gayarabei lan giñe líderaguniwa. Gayarati líderaguniña somu agaranihani saragu gürigia, gama lumoun gayarati ladügün dañu houn amu (aliiha huméi Ariñawagúni 27:12).

DUARI HUMÁ

14, 15. a) Ka uagu mosu lubéi duari wamá? b) Ka larufudahabei Ariñawagúni 14:15 woun?

14 Sun wagía busentiwa buidu lan wátuadi lun gayara lan wagundaarun lidan wabagari luma lidan weseriwidun lun Heowá. Kei le gafigoun wabéi, ligía wasandirunbei. Háfuga gayarabei wanúadirun ka lan agaranihani wabusenrubei, ani garichatiwa lun wayusuruni le wabusenrubei. Gama lumoun, lunti duari wamá. Gayarati hariñagun fiú gürigia woun o somu kónpeni anihein lan aban agaranihani le buiti hama le lunbei lareidaguagüdüniwa. Gayarati hadügüni lúnrügü hagañeirun saragu seinsu. Gayarati hariñagun hayusuruñein lan bandi gürigia ani buíduhali lan hátuadi. Moun lumuti wouchun furumiñeguarügü katei lun  wasandiragun woungua buidu o lúnrügü wawinwandun saragu dan. Ariñagati Ariñawagúni 14:15: “Afiñetiña ha mabuidunbaña ichügü luagu sun le ariñawagúbei houn; ánhaña ha buídubaña ichügü, ariha hamuti buidu halía lan héibuga”.

Duari wamá dan le lóurate desidírü wamá kaba lan agaranihani wayusura

15 Ánhawa asaminara lau duari, wóunigiraguba woungua luéi adundehani le weresibirubei, dántima liabin hámagiñe gürigia ha mama surusiagu. Lunti wálügüdagun woungua: “Chouru numuti san íderagua laaña lan árani, átürüni o agaranihani le amu gürigia? Íbini areidaguagüda lumutiña lan amu, ida liña nasubudiruni lareidaguagüdübadina lan? Lunti san nakutihan luagu buidu, luma lun nálügüdüni aban subudihabuti luáguti agaranihani?” (2 Lúrudu 17:6).

16. Dan le desidírü wamá libügürü wátuadi, ka lunbei wadügüni?

16 Lunti giñe duari wamá dan le lóurate desidírü wamá kaba lan agaranihani wayusura (Titu 2:12). Súdiniti lun duari wamá dan le amu lan warihin lun agaranihani o egüsámini le uágubei lariñaga somu gürigia woun lun wadügüni. Gayarati san hafuranguagüdüni nun ida liña lan layusurún? Anihein san somu katei úati gunfuranda nani luáguti árani o agaranihani? Yusu hamuti san saragu surusiagu? (Ariñawagúni 22:29.)  Gayarati lariñagun somu gürigia woun darihali lan lárani lidan somu fulasu díseti ani ibidiñegili lan houn saragu surusiagu. Gama lumoun anihein san somu katei le achoururagüdübalin inarüni lan agaranihani ligía? Gayarati hálugun híchugun somu árani woun le gaganati “somu katei ibidiñewati” o katei hámagiñeti sífirigu. Denchati katei le. Ladüga mabusenrunti Heowá lun wayusuruni katei burí le (2 Lúrudu 18:10-12; Isaíasi 1:13).

LUBUIDUN ÁTUADI HOUN SÚNGUBEI

17. Ka san wayumahabei sun wagía?

17 Lidan hadaani furumiñetiña kristiánugu, óunahatiña íbirigu ha alidihabalin apurichihani aban gárada houn kristiánugu lun hariñagun houn moun lumuti lan hadügün saragu katei. Lau dimurei le tagumucha gárada tuguya: “Buidu láamuga lidin hun” (Adügaü 15:29). Dimurei le aban meha igaburi lánina ayouraguni. Gama lumoun haritaguagüda lumutiwa busén wamá sun wagía lun buidu lan wátuadi.

Sun wagía busentiwa buidu lan wátuadi, gama lumoun, aba wetenirun lun weseriwidun lun Heowá (ariha huméi párafu 17)

18, 19. Kaba líchiga Heowá woun lidan Paraísu?

18 Kei le gafigoun wabéi, siñati masandibadiwa lan. Ariha wamaali uguñe weyu siñati lan wagurabahan ladügün Heowá milaguru lun wareidagun. Subudi wamuti líchuguba lan Bungiu aban lubuidun átuadi woun ámuñegü. Adimurehati apostolu Huan luagu “duna harumati [...] le íchugubei ibagari” luma luagu “tídibu wewe le íchugubei ibagari” le lunbei lareidaguagüdüniña sun gürigia (Arufudúni 22:1, 2). Layanuhaña san luagu somu árani le adügǘbei lídangiñe somu híduru le gayarabei wátuni uguñe weyu o lidan Paraísu? Uá. Layanuhaña luagu sun le lunbei ladügüni Heowá luma Hesusu, gayara láamuga wawinwandun lun súnwandan (Isaíasi 35:5, 6).

19 Agurabatiwa lau saragu ugundani wawinwandun lidan Paraísu. Lídanme awanha lan agurabahei dan ligía ruti gurasu woun wasubudiruni hínsiñe wamá lun Heowá ani subudi lumuti le wasufurirubei dan le sandi wamá. Kei Dawidi, afiñetiwa mígirun lubadiwa lan Heowá. Ánhawa úaragua lun, lóunigirubadiwa súnwandan (Sálumu 41:12).

^ par. 13 Ariñagatu aban líburu buitu lan diwéin lun fiú luwuyeri bacteria sügǘ lau fiú árani.