Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Unsu-hati irumu 2015

Arufudaha humá houn hisaanigu buidu: dan le aweinamudeina hamá

Arufudaha humá houn hisaanigu buidu: dan le aweinamudeina hamá

“Anihamémeti Hesusu aweirideina dandu lidan úgubu keisi lidan saminaü, ani richati dandu ligibugiñe Bungiu kei hagibugiñe gürigia.” (LÚKASI 2:52)

UREMU 41 LUMA 11

1, 2. a) Ka hadiheribei saragu agübürigu dan le harihini aweinamudeina haña lan hasaanigu? b) Ka katei buiti gayaraabei hadügüni nibureintiña?

SUN agübürigu ha gefentiña luagu Heowá gúndaatiña dan le habadiseirun hasaanigu. Anuhein aban íbiri gíritu Berenice badiseitiña gádürügubei tisaanigu lubaragiñe hagunfulirun 14 irumu. Ariñagatu dandu lan tuguya kei tani weiriei gunda hamá dan le harihini desidírü hamá sun hasaanigu heseriwidun lun Heowá. Gama lumoun, nidiheritiña meha giñe dan le hasaminarun málühaña lan hasaanigu aweinamuda ani hagagibudaguba lan luma lénrengunga. Anhein gasaanigu hubéi ha hídiña lun haweinamudun, chóuruti sandigua humá giñe hungua ítara.

2 Ariñagati aban sásaamu dan le lan aweinamudeina hamá irahüñü, hénrengu lan ibagari dandu houn kei houn hagübürigu. Añahein agübürigu saminatiña libidiouniganrügüñein lan aau hadüga hasaanigu ani aba lan hóuserun kei irahüñü. Gama lumoun, ariñagati sásaamu ligía lídanñanu lan aban irumudiri le ídanbei busén hamá hadügün saragu katei, gibe lan katei lidan hasaminan ani megei hamá hásügürün dan hama hamadagu. Le linarün katei,  gayaraati hadügün nibureintiña saragu katei buiti. Kéiburi aban lubuidun umadaguaü luma Heowá, kei meha ladügüni Hesusu dan le nibureingili (aliiha huméi Lúkasi 2:52). Gayaraati habuiduragüdüni ligaburi hapurichihan, ani gayaraati giñe haganwoundagüdüni hayumahan lun hadügün katei luagu lufulesein Heowá. Gayaraati giñe desidírü hamá hagía houngua, kéiburi lun hederegeruni habagari lun Bungiu ani gaganbadi hagíame lun. Anhein gasaanigu hubéi irahüñü ha nibureingiña, ida luba híderaguniña lun heseriwidun lun Heowá? Sigí huméi lani Hesusu hénpulu. Ariha waméi ida luba lan harufuduni houn hisaanigu hínsiñe hamá hun, ǘnabugu humá ani gunfuranda humaniña.

ARUFUDA HUMÉI HOUN HISAANIGU HÍNSIÑE HAMÁ HUN

3. Ka meha uagu subudi habalin apostolugu hamada lan Hesusu?

3 Lidan tidaani Bíbülia, mariñagun hamuti meha iyubudirigu houn hadamun ka lan hasaminarubei ni ida liña lan hasandiragun houngua. Ánheinti Hesusu, móuserun lumutiña lani apostolugu ítara. Ariñaga lumuti houn ariha lániña keisi lumadagu, mama keisi lidamun (aliiha huméi Huan 15:15). Hínsiñetiña meha lun saragu, ani arufuda lumuti houn lau lásügürün dan hama luma lau lasubudiragüdüni houn ka lan lisaminanbei luma ka lan lasandirubei. Aganba lumuti meha giñe le habahüdagubei lun luagu le hasaminarubei luma luagu le hasandirubei (Márükosu 6:30-32). Íderagua lumutiña katei le apostolugu lun lumadagu hamá Hesusu ha buítiña luma lun aranseñu hamá lubá wadagimanu le lunbei meha hagunfuliruni.

4. Ida luba gayara lan gamadagua hamá agübürigu hama hasaanigu? (Ariha humóun iyawaü to lídanboun lagumeseha arütíkulu.)

4 Inarüni gayara lan hagumadiruniña hisaanigu. Gama lumoun, gayaraati giñe humadagu hamá. Ida luba hadügüni? Furumiñe, lau hásügürün dan hama. Háfuga mosu lan hasagarun lídangiñe dan le hásügürübei lidan huádigimari o lidan amu katei. Sériuti katei le; ligía lunti lubéi hafurieidun, samina huguyame luagun. Libiaman, houcha humá hasubudiruni ka lan katei hínsiñebei houn hisaanigu. Kéiburi, ka burí lan uremu, pelikula o isebáhari hínsiñetimabei houn. Áfaagua humá lun línsiñedun le hínsiñetimabei houn hisaanigu hun. Ariñagatu aban íbiri italiana gíritu Ilaria aba lan meha hebereserun tagübürigu lau músika le taganbahabei. Seremei katei le, aba tagumeserun arihei túguchi kei besi tumada. Ani ruti katei ligía ichouruni tun lun tayanuhan luma luagu furumiñeguarügü katei. Ligíati, masaminara humá siñaali lanme hagumadiruniña hisaanigu anhaün gamadagua hama o ánhaña híderagua lun gamadagua hamá luma Heowá (Sálumu 25:14). Ariharügü habéi hisaanigu hínsiñe hamá ani inebe hagía hun. Ani ligíaba íchiga ichouruni houn lun hayanuhan huma luagu furumiñeguarügü katei.

5. Ka meha lunbei hadügüni lani Hesusu disipulugu lun gunda hamá?

5 Subudi lumuti meha Hesusu gúndaabaña lan lani disipulugu ánhaña eseriwida lun Heowá ani teni hagía lun hapurichihan. Ligía línchahanbaliña lun hetenirun lun hapurichihan, füramase ligía houn líderagubaña lan adügei wadagimanu le (Matéu 28:19, 20).

6, 7. Ka uagu arufuda habalin agübürigu hínsiñe hamá hasaanigu houn dan le híderaguniña lun hawinwandun keisi kristiánugu?

6 Chóuruti busén humá lun lumadagu hamá Heowá hisaanigu. Ani rúhali gumadi hun lun harufudahan houn luma lun heweridiruniña (Éfesuna 6:4). Ligía lunti lubéi harufudahan katei tídangiñeti Bíbülia houn. Samina huméi le. Ka uagu hóunahaña hisaanigu  leskuela? Ladüga subudi humani lahuuduba lan le hafurendeirubei ñein houn lidan habagari. Ítarameme, lunti hadügüni sun hiyaraati lun meferidirun hamá ni aban adamuridaguni, adamurini o Áhuduraguni keisi Iduheñu. Haritagua huméi le lan hafurendeirubei luagu Heowá gayaraabei lesefuruni habagari. Ligíati, íderagua humaña lun hafurendeirun luagu Heowá luma lun gunfuranda hamani gayaraabei lan larufudahan Heowá houn lun desidírü hamá buidu (Ariñawagúni 24:14). Arufudaha humá giñe houn súdini lan apurichihani. Sigí huméi lani Hesusu hénpulu ani íderagua humaña lun línsiñedun houn hayanuhan tuagu Bíbülia hama amu gürigia.

7 Dan le barǘ wamani wabagari keisi kristiánugu buítiña héchutiwa aturiahoun Bíbülia, adamuridagua luma apurichiha. Ka uagu buidu lubéi hadügüni nibureintiña sun le? Ariñagatu aban íbiri sudáfrikana mínsiñe lan meha taturiahóun Bíbülia ni tun ni houn tamulenu mínsiñe ligía houn houdin adamuridagua ni apurichiha. Anihein meha dan, dürügua hamani haturiahanu Bíbülia kei iduheñu mébunouga. Gama lumoun, sigitiña hagübürigu adügei aturiahani keisi iduheñu. Guentó, ariñagatu weiri lan teteingiruniña tagübürigu luagu harufuduni tun súdiniti lan leseriwidúniwa lun Bungiu. Uguñe weyu, dan le siñá lan tidin lidan somu adamuridaguni o apurichiha, áfaaguatu lunya tadügüni lau lóufudagun.

ARUFUDA HUMÉI HOUN HISAANIGU ǗNABUGU HUMÁ

8. a) Ida liña meha larufuduni Hesusu ǘnabugu lan? b) Ka meha lánibei ǘnabuguni le larufudubei Hesusu efekütu hawagu disipulugu?

8 Íbini meha mafigoun lan Hesusu, ǘnabuguti meha ani ariñagati houn lani disipulugu megei lani lídehan Heowá (aliiha huméi Huan 5:19). Madügünti katei le lun leferidirun inebesei le hasandirubei luagu. Eibu meha harihini lamuriahan ídemuei luma Heowá, ábatima meha hafiñerun luagu. Lau lásügürün dan, aba háyeihani lani hénpulu ani aba ǘnabugu hamá kei ligía (Adügaü 3:12, 13, 16).

Anhaün ánhara lun hichara, inebetimabadün houn hisaanigu

9. Ka uagu buidu lubéi ǘnabugu humá ani anha hugíame luagu chará humá?

9 Furanguti mítaran humá kei Hesusu, le meha madügünbei ni aban charati. Siñati hadügüni sun katei buidu. Ligíati, danme le hachararun, ǘnabugu humá ani ánhara humá lun hichara (1 Huan 1:8). Ladügüba lubuidun hani hénpulu lun giñe hánharun hisaanigu lun hachara, inebetima huguyame houn. Lugundun ka inebetimabei hun? Aban iyubudiri le ánharuti lun lichara, o aban le máhabei lánharun luagu chará lan ani mamuriahan ligía ferudun? Ariñagatu aban gefentu luagu Heowá gíritu Rosemary súnwandan lan meha háfaagun lun hánharun dandu tugía kei tani weiriei lun hachara hagibugiñe hasaanigu. Ariñagatu ligía lan meha ídehabei lun manufude hamá hasaanigu habahüdaguni haturóbulin houn. Súnwandan meha harufudahan houn ánhaña lan gaturóbulin, buiti lan lun hafurieidun lun Heowá luma lun háluahan ariñahani tidan burí wani agumeiraguagüdüni tídangiñetu Bíbülia.

10. Ida liña meha larufuduni Hesusu ǘnabugu lan íbini dan meha le lariñaguni houn disipulugu ka lan lunbei hadügüni?

10 Ibihati meha Hesusu ubafu lun lariñaguni houn lani disipulugu ka lan lunbei hadügüni.  Gama lumoun, kei ǘnabugu lubéi, súnwandan meha lafuranguagüdüni houn ka lan uagu lunti lubéi hadügüni. Kei hénpulu, ariñagati houn: “Áluaha huméi larúeihan luma liricha Bungiu furumiñe”. Lárigiñe aba lafuranguagüdüni houn kaba lan meha habiha lárigiñe. Ariñagati houn: “Ábame líchuguni [Bungiu] sun le hemegeirubei hun”. Lidan amu dan, ariñagati houn: “Míchiga humá hadurun amu, michugúnwa láamuga giñe hidurun, ladüga kei ligaburi híchugun hadurun amu, ítara luba giñe lichugúniwa hidurun” (Matéu 6:31–7:2).

11. Ka uagu buidu lubéi hafuranguagüdüni houn hisaanigu ka lan uagu desidírü hubéi somu katei?

11 Sagü desidírü humá aban katei le lunti gani lan efekütu lidan habagari hisaanigu, áluaha huméi chansi le buídutimabei lun hafuranguagüdüni houn ka lan uagu hadügei. Ítara, ménrenguntimabei houn gaganbadi hamá hun. Ariñagati aban Gefenti le háguchi gádürü nibureintiña afiñetima hamá nibureintiña hawagu hagübürigu dan le hafuranguagüdüni houn ka lan uagu desidírü habéi somu katei. Íderagua lumutiña katei le lun gunfuranda hamani garicha hamá hagübürigu lun desidírü hamá ladüga hínsiñe hamá houn. Haritagua huméi mámaaña lan irahüñü. Hafurendeiruña asaminara luma lun desidírü hamá hagía houngua (Rómana 12:1). Afuranguagüdati giñe úguchili le buga uágubei wayanuha megei hamá nibureintiña hafurendeirun árügüdagua houngua dan le desidírü hamá somu katei luéi hígiraguagüdün houngua lun le hasandirubei (Sálumu 119:34). Ligíati, ǘnabugu humá, ani ayanuha humá furangu hama hisaanigu. Ábame hafurendeirun lídangiñe lubuidun hani hénpulu. Harihibei giñe inebe hamá hun ani gumeseedün lan óuseraña kei gürigia wéinamuhaña.

ARUFUDA HUMÉI HOUN HISAANIGU GUNFURANDA HUMANIÑA

12. Ida liña meha líderaguni Hesusu Féduru?

12 Súnwandan meha subudi lani Hesusu ida luba lan líderaguniña lani disipulugu. Kéiburi dan le lariñagunbei houn lafarúba lan hilagubei, aba lariñagun Féduru lun lun lanügüni katei lau lámarun. Subudi lumuti meha Hesusu ladüga lan línsiñe lun Féduru lariñagunbalin dimurei ligía lun. Gama lumoun, subudi lumuti meha giñe mabuidun lan le lasaminarubei. Ida liña meha líderaguni Hesusu Féduru ítara kei líderaguniña ha híbiri disipulugu? Furumiñe, aba lererehan lun. Lárigiñe, aba lafuranguagüdüni kaba lan asusereda houn ha maganbadibaña lun Heowá dan le anihein lan turóbuli. Lárigiñe, aba lariñagun labinirubaña lan Heowá ha adügübaña sákürifisiu lun heseriwidun lun (Matéu 16:21-27). Gunfuranda lumuti meha Féduru le lariñagubei Hesusu (1 Féduru 2:20, 21).

13, 14. a) Ida luba hasubudiruni anhein megei lubéi somu hisaani ídemuei lun léredagüdüni lafiñen? b) Anhein busén hubéi hasubudiruni ida luba lan híderaguniña hisaanigu, ka lunbei hadügüni?

13 Amuriaha humá luma Heowá lun líderagunün lun gunfuranda humaniña hisaanigu luma lun hasubudiruni ida luba lan híderaguniña (Sálumu 32:8). Háfuga harihin hiru lan aban hádangiñe o wuriba lan layanuhan hawagu íbirigu. Háfuga híchugun fe anihein lan somu katei mabahüdahan lumuti hisaani hun. Mafureseha humá asaminara ladügüña lan somu katei wuribati aramudaguarügü. * Gama lumoun, marufuda humá mebereseni lun lituróbulin hisaani, o hasaminarun laranseruba lan turóbuli sin hadügün ni kata. Háfuga mégeibei hisaani ídemuei lun lederebudagüdüni lafiñen.

Íderagua humaña hisaanigu lun hadügün umadagu lidan damuriguaü (Ariha huméi párafu 14)

14 Anhein busén hubéi hasubudiruni ida luba  lan híderaguniña hisaanigu, adüga humá álügüdahani houn lau duari luma lau inebesei. Gayaraati konparárua lan le luma ladaburawagún duna wélurugugiñe. Anhein madügün humá lau duari luma gurasu, gíbebei duna áwiyuruti huéi. Ligíati, danme le hálügüdüniña hisaanigu, duari humá ani gaguraasun hugíame. Anhein madügün humá ítara, siñabei hasubudiruni ka lan hasaminarubei luma ida liña lan hasandiragun houngua (aliiha huméi Ariñawagúni 20:5). Lidan párafu 4, ayanuhatiwa tuagu aban Gefentu gíritu Ilaria. Haritagua tágili dan lan meha nibureingiru, busentu meha tásügürün saragu dan hama tupanaagu dan le mama lan heresibirúña külase. Ani kei meha subudi tani wuriba lan katei ligía, wuribati meha tasandiragun tungua. Ariha hamuti tagübürigu nidiheri tan luagu somu katei. Aban weyu, aba hariñagun tun hiru lan harihinu, ani aba hálügüdünu ka lan mégeibei. Aba tayahun, aba tabahüdaguni le asuseredubei ani aba tamuriahan ídemuei hama. Aba hóuburunu, aba hariñagun tun gunfuranda hamanu ani aba füramase hamá tun híderaguboun lan. Lau lóufudagun, aba hagumeserun íderaguoun lun tadügün umadagu lidan damuriguaü.

Teni humá lun lubuidun hagaburi hisaanigu ani ariñaga humá houn buidu lan hadüga

15. Ida liña larufuduni Hesusu gunfuranda lániña gürigia?

15 Arufuda lumuti meha Hesusu gunfuranda lániña lani disipulugu lau letenirun lun igaburi buiti le hawagubei. Kéiburi dan le laganbunbei Natanaéli nasarétüna lan Hesusu, aba lariñagun: “Anihein funagia Nasarétüna buiti?” (Huan 1:46). Lun hamuga ñéinñadün lan, hasaminaruña hamuga san wuriba lan ligaburi Natanaéli, lougua ligía lafiñen? Masaminarunti meha Hesusu ítara. Gunfuranda lumuti meha le lasaminarubei Natanaéli ani buidu lan ligaburi. Ligía lariñagunbei: “Anitén aban ladügawagun Ísüraeli le tímatimaati; úati yeeguaü lidan” (Huan 1:47). Gayaraati meha lasubudiruni Hesusu le hasaminarubei gürigia, ani furanguti teni lan meha lun igaburi buiti le hawagubei.

16. Ida luba híderaguniña hisaanigu lun buídutima lan hadügüni katei?

16 Furanguti siñati lan hasubudiruni ka lan  hasaminarubei hisaanigu, gama lumoun, gayaraati houchun gunfuranda humaniña. Líderagubadün Heowá lun harihini lubuidun hagaburi. Ánhañati acharara hisaanigu, mariñaga humá wuriba hamá o máraninaali lan hawaguti. Moun lumuti ni lun hasaminaruni. Buítimati lun hariñagun houn ariha humani igaburi buiti le hawagubei ani subudi humani busén hamá hadügüni katei keisi lubudubu. Teni humá lun sun áfaaguni le hadügübei lun habuiduragüdüni hagaburi ani ariñaga humá houn buidu lan hadüga. Dánmeti hadarirun chansi, ru humá amu burí buligasion houn lun hasigirun awansera. Ligía meha ladügübei Hesusu hama lani disipulugu. Aban irumu dimí lárigiñe lasubudiruni Hesusu Natanaéli (o Bartolomé) aba lanúadiruni keisi apostolu. Ani gúnfuliti meha Natanaéli lau luadigimari buidu (Lúkasi 6:13, 14; Adügaü 1:13, 14). Ligíati, sigí huméi lani Hesusu hénpulu. Madüga humá lun hasaminarun hisaanigu madügadi hamá ni kata buiti. Rúrügü humá gurasu houn ani ariñaga huméi houn buidu lan hadüga. Ariñaga huméi houn dandu lan huguya kei Heowá gúndaatün lau harihini áfaaguni le hadügübei, ani gayara lan hayusuruni iyarani le hawagubei lun heseriwidun lun Heowá.

ARUFUDAHA HUMÁ HOUN HISAANIGU BUIDU ÁBAME GUNDA HUMÁ

17, 18. Anhaün arufudaha houn hisaanigu buidu, ka gayaraabei hibihini?

17 Íderaguati apostolu Pábulu besafu kristiánugu lun hasubudiruni Heowá. Ítara liña meha kei aban úguchili le hínsiñehabubei houn ani samina ligía hawagun. Mabusenrunti meha lun lígiruni ni aban hádangiñe leseriwidun lun Heowá (1 Korintuna 4:15; 2 Korintuna 2:4). Háfuga anihein lan dan weiri lan hidiheri hawagu hisaanigu kei meha Pábulu. Samina humá luagun le lariñagubei aban Gefenti gíriti Victor. Lárigiñebei lagüriahaniña ǘrüwa lisaanigu, ariñagati íbini lan meha hénrengu lan dan le ásügürübei dan le aweinamudeina habéi lisaanigu, gíbetima lan ugundani sügǘ lau íruni. Lau lídehan Heowá, dandu ligía kei lani weiriou ibihatiña hadügün umadaguaü hama hasaanigu.

18 Agübürigu, subudi wamuti hínsiñe hamá hisaanigu hun ani áfaagua humá lun harufudahan houn. Mabuchadalá huagu. Samina humá luagun ugundani le lunbei hasandiruni danme le desidírü hamá hisaanigu heseriwidun lun Heowá lun súnwandan (3 Huan 4).

^ par. 13 Hadariruba ariñahani súdiniti tidan líburu Los jóvenes preguntan, volumen 1 páhina 317, luma lidan volumen 2 tídangiñe tuguyameme líburu, páhina 136 darí 141.