Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Diisi-hati irumu 2015

Ariha humuti san ida liña lan líderagunün Bungiu?

Ariha humuti san ida liña lan líderagunün Bungiu?

“LASUBUDIRÁGÜDÜBEI BUNGIU LUBAFU HADAN LÁNIGU.” (ISAÍASI 66:14)

UREMU 35 LUMA 26

1, 2. Ka hasaminanbei saragu gürigia luagu Bungiu?

UGUÑE WEYU, saminatiña saragu gürigia meberesen lan Bungiu lau le wadügübei ni lau le asuseredubei woun. Kéiburi lidan irumu 2013, aba láfuragun aban lanarime garabali luma huya lidan ubouhu Filipinas. Lárigiñe lanarime chagaguaü ligía, aba lariñagun gálidi le lídanbei aban uburugu háfuga lan bereseguñein lan Bungiu ligía lan míderagun lubaliña.

2 Añahein amu gürigia saminatiña marihin lani Bungiu katei le hadügübei (Isaíasi 26:10, 11; 3 Huan 11). Ariñagati apostolu Pábulu luagu añahein lan meha gürigia lidan lidaani ha mabusenruntiña hagunfuliruni le lariñagubei Bungiu lidan habagari. Wuribatiña meha gürigia hagía ani memenihabutiña meha (Rómana 1:28, 29).

3. a) Ka burí álügüdahani lunbei wadügüni wóuniwagua? b) Ka mini tubéi Bíbülia dan le tayanuhan luagu “lúhabu” Bungiu?

3 Chóuruti subudi wamani ariha lani Heowá sun le wadügübei. Gama lumoun, lunti wálügüdagun woungua: “Le san lúgubu afiñe nan luagu berese lan Bungiu nau? Ariha numuti san ida liña lan líderagunina Heowá lidan nibagari?”. Ayanuhatu Bíbülia saragu  wéiyaasu luagu “lúhabu” Bungiu. Ka san mini lubéi le? Libe-agei dan tayanuhaña luagu ligaburi líderaguniña Heowá lubúeingu (aliiha huméi 2 Lúrudu 26:8). (Ariha huméi rekuáduru “Ka mini lubéi?”.) Ani ariñagati giñe Hesusu “harihubei” lan fiú gürigia Bungiu, mini lan le luagu harihibei lan líderaguñanu lan Bungiu (Matéu 5:8). Ariha humuti san lúhabu Bungiu? Lidan amu dimurei, ariha humuti san ida liña lan líderagunün Bungiu lidan hibagari? Ayanuhatu Bíbülia hawagu gürigia ha marihinbalin “lúhabu” Bungiu lidan habagari luma hawagu amu gürigia ha arihibalin. Warihiba fiú lídangiñe hénpulu burí ligía lidan arütíkulu le. Ani lidan leweñegua arütíkulu warihibei ida liña lan líderaguniwa afiñeni lun warihini líderaguñadiwa lan Bungiu.

MARIHIN HAMUTI MEHA LÍDERAGUÑANU LAN BUNGIU LUMUTUNIÑA

4. Ka meha uagu marihin habalin háganiñu ísüraelina luagu líderaguñanu lan Heowá lumutuniña?

4 Lidan tidaani Bíbülia, gíbetiña meha gürigia gachansintiña lun harihini ida liña lan líderaguniña Bungiu ísüraelina. Kéiburi dan le ladügünbei milaguru lun líderaguniña lumutuniña lun háfuridun Ehiptugiñe luma lun hagañeirun saragu wuribu lidan Fulasu Füramasewati (Hosué 9:3, 9, 10). Subudi hamuti meha saragu urúeigu katei burí le adüga láalibei Bungiu. Íbini ítara, óundaraguatiña lun hageindagun “luma Hosué luma hama Ísüraelina” (Hosué 9:1, 2). Dan le hageindagunbei hama ísüraelina, gachansintiña meha giñe urúeigu hagía lun harihini líderaguniña Bungiu lumutuniña. Ariha hamuti ladügün Heowá lun lararamun Weyu luma Hati darí lásurun “háfaraguniña Ísüraelina háganiñu” (Hosué 10:13). Gama lumoun, mabusenruntiña meha harihini líderaguñanu lan Heowá lumutuniña. Ligía heferidirunbalin wuribu (Hosué 11:20).

Anhein busén wabéi warihini ida liña lan líderaguniwa Heowá, mosu agagudúañu wamá

5. Ka meha mabusenrun lubéi Aabü lasubudirun?

5 Saragu irumu lárigiñe, gachansinti meha aban urúei lun larihini ida liña lan líderaguniña Bungiu lumutuniña. Aabü meha liri urúei ligía ani wéiriti meha luriban. Aba lariñagun profeta Elíasi lun Aabü máhuyunbei lan huya darí danme lariñaguni Elíasi (1 Urúeigu 17:1). Furanguti Búngiurügüñein lan meha gayara líchugun ubafu lun Elíasi lun lariñaguni ídaba lan láhuya huya. Gama lumoun, mabusenrunti meha Aabü lafiñerun. Lárigiñe, aba lamuriahan Elíasi luma Heowá lun lóunahan watu siélugiñe, ani aba lóunabuni Heowá lafurieidun. Ariñagati giñe Elíasi lun Aabü ladügüba lan Heowá lun láhuyun huya saragu. Ani ligía asuseredubei (1 Urúeigu 18:22-45). Íbini ítara, máhati Aabü lánharun luagu Heowá lan adügübalin milaguru burí ligía. Ka wafurendeirubei lídangiñe le larufudahabei párafu le luma le lubaragiñebei le? Anhein lan busén wabéi warihini ida liña lan líderaguniwa Bungiu, mosu agagudúañu wamá.

ARIHA HAMUTI LÍDERAGUÑANU LAN HEOWÁ LUMUTUNIÑA

6, 7. Ka katei unbei hánhara gabaónna tuma Raabü?

6 Lidan lidaani Ísüraeli, anihein meha aban néchani gíriti Gabaón. Ámutiña meha gabaónna hawéi ha híbiri néchanigu. Ka uagu? Ladüga aganbaaña lan meha luagu sun le adüga láalibei Heowá hawagu ísüraelina ani ariha hamuti  meha líderaguñanu lan Bungiu lumutuniña. Ligíati, lubaragiñe hageindagun hama ísüraelina, aba háluahan gabaónna chansi lun lidan hamá darangilaü hama lumutuniña Bungiu (Hosué 9:3, 9, 10). Buiti meha lidin houn ladüga gunfuranda hamani Heowá lan íderagubaliña ísüraelina.

7 Anuhein meha giñe aban würi afiñetu luagu líderaguñanu lan Heowá lumutuniña. Raabü tíribei würi tuguya. Mama meha ísüraelina Raabü, gama lumoun, aganbaaru meha luagu sagá lánina Heowá ísüraelina Ehiptugiñe. Dan le hachülürünbei bián ísüraelina aríahatiña fulasu túbiñoun, aba tariñagun houn afiñe tan líderagubaña lan Heowá lun hagañeinruni fulasu le ñein lubéi tawinwanda. Ani íbini subudi tani líchugubei lan tafiñen luagu Heowá tibagari luma habagari tiduheñu lidan peliguru, afiñetu meha lesefurubaña lan Bungiu (Hosué 2:9-13; 4:23, 24).

8. Ka meha hafiñerubei fiú ísüraelina?

8 Ayanuhaya wamá luagu Aabü. Dan le larihinbalin lábürühan watu siélugiñe, máhati lafiñerun luagu lóunabuñein lan meha Bungiu lafurieidun Elíasi. Gama lumoun, añahein meha fiú ísüraelina ha afiñerubaña Heowá lan adügübalin milaguru ligía. Ligía hagúaragunbei ariñaga Heowá lan “Búngiubei” (1 Urúeigu 18:39).

9. Ka lunbei wadügüni lun warihini líderaguñanu lan Heowá lumutuniña?

9 Arihaadiwa saragu hénpulu hawagu gürigia ha máhabaña hafiñerun luagu íderagua lániña Bungiu lubúeingu ani arihatiwa giñe fiú ha ánhabaña hafiñeruni. Uguñe weyu, añahein giñe saragu lubúeingu Bungiu ha arihibalin líderaguñadiwa lan Heowá. Busentiwa ítara wamá kei hagía. Ida liña gayara lan warihini lídehan Heowá uguñe weyu? Dan le warihini ligaburi luma sun le ladügübei wawagu.  Ani lun lira mosu buídutima lan wasubudiruni Heowá sagü weyu. Ida liñati wasubudiruni líderaguñanu lan Heowá ha busenbaña hadügüni lugundan uguñe weyu?

KATEI BURÍ LE ARUFUDUBALIN ÍDERAGUA LÁNIWA HEOWÁ

10. Ida liña wasubudiruni sigí lan Heowá íderaguaña gürigia ha busentiña hadügüni lugundan? (Ariha humóun iyawaü to lídanboun lagumeseha arütíkulu.)

10 Anihein saragu katei le arufudubalin aniheingua lan Heowá íderaguaña ha busenbaña hadügüni lugundan. Súnwandan waganbun luagu líderaguniña Heowá gürigia ha afurieidubaña lun luagu ídemuei (Sálumu 53:2). Ayanuha wamá luagu aban Gefenti gíriti Allan. Lapurichihaña íbiri ligía lidan aban liráüraü ubouhu Filipinas. Dan le layanuhaña lan tuma aban würi, aba tagumeserun ayahua. Ka san suserebei tun? Aba lariñagun Allan binaafinméme lan ligía aba lan tamuriahan würi tuguya luma Bungiu lun hachülürün gefentiña luagu Heowá túbiñoun. Aturiahaaru meha hama Gefentiña dan le nibureingiru. Gama lumoun, dan le tamarieidunbei, aba táguyun lidoun amu fulasu ani aba maturiahanharu lan. Wéiriti meha teteingiruni Bungiu luagu lufuresen lóunabuni tafurieidun. Lubaragiñe tagunfulirun aban irumu aturiaha, aba tabadiseirun.

Mosu aranseñu wamá lun warihini ida liña lan líderaguniwa Heowá (Ariha huméi párafu 11 darí 13)

11, 12. a) Ida liña líderaguniña Heowá lubúeingu? b) Abahüdagua huméi ida liña lan líderagunu Heowá aban íbiri.

11 Íderaguaali Heowá saragu hádangiñe lubúeingu uguñe weyu. Añahein besafu hádangiñe, agumulahatiña meha, yúsutiña meha düroga ani aríagua hagía pornografía lubaragiñe gefén hamá luagu Heowá. Ariñagatiña besafu hádangiñe luagu houcha hamá yebe hígiruni katei mabuidunti ligía, ani siñá hamuti meha ígira. Gama lumoun, dan le hamuriahanbei ídemuei luma Heowá, aba líchuguni “óunwenbu ubafu” le ñǘbuinbei lúmagiñe houn, ani aba gayara lan hígiruni échuni burí ligía (2 Korintuna 4:7; Sálumu 37:23, 24).

12 Íderagua laaña giñe Heowá lubúeingu lun hararamun lun somu turóbuli lidan habagari. Ayanuha wamá tuagu aban íbiri gíritu Amy. Amuriahóuati meha tuma lun tidin lidoun aban liraüraü ubouhu lidan barana pasifiku lun tídehan lidan tábunawagun aban Luban Hadamuridagun gefentiña luagu Heowá tuma aban muna houn misioneru. Gama lumoun, hénrenguti meha ibagari ñein. Gíbeti meha dan ua lan leiti ni duna, ani anihein meha dan buinga lan lidan sun üma. Ani lidan meha aban liraüraü rumu tawinwanda tidan aban haban chülüdügütiña, ani álugatu meha hawagu tiduheñu. Luagu aban weyu, dan le tawadigimariduña lan úara tuma aban íbiri, aba tagúaragun tun íbiri tuguya. Dan le tagiribudun tidoun tirumun, wuribati meha tasandiragun tungua luagu le tadügübei. Úati leiti weyu ligía, lídanñounti luburiga. Aba tafurieidun lun Heowá. Dan le lagiribudunbei leiti, aba tadarirun aban arütíkulu tidan garüdia La Atalaya le ñein lubéi tadarira adundehani hounti misioneru. Layanuhaña meha arütíkulu ligía luagu ida luba lan hararamun gürigia lun turóbuli kéiburi dan le áluga hamá luagu hageira luma hawagu haduheñu. Ayanuhati giñe luagu ida luba lan hararamun gürigia lun ámuñegueinarügü igaburi le lídanbei ageiraü le ñeinhin lubéi háguya. Sanditu Amy kamá hamuga layanuhaña Heowá tun lidan oura ligía. Ligía íchugubei erei tun lun tasigirun tubaruaguóun (Sálumu 44:25, 26; Isaíasi 41:10, 13).

13. Ka arufudubalin woun íderagua lániña Heowá lubúeingu lun hageindagun luagu haricha lun hapurichihan?

13 Íderagua laaña giñe Heowá lubúeingu lun hageindagun luagu haricha lun hapurichihan  (Filipuna 1:7). Kéiburi dan le houchun fiú urúeigu lun hararamuni wapurichihan, aba woudin ligibugiñoun liñun-agei lúrudu lun wóunabun luagu waricha. Ani gáñeinhadiwa kéiburi 268 kesi lidan liñun-agei lúrudu le súdinitimaburibei ubouagu. Kéiburi lúmagiñe irumu 2000 gáñeinhadiwa 24 kesi lidan Liñun-agei Lúrudu le Yuropabei le Ageindagubei luagu Haricha Gürigia. Furanguti úati lan gürigia gayarati ladügün lun míderagun lániña Heowá lumutuniña (Isaíasi 54:17; aliiha huméi Isaíasi 59:1).

14. Ka amu katei arufudubalin líderaguñadiwa lan Bungiu?

14 Ka amu katei arufudubalin líderaguñadiwa lan Heowá? Arihúati lídehan Heowá ladüga wapurichihaña lidan sun ubóu (Matéu 24:14; Adügaü 1:8). Arufuda lumuti giñe úarani le wádanbei líderaguñadiwa lan Heowá, ladüga meberesenga halíana wamá lídanñadiwa aban. Úati amu sétanu ubouagu le ídanbei larihíwa saragu úarani. Íbini fiú gürigia ha meseriwiduntiña lun Heowá ariñagatiña: “Anihein [...] Bungiu huma le tímatimaati” (1 Korintuna 14:25). Kei aubei warihei, anihein saragu katei le arufudubalin líderaguñadiwa lan Heowá (aliiha huméi Isaíasi 66:14). Agia huguya? Ariha humuti san ida liña lan líderagunün Heowá lidan hibagari?

ARIHA HUMUTI SAN IDA LIÑA LAN LÍDERAGUNÜN BUNGIU?

15. Ka katei gayarabei ladügün lun marihin wamani líderaguñadiwa lan Heowá?

15 Háfuga anihein dan marihin wamani líderaguñadiwa lan Heowá. Ka uagu? Háfuga weiri lan wadiheri luagu waturobulin darí lun wabulieiduni íderagua láadiwa lan Heowá saragu lidan amu dan. Ligía meha asuseredubei lun Elíasi. Aban meha wügüri ganigiti Elíasi. Gama lumoun, dan le táluahanbei urúei Hesawéli táfaruni, aba labulieiduni ida liña lan líderaguni Heowá lidan amu dan. Aba lanufudedun saragu darí lun tariñagun Bíbülia busén lan meha lounwen (1 Urúeigu 19:1-4). Ida luba meha san  libihin ídemuei luma gurasu? Mosu meha láluahani lídehan Heowá (1 Urúeigu 19:14-18).

16. Danme le gaturobulin wamá, kaba íderaguawa arihei líderaguñadiwa lan Heowá?

16 Susereti giñe lun Hobu kei lasuseredun lun Elíasi. Wéiriti lidiheri luagu lituróbulin darí lun marihin lani kei larihini Heowá (Hobu 42:3-6). Agia wagía? Dan le gaturobulin wamá, gayarati giñe marihin wamani líderaguñadiwa lan Heowá. Kaba wadüga? Mosu waliihanu Bíbülia ani samina wagíame luagun abahüdaguni luma eweridihani burí le waliihabei. Danme le warihini ida liña lan líderaguniwa lidan waturobulin, ítara luba kamá hamuga layanuhaña Bungiu woun. Ábameti inarünitima lan Heowá woun ani ábame gayara lan wariñagun kei Hobu: “Guentó ariha náadibu lau nagu”.

Gayarati layusuruniwa Heowá lun líderagun amu (Ariha huméi párafu 17 luma 18)

17, 18. a) Ka burí ídemuei gayarabei resibi wamaali lan lúmagiñe Heowá lidan wabagari? b) Ka ídemuei ru láalibei Heowá houn fiú lubúeingu uguñe weyu?

17 Ariha humuti san líderaguñadün lan Heowá lidan hibagari? Añahein fiú íbirigu sandí hamuti ligía lan íderagubaliña lun hadariruni relihión le inarünibei. Añahein amu saminatiña Heowá lan íderagubaliña lau somu katei le lariñagubei aban íbiri lidan adamuridaguni. O gayarati giñe hariñagun íderagua lániña Heowá lau lóunabuni hafurieidun. O lau líderaguniña agunfulira somu katei le habusenrubei hadügün lun haganwoundagüdüni heseriwidun lun. O gayarati giñe hariñagun ru lumuti lan Heowá le hemegeirubei houn dan le hígirunbei somu wadagimanu le adarasahabaliña luéi houdin adamuridagua o apurichiha (Ebüréu 13:5). Anhein buidu lubéi wamadagua luma Heowá, gayarabei warihini líderaguñadiwa lan lidan saragu katei.

18 Lidan aban fulasu le gíribei Kenia, anuhein meha aban íbiri gíritu Sarah, ani tíchuguña meha íbiri to aturiahani tun aban gürigia, gama lumoun, genegeti meha mebegi lan le tafurendeirubei gürigia tuguya tun. Aba tafurieidun Sarah lun Heowá ani aba tálügüdüni anhein lun lubéi tígiruni taturiahan tuma gürigia tuguya. Kei lásurun tafurieidun Sarah, aba tagúarun gürigia tuguya tun lun tálügüdünu anhein gayara lubéi tidin tuma lidan adamuridaguni. Magurabun tumuti yebe Sarah katei le. Ánhawa eredera agagudúañu, gayarabei giñe warihini líderaguñadiwa lan Heowá. Anuhein aban íbiri Asia gíritu Rhonna, ani ariñagatu barüti lan dan lun wafurendeirun arihei ida liña lan líderaguniwa Heowá. Ani dan lan le warihini lídehan, aba wasandiragun woungua buidu dan le gunfuranda wamani berese lan Heowá wau.

19. Anhein busén wabéi warihini ida liña lan líderaguniwa Heowá, ka amu katei lunbei wadügüni?

19 Anhein busén wabéi warihini ida liña lan líderaguniwa Bungiu, mosu ‘haruma tan wanigi’ (Matéu 5:8). Mini lan le mosu lan wasaminarun luagun katei buiti ani lun wígiruni le wuribabei (aliiha huméi 2 Korintuna 4:2). Arihaadiwa lidan arütíkulu le anhein lan busén wabéi warihini ida liña lan líderaguniwa Heowá, mosu buidu lan wamadagua luma. Lidan leweñegua arütíkulu waturiahaba ida liña lan lídehan afiñeni lun warihini ida liña lan líderaguniwa Heowá lidan wabagari.