Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Nefu-hati irumu 2015

Ida liña larufuduni Heowá woun hínsiñe wamá lun

Ida liña larufuduni Heowá woun hínsiñe wamá lun

“Ariha humá lueirin wínsiñe lun Bungiu.” (1 HUAN 3:1)

UREMU 51 LUMA 13

1. a) Ka lariñagubei apostolu Huan woun lun wadügüni? b) Ka uagu lunti lubéi wasaminarun luagu lueirin wínsiñe lun Heowá?

ARIÑAGATI apostolu Huan: “Ariha humá lueirin wínsiñe lun Bungiu” (1 Huan 3:1). Lau dimurei le, ínchaha lumutiwa apostolu le lun wasaminarun luagun lueirin wínsiñe lun Heowá luma luagun ligaburi larufuduni woun. Ánhawa asaminara luagun katei le, labuiduratimaba wamadagua luma Bungiu ani hínsiñetimabei woun.

2. Ka uagu hénrengu lubéi houn fiú gürigia hafiñerun hínsiñe hamá lun Bungiu?

2 Híruti mafiñen hamá fiú gürigia luagu hínsiñe hamá lun Heowá. Saminatiña meberesen lan Bungiu hau. Saminatiña rúrügü lan lúrudu ani aba lan labeichuniña ha magunfulirunbalin. Anihein fiú relihión arufudahati houn gürigia luagu wuriba lan Bungiu. Ligía hasaminarunbei saragu siñati lan línsiñedun Bungiu woun. Ani añahein amu, saminatiña hínsiñe hamá sun gürigia lun Bungiu meberesenga ka lan hadügübei. Ánheinti wagía aturiaha wamaaru Bíbülia ani  subudi wamuti ka lan inarünibei luagu Heowá. Ariñagatu Bíbülia ínsiñeni lan Heowá ani ligía lan lóunahanbalin Liráü lun lounwen wawagu (Huan 3:16; 1 Huan 4:8). Íbini ítara, háfuga hénrengu lan houn fiú lubúeingu Heowá hafiñerun hínsiñe hamá lun. Háfuga hasaminarun ítara ladüga somu katei le asuseredubei lidan habagari.

3. Ka uagu gayara lubéi wariñagun hínsiñe wamá lun Heowá?

3 Ka uagu gayara lubéi wariñagun hínsiñe wamá lun Heowá? Lugundun ligía adügübaliwa ani ligía íchugubei ibagari woun (aliiha huméi Sálumu 100:3-5). Ligía lariñawagúnbei tidan Bíbülia “liráü [lan] Bungiu” Adán (Lúkasi 3:38TNM). Ani dan le larufudahanbei Hesusu woun ida luba lan wafurieidun, arufudahati woun Heowá lan Wáguchibei (Matéu 6:9). Ligía hínsiñe wabéi lun Heowá kei hínsiñe lisaanigu aban úguchili lun.

4. a) Ka luwuyeri Úguchili Heowá? b) Kaba wariha lidan arütíkulu le luma lidan le aban?

4 Añahein gürigia móuserun lumutiña háguchi buidu dan le ñǘbürigiña. Ani háfuga ligía hénrengu lubéi houn hafiñerun hínsiñehabu lan aban úguchili. Gama lumoun, maweiyasunti Heowá asufuriragüdawa. Le linarün katei, ligía Úguchili buídutimati le gayarabei wadariruni (Sálumu 27:10). Hínsiñetiwa lun saragu ani góunigi lumutiwa. Ani éibume wasandiruni línsiñehabu, línsiñedatimaba woun (Santiagu 4:8). Lidan arütíkulu le warihiba gádürü igaburi le ídanbei larufudei Heowá hínsiñe wamá lun. Ani lidan leweñegua arütíkulu warihiba gádürü igaburi ida luba lan warufuduni lun Heowá hínsiñe lan woun.

AREIDATI HEOWÁ

5. Ka líchugubei Heowá woun súngubei?

5 Dan le meha Atenasiñein lubéi apostolu Pábulu, gíbetiña meha guáriua ñein ani saminatiña meha gürigia búngiugu lan hagía íchugubalin habagari houn. Ligía lariñagunbei Pábulu houn Heowá lan “Bungiu le adügübalin ubóu luma sun katei le ubouagubei” ani “ligía guánarügü [lan] íchugubei ibagari luma garabali, luma sun katei woun, sun wagía” (Adügaü 17:24, 25, 28). Ru lumuti Heowá sun le wemegeirubei woun lun wawinwandun luma lun wagundaarun lau wabagari. Ariha wamá fiú lídangiñe katei le líchugubei woun ladüga hínsiñe wamá lun.

6. Ida liña san fulasu le líchugubei Heowá woun lun wawinwandun? (Ariha humóun iyawaü to lídanboun lagumeseha arütíkulu.)

6 Kei hénpulu, aranseti Heowá aban fulasu buiti woun lun wawinwandun (Sálumu 115:15, 16). Lídangiñe sun planeta le ladügübei, Ubóu espechalitimabei. Gíbeti planeta hadarirun aturiahatiña siensia huáriñurugu. Ani madarigiña ni aban le buiti lun ñein lan ibagari. Adüga lumuti Heowá Ubóu lau sun le mégeiwabei lun ñein lan ibagari, gama lumoun, adüga lumuti giñe lun aban lan fulasu le buiti ani le chóuruti lun wagundaarun lau wabagari (Isaíasi 45:18). Dan le wasaminarun luagun lubuidun Ubóu le ñein lubéi wawinwanda, aba wíchugun fe luagu hínsiñe wamá lun Heowá (aliiha huméi Hobu 38:4, 7 luma Sálumu 8:3-5).

7. Ka amu igaburi layusurubei Heowá lun larufuduni woun hínsiñe wamá lun?

7 Arufuda lumuti giñe Heowá hínsiñe wamá lun lau líchugun ubafu woun lun  warufudun igaburi libe le luágubei (Agumesehani 1:27). Ligía gayara lubéi wasandiruni hínsiñe wamá lun ani gayarati giñe línsiñedun woun. Subudi lumuti gunda wamá lau línsiñehabu lugundun gúndaatiña isaanigu dan le hasubudiruni hínsiñe hamá houn hagübürigu. Arufudahati giñe Hesusu woun gúndaabadiwa lan ánhawa eredera yarafa lun Heowá (Matéu 5:3). Ariñagatu Bíbülia ru lani Bungiu “sun katei woun gibe lun wagundaarun luagu” (1 Timotéu 6:17). Furanguti areida lan Heowá ani hínsiñe wamá lun (Sálumu 145:16).

ARUFUDAHATI HEOWÁ WOUN

8. Ka uagu busén wabéi lun larufudahan Heowá woun?

8 Aban úguchili le hínsiñetiña lisaanigu lun hóuchati lun larufudahan houn lun buidu lan lidin houn lidan habagari. Gama lumoun, gíbetiña agübürigu uguñe weyu ha minebenti le tariñagubei Bíbülia houn. Ligía siñá lubéi harufudahani  houn hasaanigu kátima lan katei buídubei lumoun le wuribabei. Adügati le lun hayuridagun hasaanigu ani lun magundan hamá (Ariñawagúni 14:12). Ánheinti Heowá, ru lumuti adundehani le buídutimabei houn lisaanigu, ladüga “Lubungiute [lan] inarüni” (Sálumu 31:5). Arufudaha lumuti inarüni woun luougua ani ariñaga lumuti woun ida luba lan wáhuduragun lun. Arufuda lumuti giñe woun ka lan ibagari buídutimabei (aliiha huméi Sálumu 43:3). Ariha waméi ka burí lan katei arufudaha láalibei Heowá woun le arufudubalin weiri lan wínsiñe lun.

Sigí lumuti aban úguchili kristiánu lani Heowá hénpulu lau larufudahani inarüni le tídanbei Bíbülia houn lisaanigu luma lau líderaguniña lun lumadagu hamá Bungiu (Ariha huméi párafu 8 darí 10)

9, 10. a) Ka uagu larufudaha Heowá woun luougua? b) Ka larufudahabei Heowá woun wawougua?

9 Furumiñe, arufudahati Heowá katei súdiniti woun luagu ladüga busenti lun wasubudiruni (Santiagu 4:8). Ligía larufudunbalin woun ka lan liri. Ani gíbetimati wéiyaasu láfuridun liri Bungiu tidan Bíbülia sügǘ lau furumiñeguarügü amu iri. Arufuda lumuti giñe woun ka lan luwuyeri Bungiu ligía. Kéiburi ánhawa etenira lun sun le ladügübei, warihibei luagu chu lan lau ani weiri lan lubafu (Rómana 1:20). Ani dan le waliihanu Bíbülia, aba warihini luagu richá lan ani hínsiñe wamá lun. Eibu wasubudiruni Heowá, ábatima wayarafadun lun.

Eibu wasubudiruni Heowá, ábatima wayarafadun lun

10 Arufudahati giñe Heowá katei súdiniti woun wawougua. Ariñagati woun hádangiñetiwa lan liduheñu. Ariñagati giñe woun ka lan lunbei wadügüni lun weseriwidun lun lidan darangilaü luma úarani. Ariñagatu Bíbülia madügün lániwa Heowá lau ubafu lun desidírü wamani woungua le buídubei lumoun le wuribabei (Heremíasi 10:23TNM). Ligía asubudirubalin ka lan buídutimabei woun. Ligíati, ánhawagubeirügü gaganbadi lun ani inebe ligíame woun ligíarügübei gunda wamá ani winwan wagíame lidan darangilaü. Arufudaha laali Heowá inarüni súdiniti le woun ladüga hínsiñe wamá lun.

11. Ka füramase lubéi Heowá woun lubá ámuñegü?

11 Aban úguchili le buiti nidiheriti luagu ida luba lan habagari lisaanigu ámuñegü ani busenti lun gúndaabaña lan. Ani le linarün aban katei, hibe-agei gürigia uguñe weyu ibidiñeti houn kaba lan asusereda houn ámuñegü. Wesi hamuti habagari nadagimein luagu katei le lunbei madurabei lan saragu (Sálumu 90:10). Ánheinti wagía, le eseriwidubei lun Heowá, rútiwa seremei lun luagu larufudahan woun ida luba lan gunda wamá guentó ani füramaseti aban ibagari buítimati woun ámuñegü.

EREREHATI HEOWÁ WOUN

12. Ida liña meha louchun Heowá líderaguni dandu Kaín kei Baruku?

12 Dan le larihinbei Heowá ladüga lan Kaín aban katei wuribati, aba louchun líderaguni. Aba lariñagun lun lun lárügüdagun lungua luéi igañi le luágubei ani lun lasansiruni ligaburi. Anhein meha ladüga, labiniruñein hamuga Heowá (Agumesehani 4:6, 7). Gama lumoun, madügünti Kaín gasu ani súfuriti saragu (Agumesehani 4:11-13). Luagu aban weyu, aba larihin Heowá buchá  lan luagu aban lubúein gíriti Baruku ani féridi laali lan luguraasun ladüga luriban ligaburi. Ligía aba lubéi lariñagun Heowá lun mosu lan lasansiruni ligaburi lasaminarun. Gaganbaditi Baruku ani aba lesefuruni libagari (Heremíasi 45:2-5).

13. Ka hafurendeirubei lubúeingu Bungiu ha lánina binadu dan dan le lidan habéi turóbuli?

13 Adundeha lumutiwa Heowá ani wéridi lawa ladüga hínsiñe wamá lun. Wéridi lumutiwa dan le megei wamani ani íderagua lumutiwa giñe lun buídutima wamá kei gürigia (Ebüréu 12:6). Íderagua lumutiña meha Heowá lubúeingu ha lánina binadu dan lun habuiduragüdüni hagaburi. Kei hénpulu, ígirati lun lásügürün Hosé, Moisesi luma Dawidi lídangiñe turóbuli hénrenguti. Seriwiti dan hénrenguti ligía houn lun hafurendeirun katei burí le eseriwidubei houn dan le líchugunbei Heowá buligasion le wéinamutimati houn. Dan le waliihan tidan Bíbülia ida liña lan líderaguniña Heowá lubúeingu lun buídutima lan hóuserun, aba warihini weiri lan wínsiñe lun (aliiha huméi Ariñawagúni 3:11, 12).

14. Ida liña larufuduni Heowá línsiñehabu woun dan le wachararun?

14 Dan le wachararun, arufuda lumuti Heowá línsiñehabu woun anhein weresibira ladundehan. Ida liña ladügüni? Ariñagati profeta Isaíasi ‘mángiti’ lan Heowá lun feruduna lániwa (Isaíasi 55:7). Ariñagati urúei Dawidi Heowá lan ‘ferudunabalin sun wariban; ligía areidaguagüdübalin sun wasandi; ligía esefurubalin wabagari lídangiñe umúahaü; ligía abuinchagüdübaliwa lau ínsiñeni luma areiduni’ (Sálumu 103:3, 4, 12). Kei aubei warihei, aranseñu liña Heowá lun feruduna lániwa. Ani lunti wánharun lun ladundehan luma lun leweridihan ani adüga wameime asansiruni le wemegeirubei. Haritagua waméi wéridi lániwa Heowá ladüga wínsiñe lun (Sálumu 30:5).

GÓUNIGI LUMUTIWA HEOWÁ

15. Ka amu igaburi ídanbei larufudei Heowá woun hínsiñe wamá lun?

15 Aban úguchili le buiti góunigi lumutiña lisaanigu luéi peliguru. Ani ligía ladügübei Heowá. Ariñagati Sálumu 97:10 góunigi lumuti lan Heowá habagari ha gúnfulibaña luma ani sefu lumutiña hawéi gürigia wuribatiña. Samina huméi san le. Dan le subudi wamani ladügüba lan somu katei dañu lun wagu, aba wadouragun lau lau lóufudagun. Ítarameme, adügati Heowá somu katei lau lóufudagun lun lóunigiruniwa luéi peliguru. Ani adüga lumuti ladüga hínsiñe wamá lun (aliiha huméi Sakaríasi 2:8).

Sefu lumutiwa Heowá lau lóufudagun lídangiñe peliguru

16, 17. Ida liña lóunigiruniña Heowá lubúeingu?

16 Súnwandan layusuruniña Heowá ánheligu lun lóunigiruniña lubúeingu (Sálumu 91:11). Kéiburi dan le láfarunbei aban ánheli 185,000 súdaragu lídanrügü aban áriebu lun lesefuruniña lumutuniña Bungiu (2 Urúeigu 19:35). Lidan meha hadaani furumiñetiña kristiánugu, sagá hamuti meha ánheligu Féduru hama amu lubúeingu Bungiu furisunrugugiñe  (Adügaü 5:18-20; 12:6-11). Málügili lasuseredun aban lanarime wuribu Áfürika. Añaha gürigia ageindagua, íweruha, águragua amu gürigia luma áfarahani lidan sun ageiraü. Íbini mounwen lan ni aban gefenti luagu Heowá, gíbetiña erederutiña sin ni kata. Íbini lidan lanarime katei ligía, sandí hamuti líderaguñanu lan Heowá. Íbini súfuri hamá meha saragu, gúndaatiña meha. Dan le lídinbei aban hádangiñe íbirigu ha arihibaña tau sukursáli to Merigaboun arihaña, ani aba lálügüdüniña ida haña lan, aba hariñagun lídanñein lan dan sun katei lau lídehan Heowá.

17 Inarüni hilá hamá fiú lubúeingu Bungiu ladüga úaragua hamá. Ligía meha asuseredubei lun disipulu Esütéban. Arufudati le mama lan súnwandan ladügün Heowá lun móunwegun hamá lubúeingu. Gama lumoun, góunigi lumutiña lubúeingu keisi sétanu lau líchugun eweridihani houn lun méiguadun hamá tidoun sádara burí to lesetihaboun Mafia (Éfesuna 6:10-12). Gayarati wadariruni eweridihani burí le tidan Bíbülia luma tidan agumeiraguagüdüni to burí tadügüboun lóundarun Heowá. Daritiwa eweridihani kéiburi luagu peliguru le lídanbei Internet, lidan pelikula, tidan burí líburu, lidan bidéu lánina huraraü le gaganati agamariduni o anarimeni. Anihein giñe eweridihani ñein lun mínsiñedun lan seinsu woun saragu. Furanguti hínsiñe wamá lun Heowá ani busén lan lóunigiruniwa.

ABAN ÓUNWENBU CHANSI

18. Ida liña wasandiragun woungua lau wasubudiruni hínsiñe wamá lun Heowá?

18 Dan meha le lasaminarunbei Moisesi luagun sun irumu le laubei eseriwida lun Heowá, aba lachoururuni luagu hínsiñe lan lun Heowá. Ligía lariñagunbei: “Buíngüdabawa lau bínsiñehabu dan le lagumeserun weyu, eremuha wamaamuga lau ugundani lidan sun wabagari” (Sálumu 90:14). Haritagua waméi dimurei le lariñagubei apostolu Huan: “Ariha humá lueirin wínsiñe lun Bungiu” (1 Huan 3:1). Ma aban katei buiti wasubudiruni hínsiñe wamá lun Heowá?