Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Widü-hati irumu 2015

Anúadaha humaña humadagu buidu lidan lagumuhóun dan le

Anúadaha humaña humadagu buidu lidan lagumuhóun dan le

“Féridigüda hamuti hagübüri umadagu lubuidun igaburi.” (1 KORINTUNA 15:33)

UREMU 25 LUMA 20

1. Ka dan ídanbei wawinwanda guentó?

WAWINWANDUÑA lidan dan hénrenguti. Lidan irumu 1914 lagumesera lagumuhóun dan lidan ubóu le. Lúmagiñe dan ligía, wuribatimahali katei ubouagu (2 Timotéu 3:1-5). Subudi wamuti luagu aganwoundeina luba lan, ladüga ariñagatu Bíbülia haribadatimaba lan gürigia (2 Timotéu 3:13).

2. Ka burí isebáhari hínsiñebei houn saragu gürigia uguñe weyu? (Ariha humóun iyawaü burí to lídanboun lagumeseha arütíkulu.)

2 Uguñe weyu, gúndaatiña gürigia lau katei le mínsiñebei lun Heowá, kéiburi wuribani, agamariduni le múaranti luma lilurudun Bungiu luma abiñarahani. Arufudúati katei burí le keisi aban katei buiti lidan Internet, bigibigitu, cine, líburu tuma garüdia. Uguñe weyu, sánsiguaali katei lidan fiú ageiraü ani guentó rúhaña üma lun ladügǘn katei le meha mabuidunbei larihín furumiñe. Gama lumoun, masansirun lágili Heowá lilurudun ani iyereegumémegili katei wuribati lun (aliiha huméi Rómana 1:28-32).

3. Ka hasaminarubei saragu gürigia wawagun wagía le gaganbadibei lun lilurudun Bungiu?

 3 Lidan meha hadaani furumiñetiña kristiánugu, gúndaatiña meha giñe gürigia adaagua katei wuribati luma figóu lánina agamariduni. Ánheinti kristiánugu madügün hamuti lira, ladüga gaganbaditiña lun lilurudun Bungiu. Ligía samina habéi meha saragu gürigia amu hamá kristiánugu hawéi ha híbiri gürigia, adügatiña bula hau ani éibaaha hamutiña meha (1 Féduru 4:4). Uguñe weyu, gaganbaditiwa giñe lun lilurudun Bungiu. Ligía hasaminarunbei saragu gürigia amu wamá hawéi. Eweridihatu Bíbülia héibaahouba lan sun ha asigiruti lani Kristu hénpulu (2 Timotéu 3:12).

GÓUNIGI WAMÁ HAWÉI HAGÜBÜRI UMADAGU

4. Anhein busén wabéi gaganbadi wamá lun Bungiu, ka lunbei madügün wamani?

4 Anhein busén wabéi gaganbadi wamá lun Bungiu, moun lumuti línsiñedun ubóu woun “ni burí katei le lídanbei” (aliiha huméi 1 Huan 2:15, 16). Ariñagatu Bíbülia lábugiñeñein lan lubafu Satanási ubóu le. Yusu lumuti relihión, gumadimatiña, bísinisi luma amu luwuyeri katei lun leyeeduniña gürigia (2 Korintuna 4:4; 1 Huan 5:19). Anhein mabusenrun wabéi lun leyeeduniwa ubóu le, mosu wanúadahaniña wamadagu buidu. Ligía teweridirunbaliwa Bíbülia lun mígirun wamá lun weyeedún ani ariñagatu giñe woun: “Féridigüda hamuti hagübüri umadagu lubuidun igaburi” (1 Korintuna 15:33). (Ariha huméi rekuáduru “Ka mini lubéi?”.)

5, 6. a) Ka uma moun lumuti lan wadügün umadaguaü? b) Ka uagu moun lumuti lubéi gamadagua wamá hama gürigia ha adügübaña katei wuribati?

5 Anhein busén wabéi wakipuruni wamadagua luma Bungiu, moun lumuti gamadagua wamá hama ha adügübaña katei wuribati. Moun lumuti giñe gamadagua wamá hama ha ariñagubaña seriwi hamá lun Heowá ani maganbaditiña lun. Ligíati, anhein adüga aban hádangiñe somu figóu wéiriti ani masakürihanti, mayanuhantiwa lun ani másügürüntiwa giñe dan luma (Rómana 16:17, 18).

6 Ánhawa gamadagua luma aban gürigia le adügübei katei mabuidunti, gayarabei giñe wadügün katei mabuidunti. Ka uagu? Ladüga hiibe-agei gürigia busentiña ítara hamá kei hamadagu ani busentiña lun herederun buidu hama. Kéiburi ánhawa gamadagua luma aban gürigia le adügüti figóu wéiriti, háfuga wadügübei lan ligiaméme. Susereñahaali ligiaméme houn fiú gefentiña luagu Heowá. Saragu hádangiñe, asakürihatiña, gama lumoun añahein amu masakürihantiña ani aba habugún lídangiñe damuriguaü (1 Korintuna 5:11-13). Ánhaña masakürihan, lasusereduba houn le lariñagubei 2 Féduru 2:20-22 (aliiha huméi).

7. Ka san lúnbaña wamadagu hamá?

 7 Inarüni mosu lan buidu wamá hama sun gürigia. Gama lumoun, moun lumuti gamadagua wamá hama gürigia ha maganbadibaña lun Bungiu. Kéiburi hamuga aban gefenti luagu Heowá le mamarieidungili, mabuidunbei hamuga gadaradun lan tuma aban gürigia to mabadiseirungiru. Buítimati gamadagua wamá luma Heowá sügǘ lau gamadagua wamá luma aban gürigia le mínsiñeti Heowá lun. Lunti gamadagua wamá hámarügü gürigia ha adügübalin lugundan Bungiu. Ariñagati Hesusu: “Furumiñeguarügü ha adügüti lugundan Bungiu, hagía namulenubaña” (Márükosu 3:35).

Súdinitimati gamadagua wamá luma Bungiu sügǘ lau gamadagua wamá hama gürigia ha mínsiñeti Heowá houn

8. Ka asuseredubei houn ísüraelina ladüga hóundarun hama hagübüri umadagu?

8 Ha óundaragutiña hama umadagu mabuiduntiña dáguatiña houngua lidoun turóbuli wéinamuti. Kéiburi dan le meha hachülürünbei ísüraelina lidoun Fulasu Füramasewati, ariñagati Heowá houn lun móundaragun hamá hama gürigia ha erederubaña ñein. Ariñagati houn: “Mafalarabéi luriban hani lílana fulasu burí ligía hénpulu. Máhuduraguaba hagibugiñe habungiutegu, lubaragiñe lira, günringuarügübaña haguariuan sunsuinagubei luma burí hadübüri sagüráuti. Huduguabá lun Babureme Bungiu” (Áfuriduni 23:24, 25). Gama lumoun, maganbaditiña meha hiibe-agei ísüraelina ani aba héiguadun lidoun figóu wéinamuti (Sálumu 106:35-39). Ka asuseredubei lárigiñe? Aba meresibirun laaña lan Heowá keisi lumutuniña ani aba lanúadiruni damuriguaü kristiánu heweñeguame (Matéu 23:38; Adügaü 2:1-4).

GÓUNIGI WAMÉI KATEI LE WARIHIBEI, LE WALIIHABEI LUMA LE WAGANBUBEI

9. Ka uagu peliguru lubéi fiú pelikula, agumeiraguagüdüni, uremu luma fiú páhina lidan Internet?

9 Gíbeti burí katei peliguruti lidan pelíkula, agumeiraguagüdüni, programa tidan bigibigitu, uremu luma burí páhina lidan Internet ladüga gadei lumuti wamadagua luma Bungiu. Ítara liña kei hagübüri umadagu ha gayarabei hadügün lun wafiñerun luagu ubóu le lani Satanási lubaragiñe hamuga wafiñerun luagu Heowá luma luagu lani füramasei. Ligía lunti lubéi duari wamá. Maweiyasun wamá aríagua, aliiha, o aganbaha somu katei le gayarabei ladügün lun wawamadiruni le lídanbei ubóu wuribati le (Titu 2:12).

10. Kaba asusereda lun saragu pelikula, agumeiraguagüdüni, uremu luma fiú páhina lánina Internet le wuribati?

10 Málühali agumuchagua ubóu le lani Satanási ani úaalime pelikula, líburu, ni páhina lánina Internet le mabuidunti. Ariñagatu Bíbülia lagünrinchawaguba lan ubóu le, hárügübaña adügübalin lugundan Bungiu awinwanda lun súnwandan (1 Huan 2:17). Anihein giñe füramasei lidan Sálumu luagu hagünrinchawagúba lan gürigia wuribatiña, ánhañati gürigia buítiña hawinwanduba lidan ugundani luma darangilaü ubouagu lun súnwandan (Sálumu 37:9, 11, 29).

11. Ida liña líderaguniwa Heowá lun úaragua wamá lun?

11 Ariñagati Hesusu lidan aban furíei anhein lan busén wabéi wawinwandun lun súnwandan, mosu lan wasubudiruni Heowá luma Liráü buidu (Huan 17:3). Ligía guánarügü íderagubadiwa  lun wasubudiruni luma lun úaragua wamá lun. Ida? Lau tídehan lóundarun. Mítarantu lóundarun Heowá kei ubóu, adügatu lóundarun Heowá agumeiraguagüdüni, bidéu burí luma páhina lidan Internet le arufudahabalin woun le lunbei wadügüni lun wawinwandun lun súnwandan. Ani arufudahatu lóundarun Bungiu woun lidan adamuridaguni le wadügübei lidan lóugiñe 110,000 damuriguaü le lídanbei sun ubóu. Le wafurendeirubei lidan adamuridaguni luma lidan adamurini íderagua lumutiwa lun laganwoundun wafiñen luagu Heowá luma luagu le füramase lubéi (Ebüréu 10:24, 25).

LUNTI WAMARIEIDUN HÁMARÜGÜ HA ‘AFIÑEBAÑA LUAGU HEOWÁ’

12. Ka mini lubéi wamarieidun ‘lúmarügü aban afiñeti luagu Heowá’?

12 Anhein busén wabéi wamarieidun, mosu duari wamá. Wéridi tumutiwa Bíbülia lun magumeserun wamá gadaradun hama gürigia ha meseriwiduntiña lun Heowá, ladüga menegeguatiwa, ítara waña kei leiti luma luburiga (2 Korintuna 6:14). Ariñagatu giñe Bíbülia lunti lan wamarieidun ‘hámarügü ha afiñebaña luagu Heowá’ (1 Korintuna 7:39). Mini lan lira lunti lan wamarieidun hámarügü gefentiña luagu Heowá ha badiseihaña ani ha inebeti lilurudun Bungiu houn. Ánhawa amarieida luma aban gürigia o tuma aban gürigia to hínsiñeti Heowá tun, líderagubadiwa katei le lun machararun wamá lun Bungiu.

Ánhawa amarieida luma aban gürigia le hínsiñeti Heowá lun, líderagubadiwa gürigia ligía lun úaragua wamá lun Bungiu

13. Ka meha gumadi líchugubei Heowá houn ísüraelina?

13 Subudi lumuti Heowá ka lan buídutimabei woun. Ani ruti gumadi houn lubúeingu lun hamarieidun hámarügü gürigia ha eseriwidubaña lun. Ruti meha gumadi houn ísüraelina lun mamarieidun hamá hama gürigia ha áhuduragutiña houn amu búngiugu. Ka uagu? Ladüga hadügüba lan meha gürigia hagía lun háhuduragun ísüraelina houn amu búngiugu. Ani ariñagati giñe Heowá houn ánhaña lan maganbadi lun, lagañiduba lan hama ani lagünrinchagubaña lan (2 Lúrudu 7:3, 4).

14, 15. Ka meha asuseredubei lun Salomón ladüga lumaganbadin lun Heowá?

14 Dan le larúeihanbei Salomón Ísüraeli, amuriahati luma Heowá lun líchugun lichú aau lun. Óunaba lumuti Heowá lafurieidun, ani aba liabin Salomón lun aban lan gürigia subudiwati ladüga lichú lau luma luagu irisini le lídanbei lageira. Ariñagatu Bíbülia ñüdün tan aban würi to arúeihaboun lidan amu ageiraü bisidei ladüga labahüdahóun tun luagu weiri lan lichú lau luma lirisin. Ani dan le tasubudirunbalin, aba taweiridun tanigi (1 Urúeigu 10:7). Íbini ítara, adügati meha Salomón aban katei le arufudubalin le gayarabei lasuseredun woun ánhawa maganbadi lun  Bungiu ani aba wamarieidun luma aban gürigia le mínsiñeti Heowá lun (Apurichihati 4:13).

15 Íbini ru lan meha Heowá saragu katei buiti lun Salomón, aba maganbadi lan urúei ligía lun ani aba lamarieidun hama saragu “würiña terencha”. Míluñanu meha lánigu weiriou! Ka asuseredubei lun Salomón ladüga maganbadi lan lun Heowá? Dan le laweiyadunbei, aba hadügün würiña hagía lun lígiruni Salomón Heowá ani lun leseriwidun houn amu búngiugu (1 Urúeigu 11:1-6). Anhein susere lubéi le lun aban gürigia chuti lau kei Salomón, gayarati giñe lasuseredun lun furumiñeguarügü wádangiñe. Ligía moun lumuti lubéi ni wasaminarun wamarieidun hama gürigia ha mínsiñeti Heowá houn.

16. Anhein maríeihali lubéi aban Gefenti tuma aban gürigia to meseriwiduntu lun Heowá, ka lunbei ladügüni?

16 Ánhounti agumesera aban gürigia eseriwida lun Heowá ani maríeiñu tiña luma aban gürigia le meseriwidunti lun Heowá? Ariñagatu Bíbülia houn würiña maríeitiña: “Gaganbadi humá houn húmarigu, lun anhein lan máhagiña lubéi lun uganu lánina asalbaruni, gayara láamuga hayabin lun hafiñerun luagu Kristu, luágurügü husan” (1 Féduru 3:1). Mini lan le anhoun lan áfaagua aban würi lun tasigiruni adundehani burí le tídanbei Bíbülia, háfuga larihini tani weiriei abuidureina liña lan tigaburi eibu dan ani ábame desidírü lan giñe aban lan gefenti luagu Heowá. Susereeli katei le houn saragu maríeitiña.  Le linarün aban katei, lunti giñe hasigiruni wügüriña ha maríeihañabaña tuma aban würi to mámaboun gefentu luagu Heowá adundehani le lídanbei 1 Féduru 3:1.

GAMADAGUA WAMÁ HAMA HA HÍNSIÑEHABUBAÑA LUN HEOWÁ

17, 18. a) Ka meha íderagubalin Noé lun lesefurun lídangiñe Guran? b) Ka meha íderagubaliña furumiñetiña kristiánugu lun hesefurun lídangiñe lagünrinchawagun Herusalén?

17 Gayarati hadügün hagübüri umadagu lun maganbadi wamá lun Heowá. Ánhañati umadagu buítiña gayarati híderaguniwa lun úaragua wamá lun Bungiu. Samina wamá luagun lani Noé hénpulu. Lidan lidaani, buin liña meha ubóu hau gürigia wuribatiña (Agumesehani 6:5). Wéiriti meha hariban gürigia hagía darí lun desidírü lan Heowá lagumuchun hau súngubei. Gama lumoun, ariñagatu Bíbülia aban lan wügüri richaguati Noé ani gaganbaditi lan meha lun Bungiu súnwandan (Agumesehani 6:7-9). Ida liña meha ladüga lun úaragua lan?

18 Móundaragunti meha Noé hama ha mínsiñehabubaña lun Heowá. Lubaragiñe lira, súnwandan yarafa lan tun lani weiriou, houn lisaanigu hau sun hani lisaanigu weiriou, ani súngubei hagía nadagimeintiña adügoun árüka ani teni hagía lun hapurichihan (2 Féduru 2:5). Ligía íderagubaliña lun hesefurun lídangiñe Guran. Uguñe weyu, sun wagía lídangiñe Noé hama liduheñu wayabin. Ligía lunti lubéi geteingiradi wamá luagu gaganbadi hamá ani móundaragun hagía hama hagübüri umadagu. Gaganbaditiña meha giñe furumiñetiña kristiánugu ani móundaraguntiña hama ha mínsiñehabubaña lun Heowá. Ligía íderagubaliña lun hesefurun lídangiñe lagünrinchawagun Herusalén lidan irumu 70 (Lúkasi 21:20-22).

Ánhawa óundaragua hama ha hínsiñehabubaña lun Heowá, gayarabei wasaminarun luagun lubuidun ibagari le lunbei wawinwanduni lidan Paraísu (Ariha huméi párafu 19)

19. Anhein busén wabéi úaragua wamá lun Heowá, ka lunbei wadügüni?

19 Anhein busén wabéi lun úaragua wamá lun Heowá lidan lagumuhóun dan le, ka lunbei wadügüni? (1 Korintuna 16:13; Ariñawagúni 13:20.) Lunti wafalaruni lani Noé, hani liduheñu luma hani furumiñetiña kristiánugu hénpulu. Maweiyasun wamá adüga umadaguaü hama gürigia ha mínsiñehabubaña lun Heowá. Haritagua waméi añahein lan saragu míñunu íbirigu úaraguatiña ha gayarati wamadagu hamá. Gayarati híderaguniwa lun úaragua wamá luma lun wesefurun lídangiñe lagumuchagüle ubóu ani lun wawinwandun lidan Paraísu. Ligíati, anúadaha wamaña wamadagu buidu lidan lagumuhóun dan le.