Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Nefu-hati irumu 2015

“Deregüdagu [humá] lidan hafiñen”

“Deregüdagu [humá] lidan hafiñen”

“Deregüdagu [humá] lidan hafiñen.” (1 KORINTUNA 16:13)

UREMU 23 LUMA 34

1. a) Ka meha asuseredubei lun Féduru lidan aban liñawan dan baranaha Galiléa? (Ariha huméi dibuhu le lídanbei lagumeseha arütíkulu.) b) Ka meha uagu lagumeserunbei Féduru abulucha?

LUAGU aban weyu guñoun, aba lánhiñuraguni Hesusu barana le Galiléabei hama lani disipulugu ani lidan oura ligía aba ladagarun dan. Sódini, aba harihini Hesusu éibugeina ligibuagu duna. Aba lálügüdüni Féduru anhein gayara lubéi léibugun ligibuagu duna kei ligía. Aba lariñagun Hesusu lun gayara lan. Ligía aba lubéi lagumeserun Féduru éibuga le ñeinhin lubéi Hesusu ligibuagu duna. Gama lumoun, fiúrügügili pasu líchugun Féduru, aba lagumeserun abulucha. Ka uagu? Ladüga larihini durumandei ligía ani aba lanufudedun. Ábati lamuriahan Féduru ídemuei luma Hesusu. Aba lárügüdüni Hesusu lúhabu ani aba lariñagun lun: “Lóuguati giñe bafiñen! Ka uagu lalouguadúnbei bafiñen?” (Matéu 14:24-32).

2. Kaba wariha lidan arütíkulu le?

2 Lidan arütíkulu le warihiba ǘrüwa katei le gayarabei wafurendeiruni lídangiñe le asuseredubei lun Féduru. Furumiñe, warihibei ida liña lan larufuduni furumiñe luagu afiñe lan luagu líderagubei  lan Heowá. Libiaman, ka lan uagu lagumesera eferidirei lafiñen. Ani lǘrüwan, ida liña lan libihininya lafiñen. Líderagubadiwa wasubudiruni ǘrüwa katei le lun here lan wafiñen (1 Korintuna 16:13).

AFIÑE WAMÁ LUAGU HEOWÁ

3. a) Ka meha uagu láfurida Féduru tídangiñe ugunei ani aba léibugun ligibuagu duna? b) Ka katei libe lira adüga wamaalibei, wagía kristiánugu?

3 Dan le lagúarunbei Hesusu lun Féduru, furiti Féduru tídangiñe ugunei ani aba léibugun ligibuagu duna. Ka uagu ladügei katei ligía? Ladüga afiñe lan líderagubei lan Heowá kei líderaguni Hesusu. Wagía kristiánugu, adügadiwa giñe aban katei libe lira. Dan le wafurendeirunbei tidan Bíbülia agunbiraha lániwa Hesusu lun lánigu wamá disipulu, aba wederegeragun woungua lun Heowá ani aba wabadiseirun. Ka uagu? Ladüga afiñe wamá líderagubadiwa lan Heowá luma Hesusu (Huan 14:1; aliiha huméi 1 Féduru 2:21).

4, 5. Ka uagu weiri lubéi lisudinin afiñeni?

4 Súdiniti afiñeni ladüga íderagua lumutiwa lun wadügün katei le genegeti siñabei lan ladügǘniwa (Matéu 21:21, 22). Kéiburi Féduru, éibugati ligibuagu duna ladüga lafiñen. Ani wagía, adügaadiwa giñe katei hénrenguti ladüga wafiñen. Besafu wádangiñe sansi wamaali wagaburi sunsuinagubei. Ani ariha hamuti gürigia ha meha asubudirubaliwa furumiñe luagu sánsihadiwa lan. Adüga wamuti asansiruni burí ligía ladüga línsiñe Heowá woun ani ladüga líderaguniwa adügei (aliiha huméi Kolosana 3:5-10). Ladüga giñe wafiñen wederegeragunbei woungua lun Heowá ani aba lumadagu wamá. Siñabei hamuga wadügüni katei le lun hamuga míderagun lániwa Bungiu (Éfesuna 2:8).

5 Súdiniti giñe afiñeni ladüga ruti erei woun lun méiguadun wamá dan le lagayuahan Satanási wawagu, ladüga wéiriti lubafu Satanási (Éfesuna 6:16). Íderagua lumutiwa giñe afiñeni lun wararamun lun turóbuli. Füramaseti Heowá woun ánhawa lan afiñera luagu ani teni wagíame lun weseriwidun lun, líchugubei lan sun le wemegeirubei woun (Matéu 6:30-34). Ani ánhawa afiñera luagu Heowá, líchuguba ibagari magumuchaditi woun lidan Paraísu (Huan 3:16).

MEFERIDIRA WAMÉI WAFIÑEN

6, 7. a) Ka uma gayara lan konparárü wamani garabali luma lugudi barana le meha anufudedagüdübalin Féduru? b) Ida liña wasubudiruni gayara lan leferidiruni furumiñeguarügü wádangiñe lafiñen?

6 Ayanuhaya wamá luagu Féduru. Ka meha uagu lanufudedagua dan le léibugunbei ligibuagu duna? Ariñagatu Bíbülia aba lan lagidaruni larihin luéi Hesusu lun letenirun lun liñawan dan (Matéu 14:30). Ligía aba lubéi lagumeserun eferidirei lafiñen ani aba lagumeserun abulucha. Gayarati konparárua lan garabali luma lugudi barana lidan liñawan dan ligía luma turóbuli luma óuchawaguni le wasufurirubei sagü weyu. Ani íbini hénrengu lan turóbuli burí ligía, gayarati líchugun Heowá erei woun lun wawanduni. Gama lumoun, ánhawa etenira saragu lun turóbuli, gayarabei wagumeserun eferidirei wafiñen luagu líderagubadiwa lan Heowá.

7 Furumiñeguarügü wádangiñe gayarati leferidiruni lafiñen. Ida liña wasubudiruni? Ladüga ariñagatu Bíbülia lilouguan lan afiñeni figóu “le agüragubaliwa” lau lumenrengun (Ebüréu 12:1). Ánhawa etenira saragu lun  waturóbulin kei meha ladüga Féduru, gayarabei wagumeserun eferidirei wafiñen. Ida luba wasubudiruni anhein lídanñein lubéi peliguru wafiñen? Ariha wamá fiú álügüdahani le lunbei líderaguniwa asubudirei.

8. Ka gayarabei ladügün lun weferidiruni wafiñen luagu lani Heowá füramasei?

8 Afiñegidiwa san luagu lani Heowá füramasei? Kei hénpulu, füramaseti Heowá málühali lan agumucha lau ubóu le lani Satanási. Gama lumoun, ánhawa ígira lun ladireiragüdüniwa isebáhari le lídanbei ubóu le, gayarabei weferidiruni wafiñen luagu yarafaali lan lagumuchagüle ubóu (Abakúku 2:3). Ariha wamá ámuya hénpulu. Füramase haali giñe Heowá feruduna lubéi lan wafigoun seremei lani Hesusu sákürifisiu. Gama lumoun, ánhawa asigira asaminara luagun binadu wachara, gayarabei wasaminarun úagili lan feruduna lániwa Heowá (Adügaü 3:19). Ani ábame weferidiruni wagundan lidan weseriwidun lun Heowá ani ábame mapurichihanhadiwa lan.

9. Ka gayarabei lasuseredun anhein míchugun wamá Heowá lidan furumiñeti lúgaaru lidan wabagari?

9 Awanheingua san eseriwida lun Heowá tau sun wanigi? Adügati wawadigimaridun lun Heowá tau sun wanigi lun mabulieidun wamani wemenigin lánina ibagari magumuchaditi. Gama lumoun, ka gayarabei lasuseredun ánhawa ígira lun lanügüni amu katei ubaraü le súdinitimabei lidan wabagari? Kéiburi hamuga ánhawa adarira aban wadagimanu le fáyeiti ani mígirunti chansi woun lun wasigirun eseriwida lun Heowá kei meha furumiñe. Gayarabei ladügün katei ligía lun ledebilidun wafiñen ani lun meseriwidunhadiwa lan lun Heowá tau sun wanigi (Ebüréu 6:10-12).

10. Ka uagu wariñaga warufuduñein lan wafiñen luagu Heowá dan le feruduna wamaniña ha híbiri?

10 Hénrenguti san woun lun feruduna wamaniña amu? Dan le hadügün amu gürigia somu katei le mínsiñeti woun, aba san wagañidun ani aba mayanuhanhadiwa lan houn? Dan le wóuserun ítara, háfuga warufuduña súdinitima lan le wasandirubei woun sügǘ lau le hasandirubei amu. Gama lumoun, dan le feruduna wamaniña ha achararutiña woun, warufudubei afiñe wamá luagu Heowá. Ka uagu wariñagei le? Subudi wamuti anhein lan busén wabéi lun feruduna lani Heowá wafigoun, mosu lan feruduna wamaniña ha híbiri (Lúkasi 11:4). Dan le feruduna wamaniña, arufuda wamuti wafiñen luagu gúndaabei lan Heowá wama ani feruduna lubadiwa lan giñe. Ani súdinitimati katei le woun sügǘ lau wadügün lun hafayeirun amu luagu le hadügübei woun. Subudi hamuti meha lani Hesusu disipulugu mégeiwa lan afiñeni lun ferudunawa hamá amu. Ligía dan lubéi le lariñagunbei houn lunti lan feruduna hamaniña íbini gürigia ha achararubaña houn saragu wéiyaasu, aba hariñagun lun: “Ruba lanwoun wafiñen” (Lúkasi 17:1-5).

11. Ka lunbei madügün wamani dan le lererehóun woun?

 11 Aba san wagañidun dan le lererehóun woun? Dan le lererehan somu gürigia woun, lunti wasaminarun ida luba lan líderaguniwa adundehani le líchugubei woun. Ánheinti lun wagumeserun áluaha charati luagu gürigia ligía o lidan le lariñagubei woun, mafurendeirunbadiwa ni kata (Ariñawagúni 19:20). Buítimati warufudun afiñeni ani ariha wameime sügǘ ligía kei aban chansi lun wafurendeirun asaminara kei Heowá.

12. Ka warufudubei dan le werederun súnwandan ayanuha wuriba hawagu ha adundehabalin damuriguaü?

12 Ayanuhatiwa san wuriba hawagu ha alidihabalin damuriguaü? Dan le meha haganbunbalin ísüraelina luriban ñunsu le hanügübei diisi aríahatiña fulasu, aba hayanuhan wuriba luagu Moisesi luma luagu Aarón. Ligía lálügüdünbalin Heowá Moisesi: “Ídaba san lagumucha mabahüdün hamanina gürigia ha? Ídaba san lagumucha lilouguan hafiñen nuagu lau sun ariha hamani burí milaguru le nadügübei haganagua?” (1 Lúrudu 14:2-4, 11). Dan le meha hekeharunbei ísüraelina hawagu wügüriña ha lanúadirubaña Heowá lun hadundehaniña, arufuda hamuti mafiñen hamá luagu. Ítarameme, ánhawa ekehara súnwandan hawagu wügüriña ha layusurubaña Heowá lun hadundehani damuriguaü, warufudubei ítara weferidiruñein lan wafiñen luagu.

13. Ka uagu moun lumuti lubéi wasaminarun úaali lan ni kata lunti wadügüni ánhawa íchiga fe débilihali lan wafiñen?

13 Lárigiñe wakutihani álügüdahani burí le, háfuga warihini débilihali lan wafiñen. Gama lumoun, moun lumuti wasaminarun úaali lan ni kata lunti wadügüni. Haritagua waméi íbini lan meha apostolu Féduru sanditi anufudei ani aba leferidiruni lafiñen. Ani chülüti meha giñe dan mosu lan lererehan Hesusu houn sun apostolugu ladüga lilouguan hafiñen (Matéu 16:8). Ani íbini ítara, gayarati wafurendeirun  aban katei súdiniti lídangiñe le ladügübei Féduru lárigiñe lagumeserun eferidirei lafiñen ani aba lagumeserun abulucha.

KABA WADÜGA LUNYA WAFIÑERUN LUAGU HEOWÁ

14, 15. a) Ka meha ladügübei Féduru dan le lagumeserunbei abulucha? b) Ida liña gayara lan wíchuguni warihin luagun Hesusu?

14 Ka meha ladügübei Féduru dan le lagumeserunbei abulucha? Gáfuliti meha Féduru, ani gayarati hamuga meha lagiribudun tidoun ugunei áfuliheina (Huan 21:7). Ka uagu madügün lubalin? Ladüga málugun lan lesefuragun lungua, lubaragiñe lira, aba larihin luagun Hesusu ani aba lamuriahan ídemuei. Ánhawa íchiga fe débilihali lan wafiñen, mosu wáyeihani Féduru. Ida luba wadügüni?

15 Aba ladigiragun Féduru luagun Hesusu. Ligía giñe lunbei wadügüni, mosu wíchuguni warihin luagun Hesusu kei tariñaguni Bíbülia (aliiha huméi Ebüréu 12:2, 3). (Ariha huméi rekuáduru “Ka mini lubéi?”.) Gama lumoun siñati warihini Hesusu kei meha larihini Féduru. Ida lubati wíchuguni warihin luagun Hesusu? Mosu waturiahani katei le ladügübei luma le larufudahabei, ani mosu giñe wafalaruni lani hénpulu. Líderagubadiwa katei le lunya léredun wafiñen. Ariha waméi ida luba lan wáyeihani Hesusu.

Dan le wetenirun lun lani Hesusu hénpulu ani aba wáyeihani, aba léreduntima wafiñen (ariha huméi párafu 15)

16. Ida liña gayara lan wayusurunu Bíbülia lun wéredagüdüni wafiñen?

16 Yusu wamóun Bíbülia lun wéredagüdüni wafiñen. Chouru lumuti meha Hesusu lúmagiñe lan Bungiu tiabin Bíbülia ani ñeinñein lan adundehani le buídutimabei (Huan 17:17). Anhein busén wabéi wáyeihani Hesusu ani lun here lan wafiñen, mosu waliihanu Bíbülia sagü weyu, mosu waturiahanu ani samina wagíame luagun le wafurendeirubei. Mosu giñe wáluahan óunabagülei lun katei le úati gunfuranda wamani. Kéiburi álügüdahani le: Chouru humuti san wawinwanduña lan lidan lagumuhóun dan? Aturiaha huméi profesía burí le tídanbei Bíbülia luáguti lagumuhóun dan ábame léredun hafiñen. Chouru humuti san lagunfulirubei lan Heowá le füramase lubéi lubá ámuñegü? Aturiaha huméi profesía burí le gúnfulihalibei ani ábame héredagüdüni hafiñen. Chouru humuti san buidu lan adundehani le tídanbei Bíbülia lun wabagari guentó? Aliiha humá hawagu íbirigu ha abuiduragüdübalin habagari lau hasigiruni adundehani burí le tídanbei Bíbülia ani ábame héredagüdüni hafiñen (1 Tesalónikana 2:13). *

17. a) Ka meha íderagubalin Hesusu lun lawandun óuchawaguni hénrenguti? b) Ida luba wasigiruni lani Hesusu hénpulu?

17 Samina wamá luagun le füramase láalibei Heowá woun. Saminati meha Hesusu luagun le füramase lubéi Heowá lun. Íderagua lumuti katei ligía lun lawandun óuchawaguni le wéinamuti (Ebüréu 12:2). Mígirunti lun ladireiragüdüni katei burí le lídanbei ubóu (Matéu 4:8-10). Ida luba wasigiruni lani Hesusu hénpulu? Mosu wasaminarun luagun füramasei le adüga láalibei Heowá woun. Ka gayarabei líderagunün adügei katei le? Samina humá luagu ida luba lan ibagari lidan Paraísu. Gayarati habürüdüni o hadiburuni le hínsiñebei hun hadügün lidan Paraísu. Gayarati giñe hadügün aban lísüta lau hiri gürigia ha úmabei habusenra hayanuhan danme le háguyugun luma luagu katei le lunbei hariñaguni houn. Samina humá luagu sun lan füramasei le ladügübei Bungiu ladügüñein lan giñe hun.

18. Ka gayarabei líderaguniwa lun laganwoundun wafiñen?

18 Amuriaha wamá luma Heowá lun laganwoundagüdüni wafiñen. Arufudahati  meha Hesusu houn lani disipulugu lun hamuriahan luma Heowá lun líchugun sífiri sandu houn (Lúkasi 11:9, 13). Ladügüba sífiri sandu lun héretima lan wafiñen, ladüga lídangiñeti igaburi le líchugubei sífiri afiñeni. Gayarati giñe wamuriahan luma Heowá lun líderaguniwa áfaagua kóntüra katei burí le edebilidagüdübalin wafiñen. Kéiburi ánhawa ariha hénrengu lan woun feruduna wamaniña amu, gayarati wamuriahan luma Heowá lun líchugun aban afiñeni héreti woun luma lun líderaguniwa lun feruduna wamaniña amu.

19. Ka hawuyeri umadagu lúnbaña wanúadahaniña?

19 Anúadaha wamá umadagu ha héreti hafiñen. Anúadira lumutiña meha Hesusu lumadagu lau duari. Apostolugu meha lumadagubaña ha úmabei buídutima lan lanaagun lungua ladüga úaragua hama ani gaganbadi hagía lun (aliiha huméi Huan 15:14, 15). Wagía, lunti giñe wanúadahan umadagu ha héreti hafiñen ani ha gaganbaditiña lun Hesusu. Umadagu ha buítiña maramuduntiña ni kata hawariuagua. Anhein lunti lubéi híchugun somu adundehani woun, ru hamuti woun. Ani dan le wagía lan íchigei houn, aganba hamutiwa (Ariñawagúni 27:9).

20. Ka uagu lunti lubéi wíderaguniña gürigia lun hafiñerun luagu Bungiu?

20 Íderagua wamá amu gürigia lun giñe léredun hafiñen. Adügati meha Hesusu ani ariñaga ligía saragu katei lun léredagüdüni hafiñen lani disipulugu (Márükosu 11:20-24). Mosu giñe wíderagun amu gürigia lun léredun hafiñen. Lugundun ítara héregüda wamuti giñe wafiñen guánarügü (Ariñawagúni 11:25). Ida luba san wéredagüdüni hafiñen amu? Dan le wapurichihan, gayarati wafuranguagüdüni houn gürigia ka lan uagu wafiñera anihein lan Bungiu, luagu berese lan wau ani ligía lan abürügüdübalun Bíbülia. Gayarati giñe wíderagun amu íbirigu lun léredun hafiñen. Kéiburi ánhawa aganba aban íbiri ekehara hawagu íbirigu ha adundehabalin damuriguaü, moun lumuti wasaminarun wuriba luagun ni lun werederun mayanuhanga lun. Lunti wíderaguni lun lafiñerun luagu Heowá luma hawagu íbirigu hagía (Húdasi 22, 23). Nibureingidibu san ani leskuelañadibu? Anhein ayanuha bumaisturun luagu saliguarügü lan sun katei lungua, ganigibá ani ayanuhabá luagu bafiñen luagu Bungiu lan adügübalin sun katei. Masaminarabá wuribabei lan lóunabun bumaisturun hama bánigu paaná. Gayarabei taweiridun banigi danme le barihini lubuidun hóunabun.

21. Kaba idan líderaguawa Heowá?

21 Kei aubei warihei, resibiti Féduru ídemuei lúmagiñe Heowá luma Hesusu lun manufude lan ani lun léreduntima lafiñen. Ani lau lásügürün dan, aba ábanhali lan óunwenbu hénpulu lánina afiñeni Féduru woun sun wagía. Líderagubei giñe Heowá kada aban wádangiñe lun léredun wafiñen (aliiha huméi 1 Féduru 5:9, 10). Íbini anhein mosu lubéi wáfaagun lun wibihini, buídubei lidin woun anhein wadüga.

^ par. 16 Kei hénpulu, ariha huméi seksióun “Sansi tumuti Bíbülia habagari”, tidan Garüdia Awisahatu.

Éibugati Féduru ligibuagu duna ladüga lafiñen

Ánhawa etenira lúnrügü waturóbulin, gayarabei wagumeserun eferidirei wafiñen

Subudi hamuti meha disipulugu mégeiwa lan afiñeni lun ferudunawa hamá amu