Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Eneru irumu 2016

Gúndaatiwa lau wawadigimaridun luma Heowá

Gúndaatiwa lau wawadigimaridun luma Heowá

“Wagía keisi ídehatiña lidan luadigimari Bungiu, ayumuraguatiwa hun, lun meresibirun humani lareini ítaraguarügü” (2 KORINTUNA 6:1).

UREMU 28, 14

1. Íbini weiri lan lubafu Heowá, ka chansi líchugubei houn amu?

HEOWÁ adügübalin sun katei. Chútimati lau ani gabafutimati sügǘ lau furumiñeguarügü. Lidan aban ókaasion ariñagati Hobu furendeihali lan gayara lan ladügüni Bungiu sun le füramase lubéi. Úati ni kata lásiñarun adüga (Hobu 42:2). Ani memegeirunti ídemuei. Íbini ítara, ígirati lun hawadigimaridun amu luma. Ítara liña larufuduni houn hínsiñe hamá lun.

2. Ka wadagimanu súdiniti líchugubei Heowá lun Hesusu?

2 Lubaragiñe furumiñeguarügü katei adüga lumuti Bungiu Hesusu, le Liráü. Lárigiñe aba líchugun aban wadagimanu súdiniti lun Liráü. Aba lígirun lun líderaguni adügei sun le líbiri katei (Huan 1:1-3, 18). Ariñagati apostolu Pábulu: “Lídangiñe Kristu ladügei Bungiu sun katei le siélubei luma le ubouagubei, dandu burí katei le marihínbei kei le arihúabei”. Ariñagati giñe: “Lídangiñe Kristu ladügei [...] ani lun giñe Kristu ladügǘwa” (Kolosana  1:15-17). Ruti Heowá uéiriguni lun Hesusu lau líchugun aban wadagimanu súdiniti lun ani abahüdahaléi houn amu.

3. a) Ka lígirubei Heowá lun ladügüni Adán? b) Ka meha uagu lígira Heowá lun líderaguni Adán?

3 Ígiraali giñe Heowá lun hawadigimaridun gürigia luma. Kei hénpulu, ígirati lun líderaguni Adán íchiga hiri animaalu (Agumesehani 2:19, 20). Chóuruti gunda lan meha Adán adügei wadagimanu ligía. Lun lanúadiruni iri le lunbei líchuguni luagu kada animaalu, akutiha lumuti ida liña lan animaalu luma ka lan ladügübei. Gayarati hamuga meha ladügüni Heowá wadagimanu ligía, ladüga ligía adügübaliña sun animaalugu. Gama lumoun, kei le meha weiri lan línsiñe Adán lun, ígirati lun líderaguni. Ani ariñagati giñe lun lun ladügüni sun Ubóu paraísume (Agumesehani 1:27, 28). Gama lumoun, dan lárigiñe aba desidírü lan Adán muadigimaridun lan luma Heowá. Kei resultóu, dandu Adán kei sun wagía ha ladügawagun súfuritiwa saragu (Agumesehani 3:17-19, 23).

4. Ka nadagimeinbaña luma Bungiu lun lagunfulirun le desidírü lubéi?

4 Lárigiñe, ígirati giñe Heowá lun hawadigimaridun amu gürigia luma. Kéiburi Noé, adügati aban árüka lun lesefurun hau tílana luban lídangiñe Guran. Liabin Moisesi, sagá lumutiña ísüraelina Ehiptugiñe. Barǘ lumutiña Hosué ísüraelina lidoun fulasu le meha füramase lubéi Bungiu houn. Adüga lumutu Salomón ténpulu to Herusalénboun. Ani seriwitu meha María lúguchume Hesusu. Sun lubúeingu Heowá úaraguatiña ha hámaya amu nadagimeintiña luma lun lagunfulirun le desidírü lubéi.

5. a) Ka wadagimanu gayarabei wadügüni sun wagía? b) Mégeiti san Heowá lun wíderaguni adügei wadagimanu le? (Ariha huméi dibuhu le lídanbei lagumeseha arütíkulu).

5 Uguñe weyu, amisuraha lumutiwa Heowá lun wadügüni sun wayaraati lun wídehan lun lawanserun luáguti Larúeihan. Ani gíbeti katei gayaraati wadügüni. Ani íbini mama lan sun wagía lun gayara lan wadügüni ligiaméme, sun wagía gayarati wapurichihani uganu luáguti Larúeihan Bungiu. Mégeiti san Heowá lun wíderaguni adügei wadagimanu le? Uá. Lun hamuga busenti, gayarati hamuga layanuhan houn gürigia siélugiñe. Ariñagati Hesusu gayarati lan hamuga ladügün lun layanuhan dübü houn gürigia luagu Lurúeite arúeihani ligía (Lúkasi 19:37-40). Gama lumoun, ígirati Bungiu lun wíderaguni (1 Korintuna 3:9). Abürühati apostolu Pábulu: “Wagía keisi ídehatiña lidan luadigimari Bungiu, ayumuraguatiwa hun, lun meresibirun humani lareini ítaraguarügü” (2 Korintuna 6:1). Aban óunwenbu chansi gayara lan wawadigimaridun luma Heowá. Ariha waméi ka burí lan uagu líchiga katei le ugundani woun.

RUTI WAWADIGIMARIDUN LUMA HEOWÁ UGUNDANI WOUN

6. Ida liña meha san lasandiragun Liráü Bungiu lungua lau lawadigimaridun luma Lúguchi?

6 Gúndaagubeiñanu lubúeingu Heowá lau hawadigimaridun luma. Lubaragiñebei liabin Hesusu ubouagun, nadagimeinti luma Heowá keisi aban “nadagimeinti hemeniti”. Subudi lumuti meha hínsiñe lan lun Bungiu saragu ani aba lariñagun: “Gúndaatina meha ligibugiñe sun dan” (Ariñawagúni 8:22, 30TNM). Gúndaati meha Hesusu lau lawadigimaridun luma Lúguchi ladüga adügati saragu katei ani subudi lumuti meha hínsiñe lan lun Bungiu. Agia wagía? Gayarati giñe san wasandiragun woungua ítara?

Wéiritimati ugundani le wasandirubei dan le warufudahani inarüni lun aban gürigia sügǘ lau wibihin furumiñeguarügü katei (ariha huméi párafu 7).

7. Ka uagu líchiga apurichihani ugundani woun?

7 Ariñagati Hesusu gunda wamá dan le wíchugun  luma dan le weresibirun somu katei (Adügaü 20:35). Dan le meha larufudahóunbei inarüni woun, gúndaatiwa meha. Gama lumoun, dan le warufudahani houn amu, gúndaatiwa giñe. Ka uagu? Ladüga warihini ugundani le hawagubei dan le hafurendeiruni le tarufudahabei Bíbülia ani aba hagumeserun asubudirei Bungiu. Gúndaatiwa dan le warihini hadügün asansiruni lidan habagari. Subudi wamuti líchugubei lan hamadagua luma Heowá chansi houn lun hawinwandun lun súnwandan (2 Korintuna 5:20). Chóuruti apurichihani lan wadagimanu le súdinitimabei ani ligía gayarabei líchugun saragu ugundani woun.

8. Ida liña hasandiragun fiú Gefentiña houngua lau hawadigimaridun luma Heowá?

8 Dan le wíderagun amu asubudirei Bungiu, aba wasubudiruni gunda lan Heowá wau ani gebegiti áfaaguni le wadügübei lun. Ruti giñe katei le ugundani woun (aliiha huméi 1 Korintuna 15:58). Ariñagati aban gefenti luagu Heowá italiana gíriti Marco: “Úati dimurei lun nafuranguagüdüni ugundani le nasandirubei luagu níchuguni sun buiti le númabei lun Heowá lubaragiñe níchuguni lun aban gürigia le lunbei labulieiduni nuádigimari”. Ariñagati ábanya Gefenti italiana gíriti Franco: “Sagü weyu layusurunu Heowá Bíbülia, agumeiraguagüdüni kristiánu luma burí adamuridaguni lun laritaguagüdüni woun weiri lan wínsiñe lun. Íbini genege lan woun murusunrügüñein lan wadügün, súdiniti sun áfaaguni le wadügübei lun. Ligíati, ruti saragu ugundani nun nawadigimaridun luma Heowá ani ruti giñe saragu resun nun lun nawinwandun”.

ADÜGATI WAWADIGIMARIDUN LUMA HEOWÁ LUN YARAFATIMA WAMÁ LUN LUMA HOUN WÍBIRIGU

9. a) Ida liña meha lanaagun Hesusu lungua luma Heowá? b) Ka meha uagu lídanñanu lubéi aban Heowá luma Hesusu?

9 Dan le wawadigimaridun luma aban gürigia le hínsiñeti woun, ábatima wayarafadun lun. Ábatima wasubudiruni ka lan ligaburibei.  Aba wasubudiruni ka lan labusenrubei ladügün luma ka lan ladügübei lun libihini. Kéiburi Hesusu, nadagimeinti luma Heowá háfuga luagu saragu milu míñunu irumu lubaragiñe liabin ubouagun. Wéiriti ínsiñeni le hádanbei darí lun ua lan gayarati lafanreinraguniña. Ligía lariñagunbei Hesusu: “Au luma Bungiu Úguchili ábanmeme wagía” (Huan 10:30). Chóuruti lídanñanu lan meha aban ladüga gúndaatiña meha lau hawadigimaridun úara íchiga ídemuei hóuniwagua.

Héregüda lumuti apurichihani wafiñen ladüga haritaguagüda lumutiwa luagun lani Bungiu füramasei luma luagun lilurudun

10. Ka uagu yarafagüdatima lubaliwa apurichihani lun Heowá luma houn wíbirigu?

10 Amuriahati Hesusu luma Heowá lun lóunigiruniña lánigu disipulu. Ka uagu? Hesusu guánarügü ariñagubei lun Heowá: “Lun lidan hamá aban le tímatimaati kei au buma” (Huan 17:11). Dan le gaganbadi wamá lun le lariñagubei Bungiu tidan Bíbülia ani aba wapurichihan, aba buídutima lan gunfuranda wamani ligaburi Heowá. Arihatiwa buídutima lan lun wafiñerun luagu Heowá ani adüga wameime le lariñagubei woun súnwandan. Ánhawa áfaagua lun lumadagu wamá, lumadagubadiwa (aliiha huméi Santiagu 4:8). Yarafagüda lumutiwa giñe apurichihani houn wíbirigu, ladüga ariha wamuti háfaagun lun hadügüni lugundan Heowá. Ariha wamuti giñe ligiaméme burí lan turóbuli gádanbaliwa, ligiaméme ugundani ani ligiaméme katei uágubei wáfaagua. Nadagimeintiwa úara, gúndaatiwa úara ani awanda wagía úara. Ariñagatu aban Gefentu awinwandutu Gran Bretaña gíritu Octavia: “Adügati nawadigimaridun luma Heowá lúntima nayarafadun lun luma houn níbirigu”. Ka uagu? Ariñagatu ladüga lan le lan katei le uágubei táfaagua ligía lan giñe uágubei háfaagua tumadagu. Ma ítara liña giñe wasandiragun woungua?

11. Ka uagu wéiritimabei lubéi wayarafan lun Heowá luma houn wíbirigu lidan iseri ubóu?

11 Chóuruti hínsiñetimahali lan Heowá hama wíbirigu woun. Gama lumoun, hínsiñetimabaña woun lidan Paraísu. Samina humá san luagun lubuidun wadagimanu le lunbei wadügüni úara ámuñegü. Weresibirubaña ha lúnbaña háguyugun ani warufudahaba houn luagu Heowá. Wadügübei sun Ubóu paraísume. Gúndaabadiwa lau wawadigimaridun úara ani lun agidareina lan figóu wawéi murusun murusun lábugiñe larúeihan Kristu. Sagü weyu yarafatimabadiwa lun Heowá luma houn wíbirigu. Chóuruti líchugubei lan Heowá sun le wayumahabei woun (Sálumu 145:16).

GÓUNIGI LUMUTIWA WAWADIGIMARIDUN LUMA HEOWÁ

12. Ka uagu góunigi lubaliwa apurichihani?

12 Wawinwanduña lidan ubóu le lani Satanási ani gafigountiwa. Ánhawa móunigiragun woungua, gayarabei wagumeserun asaminara luma óusera kei gürigia ubouaguna. Ligía mosu lubéi wóunigiruni wamadagua luma Heowá. Ani mosu wáfaagun saragu lun wadügüni. Ítara liña kamá báfulihaña lubaroun ébeeni. Anhein mabusenrun wabéi lun lanügüniwa, mosu wáfulihan lau sun were.  Íderagua lumutiwa apurichihani lun wóunigiruni wamadagua luma Heowá. Ka uagu? Ladüga dan le wayanuhan luagu Heowá luma tuagu Bíbülia, aba wetenirun lun katei le buiti ani le súdiniti. Masaminaruntiwa luagun katei le edebilidagüdübalin wafiñen (Filipuna 4:8). Héregüda lumuti apurichihani wafiñen ladüga haritaguagüda lumutiwa luagun lani Bungiu füramasei luma luagun lilurudun. Íderagua lumutiwa giñe lun warufudun igaburi kristiánu le íderagubaliwa lun wóunigiragun woungua luéi ubóu luma luéi Satanási (aliiha huméi Éfesuna 6:14-17).

Mígirunti apurichihani, aturiahani luma híderawagun íbirigu chansi woun lun wadiheridun luagu waturóbulin

13. Ka uagu weiri lubéi lebegi apurichihani lun aban Gefenti australiana?

13 Íderagua lumutiwa giñe apurichihani, taturiahóun Bíbülia luma wíderagun amu lun wóunigiragun woungua ladüga mígirunti dan woun lun wadiheridun saragu luagu waturóbulin guánarügü. Abahüdagua lumuti aban Gefenti australiana gíriti Joel ka lan uagu gebegi lubéi apurichihani lun. Ariñagati íderagua lani lun mabulieidun lani luagu weiri lan turóbuli le gádanbaliña gürigia ubouagu. Ani haritaguagüda lumuti giñe weiri lan líderaguni adundehani le tídanbei Bíbülia. Ani ariñagati: “Íderagua lumutina apurichihani lun ǘnabugu nan luma lun nafiñerun luagu Heowá luma hawagu níbirigu”.

14. Ida liña wasubudiruni íderagua lániwa Bungiu lau lani sífiri sandu?

14 Arufuda lumuti giñe apurichihani íderagua lániwa Heowá lau lani sífiri. Lun gunfuranda wamani, ru wamá aban hénpulu. Samina humá lun hamuga lamuriahan aban gürigia huma lun hafanreinhan éigini houn gürigia lidan fulasu le ñein lubéi heredera. Ani mafayeirun lubadün gürigia ligía, huguya lun hafayeiruni sun le lunbei hagastaruni. Ani subudi humuti giñe mabusenrun hamá gürigia lun hanügüni éigini ligía houn ani hiyereegudúba lan houn fiú luagu hadügüni. Átiribei hamuga san dan hawandun adügei wadagimanu ligía? Chóuruti furesebei lan hamuga labuchadun huagu ani aba hamuga madügün humaali lan. Ítarameme, barǘ wamuti uganu lúmagiñeti Bungiu houn gürigia. Yusu wamuti wadaani luma waseinsun lun wadügüni, ani adügarügütiña gürigia bula wau íbini lun weyereegudun houn. Ani awanheingua apurichiha irumu luagu irumu. Ma arufudati le líderaguñadiwa lan Heowá lau lani sífiri sandu?

ÍDERAGUA LUMUTIWA WAWADIGIMARIDUN LUMA BUNGIU LUN WARUFUDUN ÍNSIÑENI

15. Ka uagu weiri lubéi lisudinin apurichihani?

15 Súdiniti apurichihani ladüga ídehati lun lagunfulirun le labusenrubei Bungiu houn gürigia. Busenti meha Bungiu lun hawinwandun gürigia lun súnwandan, ani masansirunti katei le dan le lafigouhanbei Adán (Isaíasi 55:11). Óunaha lumuti Heowá Hesusu ubouagun lun líchuguni libagari wawagu gayara láamuga wesefurun lídangiñe figóu luma óunweni. Gama lumoun, anhein busén wabéi wasagarun buiti lídangiñe lani Hesusu sákürifisiu ani winwan wagíame  lun súnwandan, mosu gaganbadi wamá lun Bungiu. Arufudaha lumuti Hesusu houn gürigia le labusenrubei Bungiu lun hadügüni, ani ariñagati houn lani disipulugu lun giñe harufudahani. Ligía wapurichihanbei ani íderagua wagía amu gürigia lun lumadagu hamá Bungiu. Dan le wadügüni, nadagimeintiwa luma Heowá ani ídehatiwa lun hesefurun gürigia lídangiñe figóu luma óunweni.

16. Ka warufudubei dan le wapurichihan?

16 Dan le lálügüdünbalin aban lábuti relihión Hesusu ka lan gumadi súdinitimabei, aba lariñagun Hesusu lun: “‘Hínsiñela Babureme le Bubungiute bun tau sun banigi, tau sun buani luma lau sun bisaminan’. Anihán gumadi wéirigutimabei, furumiñeti giñe lídangiñe sun lugumadin Bungiu. Ani le libiaman lidan uéiriguni lenege le; ítara liña: ‘Hínsiñe hamá bíbirigu bun kei bínsiñegua bungua’” (Matéu 22:37-39). Dan le wapurichihan ani arufudaha waméi houn gürigia ida luba lan hibihin ibagari magumuchaditi, arufudatiwa gaganbadi wamá lun gumadi lun hínsiñe hamá gürigia woun luma lun hínsiñe lan Heowá woun (aliiha huméi Adügaü 10:42). Subudi wamuti busén lan “lun hasalbarun sun gürigia, lun giñe hayabin lun hasubudiruni inarüni” (1 Timotéu 2:4).

17. Ka hasaminarubei luagun lubuidun chansi lun hawadigimaridun luma Heowá?

17 Lunti geteingiradi wamá luagu wibihini chansi lun wawadigimaridun luma Heowá. Ruti wawadigimaridun luma ugundani woun, adügati lúntima wayarafadun lun luma houn wíbirigu ani góunigi lumutiwa. Ruti giñe chansi woun lun warufudun ínsiñeni luagu Heowá luma hawagu wíbirigu. Añahein saragu míñunu lubúeingu Bungiu lidan sun ubóu, ani ámuñegueinarügüti gádantiwa. Gama lumoun, sun wagía adüga wamuti le wayaraati lidan apurichihani, meberesenga anhein nibureingidiwa lubéi o wéiyougadiwa lan, anhein risi wabéi o gudeme wamá, anhein here wabéi o débili wamá. Sandiguatiwa woungua kei aban Gefentu faransuna to ariñaguboun: “Bungiu le súdinitimabei lidan sun ubóu, le adügübalin sun le aniheinbei, Bungiu le gúndaabei, ligía ariñagubei nun: ‘Beiba ayanuha. Ayanuhabá nuagu. Bayanuha tídangiñe sun banigi. Níchuguba erei bun, níchuguboun Nererun bun, hídehan ánheligu luma hídehan amu apurichihatiña. Narufudahabei bun ida luba lan badügüni ani níchuguba adundehani bun danme le bemegeiruni’. Ru lumuti Heowá chansi woun lun wagunfulirun lau lubalinti, luma lun wawadigimaridun luma. Ma lubuidun chansi!”.