Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2015

Aranseediwa san lun wawinwandun lidan Paraísu?

Aranseediwa san lun wawinwandun lidan Paraísu?

“Risi [humá] lidan le buídubei [...], ítara luba [hi]bihini ibagari magumuchaditi.” (1 TIMOTÉU 6:18, 19)

UREMU 43 LUMA 40

1, 2. a) Ka burí katei habusenrubei hadügün lidan Paraísu? (Ariha huméi dibuhu le lídanbei lagumeseha arütíkulu.) b) Kaba burí katei adüga lúntima wagundaarun lidan Paraísu?

ARIÑAGATI apostolu Pábulu mosu lan wadügüni sun wayaraati lun wibihin ibagari magumuchaditi (aliiha huméi 1 Timotéu 6:12, 19). Hiibe-agei lubúeingu Bungiu hibihiba ibagari magumuchaditi lidan Paraísu ubouagu. Anhein ligía lubéi giñe hemeniginbei, chóuruti memeniha lan hanigi lun hawinwandun ñein. Buídubei hásaarun sagü binaafin lau ugundani, lubuidun átuadi luma darangilaü (Isaíasi 35:5, 6). Samina humá san luagun lubuidun dan le lunbei hásügürüni hama hiduheñu luma hama humadagu, íbini hama ha lúnbaña háguyugun lídangiñe óunweni (Huan 5:28, 29; Adügaü 24:15). Gadaanibadün giñe lun hafurendeirun sun luwuyeri katei. Gayarabei haganwoundagüdüni hisubudin tuagu siensia, hafurendeirun áfara gidara o amu instrumentu lánina músika o hábunagunu huban.

2 Gama lumoun, ñeinbei giñe amu burí katei le lunbei  ladügün lúntima wagundaarun. Aban lídangiñe katei ligía, inebebei lan liri Heowá houn sun gürigia ani lúnrügübei gaganbadi hamá (Matéu 6:9, 10). Libiaman, buin luba Ubóu hau gürigia ha mafigountiña, ítara kei labusenruni Heowá lúmagiñe furumiñeti dan. Ani ábame agidareina lan figóu wawéi murusun murusun, ani ábame aheredeinatima lan wamadagua luma Bungiu (Sálumu 73:28; Santiagu 4:8).

3. Ka uagu lunti lubéi waranserun guentó?

3 Chouru wamuti luagu ladügüba lan Heowá lun lagunfulirun sun burí katei le. Ka uagu? Ladüga ariñagatu Bíbülia ‘gayara lumuti lan Bungiu sun katei adüga’ (Matéu 19:25, 26). Ariñagati Pábulu lunti lan wadügüni sun wayaraati lun wibihini ibagari magumuchaditi. Ligía lunti lubéi warufuduni lau ligaburi wawinwandun luagu chouru wamani lachülürüba lan lagumuchagüle ubóu furumiñeguarügü oura. Anhein busén wabéi wawinwandun lidan Paraísu, mosu waranserun guentó lun wawinwandun ñein. Ariha waméi ka lan lunbei wadügüni lun waranserun.

IDA LUBA WARANSERUN

4. Ru humá aban hénpulu le arufudubalin ida liña lan gayara lan waranserun lun wawinwandun lidan Paraísu.

4 Ida luba waranserun guentó lubá wawinwandun lidan Paraísu? Samina huméi le. Dan le láguyun aban gürigia lidoun amu ageiraü, ida liña laranserun? Mosu ladügüni sun liyaraati lun lawinwandun kamá hamuga ñéinhali. Gayarati lagumeserun afurendeirei iñeñein le ayanuhóubei ñein luma lun léchudun luagu iseri échuni le ñeinbei. Gayarati íbini lagumeserun ouchei éigini le ñeinna. Ítarameme, gayarati waranserun lubá wawinwandun lidan iseri ubóu lau wadügüni sun wayaraati lun wawinwandun kamá awanheinhadiwa ñein. Ariha wamá fiú lídangiñe katei le gayarabei wadügüni.

5, 6. Ka uagu lunti lubéi wafurendeirun lun gaganbadi wamá tun lóundarun Heowá guentó?

5 Lidan ubóu le ídanbei wawinwanda adüga hamuti gürigia le labusenrubei Satanási. Gíbetiña gürigia saminatiña mama lan mosu gaganbadi hamá lun Bungiu ani gayara lan ladügüni kada gürigia le labusenrubei. Kati lánibei le resultóu? Súfuritiña gürigia saragu ani magundantiña (Heremíasi 10:23TNM). Ánheinti wagía, subudi wamuti aban lan gumadimati hínsiñehabuti Heowá. Ligía gaganbadi wabéi lun. Ani lídanme iseri ubóu, buídutimabei ibagari lugundun gaganbadibaña sun gürigia lun Bungiu.

6 Anhein busén wabéi waranserun lun wawinwandun lidan Paraísu, mosu wéchudun guentó lun gaganbadi wamá tun lóundarun Heowá. Ka uagu? Ladüga wibihiba adundehani lidan Paraísu lun wadügüni Ubóu ábanme lubuidun fuluri-agei luma lun wíderaguniña gürigia ha lúnbaña háguyugun afurendeira luagu Heowá. Gíbebei wadagimanu lunti ladügǘn. Ligía lunti lubéi wálügüdagun woungua: “Anhoun amuriaha lóundarun Heowá numa lun nadügün aban wadagimanu le mínsiñeti nun, gaganbadibadina san ani ábame nadügüni nuadigimari lau ugundani?”.

7, 8. a) Ka uagu lunti lubéi wéchudun guentó lun wawadigimaridun lau ugundani tidan lóundarun Heowá? b) Ka amuriahóubei hamá fiú íbirigu? c) Ida luba wasandiragun woungua lidan Paraísu?

7 Lun waranserun lun wawinwandun lidan Paraísu mosu wafurendeirun agundaara lau furumiñeguarügü wadagimanu  le lunti wadügüni ani gídehadi wagíame. Kéiburi dan le tíchugun lóundarun Heowá aban iseri wadagimanu woun lidan amu fulasu, áfaaguatiwa lun wídehan luma lun gunda wamá. Ánhawa échuda lun wídehan tuma lóundarun Bungiu guentó, ménrenguntimabei woun wadügüni lidan iseri ubóu (aliiha huméi Ebüréu 13:17). Samina wamá luagun le asuseredubei houn ísüraelina dan le hachülürünbei lidoun fulasu le füramase lubéi Heowá houn. Siñati meha hanúadahan halíaba lan heredera. Ariñawagúarügüti houn halíaba lan libiti fulasu ligía heredera (1 Lúrudu 26:52-56; Hosué 14:1, 2). Gayarati ítara luba lan giñe lidan fuluri-agei, háfuga siñabei wanúadahani halíaba lan weredera. Gama lumoun, anhein furendeihadiwa lubéi ídeha tidan lóundarun Heowá, gúndaabadiwa lau weseriwidun lun le ñein lumuti wawinwanda.

8 Ábanbei lubuidun chansi gayara lan weseriwidun lun Bungiu lidan Paraísu lábugiñe Larúeihan. Ligía wadügünbalin le tariñagubei lóundarun Heowá lúmagiñe guentó. Gama lumoun, gayarabei lamuriahóun wama lun weseriwidun lidan amu fulasu. Kei hénpulu, añahein fiú íbirigu ha nadagimeintiña tidan sukursáli to Merigaboun amuriahóuati hama lun heseriwidun bóugudi tuéi Beteli. Ani añahein fiú óunigirutiña sirkuitu amuriahóuati hama lun heseriwidun kei prekursorugu espechalitiña ladüga harumudiri o luagu amu katei. Súngubei íbirigu ha gúndaatiña lau le hadügübei, ani labiniruñanu Heowá saragu. Anhein busén wabéi lun gunda wamá ani lun labiniruniwa Heowá, ka lunbei wadügüni? Mosu wamuriahan luma Heowá lun líderaguniwa, lun wadügüni sun wayaraati lun weseriwidun lun ani gunda wagíame lau furumiñeguarügü wadagimanu le ichugúti woun (aliiha huméi Ariñawagúni 10:22). Ánhawati abusenra wawinwandun lidan somu fulasu lidan Paraísu ani ábame tariñagun lóundarun Heowá woun lun wawinwandun lidan amu? Chóuruti mámabei lan aban turóbuli halía lan wawinwanda o ka lan wadagimanu lunbei wadügüni. Wéiribei weteingiradi ladüga lígiruniwa Heowá lun wawinwandun lidan Paraísu (Neemíasi 8:10).

9, 10. a) Ka uagu gayara lubéi mosu lanme gaguraasun wamá lidan Paraísu? b) Ida liña gayara lan warufuduni guentó gaguraasun wamá?

9 Háfuga mósume gaguraasun wamá lidan Paraísu. Háfuga warihibei ugundani le lunbei hasandiruni amu danme le háguyugun haduheñu hama hamadagu. Ani háfuga mosu lanme wagurabahani háguyugun waduheñu. Anhein asusereda woun ítara, wagundaaruba san hama amu ani ábame wagurabahan lau gurasu? (Rómana 12:15.) Ánhawa agurabaha guentó lau gurasu lun lagunfuliruni Heowá lani füramasei, ligiamémeba wadüga ámuñegü (Apurichihati 7:8).

10 Gayarati giñe waranserun lubá webelurun lidoun Paraísu lau warufudun gurasu dan le anihein lan somu asansiruni lidan ligaburi lafuranguagüdüniwa somu arufudahani tidan wani  agumeiraguagüdüni. Aturiaha wamuti san iseri ariñahani ligía lau duari? Gaguraasuntiwa san dan le ua lan gunfuranda wamani sunsuinagubei? Ánhawa gaguraasun guentó, ménrenguntimabei woun gaguraasun wamá danme le líchugun Heowá iseri adundehani woun lidan Paraísu (Ariñawagúni 4:18; Huan 16:12).

11. Ka uagu lunti lubéi wafurendeirun guentó lun feruduna wamaniña amu?

11 Líderagubadiwa giñe feruduna wamaniña amu lun wawinwandun lidan Paraísu. Lidan milu irumu le lánina larúeihan Kristu, agidareina luba figóu wawéi murusun murusun, íbini hawéi ha lúnbaña háguyugun (Adügaü 24:15). Gayarabei san feruduna wamaniña amu ani óusera wamañame lau ínsiñeni danme le hachararun woun? Ánhawa afurendeira íchiga ferudun guentó, ménrenguntimabei woun wanaagun woungua buidu hama amu lidan Paraísu (aliiha huméi Kolosana 3:12-14).

Lidan Paraísu mósume warufuduni igaburi le larufudahabei Heowá woun uguñe weyu

12. Ka uagu mosu lubéi warufuduni igaburi burí le larufudahabei Heowá woun guentó?

12 Lidan Paraísu mégeibadiwa warufuduni igaburi le larufudahabei Heowá woun uguñe weyu. Ka uagu? Ladüga háfuga mámaba sun dan weresibiruni le wabusenrubei. Ani háfuga mosu lanme wagurabahan lubá wibihin fiú katei. Mósume wagundaarun ani geteingiradi wagíame kei auti wadeiragun woungua. Anhein warufuda igaburi burí le guentó, warufuduba waranseruña lan lubá wawinwandun lidan iseri ubóu ani luagu busén wamá wawinwandun lidan aban ubóu le ñeinba lubéi gaganbadi hamá sun gürigia lun Heowá (Ebüréu 2:5; 11:1).

TENI WAMÁ LUN WESERIWIDUN LUN HEOWÁ

Apurichiha humá lau ubebeni

13. Kaba katei súdinitima woun lidan Paraísu?

13 Lidan Paraísu, ñeinbei sun le wemegeirubei lun gunda wamá. Gama lumoun, wamadagua luma Heowá ligíaba adüga lúntima wagundaarun (Matéu 5:3). Weseriwidun lun Heowá ligíaba katei súdinitima woun ani wagundaaruba saragu lau wadügüni (Sálumu 37:4). Ligíati, anhein busén wabéi waranserun  lubá wawinwandun lidan iseri ubóu, lunti wíchuguni weseriwidun lun Heowá lidan furumiñeti lúgaaru (aliiha huméi Matéu 6:19-21).

14. Ka gayarabei hadügüni nibureintiña?

14 Ida luba wagundaaruntima lidan weseriwidun lun Heowá? Mosu wawadigimaridun lun wagunfulirun somu katei le wabusenrubei wadügün. Anhein nibureingidibu lubéi, saminabá ida luba lan bayusuruni bibagari lun beseriwidun lun Heowá. Gayarati basaminarun luagun eseriwiduni lidan dan dayarüti. Gayarati badarirun saragu adundehani tidan wani agumeiraguagüdüni luagu ida luba lan badügüni. * Gayarati giñe bayanuhan hama íbirigu ha seriwihaña luagu saragu irumu lidan dan dayarüti. Anhein bayusura bibagari lun beseriwidun lun Heowá, bafurendeiruba saragu katei le lunbei laranserunibu lubá bibagari lidan Paraísu.

Samina humá luagun le gayarabei hadügüni lidan heseriwidun lun Bungiu

15. Ka amu katei gayarabei wadügüni lidan weseriwidun lun Bungiu?

15 Sun wagía gayarati wasaminarun kaba lan wadüga lun buídutima lan weseriwidun lun Bungiu. Gayarati wafurendeirun ida luba lan buídutima lan wagunfulirun lau wani ministeriu. Gayarati giñe warihini ida luba lan wawinwanduni adundehani le tídanbei Bíbülia. Ani gayarati giñe wouchun wabuiduragüdüni ligaburi waliihan, ligaburi wóunabun lidan adamuridaguni o ligaburi wíchugun somu yanu lidan adamuridaguni. Haritagua waméi dan le lan wáfaaguña lan wagunfulirun somu katei lidan weseriwidun lun Bungiu seriwitimatiwa lun lau ubebeni ani íderagua lumutiwa lun waranserun lubá wawinwandun lidan iseri ubóu.

IGABURI LE BUÍDUTIMABEI LUN WAWINWANDUN

Ru humá seremei lun Heowá luagu sun le líchugubei woun

16. Ida liña wasubudiruni eseriwiduni lan lun Heowá ibagari le buídutimabei?

16 Anhein wayusura wadaani lun waranserun lubá wawinwandun lidan Paraísu,  weferidiruña san aban luwuyeri ibagari buídutimati guentó? Uá. Eseriwiduni lun Heowá ligía ibagari le buídutimabei. Meseriwiduntiwa lun ladüga wafosurúña lan lun wadügüni o ladügarügü busén wamá wásügürün lau ibagari danme le lagumuchun ubóu le. Adügati wamadagua luma Bungiu luma weseriwidun lun lun buídutima lan wabagari luma lun gunda wamá. Ítara liña ladügüniwa Heowá. Buítimati línsiñehabu luma ladundehan sügǘ lau amu katei (aliiha huméi Sálumu 63:1-3). Gúndaatimatiwa dan le weseriwidun lun Heowá tau sun wanigi. Ha seriwihañabaña lun luagu saragu dan subudi hamuti buídutima lan ibagari dan le weseriwidun lun Heowá (Sálumu 1:1-3; Isaíasi 58:13, 14).

Áluaha humá adundehani tidan Bíbülia

17. Afuranguagüda huméi anhein gayarabei lubéi wagundaarun ani emeraagua wagíame lidan iseri ubóu.

17 Gayaraabei san wemeraagun, gayara ligíame wadügün somu katei le hínsiñeti woun hama wamadagu lidan Paraísu? Anha. Ladüga Heowá adügübaliwa lau ayumahani lun wagundaarun lau wabagari. Ani füramaseti woun líchugubei lan sun le wayumahabei woun (Sálumu 145:16; Apurichihati 2:24). Gama lumoun, haritagua waméi gúndaatima wamá lau le wámabei dan le wíchuguni wamadagua luma Heowá lidan furumiñeti lúgaaru. Gayarabei wemeraagun lidan Paraísu ani gayarabei giñe wadügün amu katei le íchuguti ugundani woun, gama lumoun súdinitimabei weseriwidun lun Heowá woun. Ligíati, winwan wamá ítara lúmagiñe guentó ani teni wamá lun burí katei buiti le resibi wamaalibei luagu weseriwidun lun Bungiu (Matéu 6:33).

Adügati wamadagua luma Heowá lun buidu lan wabagari luma lun gunda wamá

18. Ida liña warufuduni waranseruña lan lubá wawinwandun lidan Paraísu?

18 Buídutimabei ibagari lidan Paraísu sügǘ lau le wasaminarubei. Arufuda waméi busén wamá ñein wamá lau waranserun lúmagiñe guentó. Ida? Lau warufuduni igaburi le larufudahabei Heowá woun luma lau wapurichihan lau ubebeni. Gunda wamá lau weseriwidun lun Heowá lau sun were. Chouru wamuti lagunfulirubei lan Heowá sun le füramase lubéi lidan Paraísu. Ligíati, winwan wamá guentó kamá ñéinhadiwa.

^ par. 14 Aliihabóun líburu Los jóvenes preguntan, volumen 2, páhina 311 darí 318.