Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Nefu-hati irumu 2015

Ida liña wóunabun lun línsiñehabu Heowá?

Ida liña wóunabun lun línsiñehabu Heowá?

“Hínsiñeti Bungiu woun ladüga wínsiñedun lun furumiñe.” (1 HUAN 4:19)

UREMU LUMA 138

1, 2. Ida liña larufudahan Heowá woun lun hínsiñehabu wamá?

ABAN úguchili le buiti arufudahati houn lisaanigu lau ligaburi lóuserun. Dan le lóuseruniña lau ínsiñeni, larufudahaña houn lun hínsiñehabu hamá. Ligía giñe ladügübei Heowá lun larufudahan woun. Hínsiñetimatiwa lun sügǘ lau lun furumiñeguarügü gürigia. Ariñagatu Bíbülia aba lan “wínsiñedun lun furumiñe” (1 Huan 4:19). Lau larufuduni hínsiñe wamá lun, larufudahaña woun lun giñe hínsiñehabu wamá.

2 Ka uagu tariñaga Bíbülia hínsiñe wamá lun Heowá furumiñe? Ladüga lóunahani Liráü lun lounwen wawagu “lau sun meha gafigoungidiwa lan” (Rómana 5:8). Adüga lumuti Heowá sákürifisiu ligía lun lesefuruniwa lídangiñe figóu luma óunweni. Ítara liña larufudahan woun lun hínsiñehabu wamá ani areida wagíame (1 Huan 4:10). Ani seremei sákürifisiu ligía ligía gayara lubéi lumadagu wamá Bungiu ani gayara ligía warufuduni lun hínsiñe lan woun.

3, 4. Ida liña warufuduni hínsiñe lan Heowá woun?

3 Ínsiñeni igaburi súdinitimati le luágubei Heowá. Ligía lariñagunbei Hesusu anihán lan gumadi le súdinitimabei:  “Hínsiñela lubeiti Babureme le Bubungiute bun tau sun banigi, tau sun buani, lau sun bisaminan, lau sun bere” (Márükosu 12:30). Busenti Heowá lun línsiñedun woun tau sun wanigi. Mínsiñebei hamuga lun Heowá lun hínsiñetima lan amu gürigia o amu katei woun sügǘ lau. Gama lumoun, mabusenrunti Heowá lúnrügü wasandirun ínsiñeni luagu. Busenti lun línsiñedun woun lau sun wasaminan luma lau sun were, lidan amu dimurei, busenti lun warufuduni ínsiñeni ligía lidan le wasaminarubei luma le wadügübei (aliiha huméi Mikeasi 6:8).

4 Ligía mosu lubéi línsiñedun Heowá woun lau sun wabagari luma lau sun wámati. Anhein hínsiñe lubéi woun tídangiñe sun wanigi, ligíaba súdinitima lidan wabagari. Lidan arütíkulu le lubaragiñebei le arihatiwa gádürü ligaburi larufuduni Heowá hínsiñe wamá lun. Ani lidan arütíkulu le warihibei ida luba lan línsiñeduntima Heowá woun luma ida luba lan warufuduni ínsiñeni ligía lun.

GETEINGIRADI WAMÁ

5. Dan le wasaminarun luagun sun le líchugubei Heowá woun, ka wabusenrubei wadügün?

5 Dan le ledewehan aban gürigia somu katei woun, áfaaguatiwa lun warufuduni weteingiradi lun. Ani adüga wamuti lau wayusuruni idewesei ligía. Ariñagati Santiagu ruti lan Heowá saragu katei buiti woun (Santiagu 1:17). Ru lumuti Heowá sun le wemegeirubei woun lun wawinwandun luma lun gunda wamá. Ani seremei waña lun luagu sun katei ligía. Rútiwa fe luagu lueirin wínsiñe lun Bungiu ani busentiwa warufuduni lun luagu hínsiñe lan giñe woun. Sandiguatün san hungua ítara?

6. Ka meha lunbei hadügüni ísüraelina lun lasigirun Heowá íchiga katei buiti houn?

6 Ruti meha Heowá saragu katei buiti houn ísüraelina. Ru lumuti sun le hemegeirubei houn lun hawinwandun luagu saragu irumu. Ruti giñe lúrudu houn lun hasubudiruni ka lan lunbei hadügüni (2 Lúrudu 4:7, 8). Ariñagati meha lúrudu mosu lan híchuguni “lubuidun-agei furumiñeti lin hinadüri” lun Bungiu (Áfuriduni 23:19). Anhein busén habéi lasigirun Heowá íchiga katei buiti houn, mosu meha gaganbadi hamá lun ani mosu meha giñe híchuguni le buídutimabei hámagiñe lun. Ítara luba meha harufuduni heteingiradi lun Heowá (aliiha huméi 2 Lúrudu 8:7-11).

7. Ida liña gayara lan wayusuruni le buídutimabei wámagiñegua lun warufuduni lun Heowá hínsiñe lan woun?

7 Gayarati warufuduni lun Heowá hínsiñe lan woun lau wíchuguni katei le buídutimabei wámagiñegua lun (Ariñawagúni 3:9). Ida luba wadügüni katei le? Gayarati wadügüni lau wíchugun seinsu lun wíderaguniña íbirigu ha lídanbaña wani damuriguaü hama ha lídanbaña sun ubóu. Íbini añahein lan íbirigu ha míbeti katei hama, sun wagía gayarati wayusuruni wámati lun warufuduni lun Heowá hínsiñe lan woun (2 Korintuna 8:12). Gama lumoun, mámarügüñein ítara gayara lan warufuduni. Ariha wamá amu burí igaburi.

Eibu wafiñerun luagu líchugubei lan Heowá sun le wemegeirubei woun, warufudatimabei lun hínsiñe lan woun

8, 9. a) Ida liña gayara lan giñe warufuduni lun Heowá hínsiñe lan woun? b) Ka ladügübei Mike hama liduheñu?

8 Gayarati giñe warufuduni lun Heowá hínsiñe lan woun lau wafiñerun luagu. Ka  uagu wariñagei katei le? Haritagua waméi arufudaha lan Hesusu woun lun madiheridun wamá saragu luagu ida luba lan wibihini katei burí le wemegeirubei. Füramaseti Heowá líchugubei lan katei burí ligía woun anhein wayusura wabagari lun weseriwidun lun (Matéu 6:31-33). Afiñetiwa lagunfulirubei lan lani füramasei. Ani garichati katei le, lugundun dan le hínsiñe lan aban gürigia woun, afiñetiwa luagu. Ani eibu wafiñerun luagu, ábatima warufuduni lun hínsiñe lan woun (Sálumu 143:8). Ligía lunti lubéi wálügüdagun woungua: “Arufuda numuti san lun Heowá hínsiñe lan nun lau ligaburi nayusuruni nidaani luma nere? Arufuda numuti san sagü weyu afiñe nan luagu líchugubei lan sun le nemegeirubei nun lun nawinwandun?”.

9 Ariha waméi lásügürün aban íbiri gíriti Mike hama liduheñu. Lúmagiñe ñǘraügili Mike, busenti meha lidin lidoun amu ageiraü lun lídehan lidan apurichihani. Lárigiñe lamarieidun ani gasaanigu ligía, busenmémegili meha ladügüni. Aliihati Mike hama liduheñu saragu arütíkulu hawaguti íbirigu ha águyubaña lidoun amu ageiraü lun hídehan lidan apurichihani. Ligía aba lubéi desidírü hamá hanügün aban ibagari sensiyuti. Aba halugurunu haban ani aba háguyun tidoun aban muna ñǘraütimatu. Aba lañüraüdagüdünu Mike lani bísinisi lánina arumadahani ani aba lafurendeirun ida luba lan letenirun tun luagu Internet. Guentó, leseriwiduña lau ugundani hama liduheñu lidan amu ageiraü. Ariñagati Mike ariha hamaali lan lagunfulirun füramasei le ladügübei Hesusu lidan Matéu 6:33.

SAMINA WAMÁ LUAGUN LE LARUFUDAHABEI HEOWÁ WOUN

10. Ka uagu lunti lubéi wáyeihani Dawidi lun wasaminarun luagun katei le larufudahabei Heowá woun?

10 Sagati meha urúei Dawidi dan lun lasaminarun luagun lilurudun Heowá luma luagun sun le adüga láalibei. Aba lubeiti lariñagun: “Abahüdagua lumuti sielu luéirigun Bungiu”. Ariñagati giñe “suruti [lan] larufudahan [Heowá]”, richati ani gayarati lafiñerúniwa luagu, ruti erei woun ani íderagua lumutiwa lun lachuudun wau. Dan le lasaminarunbei Dawidi luagun katei burí le, aba busén lan larufuduni lun Heowá hínsiñe lan lun. Ligía lariñagunbei busén lan lagundaarun Heowá lau lisaminan luma lau le ladügübei (Sálumu 19:1, 7, 14). Ítara kei Dawidi, lunti giñe wasaminarun luagun sun katei le ladügübei Heowá luma luagun le larufudahabei woun tidan Bíbülia. Ítara luba buídutima lan wamadagua luma Bungiu ani warufudubei lun hínsiñe lan woun.

11. Ida luba wayusuruni le larufudahabei Heowá woun lun warufuduni lun hínsiñe lan woun? (Ariha humóun iyawaü burí to lídanboun lagumeseha arütíkulu.)

11 Uguñe weyu, arufudahati Heowá saragu katei woun luougua, luagu sun le ladügübei, luagu lani füramasei luma tuagu Bíbülia. Ínchahouatiña gürigia lidan  ubóu le lun haturiahan tidan luban furendei íñuti, gama lumoun, adügati katei le lun heferidiruni gürigia hínsiñehabu luagu Bungiu. Ánheinti Heowá, busenti lun wafurendeirun saragu katei. Ani busenti giñe lun wafurendeirun desidírü buidu. Busenti lun wayusuruni le larufudahabei woun lun wadügüni le buídubei luma lun wíderaguniña amu (Ariñawagúni 4:5-7). Ida luba wadügüni katei le? Gayarati wadügüni lau wíderaguniña gürigia “lun hasubudiruni inarüni” lun gayara lan hesefurun (1 Timotéu 2:4). Anhein warufudaha houn sun gürigia ha wayaraatiña kaba lan ladüga Larúeihan Bungiu wawagu, warufudubei hínsiñe lan Heowá woun ani hínsiñe hamá giñe gürigia woun (aliiha huméi Sálumu 66:16, 17).

12. Ka tariñagubei aban íbiri nibureintu luagu aban idewesei le líchugubei Heowá tun?

12 Gayarati giñe hasaminarun nibureintiña luagun sun le líchugubei Heowá houn luma le larufudahabei houn. Haritagua tumuti aban íbiri gíritu Shannon ida liña lan meha tasandiragun tungua lidan Adamurini Distritu le gíribei Devoción piadosa. Unsu meha irumu tau ani tamulelua 10 meha irumu tau. Lidan aban fánreinti lidan adamurini ligía aba lamuriahóun hama sun nibureintiña lun hañuurun lidan aban seksióun espechaliti. Aba tañuurun Shannon ñein. Furumiñe hanufudetu yebe, gama lumoun aba tagundaarun dan le tichugúnwabei aban líburu Los jóvenes preguntan lun kada nibureinti. Ariñagatu adüga lan idewesei ligía lun tarihini Heowá kei aban  Bungiu le inarüniti ani lun tasubudiruni hínsiñe tan lun. Ani rutu giñe seremei lun Bungiu luagu líchugun idewesei buíduburiti woun.

RESIBI WAMÉI LEWERIDIHAN HEOWÁ

13, 14. Ida luba wóunabun danme le lererehan Heowá woun?

13 Ariñagatu Bíbülia erereha lan Heowá houn gürigia ha hínsiñebaña lun, “kei ladüga aban úguchili lun liráü” (Ariñawagúni 3:12). Ida liña san lunti lan wóunabun dan le lererehan Heowá woun? Háfuga wírudun o wasandiragun woungua wuriba. Gama lumoun, lunti weresibiruni leweridihan Heowá súnwandan. Ítara luba wafurendeirun adügei le buídubei ani darangilubadiwa (Ebüréu 12:11). Mamahada wamá lun lererehóun woun ani magañida wamá anhein mínsiñe lubéi woun ka lan ariñawagúbei woun. Anhein waganba Heowá ani sansi wameime wagaburi, warufudubei lun hínsiñe lan woun.

Ánhawa adüga asansiruni lun wagundaaragüdüni Heowá, warufudubei lun hínsiñe lan woun

14 Lidan lidaani profeta Malakíasi, rútiña meha huríu sákürifisiu le mabuidunti lun Heowá ani magundanti meha Heowá lau. Ligía líchugunbei adundehani le dǘgüdati houn (aliiha huméi Malakíasi 1:12, 13). Ererehati houn saragu wéiyaasu, gama lumoun maganbun hamuti, ligía aba lubéi labeichuniña (Malakíasi 2:1, 2). Ka larufudahabei le woun? Ánhawa lan madügün gasu lau leweridihan Heowá o ánhawa asaminara ua lan súdini lan, mámadiwame lumadagu.

Mosu wadügüni le lariñagubei Heowá mama le hariñagubei gürigia ubouaguna (Ariha huméi párafu 15)

15. Ka burí igaburi lunbei máyeihan wamani?

15 Hibe-agei gürigia lidan ubóu le barüguatiña houngua ani hawouguounrügüñein hasaminara. Saragu hádangiñe mínsiñeti houn lererehóun houn ni lun lariñawagún houn kaba lan hadüga. Ani dan le hánharun fiú hádangiñe lun somu eweridihani, lau luriban igaburi hadügei. Gama lumoun, ariñagatu Bíbülia lunti lan móuserun wamá ítara. Mosu wafurendeiruni le labusenrubei Heowá lun wadügüni ani mosu wadügün gasu lau (Rómana 12:2). Yusu lumutu Heowá lóundarun lun líchugun adundehani woun dan le wemegeiruni. Kei hénpulu, ariñaga lumuti woun ida luba lan wóuserun hama würiña anhein wügüriña wabéi, ida luba lan wanúadahan umadagu buítiña luma ida luba lan wanúadahan isebáhari buiti. Dan le wánharun lun ladundehan Heowá ani adüga wagía asansiruni lun wadügüni lugundan, arufuda  wamuti weteingiradi luagu ladundehan ani arufuda wamuti giñe hínsiñe lan woun (Huan 14:31; Rómana 6:17).

AMURIAHA WAMÁ LUMA HEOWÁ LUN LÍDERAGUNIWA

16, 17. a) Ka uagu lunti lubéi wáfaagun lun wasubudiruni lisaminan Heowá lubaragiñe desidírü wamá? b) Lubaragiñe hamuga meha hafiñerun ísüraelina luagu Heowá, ka hadügübei?

16 Áluaha hamutiña irahüñü hagübürigu lun hamuriahan ídemuei hama luma lun hóunigiruniña. Íbini gürigia wéinamuhaña anihein dan amuriaha hamá ídemuei hama hagübürigu. Ka uagu? Ladüga íbini gayara lan desidírü hamá hábuguarügü, subudi hamuti gayara lan híchugun hagübürigu adundehani buiti houn. Ítara liña giñe lasuseredun woun luma Heowá. Ígira lumutiwa lun desidírü wamani kaba lan wadüga. Gama lumoun, kei le afiñe wabéi luagu ani hínsiñe ligía woun, súnwandan wamuriahan ídemuei luma. Ani lubaragiñe desidírü wamá, áfaaguatiwa lun wasubudiruni ka lan lisaminanbei. Dan le wamuriahan ídemuei luma Heowá, íderagua lumutiwa lau lani sífiri sandu lun wadügüni le buídubei (Filipuna 2:13).

17 Lidan lidaani profeta Samueli, heferidiruña meha ísüraelina aban wuribu kóntüra filistéana. Ani lubaragiñe hamuga meha hafiñerun luagu Heowá lun hálügüdüni kaba lan hadüga, ábarüga desidírü hamá hanügünu lubagüsina lidaradun Bungiu lidoun wuribu. Saminatiña ítara luba lan líderaguniña Heowá lun hagañeirun. Ani máfaaguntiña lun hasubudiruni ka lan lisaminanbei. Adügarügü hamuti le hasaminarubei buidu lan. Ka resultóubei? Hilatiña 30,000 súdaragu ísüraelina. Ani le wuribatimabei, aba lan herederun filistéana tau lubagüsina daradu (1 Samueli 4:2-4, 10, 11; aliiha huméi Ariñawagúni 14:12).

18. Según Sálumu 42:5, 6 luma Ariñawagúni 3:5, 6, ka lunbei wadügüni?

18 Abürühati meha aban wügüri le hínsiñehabubei lun Heowá dan le lan lídanñein lan somu turóbuli le wéiriti, aba lan líchuguni lafiñen luagu líderagubei lan Heowá ani lesefurubei lan (Sálumu 42:5, 6). Ítara liña san hasandiragun hungua? Háfuga afiñe humá luagu Heowá. Ani íbini ítara, sun wagía gayarati waganwoundagüdüni wafiñen luagu. Ariñagatu Bíbülia: “Afiñebá luagu Bungiu tau sun banigi, mamalá luagu lualin bichügü. Haritaguabá luagu Bungiu lidan sun le badügübei, ábame lanügünibu luéigiñe üma le surubei” (Ariñawagúni 3:5, 6).

19. Ida luba harufuduni lun Heowá hínsiñe lan hun?

19 Kei aubei warihei, hínsiñetiwa lun Heowá furumiñe. Ítara liña larufudahan woun lun giñe línsiñedun woun. Lunti wasaminarun súnwandan luagu sun le adüga láalibei wawagu luma luagu lanarime wínsiñe lun. Arufuda waméi lun hínsiñe lan giñe woun tau sun wanigi, wawani, wasaminan luma were (Márükosu 12:30).