Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Diisi-hati irumu 2015

“Nayarafahóun lun Bungiu, ligía lubuidun-ágeibei katei nun”

“Nayarafahóun lun Bungiu, ligía lubuidun-ágeibei katei nun”

DAN le nagunfulirunbei nefu irumu aba maweiridunhadina lan. Guenlé 43 irumu nau ani ábanrügüñein méturu (ǘrüwa ugudi) nigagubun. Aba hariñagun nagübürigu nun lun nawadigimaridun lun merederun nan asaminara luagun liñüraü núgubu súnwandan. Ligía aba lubéi nagumeserun aluguraha furuda ñein tigibugiñe waban. Kei le haruma lubéi nakipuruni fulasu le ñein lubéi naluguraha, gíbetiña meha gürigia agañeinhatiña numa.

Gama lumoun, mama meha wadagimanu láraninabei nituróbulin. Wéiriti meha niñüraü darí lun siñá lan nararamun luagu funedera dan le nidin chápurugu. Hounti meha gürigia ha gágubutiña nuéi ladügǘwa sun katei, ani hírutina meha luagu katei le. Gama lumoun, dan le meha 14 irumu nau, aba lasansirun ligaburi narihini katei.

Luagu aban weyu, aba hachülürün bián Gefentiña agañeinha furuda numa. Aba hariñagun nun gayara lan híchugun külase tídangiñeti Bíbülia nun, ani aba nánharun. Arufudahatiña nun súdinitima lan nafurendeirun luagu Heowá sügǘ lau ligaburi narihín. Ligía íderagubalina saragu. Aba línsiñedun le lariñagubei Sálumu 73:28 nun saragu. Lidan furumiñeti fánreinti ariñagati: “Nayarafahóuba lun Bungiu, ladüga anihán lubuidun-ágeibei katei nun”.

Lidan dan ligía Costa de Marfil meha nawinwanda hama niduheñu. Héchuhaña meha gürigia arihana ñein. Gama lumoun, aba wáguyun lidoun aban fulasu gíriti Burkina Faso, ani aba lasansirun nibagari saragu. Súnwandan meha herederun gürigia aríaguana, ligía aba lubéi máfuridun nan. Fiú dimaasu lárigiñe, aba naritaguni weiri lan meha línsiñe nun nafurendeirun luagu Heowá. Gama lumoun, úati meha íchuguti aturiahani nun Burkina. Ligía aba lubéi nabürühan tidoun hani gefentiña luagu Heowá áfisi, ani aba hóunahan aban misionera gíritu Nani lun tíderagunina. Chülütu íbiri tugía arihana tidan aban moto.

Lauti meha múa üma le ñéingiñe lubéi wásügüra lun woudin wábiñoun, ani hénrenguti meha leibugún ñéingiñe. Ani dan le meha láhuyun huya, aba labuinchun lau baribarabu. Héiguatu meha Nani tuéigiñe moto saragu wéiyaasu dan le tidin wábiñoun, ani íbini ítara súnwandan meha tidin. Aban weyu aba tamisurahanina lun nidin tuma tidan Luban Adamuridaguni. Ibidiñeti meha nun ida luba lan nóunabunu, lugundun mosu meha náfuridun núbiñegiñe ani awandaneime haríagunina gürigia. Ani hénrengutimabei meha tun Nani tabugahanu moto ánhana ádina tuma. Ani íbini ítara, aba nánharun. Ragütina ganigi dan le naritaguni libiaman fánreinti lidan Sálumu 73:28, le ariñagubei: “Buguya, Nabureme, buguya naramudaguagülebei”.

 Héiguatiwa meha lidoun baribarabu bandi wéiyaasu tuma Nani. Ani kei le meha hínsiñe lubéi woun woudin tidan luban wadamuridagun, mebereseguntiwa lau wéiguadun. Ámuti meha haríagunina gürigia ǘmada. Ánheinti tidan luban adamuridaguni, ma meha lubuidun háhayachun íbirigu nuagun. Ligía aba lubéi nabadiseirun nefu hati lárigiñe.

Bérusu le hínsiñetimabei nun sigiti ariñaga: “Nadimurehaba luagu sun katei le badügübei”. Haritaguagüda lumutina meha bérusu le mosu lan napurichihan, ani subudi numuti meha hénrengubei lan nun napurichihan muna tuagu muna. Dan le furumiñetibei náfuridun apurichiha, aba héibugun saragu gürigia nárigi lun hadügün bula nau luagu ligaburi néibugun. Adügati meha katei ligía lun nírudun saragu. Le íderagubalina lun nasigirun nasaminarun luagu megei hamani gürigia hagía Paraísu kei nuguya.

Lun gayara lan náfuridun apurichiha, aba nagañeinhan aban nubeikin to abugahóutu láurügü úhabu. Dan le mosu lan nawarirun aban wübü, mosu meha tádahan nani paaná nau. Ani dan le lunti lan wararirun aban wübü, aba tawarirun numa tuagun beiki tuguya. Hénrenguti meha apurichihani nun furumiñe, gama lumoun lárigiñe aba néchudun. Aba línsiñedun nun saragu darí lun nagumeserun eseriwida kei prekursora lidan irumu 1998.

Rútina külase tídangiñeti Bíbülia houn besafu gürigia, ani chülütiña gádürü hádangiñe lun gefén hamá luagu Heowá. Chülütu giñe aban hádangiñe níbirigu lun aban tan Gefentu. Nasubudiruni hayarafaduña lan fiú gürigia lun Heowá ligíatima íchugubei gurasu nun. Rútina meha külase tídangiñeti Bíbülia lun aban nibureinti reiti tubenari haban. Laturiahaña meha tidan luban furendei íñuti. Lárigiñe, aba namuriahan luma aban íbiri lun lasigirun arufudaha lun nibureinti ligía. Dan lárigiñe, aba láguyun nibureinti ligía lidoun fulasu le gíribei Costa de Marfil. Luagu aban weyu dan le sandi nubéi lau malaria aba tachülürün aban gárada nun Costa de Marfiligiñe. Tidan gárada tuguya ariñagati luagu gumeseeli lan meha nibureinti ligía apurichiha. Ma lueirin ugundani le nasandirubei!

Lun gayara lan nanuriagun nungua, aba lariñawagún nun tídangiñe aban óundaruni to íderagubaliña gürigia ha anihein somu mégeiti hawagu luagu harufudahaba lan áhüchaguni nun. Aba tíchugun aban máistara fe luagu benefa nan. Ábati tariñagun gayara lan larufudahóun ladaawagun sabun nun. Ani ligía hadügübei. Guenlé adaaguatina sabun núbiñe dandu le lunti chibaguaü kei le lunti ágouni. Gúndaatiña gürigia ha agañeinhabaña numa ani ariñagatiña houn amu gürigia lun giñe hagañeinhan. Nuguya guánarügü ñǘdünboun ederegehei sabun tidan nimoton to ǘrüwaboun ubalabala.

Le hírubei eibu lan dan ábatima lagaridun nanagan. Ligía mosu lubéi meha nígiruni neseriwidun kei prekursora lidan irumu 2004. Gama lumoun, furitina apurichiha sun le niyaraati.

Aba hariñagun gürigia hayañu niña lan súnwandan. Ani hayatina ladüga gunda nan. Subuditi hun ka lan uagu gunda nubéi? Ladüga nayarafahóun lun Bungiu, ligía lubuidun-ágeibei katei nun. (Tabahüdagun Sarah Maiga.)