Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2015

 ABAHÜDAGUNI LUÁGUTI IBAGARI

Darangilaü luma Bungiu luma tuma núguchu

Darangilaü luma Bungiu luma tuma núguchu

ABAN weyu, aba tariñagun núguchu nun: “Ibidiñeti nun ka lan uéigiñe maha bubéi lun báhuduragun houn bagüchagu! Marihin bumuti san hagía lan íchugubalin wabagari woun? Metengiraditibu. Ida luba san báguuruni hafiñen wagüchagu? Ánhabu maha báhuduragu houn, banabaguñein wani relihión”. Aba tagumeserun ayahuaha.

Fiu hati lubaragiñe, álügüda hamaaru meha gefentiña luagu Heowá núguchu anhein busén tubéi taturiahanu Bíbülia hama. Mabusenruntu meha taturiahan, gama lumoun lun tarufudun inebesei houn aba tariñagun houn lun haturiahan numa. Guenlé, ka uagu tasafaragua numa? Ladüga busentina meha gaganbadi nan lun Heowá luma lun nagundaaragüdüni. Ligía siñahaali meha nadügün saragu katei le aubei tagundaara. Hénrenguti meha katei le, gama lumoun ruti Heowá erei nun.

IDA LIÑA NASUBUDIRUNI HEOWÁ

Budista meha nuguya hama niduheñu, kei saragu gürigia Hapón. Lárigiñe bián hati le naubei aturiaha hama Gefentiña, aba nafiñerun luagu inarüni lan le tídanbei Bíbülia. Dan le nafurendeirubei anihein lan aban Núguchi sielu, aba nabusenrun nasubudiruni. Furumiñe, hínsiñeti meha nun nayanuhan tuma núguchu luagu le nafurendeirubei ani gúndaatu. Gumesetina giñe abasiiha adamuridagua dimaasu. Lau le nafurendeirubei, aba nariñagun tun núguchu madügün naali lan le hadügübei tidan tani relihión. Sódini, aba tariñagun nun “aban lan busiganu ñein lan somu gürigia hadan iduheñu le marufudunti inebesei houn lagüchagu”. Aba tamahadun lun nidin lidan adamuridaguni luma lun naturiahanu Bíbülia. Magurabun numuti yebe lira. Móuserun tágidina meha ítara.

Aba lidin núguchi luéigiñe tóubadina núguchu. Furendeitina lidan Éfesuna 6 busén lan Heowá lun gaganbadi hamá isaanigu houn hagübürigu. Busentina meha lun ñein lan darangilaü múnada, ábati nasaminarun ánhana lan adügei le habusenrunbei nagübürigu buídubei lan hóuserunina. Lidan dan ligía mosu meha naturiahan lun fiú egüsámini súdiniti leskuelarugu. Ligía midin nubéi meha adamuridagua luagu ǘrüwa hati. Gama lumoun füramasetina lun Heowá nagiribuduba lan adamuridagua danme le lagumuchun dan ligía.

Wuribati meha le desidírü nubéi ladüga bián resun. Furumiñe, ladüga saminatina lárigiñe lanme ǘrüwa hati ligía hinsiñemémebei lan Heowá nun. Ani mítaranti. Aba lagadeirun numadagua luma lau lóufudagun. Libiaman, ladüga aba lan hadügüdarun nagübürigu nuagu lun nígiruni neseriwidun lun Heowá.

 LAGAWOUNDUN TUROBULI

Subudihadina meha saragu íbirigu tidan Luban Adamuridaguni ha meha lídanbaña ligiaméme turóbuli kei nuguya. Aba hariñagun nun ánhana lan awanda, líchuguba lan Heowá erei nun, ani luagu gayarabei lan hamuga hafurendeiruni niduheñu inarüni luagu Bungiu (Matéu 10:34-37). Busentina meha nafiñerun luagu, ligía nagumeserunbei afurieida lun lau sun nere.

Ámuñegueinarügü luwuyeri lidere dan híchugun nagübürigu nun. Kei hénpulu, aban híchugun lanwoun nidasin múnada lun máfuridun nan. Anihein dan aba hígirunina bóugudin o míchugun hamá éigini nun. Anihein dan aba tayumuragun núguchu nun lun nígiruni naturiahanu Bíbülia. Súnwandan meha nerederun maniñu. Dan le meha nariñagun somu katei, aba meha wasigenehan ladüga biángubei lan wagía busentiwa warufuduni inarüni lan le wariñagubei. Guenlé, subudi naali lunti lan meha inebe lan hafiñen nun luma le hasandirubei. Háfuga ítara magañidunboun yebe núguchu numa.

Aba tagumeserun núguchu amuriaha ídemuei hama amu gürigia. Kei hénpulu, aba tayanuhan luma numaisturu, gama lumoun máhati ládaragun lungua lidoun waturóbulin. Lárigiñe aba tanügünina le ñein lubéi tawadigimarida ani aba tamuriahan luma tábuti lun lariñagun nun luagu hani lan relihión inarüniboun luma tuguya lan buíduboun. Watu giñe houn saragu tiduheñu ayumuragueina ani ayahuaheina amuriaha ídemuei hama. Sun katei le adügati lun wuriba lan nasandiragun nungua. Gama lumoun lidan adamuridaguni aba hariñagun wéiyaaña lidan afiñeni nun dan le lan tabahüdaguni núguchu le houn amu gürigia, ítara liña kamá tapurichihaña.

Busentiña meha nagübürigu lun lidin aturiaha tidan luban furendei íñuti, gayara láamuga nibihin aban wadagimanu buiti. Súnwandan wasigenehan luagu katei le. Ligía aba lubéi nabürühan gárada  houn lun nafuranguagüdüni ka lan nabuserunbei nadügün lau nibagari. Aban weyu, aba lagañidun núguchi numa saragu, aba lariñagun: “Anhein afiñe bubéi badariruba lan wadagimanu, daribei haruga. Anhein madari ban, bídiba yáagiñe”. Ayumuraguatina lun Heowá lun líderagunina. Larugan aba náfuridun apurichiha, ñéinmeme aba hálügüdünina bián íbirigu anhein busén nubéi nawadigimaridun hama arufudaha houn hasaanigu. Lubaragiñe lagundaarun núguchi, aba lóuserunina kamá le ibidiñetina lun. Aba tariñagun núguchu buídutimati hamuga lun aban nan gürigia le adügüti wuribani houn amu sügǘ luéi gefén nan luagu Heowá.

Íderagua lumutina Heowá lun nabuiduragüdüni nigaburi luma lun desidírü nan buidu

Anihein meha dan álügüdaguatina nungua anhein gunda lubéi Heowá lau nasigeneha saragu hama nagübürigu. Ábati nafurieidun ani samina nuguya luagu saragu bérusu le ayanuhabei luagu línsiñehabu Bungiu. Íderagua lumutina meha le lun gunfuranda nani háluahañein lan nagübürigu le buídutimabei nun. Eibu napurichihan, éibutima nagundaarun luagu nayanuhan luagu Bungiu. Busentina meha lun prekursora nan.

NESERIWIDUN KEI PREKURSORA

Dan le híchugunbei fiú íbirigu fe luagu busén nan prekursora nan aba hariñagun nun lun lan nagurabahan murusun dan darí lásügürün hagañi nagübürigu. Aba namuriahan ídemuei luma Heowá, ani aturiaha numutu giñe wani agumeiraguagüdüni, samina nuguya ka lan uagu nabusenra prekursora nan. Gama lumoun, amuriahatina adundehani hama íbirigu ha barühaña saragu dan lidan inarüni. Ábati desidírü nan le lan súdinitimabei lidan nibagari nagundaaragüdüni Heowá. Ani aba gunfuranda nani ánhana lan agurabaha lun prekursora nan madügünbei lan lira lun lasansirun ligaburi hasaminan nagübürigu.

Gumese numuti neseriwidun kei prekursora lidan lagumuhóun irumu le naubei tidan kolehiu. Lárigiñe fiú dan, aba nasandirun busén nan nidin eseriwida lidan somu fulasu le ñein lubéi hemegeirúa apurichihatiña. Gama lumoun mabuseruntiña meha nagübürigu lun náfuridun múnadagiñe. Ligía nagurabahanbei nagunfulirun wein irumu. Ábati namuriahan tuma sukursáli lun tóunahanina suru lani Hapón, le ñein lubéi hawinwanda fiú niduheñu lun ua lan nidiheri tan núguchu nuagu.

Lidan fulasu ligía íderaguatina saragu gürigia lun gefén hamá luagu Heowá. Aturiahatina giñe inglesi lun gayara lan naganwoundagüdüni neseriwidun lun Heowá. Lidan damuriguaü le ñein nubéi añahein meha bián prekursorugu espechalitiña. Chawá lumuti nisaminan lanarime háfaagun lidan heseriwidun lun Heowá luma lidan híderaguniña amu. Ábati nabusenrun lun aban nan prekursora espechaliti. Lidan dan ligía aba tasandirun núguchu bián wéiyaasu. Lidan bián wéiyaasu le tasandirunbei giributina wábiñoun lun nóunigirunu. Magurabun tumuti yebe nadügübei lan lira. Ligía aba lubéi buidutimaraühali lan tóuserunina.

SARAGU ABINIRÚNI LÚMAGIÑE HEOWÁ

Sedü irumu lárigiñe aba neresibirun aban gárada lúmagiñe aban hádangiñe bián prekursorugu espechalitiña ha buga uágubaña nayanuhan furumiñe. Atsushi líribei. Aba lariñagun nun lasaminaruña lan lamarieidun ani aba lálügüdünina anhein sandí nubéi ínsiñeni luagu. Le linarün katei, masanditina meha ínsiñeni luagu, saminatina giñe masandirun lan ni kata nuagu. Aban hati lárigiñe, aba nóunabuni ariñageina lun gayara lan wasubudiragun woungua buidu. Ábati wíchugun fe wáfaaguña lan luagu ligiaméme. Busentiwa meha wasigirun eseriwida lun Heowá lidan dan dayarüti lidan furumiñeguarügü fulasu. Ligíati, lau lásügürün dan aba wamarieidun. Ñǘdüntiña nagübürigu hama amu niduheñu lidan wamarieidun. Gúndaagüda lumutina katei le.

Nepal

Seriwitina meha nuguya luma nani weiriei kei prekursoru ha adügübaña ǘrüwa-wein-diisi oura. Ábati tamuriahan sukursáli lun wabisidaha fiú damuriguaü. Lárigiñe aba wiridúniwa kei prekursorugu espechalitiña, lau lásügürün dan aba liridún Atsushi  kei óunigiruti sirkuitu. Dan le wegeyedaguni sirkuitu furumiñeti wéiyaasu, aba tálügüdüniwa sukursáli anhein busén wabéi wáguyun Nepal lun wasigirun abisidaha damuriguaü.

Neseriwidun lidan saragu ageiraü arufudahaali saragu katei nun luagu Heowá

Nidiheritina meha luagu kaba lan hariñaga nagübürigu danme híchugun fe luagu wáguya lan lidoun amu fulasu díseti. Gama lumoun dan le nagúarunbei houn, aba lariñagun núguchi nun: “Béibuga lidoun aban fulasu buídumeraüti”. Aba dimaasu lubaragiñe, edewehati meha lumada aban líburu lun to ayanuhaboun luagu Nepal, aba lasaminarun núguchi buidu lan Nepal lun asariñahani.

Hínsiñeti woun wásügürün dan hama gürigia ha Nepalibaña, ha arufudubaña ínsiñehabuni. Lau lásügürün dan aba hamuriahan lun wabisidahani fiú damuriguaü le lídanbei ageiraü le gíribei Bangladesh. Íbini yarafagua lan ageiraü burí le, ámuñegueinarügüti igaburi luma échuni ñein. Adügati katei le lun ámuñegueinarügü lan ligaburi wapurichihan. Seingü irumu lárigiñe aba hóunahaniwa warigóun Hapón. Guenlé weseriwiduña lau ugundani lidan wabisidahani damuriguaü le ñeinbei.

Neseriwidun Hapón, Nepal luma Bangladesh arufudahaali saragu katei nun luagu Heowá. Gürigia ha lídanbaña ageiraü le ámuñegueinarügüti hechun luma hagaburi. Ani ámuñegueinarügüti ligaburi kada gürigia. Ariha naali gayara lan líderaguniña luma lóunigiruniña Heowá kada gürigia. Ariha naali giñe luagu berese lan lau kada aban hádangiñe.

Lunti níchugun seremei lun Heowá luagu saragu katei. Rúhali chansi nun lun nasubudiruni luma lun neseriwidun lun ani rúhali giñe aban weiriei buiti nun le eseriwidubei lun tau sun lanigi. Ani arufudahaali nun lun desidírü nan buidu. Seremei lun Heowá, gamadagua yáadina tuma núguchu, ani buiti nanaagun nungua hama ha híbiri niduheñu. Súnwandan níchuguba lan seremei lun Bungiu luagu darangilaü luma tuma núguchu.

Gúndaatiwa lau wabisidahani burí damuriguaü