SAMINA HUMÁ lídanñadün lan aban fulasu le ñein lubéi larufudahóua saragu katei binaduhali. Libe-agei lídangiñe katei le ñeinbei, fuduhali, lǘhali ani gáhühali. Anihein ligía mégeiti fiú fánreinti wéinamuti luagu. Gama lumoun, anihein aban le úati mégeiti luagu. Arihúati buidu lan ligaburi ladügǘn. Aba hálügüdüni gürigia le anügübadün asubudirei fulasu, “iserigili san katei le luéi le líbiri?”. Aba lóunabun: “Ua, ligía aban lídangiñe katei létima binaduhali ani maranseha hamagili lúmagiñe ladügǘn”. Hariñaga: “Areidúañu liña san lidan somu fulasu?”. Ábaya lóunabun gürigia le anügübadün asubudirei fulasu: “Ua, sügühali lídangiñe katei hénrenguti kéiburi, garabali, láhuyun huya ani gíbeeña gürigia álugutiña hagünrinchaguni”. Ligíati, gayaraabei lubéi hasaminarun: “Ka aau hadügei?”.

Gayaraati lariñawagún ítara tan Bíbülia kei katei buitu ligía. Binadutimaharu Bíbülia sügǘ tuéi tibe-agei líburu. Inarüni anuhein lan burí amu líburu binaduharu, gama lumoun, ítara kei katei binadu le buga uágubei wayanuhan, gádeiharu giñe saragu líburu lau lásügürün dan. Kei hénpulu, meseriwinhali binadu ariñahani le abürüdǘbei tuagu siensia ladüga aniheinhali iseri ariñahani le ídehabei lun gayara lan larihín anhein inarüni lubéi. Adundehani le ichugúbei luagu árani gabügürüguati dencha lan sügǘ luéi buídutima lan. Ani murusunrügaali fánreinti lídangiñe abürüdǘni burí ligía erederuti, ladüga féridiwaali le líbiri fánreinti o gádeihali lan saragu.

Ánhounti Bíbülia mítarantu, barüharu lóugiñe 3,500 irumu lúmagiñe tadügǘn ani dayarügiru. Lidan burí sígulu le ásügürübei áfaaguaaña saragu gürigia lun hagumuchun tau lau —hágudunu, máhawa lan tayusurún luma tarihín kei ni kata—, madügünti  lira lun lasansiragun le tariñagubei. Lubaragiñe hamuga mayusurúwa tan Bíbülia ladüga burí iseri subudi le aniheinbei, arihúati awansetima tan sügǘ luéi dan le ídanbei tabürüdǘwa lidan saragu katei le tariñagubei (ariha huméi rekuáduru “Binaduharu san Bíbülia o awansetu lun dan le ídanbei tadügǘwa?”).

ADUNDEHANI LE WEMEGEIRUBEI UGUÑE WEYU

Lau sun lira, gayaraati álügüdagua humá hungua: “Inarüni san huugili lan adundehani le tídanbei Bíbülia?”. Lun hadariruni óunabagülei samina humá luagu lanarime turobuli le úmabei hagagibudagua gürigia uguñe weyu. Ka turobuli hanarimetimabei lídangiñe súngubei? Másiñati hasaminaruña lan luagu wuribu, lagadeiruni wügüri ubóu, anarimeni o mouserúniwa lan lau arumani. Guentó, akutiha huméi fiú arufudahani méiniti tídangiñe Bíbülia ani danme hadügüni, álügüdagua humá hungua: “Ma buídutimabei hamuga ubóu ánhawa hamuga afalarei adundehani le tídanbei Bíbülia?”.

ÍNSIÑENI LUAGU DARANGILAÜ

“Fuleseiwatiña ha awadigimaridubaña luagu darangilaü, ladüga lagúarubaña Bungiu keisi lirahüñü” (Matéu 5:9). “Adüga huméi sun le huáraati lun habagaridun lidan darangilaü hama súngubei” (Rómana 12:18).

GUDEMEHABU LUMA FERUDUN

“Fuleseiwatiña ha gudemehabubaña, ladüga gudemehabubei giñe Bungiu houn” (Matéu 5:7). Gaguraasun humá hubaruagua, ferudunagua huguyame húmawagua; ítara kei feruduna lanün Heowá *, ítarala giñe hadüga (Kolosona 3:13).

ÚARANI LIDAN SUN RASA

“Lídangiñe ábanrügü wügüri ladügaña [Bungiu] sun néchanigu lun haganóun lidan sun ubóu” (Adügaü 17:26). Úati himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei (Adügaü 10:34, 35).

INEBESEI LUAGU UBÓU

Ru lumuti “Wabureme Bungiu wügüri lidoun Edén, lun lábunaguni, luma lun lóunigiruni” (Agumesehani 2:15). Lagünrinchagubaña Bungiu ha agünrinchagubalin ubóu (Arufudúni 11:18).

IYEREEGU LAN IGAADUAÜ LUMA MAGÍAGUNI WOUN

“Góunigigua humá hungua luéi igaaduaü, ladüga mama luéigiñe liibe lúmati gürigia labagarida” (Lúkasi 12:15). “Kei lánigu humá Bungiu, moun lumuti ni lun hadimurehan luagu salufuri, ni amu luwuyeri iwiyei, ni igaaduaü” (Éfesuna 5:3).

LOUSERÚNIWA LAU ARUMANI LUMA WADAGIMANU HÉRETI

Busentiwa “buidu lan wóuserun lidan sun katei” (Ebüréu 13:18). “Le meha híwerubei, hebé líweruhan, luadigimarida lau arumani” (Éfesuna 4:28).

HIDERAWAGÚN HA MÉGEIBAÑA

“Lun híchugun gurasu houn ha maguraasunbaña, lun híderaguniña ha débilibaña lidan hafiñen, lun giñe gaguraasun humá habá súngubei” (1 Tesalónikana 5:14). “Lun wíderaguniña méteñuhaña hama würiña ha hilaañabaña hámarigu lidan hadiheri” (Santiagu 1:27).

Mámarügü íridarügü tumuti Bíbülia igaburi burí le, ínchaha tumutiwa lun gebegi lan woun luma lun wawinwanduni. Lun hamuga hafalaruni gürigia sun  adundehani le lidan habagari: Ma ménrenguntimabei hamuga haransehani gürigia turobuli wéinamuti le burí ubouagubei? Le linarün katei, guentotima, huuti ani gebegitimarügüti adundehani le tídanbei Bíbülia. Gama lumoun, ka gayaraabei tadügüni Bíbülia huagu?

IDA LUBA GAYARA LAN TÍDERAGUNÜN BÍBÜLIA?

Ariñagati wügüri le chútimaati aau: “Arihúati lichú aau lidan le adügǘbei” (Matéu 11:19TNM). Ma inarüni dimurei burí le? Lun lasubudiruniwa anhein buidu lubéi aban adundehani, mosu ladügǘn adundehani ligía lun larihín ka lan ibihúbei lau ladügǘn. Ligía gayara lubéi hariñagun: “Anhein inarüni lubéi hu tan Bíbülia, ma lunti hamuga narihini le ladügübei gaganbadi nan lun tadundehan lidan nibagari? Inarüni san gayara lan tíderagunina aranserei nituróbulin?”. Ariha wamá aban hénpulu.

Wéiriti meha lubuidun tibagari Diana * ani beresegutu meha saragu, gama lumoun, sódini aba lasansiragun tibagari ani súfuritu saragu: Aba tounwen tisaani ani nibureingiru, aba tígiragun luma tani weiriei ani aba terederun maseinsunga. Ariñagatu: “Ibidiñehali meha nun kátañadina lan; aba nerederun masaaniga, nábuguarügü ani mábanga. Féridi numuti sun katei: Nere luma nemenigin”.

Aba gunfuranda tani Diana buidu inarüni lan dimurei burí le: “Ǘrüwa wein diisi irumu ligía wabagaridubei;  ha héretimabaña chülütiña darí gádürü-wein; gama lumoun igarigu luma wadagimanu líchugubei limigifen ibagari. Sügüti burí irumu furese” (Sálumu 90:10).

Dan le tagagibudagubei Diana luma sun turobuli burí ligía, aba táluahani tídehan Bíbülia ani wéiriti lubuidun le tibihibei. Warihuba lidan burí leweñegua arütíkulu, saraguhaña lan gürigia adügei le tarufudahabei Bíbülia ani hanarimeti lubuidun lidin houn. Rúhaña fe ítara tiña lan Bíbülia kei katei le uágubei wayanuha lidan lagumeseha arütíkulu. Mítarantu kei saragu líburu to mayusurunwaaru lau lásügürün dan. Ladüga funa san amu tan Bíbülia tuéi amu burí líburu? Lisaminan funa san Bungiu tídanbei o hasaminan wügüriña? (1 Tesalónikana 2:13).

Másiñati samina humá mamigifen lan ibagari ani buin liña lan lau turobuli. Halíaba san hadarira gurasu, ídemuei luma adundehani danme hanarime lan hituróbulin?

Akutiha wamá ǘrüwa igaburi le ídanbei gayara lan tíderagunün Bíbülia lidan hibagari.

  1. Hadireirun luéi turobuli danme gayara lan.

  2. Haransehani turobuli danme ñein lan.

  3. Hawanduni gádanti le siñabei haransehani.

Lakutihóuba ǘrüwa katei le lidan burí leweñegua arütíkulu.

^ par. 10 Arufudahatu Bíbülia Heowá lan líribei Bungiu (Sálumu 83:18TNM)

^ par. 24 Sánsiwati iri lidan arütíkulu le luma burí lidan le líbiri.