Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Unsu-hati irumu 2015

San irumu lábugiñe Larúeihan Bungiu

San irumu lábugiñe Larúeihan Bungiu

“Ayumuraguatina lun Bungiu, le lánina darangilaü, [...] lun luadigimaridun hidan lidan sun katei [...] lun gayaraabei lan hadügüni lugundan.” (EBÜRÉU 13:20, 21)

UREMU 136 LUMA 14

1. Ida liña wasubudiruni súdini lan meha lun Hesusu layanuhan luagu Larúeihan Bungiu?

HÍNSIÑETI meha lun Hesusu layanuhan houn gürigia luagu Larúeihan Bungiu. Súdiniti meha katei le lun. Dan le lapurichihanbei ubouagu, ayanuhati luagu Arúeihani ligía lóugiñe 100 wéiyaasu. Ligía meha katei le uágubei wéiritima lan layanuhan (aliiha huméi Matéu 12:34).

2. Átiriñanu gürigia aganbuti le lariñagubei Hesusu lidan Matéu 28:19, 20? (Ariha huméi abürüdǘni.)

2 Murusun dan lárigiñe láguyugun Hesusu, aba larufudagun lungua houn hóugiñe 500 gürigia (1 Korintuna 15:6). Háfuga houn lan gürigia hagía líchiga Hesusu gumadi lun houdin apurichiha houn “gürigia ha lílana sun fulasu”. * Gama lumoun, hénrengubei meha lapurichihóun houn sun gürigia. Ariñagati meha Hesusu lanügüba lan dan. Lasigiruba darí lumoun lagumuchagüle ubóu  wuribati le. Dan le wapurichihan uguñe weyu, wídehaña lun lagunfulirun le lariñagubei Hesusu (Matéu 28:19, 20).

3. Ka burí katei seriwihalibei woun lun wapurichihan?

3 Dan le lóunahanbaliña Hesusu lani disipulugu apurichiha, ariñagati houn: “Subudi huméi luagu anahein lan huma” (Matéu 28:20). Lau dimurei le, füramaseti Hesusu houn ladundehabaña lan ani líderagubaña lan lun hapurichihan lidan sun Ubóu. Íderagua lumutiwa giñe Heowá uguñe weyu. Ligía íchugubalin “sun katei buiti” woun lun gayara lan wapurichihan (Ebüréu 13:20, 21TNM). Lidan arütíkulu le, warihibei rúhali lan saragu ídemuei woun, arufudahalei woun ida luba lan wapurichihan. Gumese wamá lau warihin fiú lídangiñe ídemuei le resibi wamaalibei lidan lagumuhóun 100 irumu.

KATEI BURÍ LE SERIWIHALIBEI WOUN LUN WAPURICHIHAN

4. Ka un lahuuda ídemuei burí le resibi wamaalibei woun?

4 Ariñagati Hesusu ítara liña lan uganu luáguti Larúeihan Bungiu keisi aban ilaü le abunúti (Matéu 13:18, 19). Lun laranserun aban ábunaguti múa lubá lábununi ilaü, yúsuti saragu ídemuei. Ítarameme, lun wíderaguniña gürigia lun hánharun lun uganu le wanügübei houn, yusu wamuti ídemuei burí le líchugubei warúeite Hesukrístu woun. Anihein yusu wamuti luágurügü fiú irumu, ani anihein amu awanheingua ayusurei. Íderagua láadiwa súngubei lun buídutima lan wapurichihan.

Íderagua tumutiña meha tirahüñü gárada lánina apurichihani íbirigu lun hapurichihan luagu furumiñeti wéiyaasu

5. Ka meha ídemuei heresibiruboun kristiánugu lidan irumu 1933? b) Ida liña meha san tayusurún gárada tuguya?

5 Lidan irumu 1933, resibitiña íbirigu aban ídemuei le ahuudubei houn saragu hádangiñe lun hapurichihan luagu furumiñeti wéiyaasu. Wayanuhaña tuagu aban tiraüraü gárada to uáguboun bürüwañu lan aban uganu tídangiñeti Bíbülia. Subudiwatu meha kei gárada lun lapurichihóun. Díseguati meha táfuridun iseri gárada lau iseri uganu. Ida liña meha tayusurún? Ariñagati aban íbiri le meha agumeserubei ayusuroun dan le meha 10 lubéi irumu lau aba lan meha hamuriahan hama gürigia lun haliihanu tiraüraü gárada tuguya. Lárigiñe, aba hígirun aban agumeiraguagüdüni houn, ñéingiñe aba houdin.

6. Ka uagu hu tubéi meha tirahüñü gárada lánina apurichihani?

6 Wéiriti meha tahuudun tirahüñü gárada tuguya. Ka uagu? Ladüga lubaragiñe ñein tan tirahüñü gárada tuguya añahein meha íbirigu busentiña hapurichihan, gama lumoun haburitiña meha, ibidiñe ligía houn kaba lan hariñaga houn gürigia. Añahein meha giñe amu wéiriti ganigi hamá darí lun hariñaguni sun le hasubudirubei houn gürigia lidan murusun oura. Ani madügün hamuti meha lau duari. Huutu meha tirahüñü gárada tuguya ladüga íderagua tumutiña sun íbirigu íchiga aban uganu furanguti le ménrengunti gunfurandawa lan.

7. Ka uagu anihein lubéi meha dan hénrengu lan lapurichihóun tau tirahüñü gárada lánina apurichihani?

7 Gama lumoun, anihein meha dan hénrengu lan lapurichihóun tau tirahüñü gárada tuguya. Abahüdahatu aban íbiri: “Anihein meha dan  hariñagun gürigia woun: ‘Kati tariñagubei tiraüraü gárada to? Ka uagu mariñagun hubalin nun?’”. Añahein meha gürigia siñá hamutu aliiha o aba meha herederun tau ani aba hadouruni bena. Añahein amu aba meha haheiridagunu ladüga mínsiñe lan uganu le wanügübei houn. Íbini ítara, seriwitu meha gárada burí tuguya lun hapurichihan íbirigu luma lun hasubudiruniña gürigia kei apurichihatiña Larúeihan Bungiu.

8. Ida liña meha san layusurún laganbahagüle ariñahani? (Ariha humóun iyawaü to lídanboun lagumeseha arütíkulu.)

8 Lárigiñe irumu 1930 resibitiwa amu ídemuei. Aban laganbahagüle ariñahani, aba máhina le ídanbei laganbahóua somu yanu. Añahein meha agúarutiña lun máhina ligía Aarón ladüga máhina lan ligía ayanuhabei hawagu kei meha layanuhani Aarón le lariñagubei Moisesi lun (aliiha huméi Áfuriduni 4:14-16). Anhein meha busén gürigia laganbun, aba líchugun íbiri aban yanu ani aba lígirun somu garüdia lun. Anihein meha dan aganba hamani sun tílana muna uganu ligía. Lidan irumu 1934 aba wagumeserun adügei wani máhina woungua lun wapurichihan lau. Lau lásügürün dan, rútiña íbirigu 92 yanu.

9. Ka burí resultóu buiti ibihúbei seremei layusurún laganbahagüle ariñahani?

9 Luagu aban weyu, aba laganbun aban wügüri aban yanu gürawaruarügüti ani hínsiñeti lun saragu. Amuriahati lun lafuredeirúniwa laganbahagüle ariñahani ligía lun luagu aban dimaasu lun gayara lan haganbuni sun lubesinanigu. Ídehati katei ligía lun gibe hamá gürigia ánharutiña haturiahanu Bíbülia badisei hagía. Badiseiti giñe wügüri ligía, ani dan lárigiñe seriwitiña bián hádangiñe lisaanigu keisi misionerugu. Dandu tirahüñü gárada lánina apurichihani kei máhina le laganbahagüle ariñahani ídehati lun gayara lan hapurichihan saragu íbirigu luagu furumiñeti wéiyaasu. Gama lumoun, lau lásügürün dan, aba lagumeserun urúei Hesukrístu ayusuroun Leskuela Kristiánu lánina Apurichihani lun larufudahan houn lani disipulugu lun buídutima lan ligaburi hapurichihan.

KATEI BURÍ LE ÍDERAGUBADIWA LUN WAPURICHIHAN

10, 11. Ida liña tíderaguniwa periodiku tuma radiu lun wanügüni uganu houn gürigia?

10 Lau lídehan Warúeite, hóuchaadiwa ámuñegueinarügü ligaburi apurichihani lun wasubudiragüdüni uganu buiti houn sun gürigia ha wayaraatiña. Íderagua lumutiwa katei burí le dántima meha le míbegiña Gefentiña ubouagu (aliiha huméi Matéu 9:37). Yusu wamutu meha periodiku lun wapurichihan saragu irumu guentó. Óunahati meha íbiri Russell aban yanu sagü dimaasu tidoun aban áfisi lánina ñunsu. Ani aba tóunahani áfisi tuguya ñunsu tidoun periodiku Kanadá, Meriga luma Yuropa. Lúmounbei irumu 1913, furihali meha liyanun íbiri Russell tidan 2,000 periodiku ani aliiha hamuti meha kéiburi 15 míñunu gürigia.

Huutu meha periodiku tuma radiu ladüga íderagua tumutiwa lun wapurichihan ñein lubéi mibe hamá íbirigu

11 Ibihatiwa giñe buiti resultóu lau wayusurunu radiu lun wapurichihan. Weyu 16 lidan gádürü-hati lidan irumu 1922 ligía líchuguni íbiri Rutherford furumiñeti liyanun tídangiñe  radiu. Aganba hamuti kéiburi 50,000 gürigia. Fiú dan lárigiñe, ligía wadaarunu wani radiu. Furiti furumiñeti wani programa 24 lidan bián-hati lidan irumu 1924. Dan le lagumuchun irumu 1924, ariñagatu garüdia to lidan inglesi: “Afiñetiwa lásügüragüdüniwa lan uganu tidan radiu húutimabei ani meseruntimabei lun laburuchagun uganu lánina inarüni”. Huutu periodiku tuma radiu ladüga íderagua tumutiwa lun wapurichihan ñein lubéi mibe hamá íbirigu.

Gíbetiña íbirigu hínsiñeti houn hapurichihan lidan burí guririguaü luma hayanuhan houn gürigia luagu wani páhina lidan Internet (Ariha huméi párafu 12 luma 13)

12. a) Lídangiñe sun apurichihani le adügǘbei lidan fulasu le ñein habéi saragu gürigia, ka hínsiñetimabei hun? b) Anhein hanufude hubéi hapurichihan lidan fulasu le ñein hamuti saragu gürigia, ka lunbei hadügüni?

12 Ábanya katei le ídehabei uguñe weyu lun lapurichihóun lidan fulasu burí le ñein hamuti bandi gürigia, lapurichihóun lidan guririguaü. Áfaaguatiwa lun wapurichihan ñein lubéi tagurabahóua busu, íngiini, tidan burí mágidu luma lidan amu burí fulasu. Ka gayaraabei hadügüni anhein hénrengu lubéi hun hapurichihan lidan fulasu burí le? Furíei humá lun Heowá ani samina humá luagun le lariñagubei aban óunigiruti sirkuitu. Ariñagati kada lan iseri ligaburi apurichihani ámuya lan ligaburi weseriwidun lun Heowá ani warufuduñein lan úaragua wamá lun ani afiñe wamá luagu. Ariha lumuti kei aban chansi lun larufuduni lun Bungiu aranse lan lun ladügüni sun le lamuriahan lúmagiñe. Dan le wígiruni anufudei ani aba wouchun iseri luwuyeri apurichihani, aba lubúeingu wamá Bungiu ha buítimatiña ani aba wafurendeirun afiñera luagu (aliiha huméi 2 Korintuna 12:9, 10).

13. a) Ka uagu buidu lubéi wayanuhan luagu wani páhina lidan Internet dan le wapurichihan? b) Ida liña hayusuruni páhina le lidan hapurichihan?

 13 Gíbetiña íbirigu hínsiñeti houn hayanuhan houn gürigia luagu wani páhina lidan Internet. Sagü weyu belutiña hóugiñe 1,600,000 gürigia lidoun jw.org. Ñein gayaraati haliihan, rarigüda hagía agumeiraguagüdüni lidan lóugiñe 700 iñeñein. Lidan dan le sügühalibei yúsutiwa meha radiu lun wapurichihan houn gürigia ha awinwandubaña lidan fulasu díseti. Ani uguñe weyu ligiaméme wibihibei lau wani páhina lidan Internet.

ARUFUDAHANI LE ÍDERAGUBALIWA LUN WAPURICHIHAN

14. a) Ka meha arufudahani hemegeirubei íbirigu? b) Ka leskuela íderagubaliwa lun buídutima lan warufudahan tuagu Bíbülia?

14 Arihaadiwa rúhali lan Heowá saragu katei woun luma burí iseri aransehani lun líderaguniwa apurichiha. Gama lumoun arufudahaali giñe woun. Ka san uagu megei wabalin sun katei le? Dan meha le hapurichihanbei íbirigu lau máhina le laganbahagüle ariñahani, añahein meha gürigia magundantiña lau le haganbubei. Añahein amu hínsiñeti meha houn ani busentiña meha haganwoundagüdüni hasubudin tuagu Bíbülia. Mégeitiña meha íbirigu hafurendeirun ida luba lan buídutima lan harufudahan luma kaba lan hariñaga houn gürigia ha mabusenruntiña haganbuni uganu. Adügati sífiri sandu lun líchugun íbiri Knorr fe busén hamá íbirigu hafurendeirun ida luba lan buídutima lan harufudahan tuagu Bíbülia. Ligíati, lidan irumu 1943 aba tagumeserun Leskuela Kristiánu lánina Apurichihani.

15. a) Ida liña lidin houn fiú hádangiñe ha gánihañabaña fánreinti tidan Leskuela Kristiánu lánina Apurichihani? b) Ida liña larihíniwa lidan hikesin gúnfuli lani Heowá füramasei le ladügübei lidan Sálumu 32:8?

15 Gíbetiña meha giñe íbirigu ibidiñeti houn ida luba lan hayanuhan hagibugiñe bandi gürigia. Haritagua lágili aban íbiri le asuseredubei lun dan le líchugunbalin furumiñeti liyanun lidan irumu 1944. Layanuhaña meha luagu aban wügüri le uágubei tayanuha Bíbülia gíriti Doegü. Ariñagati íbiri ligía hanarime lan ladadagarun lúhabu, ligachürügü luma láribugu dan le líchugunbalin yanu darí lagumuchun. Íbini meha giñe irahüñü gánitiña fánreinti tidan leskuela to. Haritagua lágili óunigiruti sirkuitu le uágubei wayanuha lidan párafu 12 le asuseredubei lun aban irahü dan le meha líchugunbalin furumiñe liyanun tidan leskuela. Wéiriti meha ladadagarun darí lun ayahuamémeeli lan. Lau sun lira, sigiti lubaruaguóun darí lagumuchuni. Añahein íbirigu hanarimeti hadadagarun ladüga haburi hamá ani genegeti houn siñabei lan hiñuruni háhabu ni hawarirun luagu plataforma. Susereti san katei le hun? Amuriaha humá luma Heowá lun líderagunün lun ganigi humá. Líderagubadün ítara kei líderaguniña furumiñetiña aturiahatiña tidan  Leskuela Kristiánu lánina Apurichihani (aliiha huméi Sálumu 32:8).

Eresibihaaña kéiburi 8,500 íbirigu tídangiñe Galaadü lúmagiñe irumu 1943 ani ñǘdünhaña eseriwida lidan kéiburi 170 ageiraü

16. Ka lébunabei tadügǘn Leskuela Galaadü?

16 Arufudahaali giñe Bungiu houn lubúeingu tidan Leskuela Galaadü. Lidan irumu 1943 tagumesera leskuela to ani adügǘwatu lun tíderaguniña aturiahatiña lun busentima hamá hapurichihan. Lúmagiñe dan ligía eresibihaaña kéiburi 8,500 íbirigu tídangiñe ani ñǘdünhaña eseriwida lidan kéiburi 170 ageiraü. Ani lúmagiñe irumu 2011 mamisurahóunhaña amu íbirigu tidoun leskuela to haweidigia prekursorugu espechalitiña, óunigirutiña sirkuitu, eseriwidutiña betelirugu hama misioneru ha mídingiña tidan leskuela to.

17. Ka buiti ibihúbei tídangiñe Leskuela Galaadü?

17 Ka resultóu buiti ibihúaalibei tídangiñe Leskuela Galaadü? Samina wamá luagun le asuseredubei Hapón. Lidan widü-hati lidan irumu 1949 úatiña meha ni 10 Gefentiña lidan ageiraü ligía. Aba hagumeserun mísionerugu ha áfuridutiña tídangiñe Galaadü achülüra ñeinhin. Lúmounbei lagumuchun irumu ligía añaheinhaña meha 13 misioneru íderaguaña íbirigu apurichiha. Guentó añaheinhaña 216,000 Gefentiña Hapón. Ani kéiburi hamidan heseriwiduña kei prekursorugu ha apurichihabaña 70 oura sagü hati o kei prekursorugu ídehatiña.

18. Ka amu burí leskuela anuheinboun wama wagía gefentiña luagu Heowá?

18 Ka burí amu leskuela anuheinboun hama gefentiña luagu Heowá? Anuhein Leskuela houn Wéiyaaña hama Ídehatiña, Leskuela houn Prekursorugu, Leskuela houn Apurichihatiña, Leskuela houn Óunigirutiña Sirkuitu tuma hani Weiriou, Leskuela houn Íbirigu ha Arihibaña tau Beteli tuma hani Weiriou. Ibihaaña saragu íbirigu wügüriña hama würiña lubuidun arufudahani tídangiñe leskuela burí to, ani héretimahali hafiñen. Furanguti aniheingua lan Hesusu arufudaha woun uguñe weyu.

19. a) Ka meha lariñagubei íbiri Russell luagu apurichihani? b) Linarün meha san íbiri Russell le lariñagubei?

19 Sügühali lóugiñe 100 irumu lúmagiñe lagumeserun Larúeihan Bungiu agumadiha. Lúmagiñe dan ligía, Hesukrístu alidihabalin apurichihani. Lidan irumu 1916, ariñagati íbiri Russell: “Fureseti lawanserun apurichihani, ani lasigiruba awansera, ladüga mosu wapurichihani ‘uganu luáguti Larúeihan Bungiu’ lidan sun ubóu” (La fe en marcha, to lani A. H. Macmillan, páhina 69). Kei aubei warihei, chouru lumuti meha íbiri Russell luagu lapurichihóuba lan lidan sun ubóu. Ani linarün meha, lugundun wapurichihaña lidan sun fulasu. Ani seremei wamuti Heowá luagu líchuguni sun le wemegeirubei woun lun wadügüni wadagimanu le.

^ par. 2 Másiñati aba lan hadügagun hiibe-agei gürigia hagía houngua kristiánugume. Ida liña wasubudiruni? Ladüga lagúarun apostolu Pábulu houn “afiñetiña”. Ariñagati giñe hilaaña lan meha fiú hádangiñe lumoun dan ligía, gama lumoun wínwangiña lan meha hiibe-agei. Genegeti lubeiti subudi hamá besafu hádangiñe 500 gürigia hagía lun Pábulu luma houn amu kristiánugu.