Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Diisi-hati irumu 2015

Seriwi wamá lun Heowá sin leberesehaniwa ni kata

Seriwi wamá lun Heowá sin leberesehaniwa ni kata

Aba tañuurun [María] lubadu Hesusu lun taganbuni le lariñagubei; ánhounti Marta, wéiriti tetenirun lun tuberesegun.” (LÚKASI 10:39, 40)

UREMU 40 LUMA 55

1, 2. a) Ka meha uagu hínsiñe tubéi Marta lun Hesusu? b) Ka idan tacharara Marta?

KA MEHA san tuwuyeri gürigia Marta, to litu Lásaru? Ariñagatu Bíbülia buidu lan meha lumadagua Hesusu tuma ani hínsiñetu lan meha lun saragu. Ani añahein meha giñe amu würiña ha únbaña larufuda Hesusu ínsiñeni luma inebesei. Kéiburi María, to aban litu Lásaru. Hínsiñetu meha giñe María, to lúguchu lun (Huan 11:5; 19:25-27). Gama lumoun, ka meha san uagu hínsiñe tubéi Marta lun Hesusu?

2 Hínsiñetu meha Marta lun Hesusu ladüga aban tan würi areidatu ani benefatu, ani ligibuagun lira, wéiriti meha tafiñen. Chouru tumuti meha luagu Hesusu lan Mesíasi le füramase wáalibei ani afiñetu meha luagu sun le larufudahabei (Huan 11:21-27). Ani íbini ítara, gafigountu meha ani anihein meha dan tachararun. Kéiburi dan le lídinbei Hesusu ebeluha túbiñe Marta tuma María, aba tagañidun Marta tuma María to tamulelua ani aba tariñagun lun Hesusu: “Nabureme, meberesentibu san lau tígirunina namulelua adügei sun beresegu nábugua? Ariñagabá  tun lun tíderagunina” (aliiha huméi Lúkasi 10:38-42). Ka san uagu tagañida Marta? Ani ka wafurendeirubei lídangiñe óunabagülei le líchugubei Hesusu tun?

ABA TETENIRUN MARTA LUN AMU KATEI

3, 4. a) Ka meha uagu lariñaga Hesusu tun María buidu lan tadüga? b) Ida liña meha tóunabun Marta? (Ariha huméi dibuhu le lídanbei lagumeseha arütíkulu.)

3 Wéiriti meha leteingiruniña Hesusu Marta tuma María luagu hamisurahani eiga hábiñe, ligía aba lubéi lagumeserun arufudaha saragu katei súdiniti houn. Busentu meha María tafurendeiruni sun le tiyaraati lúmagiñe Máisturu le Wéirigutimabei, ligía aba lubéi tañuurun aganbahei. Ánhounti Marta, ka tadügübei? Gayarati hamuga meha giñe tígiruni tifisiute lun taganbuni Hesusu. Ani chóuruti lariñaguña lan hamuga Hesusu tun buidu lan tadüga.

4 Gama lumoun, lubaragiñe hamuga tañuurun aganbaha, aba tidin adüga amu katei. Bereseguñoun meha ábougua luma adüga saragu katei lun lasandiragun Hesusu lungua buidu. Dan le tarihinbei míderagun tanu María, aba tagañidun ani aba tariñaguni lun Hesusu. Subudi lumuti meha Hesusu gibe lan tifisiute Marta. Ligía lariñagunbei tun lau ínsiñeni: “Marta, Marta, nidiheritibu ani bafuuduña luagu saragu katei”. Ani ariñagati giñe tun buídurügüti lan hamuga tadügün aban éigini sensiyuti. Larigiñe, aba lariñagun tun María buidu lan tadüga lau tañuurun aganbei. Aba lariñagun anúadira tani María lubuidun-agei katei le lunbei magidarúnbei lan tuéi. Lau lásügürün dan, háfuga aba lan tabulieiduni María ka lan téigibei weyu ligía, ánheinti sun katei le lariñagubei Hesusu, chóuruti mabulieidun tani. Lóugiñe 60 irumu lárigiñe, ariñagati apostolu Huan weiri lan hínsiñe Marta tuma María lun Hesusu (Huan 11:5). Ligía subudi wabalin luagu resibi tani Marta ladundehan Hesusu ani aba teseriwidun lun Heowá lau úaraguni lidan sun tibagari.

5. a) Ka uagu hénrengu lubéi woun uguñe weyu weseriwidun lun Heowá sin ni kata le adarasahatiwa? b) Kaba burí álügüdahani wóunaba lidan arütíkulu le?

5 Kei aubei warihei, lidan tidaani Bíbülia anihein meha katei le gayarabei ladügün lun hadireirun lubúeingu Bungiu luéi katei le súdinitimabei. Gama lumoun, gíbetimahali katei uguñe weyu le gayarabei leberesehaniwa lidan weseriwidun lun Bungiu. Ariñagatu meha garüdia La Atalaya to lánina 1 lidan gádürü-hati irumu 1959 mosu lan hóunigiragun kristiánugu houngua lun madügün lan iseri burí katei le áfuridubei lun hadireirun. Íbini lidan dan ligía genegeti meha sagü lan weyu láfuridun iseri katei. Wéiriti meha hayusurun gürigia garüdia, radiu tuma bigibigitu. Ariñagatu meha garüdia La Atalaya eibu lanme layarafadun lagumuchagüle ubóu, láfuriduba lan iseri burí katei le lunbei ladügün lun metenirun wamá lun le súdinitimabei. Ani ligía asuseredubei. Anihein saragu katei uguñe weyu le gayarabei líweruhani wadaani. Ka gayarabei wadügüni lun wafalaruni tani María hénpulu lun weseriwidun lun Heowá sin leberesehaniwa ni kata?

YUSU WAMÉI UBÓU LAU DUARI

6. Ida liña hayusuruni lumutuniña Heowá iseri burí katei le áfuridubei lun hapurichihan?

6 Yusu hamaali lubúeingu Heowá iseri burí katei le áfuridubei lun hapurichihan. Kéiburi lubaragiñe Furumiñeti Wuribu Wéiriti apurichihatiwa lau aban programa le gaganabei dibuhu le gakolorunti, amuri luma bidéu. “Foto-Drama de la Creación” meha líribei.  Lau programa ligía furendeitiña saragu míñunu gürigia lidan saragu ageiraü luagu málühali lan Hesusu anüga darangilaü ubouagun. Lárigiñe, aba wayusurunu radiu lun wanügüni uganu luáguti Larúeihan Bungiu houn saragu míñunu gürigia lidan sun ubóu. Guentó yusu wamuti Internet lun wapurichihan houn sun gürigia, íbini houn ha erederubaña lidan fulasu le díseti.

Mígira wamá lun leberesehani amu katei weseriwidun lun Heowá (Ariha huméi párafu 7)

7. a) Ka uagu lunti lubéi duari wamá lidan wayusuruni ubóu? b) Ka burí katei lunbei wadügüni lau duari? (Ariha huméi abürüdǘni.)

7 Ariñagati apostolu Pábulu lun lan wawinwandun kamá “madan” lumutiwa ubóu (aliiha huméi 1 Korintuna 7:29-31). Ligía lunti lubéi duari wamá lun másügürün wamá saragu dan etenira lun katei burí le lídanbei ubóu. Inarüni mariban lan súngubei. Gama lumoun, anhein mafalarun wamá eweridihani le líchugubei Pábulu, gayarabei ladügün katei burí le lídanbei ubóu lun weferidirun saragu dan. Ábameti metenirun wamá lun le súdinitimabei: weseriwidun lun Heowá (aliiha huméi Éfesuna 5:15-17). Ka idan gayara lan weferidiruni wadaani? Lidan isebáhari, lidan taliihóun líburu burí, taríawagun bigibigitu, ebeluhani, agañeinhani, lounahóun uganu luagu gágamuru, laríawagun ñunsu luma huraraü o lidan laluahóun iseri burí máhina le áfuriduti luma amu burí katei. Añahein gürigia wéiriti hetenirun lun katei burí le (Apurichihati 3:1, 6). *

8. Ka uagu lunti lubéi Heowá lan ínsiñeda woun, mama katei burí le lídanbei ubóu?

8 Busenti Satanási lun wetenirun lun katei burí le lídanbei ubóu le luma lun wígiruni weseriwidun lun Heowá. Hóuchati meha ladügüni houn furumiñetiña kristiánugu, ani láluguña giñe ladügüni woun (2 Timotéu 4:10). Gama lumoun, ariñagatu Bíbülia lunti lan línsiñedun Heowá woun, mama katei burí le ubouagubei. Ka uagu? Ladüga ítararügübei gaganbadi wamá lun ani ábame  lumadagu wamá (1 Huan 2:15-17). Ligía lunti lubéi warihini anhein línsiñeduña lubéi katei burí le lídanbei ubóu woun. Ani anhein ítara liña lubéi, adüga waméi asansiruni le wemegeirubei.

TENI WAMÁ LUN LE SÚDINITIMABEI

9. a) Ka meha katei lunbei hetenirun lani Hesusu disipulugu lun? b) Ka hénpulu líchugubei Hesusu houn?

9 Kei aubei warihei, arufudahati Hesusu tun Marta lun meferidirun tani tidaani luagu katei le úati súdini lan. Ani arufudahati giñe aban katei ítarati houn lani disipulugu. Ínchaha lumutiña lun hetenirun lun Larúeihan Bungiu luma lun heseriwidun lun Heowá (aliiha huméi Matéu 6:22, 33). Ruti giñe aban hénpulu buiti houn, ladüga míbeti meha lumegegun Hesusu. Mábangubeiti meha ani mafulasun ligía (Lúkasi 9:58; 19:33-35).

10. Ka hénpulu buiti líchugubei Hesusu?

10 Mígirunti meha Hesusu lun ñein lan somu katei le adarasahati luéi lapurichihan. Lidan aban ókaasion, apurichihati meha lidan uburugu Kafarünaumu (Capernaum). Dan le lásurunbei lapurichihan, gíbetiña yebe óuchutiña hadügün lun lerederun saragu dan hama. Ka san ladügübei Hesusu? Aba lafuranguagüdüni houn mosu lan lidin lidan amu burí uburugu lun lasigirun apurichihei Larúeihan Bungiu (Lúkasi 4:42-44). Ani ligía ladügübei. Éibugati Hesusu lidoun burí fulasu díseti lun lanügüni uganu houn sun gürigia ha liyaraatiña. Ani íbini meha mafigoun lan, nadagimeinti meha saragu darí lun anihein lan dan labuchadun luagu ani mósuha lemeraagun (Lúkasi 8:23; Huan 4:6).

Arufudahati Hesusu ánhawa lan adiherida saragu luagu umegeguni, gayarabei lan wígiruni weseriwidun lun Bungiu

11. a) Ka meha ladügübei Hesusu dan le lamuriahanbei aban wügüri ídemuei luma lun laransehan aban turóbuli? b) Ka meha larufudahabei Hesusu houn lani disipulugu?

11 Luagu aban weyu, larufudahaña meha Hesusu somu katei súdiniti houn lani disipulugu. Sódini, aba lachülürün aban wügüri amuriaha ídemuei luma lun laransehan aban turóbuli lidan libagari. Lariñaga wügüri ligía lun: “Máisturu, ariñagabá lun níbugaña lun líchuguni nufanran nun lídangiñe alagan”. Gama lumoun, míderagun lumuti Hesusu wügüri ligía. Ka uagu? Ladüga larufudahaña meha houn lani disipulugu ani mabusenruti lun leberesehani ni kata. Yúsurügü lumuti le asuseredubei lun larufudahan houn ánhaña lan adiherida saragu luagu umegeguni gayarabei lan ladireirun hasaminan luagu amu katei ani ábame hígiruni heseriwidun lun Bungiu (Lúkasi 12:13-15).

12, 13. a) Ka ladügübei Hesusu ténpulurugu Herusalén? b) Ida liña meha lóunabun Hesusu dan le lariñagunbei Felipe lun busén hamá fiú gürigia hasubudiruni?

12 Hénrenguti meha lagumuhóun burí weyu le lásügürübei Hesusu ubouagu (Matéu 26:38; Huan 12:27). Subudi lumuti meha lasufuriruba lan saragu ani lóunweba lan. Gama lumoun, subudi lumuti meha giñe mosu lan ladügün saragu katei lubaragiñe lafarún hilagubei. Kéiburi seingü weyu lubaragiñe lounwen, aba lebelurun Herusaléun wariñu luagu aban burigü.  Gíbetiña gürigia eresibiruti kei harúeite (Lúkasi 19:38). Larugan, aba labugaguniña Hesusu alugurahatiña ha eyeehabaliña gürigia lun hagañeirun seinsu ténpulurugugiñe (Lúkasi 19:45, 46).

13 Ñǘdünhaña meha fiú güriegu Herusalén lun hefeduhani Luéyuri Emeraaguni hama huríu. Dan le harihinbalin le ladügübei Hesusu ténpulurugu, aba taweiridun hanigi. Ligía aba lubéi hálügüdüni apostolu Felipe anhein gayara lubéi harihini Hesusu lun hayanuhan luma. Máhati Hesusu. Mabusenrunti meha lasubudirun gürigia ha lúntiña híderaguni. Súdinitimati meha lun ladügüni le lariñagubei Heowá lun, lidan amu dimurei, lun lounwen wawagu. Ábati laritaguagüdüni houn lani disipulugu málühali lan ounwe ani mosu lan giñe aranseñu hamá lánigu lun furumiñeguarügü katei. Ani aba lariñagun houn anhein lan aranse habéi lun híchuguni habagari, líchuguba lan Heowá ibagari magumuchaditi houn. Chóuruti ru lani Felipe lubuidun uganu ligía houn güriegu (Huan 12:20-26).

14. Íbini aba lan letenirun Hesusu apurichiha, ka amu katei ladügübei lidan libagari?

14 Dan le meha ya lubéi Hesusu ubouagu, aba meha letenirun apurichiha. Ani íbini ítara, sagati meha dan lun ladügün amu burí katei. Subudi wamuti ñüdün lan íbini lidan aban maríei, ani aba lasaliraguagüdün duna diweinme (Huan 2:2, 6-10). Ánhati giñe lidin eiga hábiñe lumadagu ha amisurahabalin luma hábiñe amu burí gürigia ha busenbaña haganbuni larufudahan (Lúkasi 5:29; Huan 12:2). Le súdinitimabei súnwandan lan lasagarun dan lun lafurieidun, lun lasaminarun luma lun lemeraagun (Matéu 14:23; Márükosu 1:35; 6:31, 32).

MÍGIRA WAMÁ LUN LEBERESEHANI AMU KATEI WESERIWIDUN

15. a) Kei lariñaguni apostolu Pábulu, ka lunbei wadügüni wagía kristiánugu? b) Ka hénpulu buiti líchugubei Pábulu woun?

15 Ariñagati apostolu Pábulu ítara waña lan kei éibaagutiña lidan aban éibaaguni le migifeti. Anhein busén wabéi wagumuchuni éibaaguni, mosu wagidaruni sun katei le gayarabei ladarasahaniwa o lararamuniwa (aliiha huméi Ebüréu 12:1). Ani Pábulu guánarügü íchugubei aban hénpulu buiti woun. Gayarati hamuga meha aban lan lábuti relihión le rísiti ani le subudiwati. Gama lumoun, aba lígiruni sun katei ligía lun letenirun lun katei le súdinitimabei. Yusu lumuti libagari lun lapurichihan ani aweiyasuhati lidoun saragu fulasu, kéiburi Siria, Liraüraü Asia, Masedónia luma Hudéa. Busenhali meha libihini lafayeiruaha lánina ibagari magumuchaditi sielu. Ligía lariñagunbei: “Le nadügübei, nabulieiduni sun le erederubei árigi lun náfaagun lun nárügüdüni le nigibugiñebei, lun nachülürün lumoun lébeha éibaaguni, ani resibineime le lunbei líchuguni Bungiu sielu lun le agañeiruti” (Filipuna 1:10; 3:8, 13, 14). Ani kei le meha mamarieidun lan, gachansinti meha lun leseriwidun lun Bungiu sin ni kata le gayarati ladarasahani (1 Korintuna 7:32-35).

Ígira lumuti Pábulu chansi lun aban lan wügüri rísiti ani le subudiwati ani aba letenirun adügei katei le súdinitimabei

16, 17. a) Dandu anhein maríeihadiwa lubéi o mamarieidungidiwa lan, ida luba wafalaruni lani Pábulu hénpulu? b) Ida liña hafalaruni aban feru maríeitiña ha awinwandubaña Gales lani Pábulu hénpulu?

 16 Uguñe weyu, desidírühaña fiú lubúeingu Heowá herederun mamarieidunga lun haganwoundagüdüni heseriwidun lun Heowá (Matéu 19:11, 12). Libe-agei dan, míbeti hani ha mamarieidungiñabaña buligasion kei ha maríeihañabaña. Gama lumoun, dandu anhein maríeihadiwa lubéi o anhein mamarieidungidiwa lubéi, lunti wáfaagun lun ua lan ni kata adarasahatiwa luéi weseriwidun lun Heowá. Háfuga mégeibaña fiú wádangiñe hasansirun somu échuni lun mewesirun hamani hadaani ani lun gayara lan haganwoundagüdüni heseriwidun lun Heowá.

17 Ayanuha wamá luagu Mark tuma Claire, aban feru maríeitiña lídangiñetiña ageiraü le gíribei Gales (Reino Unido). Aba heseriwidun kei prekursorugu dan le hagumuchunbalin haturiahan, dan le meha mamarieidungiña. Dan le hamarieidunbei, aba hasigirun eseriwida kei prekursorugu. Ani busengiña meha haganwoundagüdüni heseriwidun, ligía aba lubéi desidírü hamá lun sensiyu lan habagari. Ariñagati Mark aba lan hígirunu haban lau ǘrüwa rumu tidan luma hawadigimari. Adügati meha katei ligía lun gayara lan heseriwidun lidan tábunawagun Muna lánina Adamuridaguni lidan sun ubóu. Lidan lagumuhóun 20 irumu ídehaaña lidan tábunawagun Luban Adamuridaguni lidan saragu ageiraü Áfürika. Anihein dan harihini gumumémeli lan haseinsun, gama lumoun súnwandan lóunigiruniña Heowá. Ariñagatu Claire weiri lan hagundan lau hayusuruni habagari lun heseriwidun lun Heowá. Lidan sun irumu burí le adügaaña umadagu buítiña ani memegeirungili ni kata houn. Ariñagatu giñe ni kata lan katei burí le hígirubei dan le konparárü hamani luma leseriwidúniwa lun Heowá lidan dan dayarüti. Ani ligiaméme hariñagubei saragu lubúeingu Heowá ha eseriwidubaña lun lidan dan dayarüti. *

18. Ka álügüdahani lunbei wadügüni wóuniwagua?

18 Súngubei wagía lunti wálügüdagun woungua: “Lunti san naganwoundagüdüni ubebeni le aubei neseriwida lun Heowá? Nígiruña san lun ladügün amu burí katei lun nadireirun luéi le súdinitimabei? Anhein ítara liña lubéi, ka asansiruni lunbei nadügüni?”. Háfuga mosu buídutima lan waliihanu luma waturiahanu Bíbülia. Warihibei lidan leweñegua arütíkulu ida luba lan wadügüni.

^ par. 17 Anihein meha aban bísinisi buiti hama Hadyn tuma Melody lidan ageiraü le gíribei Australia, ani aba hígiruni lun heseriwidun lidan dan dayarüti. Dan le heseriwidunbei kei misionerugu India, aba herederun maseinsunga. Hínsiñeti hamuga san hun hasubudiruni ka lan hadügübei? Aliiha humá hawagu tidan garüdia La Atalaya to lánina 1 lidan ǘrüwa-hati irumu 2006.