Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2015

Weiri lan weteingiruni líchigadi Heowá

Weiri lan weteingiruni líchigadi Heowá

ABAN BUNGIU gíchigaditi Heowá (Santiagu 1:17). Gayaraati warihini líchigadi lidan sun le adüga láalibei. Buíngüda laali sielu tau waruguma, wéndegüdalei Ubóu lau lubuidun burí nadü (Sálumu 65:12, 13; 147:7, 8; 148:3, 4).

Wéiriti meha eteingiruni le lasandirubei aban abürühati Sálumu luagu sun le adüga láalibei Heowá darí lun labürühan aban uremu Lun lun lalawahani. Gayaraati haliihani lidan Sálumu 104. Ariñagati ñein: “Neremuhaba lun Nabureme sun wínwangidina lan, neremuhaba lun Nubungiute lidan sun nibagari” (Sálumu 104:33). Busentün giñe san hadügüni ligiaméme?

HEOWÁ ÍCHUGUBALIN HÉNPULU LE BUÍDUTIMABEI LÁNINA GÍCHIGADI

Busenti Heowá wáyeihani líchigadi. Ruti resun woun lun gíchigadi wamá. Adügati lun labürüdüni apostolu Pábulu dimurei burí: “Ha gámabaña irisini lánina ubóu le, ariñagabá houn lun manaagun hamá houngua luagu, míchugun hameime hemenigin luagu irisini machourunti ligía, lun híchuguni hemenigin luagu Bungiu, le wínwanbei, ani ruléi sun katei woun gibe lun wagundaarun luagu. Ariñagabá houn lun risi hamá lidan le buídubei, lun buidu lan hóuserun le tímatimaati, lun aranseñu hamá lun híchuguni luma lun hafanreinhani le hámabei. Ítara luba hóundaragun irisini houngua sielu le adurarubei lun sun dan, ítara luba habihini ibagari magumuchaditi” (1 Timotéu 6:17-19).

Tidan tibiaman gárada to labürüdüboun Pábulu houn korintuna, afuranguagüda lumuti ka lan igaburi lunbei línchahaniwa lun gíchigadi wamá. Ariñagati: “Lunti líchugun kada aban hídangiñe, keisi lasandiruni tidan lanigi; mama lau magundani ni ladüga lariñawagún hun lun híchugun, lugundun hínsiñehabuti Bungiu lun le íchugubei lau ugundani” (2 Korintuna 9:7). Ka asagarubei buiti dan le gíchigadi wamá? Ariñagati Pábulu íderagua wamá amu dan le wíchuguni le hemegeirubei houn, wíderaguña giñe woungua ladüga líchuguba lan Heowá saragu katei buiti woun (2 Korintuna 9:11-14).

Haritaguagüda lumuti Pábulu houn korintuna mosu lan heteingiruni Bungiu ladüga rúhali lan aban idewesei espechaliti woun (2 Korintuna 9:15). Lidan “óunwenbu idewesei” le, anihein sun katei buiti le líchugubei Heowá woun lau lídehan Hesukrístu, le Liráü. Madaritiwa dimurei lun wafuranguagüdüni lueirin lubuidun idewesei lúmagiñeti Heowá le.

Ida luba warufuduni teinki wamani Heowá luma Hesusu luagu sun le hadügübei wawagu guentó luma le lunbei hadügüni ámuñegü? Adüga wamuti dan le gíchigadi wamá lídangiñe wadaani, were luma wámati lun weseriwidun lun Heowá luma lun wíderagun amu asubudirei. Sun wagía gayaraati wíchugun gibe lan yebe wámati o lougua lan (1 Krónikasi 22:14; 29:3-5; Lúkasi 21:1-4).