Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Unsu-hati irumu 2015

Heowá Lubungiutebei ínsiñeni

Heowá Lubungiutebei ínsiñeni

“Ínsiñeni Bungiu.” (1 HUAN 4:8, 16)

UREMU 18 LUMA 51

1. a) Ka ligaburi Bungiu súdinitimabei? b) Ida liña wasandiragun woungua lau wasubudiruni ínsiñeni lan Bungiu?

ARIÑAGATU Bíbülia “ínsiñeni [lan] Bungiu” (1 Huan 4:8). Mini lan lira ínsiñeni lan súdinitimabei lídangiñe sun ligaburi Bungiu. Mama sandirügüti ínsiñeni, ínsiñeni ligía. Ínsiñeni lébunabei sun le ladügübei. Wéiriti weteingiruni Bungiu luagu línchahani línsiñehabu adügei sun le aniheinbei.

2. Ida liña wasubudiruni hínsiñe wamá lun Heowá? (Ariha huméi dibuhu le lídanbei lagumeseha arütíkulu.)

2 Subudi wamuti hínsiñe lan sun le ladügübei Heowá lun. Ligía chouru wabalin lagunfulirubei lan sun le füramase lubéi woun. Kei le hínsiñe wabéi lun, ligía “anúadiraali [lubéi] [...] aban weyu lun ligíaba lan weyu laguseragüdüniña gürigia ha ubouagubaña lau irichaü”. Ani layusurubei Bungiu Hesusu lun ladügüni (Adügaü 17:31). Chouru wamuti laguseragüdübadiwa lan Hesusu lau irichaü. Ábame hawinwandun sun ha gaganbadibaña lau ugundani ani lun súnwandan.

 LE LARUFUDUBEI SUN LE SUSEREELIBEI UBOUAGU

3. Lun hamuga mínsiñe wamá lun Heowá, kaba hamuga asusereda woun?

3 Lun hamuga mínsiñe wamá lun Heowá, kaba hamuga asusereda woun? Hasigiruña hamuga gürigia agumadiragua houngua lábugiñe lubafu Mafia, le habungiute (2 Korintuna 4:4; 1 Huan 5:19; aliiha huméi Arufudúni 12:9, 12). Ma hamuga lirun gádantiwa!

4. Ka uagu lígira Heowá lun lebedaagun Satanási lun?

4 Dan le lebedaagunbei Satanási lun Heowá, adügati giñe lun lebedaagun Adán tuma Ewa. Adügati lun machourun hamani gürigia garicha lan Bungiu lun lagumadihan. Ani ariñagati buídutimabei lan lagumadihan sügǘ lau Bungiu (Agumesehani 3:1-5). Kei le chu lubéi lau Heowá, ígirati lun lásügürün dan lun larufuduni Satanási anhein inarüni lubéi le lariñagubei. Ani rédeihali furangu ni lan Satanási ni gürigia ubouagu siñaguatiña houngua lun hagumadihan buidu.

Madügün lumutiwa Heowá lau ubafu lun wagumadiragun woungua sin lídehan

5. Ka arufuda láalibei sun dan le sügühalibei?

5 Uguñe weyu, wuribatimarügüti ubóu. Lidan san irumu le sügühalibei, hilatiña hóugiñe 100 míñunu gürigia lidan wuribu. Ariñagatu Bíbülia haribadatimaba lan gürigia lidan “lagumuhóun dan” (2 Timotéu 3:1, 13). Ariñagatu giñe mabafu hamá wügüriña lun hagumadiragun houngua (Heremíasi 10:23TNM). Inarüni dimurei burí le. Arufuda laali sun dan le sügühalibei madügün lániwa Heowá lau ubafu lun wagumadiragun woungua sin lídehan.

6. Ka uagu lígira Heowá lun hasigirun gürigia wuribatiña awinwanda?

6 Ka uagu lígira Heowá lun hasigirun gürigia wuribatiña awinwanda? Ladüga ítara, larufuduñein larúeihanrügüñein lan agumadiha buidu. Ámuñegü, lagumuchaguagüdübaña Bungiu gürigia wuribatiña. Lárigiñemeti lira, anhein ebedaagua somu gürigia lun, lagumuchuba lau lau lóufudagun. Gayaraabei layusuruni sun le susereelibei houn gürigia lun larufuduni mosu lan lagumuchun hau gürigia wuribatiña. Mígirundigiaalime lun ñein hamá gürigia wuribatiña.

IDA LIÑA LARUFUDUNI BUNGIU LÍNSIÑEHABU WOUN?

7, 8. Ida liña larufuduni Heowá línsiñehabu woun?

7 Arufuda lumuti Heowá línsiñehabu lidan ámuñegueinarügü igaburi. Samina humá luagun lubuidun burí katei le warihibei lidan lueirin sielu. Anuhein saragu míñunu waruguma luma burí ubóu ñein. Weyu aban tídangiñe waruguma tuguya. Úabei hamuga ibagari ubouagu lun hamuga ua lan Weyu. Kei lariñagun Rómana 1:20, arufuda lumuti sun katei le woun Heowá lan adügübaliwa ani weiri lan lubafu, lichú lau luma línsiñehabu.

Adüga lumuti Heowá Ubóu lun hawinwandun gürigia lau ugundani lidan

8 Aranse lumuti Heowá Ubóu lun gayara lan hawinwandun gürigia ligibuagu ani ru lumutiña gürigia lidan aban lubuidun fuluri-agei. Ruti giñe aban saminaü buiti  houn luma aban úgubu le gayaraati lawinwandun lun súnwandan (aliiha huméi Arufudúni 4:11). Ariñagati giñe Sálumu 136:25 hóugüda lániña Bungiu dandu gürigia kei animaalugu, ladüga magumuchadi lan línsiñehabu.

9. Íbini Heowá lan Lubungiutebei ínsiñeni, ka katei iyereegubei lun?

9 Íbini Heowá lan Lubungiutebei ínsiñeni, iyereeguti sun le wuribabei lun. Ligía lariñagunbei Sálumu 5:4-6 mínsiñe lan wuribani lun ani iyereegu hamá gürigia wuribatiña, hanarimetiña ani yéetiña lun.

MÁLÜHALI SUN LE WURIBABEI AGUMUCHA

10, 11. a) Kaba asusereda houn gürigia wuribatiña yarafa madise? b) Kaba afayeiruahaü líchiga Heowá houn gürigia ha gaganbadibaña?

10 Kei aubei warihei, Heowá lubungiutebei ínsiñeni ani iyereeguti wuribani lun. Ligíati, danme le desidírü lani, lagidarubei sun wuribani. Füramasetu Bíbülia lagumuchuba lan Bungiu hau gürigia wuribatiña, “ánhaña ha hemenigibaña luagu [...] hagíaba laburiña múa”. Füramasetu giñe málühaña lan úa gürigia wuribatiña ubouagu (Sálumu 37:9, 10, 20).

11 Kaba afayeiruahaü líchiga Heowá houn gürigia gaganbaditiña ha eteingirubalin luagu línsiñehabu? Líchuguba aban ibagari buiti houn ámuñegü. Füramasetu Bíbülia: “Galagantehabei gürigia buítiña múa, haganóuba giñe lidan súnwandan” (Sálumu 37:29). Gúndaabaña gürigia ani habagariduba lábugiñe darangilaü (Sálumu 37:11). Ka uagu? Ladüga súnwandan ladügüni Wabungiute le buídutimabei luagu hafulesein lumutuniña. Ariñagatu Bíbülia: “Laragahabei sun háguira; úaalime óunweni ni ayahuni ni íruni ni igarigu”. Úaalime ni kata wuribati (Arufudúni 21:4).

12. Anhein busén wabéi lun larihiniwa Heowá keisi gürigia maduruntiña, ka lunbei wadügüni?

12 Ariñagati Sálumu 37:37, 38 sun lan ha líridun Heowá kei “harumatiña”, o maduruntiña, hawinwanduba lan lidan darangilaü ámuñegü. Ariñagati giñe lagünrinchagubaña lan Bungiu sun ha wuribabaña hama ha maganbadibaña. Anhein busén wabéi larihiniwa Heowá keisi maduruntiña, mosu wasubudiruni ani subudi wameime Liráü, ani lunti giñe gaganbadi wamá lun sun le lariñagubei Heowá (aliiha huméi Huan 17:3). Mosu gunfuranda wamani lagumuchuba lan Bungiu lau ubóu wuribati le yarafa madise, “ánheinti le adügüti lugundan Bungiu, labagariduba lun sun dan” (1 Huan 2:17). Kei le yarafaali lubéi lagumuchagüle ubóu, súdiniti lun wafalaruni adundehani le: “Hemenigibá luagu Aburemei, aganbabéi” (Sálumu 37:34).

KATEI WÉIRITIMATI LE ARUFUDUBALIN LÍNSIÑEHABU BUNGIU

13. Ka katei arufudubalin hínsiñe wamá lun Bungiu?

13 Íbini gafigoun wamá, gayaraati gaganbadi wamá lun Bungiu. Gayaraati giñe lumadagu wamá seremei lani Hesusu sákürifisiu. Láutima sákürifisiu ligía larufudei  Bungiu hínsiñe wamá lun. Óunaha lumuti Liráü lun lounwen, gayara láamuga hesefurun gürigia ha gaganbadibaña lídangiñe figóu luma óunweni (aliiha huméi Rómana 5:12 luma 6:23). Chouru lumuti meha Heowá úaraguabei lan Hesusu ya ubouagu, lugundun arufuda laali meha igaburi ligía sielu luagu saragu dan. Gáriti meha lun Heowá larihini hóuseruni gürigia Lisaani wuriba. Gama lumoun, súnwandan meha lageindagun Hesusu luagu liricha Heowá lun larúeihan. Arufuda lumuti giñe gayara lan úaragua hamá gürigia garaüwarügütiña lun Bungiu íbini lidan lidaani lénrengunga.

Óunaha lumuti meha Bungiu Liráü ladüga wínsiñe lun (Ariha huméi párafu 13)

14, 15. Ka buiti wasagarubei lídangiñe lounwen Hesusu hawagu sun gürigia?

14 Lau sun súfuri lan Hesusu saragu, úaraguati meha lun Bungiu darí lóurate lounwen ani ígira lumuti furangu Lúguchi lan garichabei lun larúeihaniwa. Ida liña san lahuudun lounwen Hesusu woun sun wagía? Ruti chansi woun lun wawinwandun lidan iseri ubóu. Afuranguagüda lumuti apostolu Pábulu arufuda lani sákürifisiu le lueirin ínsiñeni le lasandirubei Heowá luma Hesusu wawagu. Abürühati: “Mama katei ménrengunti lun lígiraguagüdün aban gürigia lungua lun lounwen luagu aban gürigia le richaguati; lau sun anihein lan gürigia gayaraati hamuga lounwen luéigiñe aban gürigia le buiti le tímatimaati. Ánheinti Bungiu, arufuda lumuti lueirin línsiñehabu woun lau lóunahani Hesukrístu lun lounwen wawagu, lau sun meha gafigoungidiwa lan” (Rómana 5:6-8). Abürühati apostolu Huan: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe. Anihán ínsiñenibei: Mama luagu wagía lan hínsiñehabubei lun Bungiu, luagu ligía lan hínsiñehabubei woun, aba lóunahani Liráü [...] lun lounwen, lun lébuname ferudunawa lan wafigoun” (1 Huan 4:9, 10).

15 Ani ariñagati meha Hesusu weiri lan hínsiñe gürigia lun Bungiu darí lun  líchuguni libagari Liráü le ábanrügüti, “lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Íbini gari lan meha lun Heowá, ígirati lun lounwen Liráü wawagu. Arufudati le woun weiri lan wínsiñe lun, ani masansirunbei katei le. Ligía labürühanbei Pábulu: “Chouru numuti lubeiti luagu ua lan ni kata lun lafanreinraguniwa luéi línsiñehabu Bungiu —ni óunweni, ni ibagari, ni ánheligu, ni máfianu, ni katei le guentobei, ni le lunbei liabin, ni le siélubei, ni le ubouagubei, ni burí amu katei le ladügübei Bungiu— siñati lafanreinraguniwa luéi línsiñehabu le larufudubei woun lidan Wabureme Hesukrístu” (Rómana 8:38, 39).

GUMESEELI LARÚEIHAN BUNGIU AGUMADIHA

16. a) Katei san Larúeihan Bungiu? b) Ka líridubei Bungiu lun lagumadihan lidan Larúeihan?

16 Arufuda lumuti larúeihan Mesíasi luagu hínsiñe wamá lun Heowá. Bungiu adügübalin Arúeihani le, ani íridaali aban urúei le hínsiñehabuti houn gürigia ani aranseti lun lagumadihan (Ariñawagúni 8:31). Hesukrístu urúei ligía. Ani anúadiraali Bungiu 144,000 gürigia lun harúeihan luma Kristu sielu. Dan le háguyugun, mabulieidun hamuti ida liña lan meha habagari ya ubouagu (Arufudúni 14:1). Dan le meha ya lubéi Hesusu ubouagu, luágutima Larúeihan Bungiu layanuha lidan apurichihani. Arufudahati meha houn lani disipulugu lun hafurieidun ítara: “Wáguchi Bungiu le siélubei, inebewalá biri. Ñǘbuinla barúeihan; adügüwalá bugundan ya ubouagu kei ladügǘniwa sielu” (Matéu 6:9, 10). Memeniha wanigi warihini lagunfulirun furíei le ani ariha wameime lanügün Larúeihan Bungiu saragu abinirúni houn sun gürigia.

17. Ida liña amu lubéi ligaburi larúeihan Hesusu luéi ligaburi harúeihan wügüriña?

17 Ámuti ligaburi larúeihan Hesusu luéi ligaburi harúeihan wügüriña. Adügaaña gürigia lun ñein lan saragu wuribu luma lun hóunwegun besafu gürigia. Ánheinti Hesusu, hínsiñetiwa lun, ani anihein sun lubuidun ligaburi Heowá luagu; ínsiñeni aban lídangiñe (Arufudúni 7:10, 16, 17). Füramaseti Hesusu: “Higougu numoun, sun huguya ha buchaañabaña uagu lárigi huádigimari luma lihürü hanügün, emeraaguagüda náamugaün. Resibi huméi narufudahan, furendei huguyame númagiñe; lau gaguraasun nan, ñulú tuguya nanigi, ábame hadarirun emeraaguni tun huani. Ménrengunti lun heseriwidun nun, huáliti giñe anügüni le níchugubei hun lun hanügüni” (Matéu 11:28-30). Ma lueirin ínsiñeni le lasandirubei Hesusu wawagu!

18. a) Ka asuseredubei lúmagiñe irumu 1914? b) Kaba wariha lidan le aban arütíkulu?

18 Arufudahatu Bíbülia gumese lan Larúeihan Bungiu agumadiha sielu lidan irumu 1914. Lúmagiñe dan ligía hóundarawaguña hagumuhóun hádangiñe 144,000 ha lúnbaña hagumadihan luma Kristu sielu. Hóundarawaguña giñe ha lúnbaña hásügürün lau ibagari lídangiñe lagumuchagüle ubóu lun hawinwandun lidan Paraísu. Tidan Bíbülia wáwati lun sétanu le “saragu gürigia” (Arufudúni 7:9, 13, 14). Átiriñanu san gürigia lidan sétanu le? Ka lagurabubei Bungiu hámagiñe? Warihibei lidan le aban arütíkulu.