Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2015

 ABAHÜDAGUNI LUÁGUTI IBAGARI

“Gúndaaguala burí ubouhu”

“Gúndaaguala burí ubouhu”

Wein-biama lidan seingü-hati lidan irumu 2000, tídanñadina meha Beteli to Merigaboun hama saragu íbirigu ha lídangiñetiña ámuñegueinarügü ageiraü. Lídanñadiwa lasali le ñein lubéi hadamuridagua lílana Sétanu le Arihibei lau Hawadigimari Gefentiña luagu Heowá lidan sun ubóu agurabaha fiú íbirigu lídangiñetiña sétanu le arihibei lau labürühóun ariñahani. Wéiriti meha tádühan wanigi lugundun wóudinña meha lun warufuduni houn ida liña lan wasaminarun wíderaguniña íbirigu ha ásügüragüdübarun agumeiraguagüdüni. Mabulieidun nubéi adamuridaguni ligía. Busentün san hasubudiruni ka lan uagu? Furumiñe, nabahüdaha fiú katei hun luagu nibagari.

Badiseitina Queensland, seriwitina meha kei prekursoru Tasmania ani lárigiñe seriwitina kei misioneru Tuvalu, Samoa luma Fiyi

LIDAN uburugu Queensland (Australia) nagurahóua lidan irumu 1955. Estelle luma Ron hiri nagübürigu. Murusun dan lárigiñe nasirua nan, aba tagumeserun núguchu aturiahoun Bíbülia hama gefentiña luagu Heowá. Aba tabadiseirun aban irumu lárigiñe, ánheinti núguchi 13 irumu lárigiñe ligía labadiseirun. Au badiseitina lidan irumu 1968 lidan aban fulasu díseti Queensland.

Hínsiñegubeiñoun líburu nun luma lafurendeirúniwa amu iñeñein. Dan meha le ñǘraügidina aba meha hanügünina nagübürigu tidan karü, ani súnwandan meha aliiheina nan. Afiñetina mínsiñe lan meha houn nagübürigu maríagun nani sun katei buiti le bóugudibei. Gama lumoun, seremei línsiñe aliihani nun, buiti meha lidin nun leskuelarugu. Gáñeitina meha saragu idewesei leskuelarugu uburugu Glenorchy (Tasmania).

Lidan dan ligía aba lichugún aban ídemuei nun lun nidin aturiaha tidan luban furendei íñuti. Hínsiñeti meha aliihani luma aturiahani nun, ligía mosu lubéi meha desidírü nan anhein nánharuba lubéi lun ídemuei ligía o máhabadina lan. Gama lumoun arufudahaaru meha núguchu nun lun línsiñedun Heowá nun sügǘ lau furumiñeguarügü katei (1 Korintuna 3:18, 19). Seremei le tarufudahabei nun, aba desidírü nan lárigiñe lanme nagumuchuni naturiahan leskuelarugu  aba lanme neseriwidun kei prekursoru. Gúndaatiña meha nagübürigu lau le nasaminarubei. Ligía aba lubéi nagumeserun eseriwida kei prekursoru enerurugu lidan irumu 1971 dan le meha 15 irumu nau.

Lidan widü irumu le asigirubei seriwitina meha kei prekursoru lidan ubouhu le gíribei Tasmania. Ñein namarieida tuma aban nibureintu magadiñetu gíritu Jenny Alcock. Biángubei wagía seriwitiwa kei prekursorugu espechalitiña luagu gádürü irumu lidan lirahüñü burí aüdü le gíribei Smithton luma Queenstown.

WESERIWIDUN KEI MISIONERU LIDAN FIÚ UBOUHU

Lidan irumu 1978, aba nidin tuma Jenny lidan aban adamurini Moresby (Papúa Nueva Guinea) le ídounbei hachülüra íbirigu lídangiñetiña saragu ageiraü. Haritagua nágili aban yanu le líchugubei aban misioneru lidan iñeñein hiri motu. Úati gunfuranda nan ni aban dimurei, gama lumoun aba nasaminarun hínsiñe lan hamuga nun misioneru nan. Ítara luba meha gayara lan nafurendeirun amu burí iñeñein luma lun níchugun yanu le íchuguti gurasu houn íbirigu ha lídangiñetiña amu burí ageiraü. Aba meha níchugun fe gayara lan nayusuruni ínsiñeni le nasandirubei luagu amu burí iñeñein lun neseriwidun lun Heowá.

Dan le wagiribudunbei Tasmanioun, aba wamisurahóun lun weseriwidun lidan aban ubouhu gíriti Funafuti (Tuvalu). Magurabun wamuti yebe. Chülütiwa ñeinhin enerurugu lidan irumu 1979. Ǘrüwarügüñanu meha gefentiña luagu Heowá lidan sun fulasu ligía.

Au tuma Jenny Tuvalu

Hénrenguti meha woun wafurendeirun ayanuha tuvaluano, ladüga úatu meha dimurei-agei ni íchugutiña külase lidan iñeñein ligía. Ábanrügüñoun meha Bíbülia lánina iseri daradu lidan iñeñein ligía. Ligía aba lubéi desidírü wamá wafurendeiruni woungua. Ani aba wouchun wafurendeirun 10 o 20 dimurei luagu weyu. Málüti lárigiñe, aba wíchugun fe gíbeti lan katei úati gunfuranda wamani buidu. Kéiburi dan le wayanuhan, lubaragiñe hamuga wariñagun wuriba lan layanuhóun hama máfianu, aba wariñagun wuriba lan layusurún balansu luma badun. Gama lumoun, aba wáfaagun lun wasigirun afurendeira, ladüga wíchuguña meha aturiahani tídangiñeti Bíbülia houn bandi gürigia. Fiú irumu lárigiñe, aba tariñagun aban hádangiñe gürigia hagía woun wuriba lan wayanuhani iñeñein le furumiñe ani ua lan meha gunfuranda hamani ka lan wariñagubei.

Úatu meha muna lidan fulasu ligía lun wakilahan, ligía mosu lubéi meha wawinwandun hábiñe fiú íbirigu. Mosu meha wayanuhani iñeñein tuvaluano sun dan ani ligía íderagubaliwa lun furese lan wafurendeiruni. Ani kei le dísegua lubéi meha wayanuhan inglesi, aba tuvaluanohali lan furumiñeti wañeñe.

Gíbetiña meha gürigia Tuvalu ha busentiña hafurendeirun tuagu Bíbülia, ani úatu meha agumeiraguagüdüni lidan hañeñe. Ida luba meha san hafurendeirun gürigia ha luagu Heowá, heremuhan uremu lun, habasiihan adamuridagua o habadiseirun? Mégeitiña meha agumeiraguagüdüni to ayanuhaboun  luagu Heowá houn lidan hañeñe (1 Korintuna 14:9). Le turobulibei, móustaruntiña meha gürigia ha ayanuhabaña tuvaluano ni 15,000. Lachülürüba meha san dan lun ñein tan líburu lidan iñeñein ligía? Arufudati lóunabagüle Heowá bián katei. Furumiñe, busén lan Bungiu lun hasubudiruni gürigia ha awinwandubaña lidan ‘burí ubouhu’ le díseti (Heremíasi 31:10). Ani libiaman, busén lan líderaguniña gürigia ha arihíbaña lidan ubóu le kei ni kata (Sofoníasi 3:12).

LÁSÜGÜRAWAGÜDÜN ARIÑAHANI LIDOUN AMU IÑEÑEIN LUN HAFURENDEIRUN GÜRIGIA LUAGU HEOWÁ

Lidan irumu 1980, aba tíchuguni sukursáli wadagimanu woun lun wásügüragüdün agumeiraguagüdüni lidoun iñeñein tuvaluano. Genegeti meha woun mabafubadiwa lan lun wadügüni, ani íbini ítara gumesetiwa adügei (1 Korintuna 1:28, 29). Kei le ua lubéi meha leiti ñein lidan dan ligía, aba wagañeihan aban máhina lun imprimírü wamá ani mosu meha wahandilihanu lau wáhabu. Furumiñe, yusu wamutu lun imprimírü wamá agumeiraguagüdüni lubá adamuridaguni. Lárigiñe aba wayusurunu lun imprimírü wamanu líburu La verdad que lleva a vida eterna lidan iñeñein tuvaluano. Haritagua nágili líhemen tinta le wayusurubei luma lárouga le wasandirubei lidan awanha lan imprimíroun agumeiraguagüdüni.

Hénrenguti meha ásügüragüdüni lidoun tuvaluano ladüga úatu meha líburu ni dimurei-agei lun wakutihan. Gama lumoun, aniheinha dan lachülürün ídemuei woun lidan magurabun wamani. Luagu aban weyu, aba nayuridagun agúara lúbiñoun aban gürigia le mabusenrunbei lasubudirun ni kata hawagu Gefentiña. Máisturu meha wügüri ligía, ani mawadigimaridunhali ladüga lirumudiri. Aba laritaguagüdüni nun mabusenrun lan lun bisida wamani. Gama lumoun, ariñagati aban katei le aweiridagüdübarun nanigi. Aba lariñagun úati lan furangu lan laganbún taliihóun wani agumeiraguagüdüni lidan tuvaluano ani aba lariñaguni nun ka lan idan wacharara. Aba nálügüdahan hama amu gürigia, ani aba wíchugun fe linarün lan. Ligía aba lubéi wadügün fiú asansiruni lidan ligaburi wásügüragüdün. Wéiritu nanigi lau narihini ida liña lan layusurun Heowá aban gürigia le aliihabarun wani agumeiraguagüdüni lun líderaguniwa, íbini mínsiñe wamá lun gürigia ligía.

Uganu luáguti Larúeihan Bungiu númeru 30 lidan tuvaluano

 Amisuragülei lánina Aritaguagülei furumiñetuboun agumeiraguagüdüni lidan tuvaluano to auboun wapurichiha muna tuagu muna. To tibiaman, Uganu luáguti Larúeihan Bungiu númeru 30, to meha áfuriduboun úara tuma to áfuriduboun lidan inglesi. Gúndaatiwa meha lau gayara lan wanügün agumeiraguagüdüni houn gürigia lidan hañeñe. Lau lásügürün dan, aba áfurideina tan saragu garüdia tuma burí líburu lidan iñeñein le. Lidan irumu 1983, aba tagumeserun sukursáli to Australiaboun adügoun Garüdia Atalaya lidan iñeñein ligía. Wein-gádürüñein meha páhina tidan kada garüdia ani kada 3 hati ligía meha táfuridun. Gúndaatiña meha gürigia tau wani agumeiraguagüdüni, ladüga hínsiñeti meha aliihani houn. Sagü meha táfuridun aban agumeiraguagüdüni lidan iñeñein tuvaluano, awisahatu radiu to lani urúei, ani anihein meha dan ligía meha ñunsu súdinitimabei lidan weyu. *

Ida liña meha san wásügüragüdünu garüdia lídangiñe aban iñeñein lidoun amu? Furumiñe, aba wadügüni lau wáhabu. Lárigiñe aba wásügüragüdünu lau máhina ani aba warihini anhein ua lubéi charati tidan. Ánhawa adarira charati tidan, ábaya wabürühanu lau máhina. Ítara liña wadüga darí lun madari wamá charati tidan ani aba wóunahanu tidoun sukursáli to Australiaboun tuagu koréu. Ñein, aba hásügüragüdüni bián íbirigu sun ariñahani ligía tidoun konputadora. Ani mayanuhantiña meha íbirigu hagía tuvaluano. Ida liña san hadüga lun másügürün lan charati hawéi? Aba tádaruni kada aban hádangiñe ariñahani tidoun konputadora ani lárigiñe, aba konparárü hamani anhein ligiaméme lubéi hámabei biángubei. Lárigiñe, aba híchuguni dibuhu lidan páhina burí ligía lun buidu lan taríawagun. Lárigiñe, aba hóunahanu woun tuagu awión lun warihini anhein buidu lubéi sun katei. Ani lárigiñe aba wóunahanu tun sukursáli lun imprimírua tan.

Mítaranhaali katei guentó! Uguñe weyu, mámaali mosu héibaagun íbirigu ha ásügüragüdübarun agumeiraguagüdüni lun houdin óunahei ariñahani tuagu koréu. Guentó, tidan aban konputadora hásügüragüdei ariñahani ani ñéinmeme háluahei anhein anihein lubéi somu charati lidan. Liibe-agei, dan anihein aban íbiri hama le afidirubalin dibuhu luma sun katei tidan agumeiraguagüdüni. Ani dan le aranseeru, aba hóunahanu íbirigu luéigiñe Internet tidoun sukursáli lun imprimírua tan.

ABA WOUNAHÓUN LIDOUN AMU BURÍ FULASU

Lidan burí irumu le asigirubei aba nounahóun tuma Jenny eseriwida lidan burí amu ubouhu. Lidan irumu 1985 aba wounahóun eseriwida tidan sukursáli to Samoaboun. Ñein sigitiwa ásügüragüdoun wani burí agumeiraguagüdüni lidoun iñeñein tuvaluano, gama lumoun, íderagua wamutiña íbirigu ha ídehabaña lidan ligiaméme wadagimanu lidoun iñeñein samoano, tongano luma toquelao. *Ani lidan irumu 1996 aba wounahóun tidoun sukursáli Fiyi lun wídehan lidan tásügürawagüdün agumeiraguagüdüni lidoun iñeñein fiyiano, kiribatiano, nauruano, rotumano luma tuvaluano.

Yusu wamutu meha agumeiraguagüdüni lidan tuvaluano lun warufudahan tuagu Bíbülia houn gürigia

Súnwandan wéirigüda lanu nanigi narihini ínsiñeni le hasandirubei íbirigu ha ásügüragüdübarun wani agumeiraguagüdüni lidoun amu iñeñein luagu hawadigimari, íbini hénrengu lan. Ítara kei Heowá,  busentiña lun haganbuni sun gürigia uganu buiti lidan hañeñe guánarügü (Arufudúni 14:6). Kéiburi dan le meha ladügǘn aransehani lun tásügürawagüdün Garüdia Atalaya lidoun iñeñein tongano, aba nóundaragun hama sun wéiyaaña lidan afiñeni ha Tóngabaña ani aba nálügüdüniña ka lan hádangiñe gayarabei lafurendeirun ásügüragüda ariñahani lidoun amu iñeñein. Aban hádangiñe aranseha máhina lifisiutebei, ani buiti meha lagañeirun lidan luadigimari. Gama lumoun aba desidírü lan lígiruni luadigimari lun lagumeserun ásügüragüdoun agumeiraguagüdüni. Ibidiñeti meha lun ida luba lan lagañeirun seinsu lun lanuriahaniña liduheñu, gama lumoun afiñeti meha luagu Heowá sunsuinagubei. Nadagimeinti meha keisi ásügüragüdüti luagu saragu irumu, ani súnwandan meha labiniruni Heowá hama liduheñu.

Busentiña giñe lílana Sétanu le Arihibei lau Hawadigimari Gefentiña luagu Heowá lidan sun ubóu lun ñein tan agumeiraguagüdüni lidan saragu iñeñein, íbini lidan iñeñein burí le hayanuhabei murusun gürigia. Lidan aban dan, aba halügüdǘn íbirigu lílana sétanu le anhein lunti lubéi lasigirúniwa wadagimanu lánina lásügürawagüdün ariñahani lidoun iñeñein tuvaluano. Ruti óunabagülei le híchugubei gurasu nun. Aba hariñagun ua lan ni aban resun lun hararamuni wadagimanu le. Aba hafunranguagüdüni megei hamá giñe fiú gürigia ha ayanuhabaña tuvaluano haganbuni uganu buiti lidan hañeñe.

Nabadiseiruñoun aban íbiri lidan aban lagunu

Au tuma Jenny seriwitiwa úara lidan Departamentu lánina Tásügürawagüdün Agumeiraguagüdüni Fiyi darí irumu 2003. Lidan irumu ligía aba wounahóun eseriwida lidoun Departamentu lánina Tásügürawagüdün Agumeiraguagüdüni Betelirugu Meriga, Patterson. Wéiriti meha ugundani le wasandirubei. Ka uagu? Lugundun departamentu meha ligía ídehabei lun lásügürawagüdün ariñahani lidoun burí amu iñeñein. Lidan lóugiñe bián irumu le waubei ñein, aweiyasuhatiwa lidoun saragu ageiraü lun wíderaguniña ámuñegueinarügü íbirigu ha ásügüragüdübaña ariñahani lidoun amu burí iñeñein.

SÚDINITI LE DESIDÍRÜ LUBÉI MUSU ÚARAGUATI

Guentó, giribu wamá lidoun irumu 2000, lidoun adamuridaguni le uágubei nayanuha hun lidan lagumeseha arütíkulu le. Irumu ligía aba híchugun íbirigu ha arihibaña lau wadagimanu lánina apurichihani lidan sun ubóu fe luagu megei hamá íbirigu ha ásügüragüdübarun agumeiraguagüdüni lidoun amu iñeñein larufudahóun houn lun hadügüni hawadigimari buidu. Hiibe-agei marufudahóuagili meha houn ida luba lan hadügüni wadagimanu ligía. Ligía aba lubéi desidírü lan musu úaraguati lun lichugún külase houn ásügüragüdütiña lun gunfuranda hamani ariñahani le abürüdǘbei lidan inglesi, luma lun habuiduragüdüni ligaburi hawadigimaridun.

Seremei arufudahani ligía, buídutimahali tásügürawagüdün wani agumeiraguagüdüni ani anuheinharu giñe lidan saragu iñeñein. Dan le wagumeserunbei eseriwida kei misioneru lidan irumu 1979, lídanrügüñein meha 82 iñeñein Garüdia Atalaya. Furumiñe, furitu meha lidan inglesi, ani saragu dan lárigiñe lidoun amu iñeñein. Ani guentó, adügǘwatu Garüdia Atalaya lidan lóugiñe 240 iñeñein. Ani lidan liibe-agei iñeñein ligía furitu úara tuma to áfuriduboun lidan inglesi. Uguñe weyu, anuhein wani agumeiraguagüdüni lidan lóugiñe 700 iñeñein. Saragu irumu lubaragiñe le genegeti yebe siñabei lan ladügǘn katei le.

Lidan irumu 2004, aba desidírü lan musu úaraguati aban katei súdiniti: lun tásügürawagüdün Traducción del Nuevo Mundo lidoun amu burí iñeñein. Ligía gayara lubéi haliihanu saragu gürigia Bíbülia. Lidan  irumu 2014, anuheinharu Bíbülia to o fiú fánreinti tídangiñe lidan 128 iñeñein, ani fiú lídangiñe iñeñein ligía ayanuhóuati lidan fiú ubouhu.

Narufuduñoun Traducción del Nuevo Mundo de las Santas Escrituras Griegas Cristianas lidan tuvaluano

Haritagua nágili aban adamurini le adügǘbei Tuvalu lidan irumu 2011. Sügühali meha saragu hati ani máhuyungili meha huya lidan sun ageiraü, ani aba hasaminarun íbirigu siñabei lan ladügǘn adamurini. Gama lumoun, weyu le wachülürünbei ligía lagumeserun áhuya. Au meha arufudubarun Traducción del Nuevo Mundo de las Escrituras Griegas Cristianas lidan iñeñein tuvaluano. Íbini mibe hamá íbirigu ayanuhati iñeñein ligía, resibi hamuti giñe lubuidun idewesei le lúmagiñe Heowá. Dan le lagumuchunbei adamurini, ábaya láhuyun. Ligía gayara lubéi wariñagun resibi hamá íbirigu bián idewesei siélugiñe weyu ligía.

Nálügüdüñanu nagübürigu, Ron tuma Estelle, lidan aban adamurini Townsville (Australia) lidan irumu 2014

Ma lirun ua tan nani weiriou lidan adamurini ligía. Aba tounwen lidan irumu 2009, lárigiñe tasufurirun 10 irumu lau kánserü. Darandiñein-seingü irumu wau maríeiñu. Danme le táguyugun, gúndaaboun lau tasubudiruni adügǘwa tan Bíbülia lidan iñeñein tuvaluano.

Maríeiyaadina tuma amu würi. Loraini Sikivou tíribei, ani tugía ábanya idewesei lúmagiñe Heowá. Nadagimeintu meha keisi ásügüragüdütu ariñahani lidoun amu iñeñein, ani nadagimeintu meha Betelirugu Fiyi tuma Jenny. Ligía weiri lubéi nugundan lau maríeiyaadina lan tuma aban würi to eseriwiduboun lun Heowá lau úaraguni ani hínsiñeti amu burí iñeñein tun kei nun.

Napurichihaña Fiyi tuma Loraini

Lidan burí irumu le sügühalibei ariha naali ida liña lan líderaguniña Heowá sun gürigia, íbini ha ayanuhabalin iñeñein burí le ibidiñeti houn saragu gürigia (Sálumu 49:1-3). Ariha naali giñe ugundani le hasandirubei dan le heresibirun agumeiraguagüdüni lidan hañeñe luma dan le heremuhan lun Heowá lidan hañeñe guánarügü. Aba nasaminarun luagun ínsiñeni le lasandirubei Heowá wawagu (Adügaü 2:8, 11). Haritagua nágili lariñagun aban íbiri tuvaluna gíriti Saulo Teasi lárigiñebei weremuhani aban uremu luagu buítimati lan laganbún uremu lidan tuvaluano sügǘ lau lidan inglesi.

Lidan nefu-hati irumu 2005 aba neresibirun aban iseri wadagimanu. Aba lichugún chansi nun lun aban nan hádangiñe lílana Sétanu le Arihibei lau Hawadigimari Gefentiña luagu Heowá lidan sun ubóu. Íbini siñaali lan nawadigimaridun keisi ásügüragüdüti ariñahani lidoun amu iñeñein, teinki numuti Heowá luagu lígirun lun nasigirun íderaguaña ha ásügüragüdübarun agumeiraguagüdüni lidoun amu burí iñeñein lidan sun ubóu. Gúndaatina lau narihini ida liña lan lóunigiruniña lubúeingu, íbini ha erederubaña lidan burí ubouhu le dísetimabei. Kei lariñagun Sálumu 97:1: “Gúndaaguala sun múa! Gúndaaguala burí ubouhu le gíbebei lamidangua barana! Aburemei urúeibei!”.

^ par. 18 Anhein busén hubéi lanwoun ariñahani luagu ligaburi heresibirunu gürigia tuvaluna wani agumeiraguagüdüni, ariha humóun Garüdia Atalaya to lánina 15 lidan duusu-hati irumu 2000, páhina 32; Garüdia Atalaya to lánina 1 lidan widü-hati irumu 1988, páhina 22, tuma ¡Despertad! to lánina 22 lidan duusu-hati irumu 2000, páhina 9.

^ par. 22 Gayarati haliihan lanwoun ariñahani luagu lásügürawagüdün ariñahani lidoun amu iñeñein Samoa tidan Anuario 2009, páhina 120, 121, 123 luma 124.