Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2015

Mabulieida huméi hínsiñe humá lun Heowá

Mabulieida huméi hínsiñe humá lun Heowá

“Nasaminaruba luagu sun le [b]adügübei.” (SÁLUMU 77:12)

UREMU 18 LUMA 29

1, 2. a) Ka uagu chouru hubalin luagu hínsiñe hamá lubúeingu Heowá lun? b) Ka hemegeirubei sun gürigia?

CHOURU humuti san hínsiñe hamá lubúeingu Heowá lun? Samina humá luagun hénpulu burí le. Aban íbiri gíritu Taylene súnwandan tasaminarun mosu lan buídutima lan tadügüni katei ani ábaha tírudun. Luagu saragu irumu, ínchaha hamutu íbirigu lau ínsiñeni lun masaminarun tan wuriba tuouguoun. Ariñagatu lun hamuga lan mínsiñe tan lun Heowá, míchuti lan hamuga saragu gurasu luma adundehani tun. Ábanya íbiri gíritu Brigitte, aba lounwen tani weiriei ani aba terederun tábugua hau bián tisaanigu. Ariñagatu hagüriahóun lan irahüñü aban lídangiñe katei le hénrengutimabei lidan ibagari, dántima le berederun bábuguarügü hau. Gama lumoun, chouru tumuti hínsiñe tan lun Heowá ladüga íderagua laaru lun tawanduni igarigu luma íruni, ani mígirunti lun tasufurirun lóugiñe le gayarabei tawanduni (1 Korintuna 10:13). Ábanya íbiri gíritu Sandra tasufuriruña lau aban sandi le máraninati. Lidan aban adamurini, aba tayarafadun aban  íbiri tuagun to ibidiñetu tun lun tabusuragun tun luma lun tayanuhan tuma. Ariñagati tani Sandra weiriei ñuluguagüda lanu katei ligía hanigi. Ariñagati sandí hamani línsiñehabu Heowá íbini lidan katei ñǘbüriti le hadügübei íbirigu.

2 Sun gürigia mégeitiwa wasandirun ínsiñeni ani lun giñe hínsiñe wamá houn amu, ladüga ítara liña ladügüniwa Heowá. Gama lumoun, anhein sandi wabéi, anhein megei wabéi seinsu o anhein mabusenrun habéi gürigia haganbuniwa lidan apurichihani, gayarabei weferidiruni waguraasun ani gayarabei giñe wasaminarun mínsiñeediwa lan lun Heowá. Anhein asusereda lira woun, lunti waritaguni berese lan Heowá wau ani busén lan líderaguniwa. Mígirun lubadiwa ánhawa eseriwida lun lau úaraguni (Isaíasi 41:13; 49:15).

3. Kaba íderaguawa lun wachoururuni hínsiñe wamá lun Heowá?

3 Sun íbirigu ha uágubaña wayanuha chouru hamuti íderagua lániña Bungiu lidan lidaani lénrengunga. Gayarati giñe wachoururuni busén lan Heowá líderaguniwa (Sálumu 118:6, 7). Ánhawa asaminara luagun sun katei buiti le adüga láalibei wawagu, warihibei hínsiñe wamá lun (aliiha huméi Sálumu 77:11, 12). Lidan arütíkulu le warihiba gádürü idewesei le ru láalibei Heowá woun luma ida luba lan weteingiruni luagu: sun katei le ladügübei, Bíbülia, furíei luma lebegi asalbaruni (ariha huméi rekuáduru “Ka mini lubéi?”).

KATEI BURÍ LE LADÜGÜBEI HEOWÁ

4. Dan le warihini sun le ladügübei Heowá, ka ñǘbuinbei lidoun wasaminan?

4 Dan le warihini sun katei le ladügübei Heowá, aba wíchugun fe luagu weiri lan wínsiñe lun (Rómana 1:20). Ru lumuti Ubóu woun lau sun le mégeiwabei lun gunda lan wabagari. Adügati giñe sun luwuyeri éigini lun wagundaarun lau (Apurichihati 9:7). Ariñagatu aban íbiri gíritu Catherine gunda tan dan le tarihini lawinwandagun sun katei dan le lagumuchun lidaani huya luma lidiliga ani aba liabin lubachouga. Hínsiñeti tun tarihini láfuachun fuluri luma ida liña lan hagiribudun dunuru ha ñǘdünbaña ladüga lidiliga. Ani hínsiñeti tun tarihini tachülürün aban süsü eigei éigini le tígirubei luagu tufunederan tugusinan. Aba tariñagun anhein lan ru lubéi Heowá saragu katei buiti woun, ladügarügü liña hínsiñe wamá lun saragu. Gúndaati Wáguchi Bungiu lau larihini katei burí le adüga láalibei ani busenti giñe lun gunda wamá (Adügaü 14:16, 17).

Dan le warihini sun katei buíduburiti le adüga láalibei Heowá, aba wíchugun fe hínsiñe wamá lun

5. Ka amu katei arufudubalin woun hínsiñe wamá lun Heowá?

5 Arufuda lumuti giñe ligaburi ladügüniwa Heowá luagu hínsiñe wamá lun. Adüga lumutiwa lau ubafu lun wadügün wadagimanu le adügübei lun wasandiruni hu wamá ani lun wagundaarun (Apurichihati 2:24). Ru lumuti Ubóu woun lun wabuinchagüdüni hau gürigia, lun  wawadigimariduni luma lun wóunigiruniña animaalugu luma le líbiri katei (Agumesehani 1:26-28). Ani adüga lumutiwa lau ubafu lun wáyeihani lubuidun burí ligaburi (Éfesuna 5:1).

BÍBÜLIA

6. Ka uagu lunti lubéi weteingiruni Bungiu luagu líchugunu Bíbülia woun?

6 Ru lumutu Heowá Bíbülia woun ladüga hínsiñe wamá lun. Lunti weteingiruni luagu idewesei le, lugundun íderagua lumutiwa lun wasubudiruni ka lan ligaburibei Bungiu luma ka lan lasandirubei hawagu gürigia. Kei hénpulu, afuranguagüda tumuti Bíbülia ka lan meha lasandirubei Heowá hawagu ísüraelina íbini chará hamá lun saragu wéiyaasu. Ariñagati Sálumu 78:38: “Gudemeheitiña lun Bungiu, ábaha feruduna lániña magünrinchagun lumutiñaha; saraguha wéiyaasu, ígira lumuti agañiduni aba mígiraguagüdün lan lungua lun igañi”. Wasaminarun luagun bérusu le íderagua lumutiwa lun wafiñerun luagu hínsiñe wamá lun Heowá ani berese lan wau íbini chará wamá (aliiha huméi 1 Féduru 5:6, 7).

Íderagua tumutiwa Bíbülia lun wasubudiruni ida liña lan Bungiu luma ka lan lasandirubei hawagu gürigia

7. Ka uagu ítara tiña lubéi Bíbülia kei aban irisini?

 7 Ítara tiña Bíbülia woun kei aban irisini. Ka uagu? Ladüga yusu lumutu Heowá lun layanuhan wama. Dan le layanuhan aban úguchili luma lisaani buidu, aba laweiridun ínsiñeni luma afiñeni le hasandirubei hawougua. Heowá Wabungiutebei le hínsiñehabubei. Ani íbini siñá lan warihini, ni waganbuni, ayanuhati woun tídangiñe Bíbülia. Ligíati, dan le waliihanu lunti wetenirun lun le tariñagubei woun (Isaíasi 30:20, 21). Ítarati, warihibei busén lan Heowá ladundehaniwa luma lun lóunigiruniwa. Ábameti wasubudiruni buidu ani ábame laweiridun wafiñen luagu (aliiha huméi Sálumu 19:7-11 luma Ariñawagúni 1:33).

Ererehati Heú lun Hosafátü, ani ariñagati giñe lun darihali lan Heowá katei buiti luagu (Ariha huméi párafu 8 luma 9)

8, 9. a) Ka labusenrubei Heowá lun wasubudiruni? b) Ru humá aban hénpulu le arufudubalin metenirun lan Heowá lun wachara.

8 Busenti Heowá wasubudiruni metenirun lan lun wachara, lun lan katei buiti le wadügübei letenira (2 Krónikasi 16:9). Ariha waméi le asuseredubei lun lurúeite Hudá le gíribei Hosafátü. Aba desidírü lan lun lóundarun lumoun Aabü le lurúeite Ísüraeli lun lawuribuhan hama síriana. Ariñagatiña 400 profetagu yéetiña lun Aabü lagañeirubei lan wuribu. Gama lumoun, aba lariñagun aban profeta inarüniti gíriti Mikaíasi lun Aabü luma lun Hosafátü ánhaña lan awuribuha, heferidirubei lan wuribu. Ani ligía asuseredubei. Hilati Aabü lidan wuribu ani ítagaraüyebe giñe lounwen Hosafátü. Aba lóunahani Heowá Heú lun lererehan lun Hosafátü luagu katei wuribati le desidírü lubéi, luma lun lariñagun lun: “Anihein amu katei buiti luagu bufulesein” (2 Krónikasi 18:4, 5, 14-22, 33, 34; 19:1-3).

9 Ka burí meha katei ladügübei urúei Hosafátü? Saragu irumu lubaragiñe dan ligía óunaha lumutiña meha urúeigu, ladügawagun Lewí hama fádirigu lun hegeyedaguni Hudá arufudahei lilurudun Bungiu houn sun gürigia. Barüti meha katei ligía lubuidun resultóu, lugundun íbini gürigia lídangiñetiña amu ageiraü furendeitiña luagu Heowá (2 Krónikasi 17:3-10). Íbini adüga lan Hosafátü aban katei wuribati, mabulieidun lumuti Heowá katei buiti le meha ladügübei. Ka larufudahabei le woun? Íbini lan chará wamá sun wagía, ánhawa áfaagua lun wasigirun eseriwida lun Heowá, hínsiñememebadiwa lun ani mabulieidun lubéi katei buiti le adüga wamaalibei.

FURÍEI

10, 11. a) Ka uagu wariñaga aban lan idewesei lúmagiñeti Heowá furíei? b) Ida liña gayara lan lóunabuni Heowá wafurieidun? (Ariha humóun iyawaü to lídanboun lagumeseha arütíkulu.)

10 Ka ladügübei aban úguchili buiti dan le busén lan lisaani layanuhan luma? Kei le nidiheri lubéi luagu lisaani, sagati dan lun laganbuni luma lun lasubudiruni ka lan lasandirubei. Heowá Wáguchibei ani hínsiñetiwa lun saragu. Ligíati, dan le wafurieidun lun, aganba lumutiwa. Chóuruti aban lan lubuidun chansi gayara lan wayanuhan luma Heowá.

Aganba lumutiwa Heowá ani gunfuranda lumutiwa, íbini dan le ua lan gunfuranda hamaniwa amu

11 Aban idewesei lúmagiñeti Heowá furíei. Ka uagu? Ladüga seriwiti lun wayanuhan luma Heowá le oura wabusenrun. Ligía wamadabei ani súnwandan gadaani lan lun laganbuniwa. Lidan furumiñeti párafu ayanuhatiwa tuagu aban íbiri gíritu Taylene. Ariñagatu gayara lan wabahüdagun furumiñeguarügü katei lun Heowá. Dan le wabahüdaguni lun Bungiu ka lan  wasandirubei, gayarati lóunabuniwa lidan ámuñegueinarügü igaburi. Kéiburi lau somu bérusu tídangiñeti Bíbülia, tídangiñe somu agumeiraguagüdüni o lídangiñe gurasu le líchugubei somu íbiri woun. Aganba lumutiwa Heowá ani gunfuranda lumutiwa íbini dan le madügün hamani amu. Arufuda lumuti giñe woun hínsiñe wamá lun dan le lóunabuni wafurieidun.

12. Ka uagu buidu lubéi waturiahani furíei burí le tídanbei Bíbülia? Írida humá fiú lídangiñe furíei ligía.

12 Arufudahati furíei le waliihabei tidan Bíbülia saragu katei woun. Ligía buidu lubéi lun waturiahani lidan wáhuduragun keisi iduheñu. Gayarati waturiahani ǘnabuguni le larufudubei Honasi dan le lafurieidunbei lurageirugugiñe udu (Honasi 1:17–2:10). Gayarati giñe wakutihani lubuidun furíei le meha ladügübei Salomón dan le tederegerúniwa ténpulu (1 Urúeigu 8:22-53). Gayarati giñe wasaminarun luagun furíei le larufudahabei Hesusu (Matéu 6:9-13). Anhein wayusura wadaani lun wasaminarun luagun furíei burí le, wafurendeiruba afurieida buidu. Ani lunti giñe mabulieidun wamani súdini lan wafurieidun súnwandan. “Ábameti líchuguni Bungiu lidarangilan [woun], le wéiritimabei luéi sun subudi; lun lóunigirunu [w]anigi luma sun [wa]saminan”. Ánhawa afurieida súnwandan, wéiritimabei weteingiruni Heowá luagu línsiñehabu (Filipuna 4:6, 7).

LEBEGI ASALBARUNI

13. Ka chansi wibihibei seremei lebegi asalbaruni?

13 Arufuda lumuti giñe Heowá línsiñehabu woun lau lafayeiruni lebegi wasalbarun. Ru lumuti idewesei ligía woun, “gabagari wamaamuga lídangiñe” (1 Huan 4:9). Afuranguagüda lumuti apostolu Pábulu ua lan ni aban lun líchuguni libagari luagu aban “gürigia le richaguati” ani háfuga lan líchuguni aban gürigia libagari luagu “aban gürigia le buiti le tímatimaati”. Gama lumoun, ariñagati arufuda lani Bungiu hínsiñe wamá lun saragu lau lóunahani Liráü lun lounwen wawagu, “lau sun meha gafigoungidiwa lan” (Rómana 5:6-8). Ru lumuti lounwen Hesusu chansi woun lun lumadagu wamá Bungiu ani ligía katei wéiritimati le ladügübei Bungiu lun larufuduni hínsiñe wamá lun.

14, 15. a) Ida liña hasagarun kristiánugu anuadirúaaña buiti lídangiñe lebegi asalbaruni? b) Ida liña hasagarun ha lúnbaña midin hamá sielu buiti lídangiñe lebegi asalbaruni?

14 Ida liña lahuudun lebegi asalbaruni houn kristiánugu anuadirúaaña? Sandí hamuti kristiánugu ha línsiñehabu Heowá lidan aban igaburi espechaliti (Huan 1:12, 13; 3:5-7). Anúadira laaña Bungiu lau lani sífiri sandu, ani ligía lisaanigu haaña lubéi (Rómana 8:15, 16). Ariñagati Pábulu ñun haña lan “luma Kristu yágüta sielu” (Éfesuna 2:6). Ánheinti añaheingua lubéi fiú kristiánugu anuadirúaaña ya ubouagu, ka mini lubéi le lariñagubei Pábulu? Mini lan  ru laali lan Heowá emenigini houn lun hawinwandun lun súnwandan sielu (Éfesuna 1:13, 14; Kolosana 1:5).

Arufuda lumuti lebegi asalbaruni hínsiñe wamá lun Heowá saragu

15 Ida liña lahuudun lebegi asalbaruni houn ha manúadirunwabaña lun houdin sielun? Anhein afiñe habéi luagu lebegi asalbaruni, gayarati lumadagu hamá Bungiu. Ani ámuñegü gayarabei giñe lirahüñü hamá Bungiu ha lúnbaña hawinwandun lun súnwandan ubouagu. Kei aubei warihei, arufuda lumuti lebegi asalbaruni hínsiñe hamá sun gürigia lun Heowá (Huan 3:16). Gúndaatiwa lau wasubudiruni ánhawa lan úaragua lun Bungiu, líchugubei lan ibagari le buídutimabei woun lidan Paraísu. Chóuruti lebegitima lan asalbaruni arufudubalin weiri lan wínsiñe lun Heowá. Ligíati, sigí wamá arufudei seremei waña lan lun tídangiñe sun wanigi.

ARUFUDA HUMÉI LUN HEOWÁ HÍNSIÑE LAN HUN

16. Ánhawa asaminara luagun ida liña lan larufuduni Heowá hínsiñe wamá lun, kaba wadüga?

16 Arufuda lumuti Heowá woun hínsiñe wamá lun lidan ámuñegueinarügü igaburi. Ariñagati urúei Dawidi: “Bungiu, huliliti bisaminan nun; mébehati súngubei! Ánhana hamuga abusenra nabahüdüni, gíbeti hamuga sügǘ lau sagoun” (Sálumu 139:17, 18). Ánhawa asaminara luagun sun ínsiñeni le larufudubei Heowá woun, hínsiñetimabei woun eibu dan ani wadügübei sun wayaraati lidan weseriwidun lun.

17, 18. Ida luba warufuduni lun Heowá hínsiñe lan woun?

17 Ida luba warufuduni lun Heowá hínsiñe lan woun? Lau wapurichihani uganu buiti luáguti Larúeihan Bungiu lau ubebeni (Matéu 24:14; 28:19, 20). Warufudubei giñe lau úaragua wamá dan le lidan wamá turóbuli le óuchagubalin wafiñen (aliiha huméi Sálumu 84:11 luma Santiagu 1:2-5). Íbini wéinamu lan turóbuli burí ligía, subudi lumuti Heowá ka lan wasufurirubei ani líderagubadiwa ladüga hínsiñe wamá lun (Sálumu 56:8).

18 Lidan arütíkulu le arihaadiwa fiú katei le ídanbei gayara lan warufuduni lun Heowá hínsiñe lan woun. Furumiñe, lau wasaminarun luagun sun katei buíduburiti le adüga láalibei. Libiaman, lau waturiahanu Bíbülia súnwandan. Lǘrüwan, lau wafurieidun súnwandan lun héretima lan wamadagua luma Heowá. Ani ligadürün, lau wasaminarun luagun lebegi asalbaruni (1 Huan 2:1, 2). Anhein wadüga sun le, wachoururubei hínsiñe wamá lun Heowá, ani hínsiñetimabei woun eibu dan.