Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Eneru irumu 2016

“Hínsiñeguameme humá húmagua keisi íbirigu”

“Hínsiñeguameme humá húmagua keisi íbirigu”

“Hínsiñeguameme humá húmagua keisi íbirigu” (EBÜRÉU 13:1).

UREMU 3, 20

1, 2. Ka meha uagu labürüdoun Pábulu ligaradan houn Ebüréu?

LIDAN irumu 61, darangilati meha habagari kristiánugu ha Herusalénbaña. Ladaürǘña meha apostolu Pábulu Roma, ani lagurabahaña meha lun hígiragüdüni furese. Sun liña meha láfuridun Timotéu, le lani paaná, furisunrugúgiñe. Gadaraduntiña meha lun houdin úara bisidaña íbirigu ha Hudéabaña (Ebüréu 13:23). Gama lumoun, lasansiruba meha léibugun katei. Seingü irumu lárigiñe dan ligía, hegeyedagubei meha súdaragu rómana uburugu Herusalén. Ani ariñagaali meha Hesusu danme lan harihini geyegua hamá lan súdaragu uburugu, mosu lan hanurahan kristiánugu ha Herusalénbaña hama ha Hudéabaña (Lúkasi 21:20-24).

2 Sügühali meha 28 irumu lúmagiñe líchuguni Hesusu eweridihani le. Lidan irumu burí ligía, kíputiña kristiánugu ha Ísüraelibaña úaraguni íbini éibaahoua hamá ani súfuri hagía amu burí turóbuli (Ebüréu 10:32-34). Gama lumoun, ayarafadeina liña meha aban lídangiñe óuchawaguni le wéinamutimabei lun hafiñen (Matéu 24:20, 21; Ebüréu 12:4). Anhein meha busén habéi gaganbadi hamá lun Hesusu lun habagaridun, mégeitiña meha afiñeni luma awanduni sügǘ lau lidan amu dan (aliiha huméi Ebüréu 10:36-39).  Ligía meha ladügünbei Heowá lun labürüdün Pábulu aban gárada houn líbirigu, subudi wamutu gárada tuguya uguñe weyu kei gárada houn Ebüréu. Aranse tumutiña gárada tuguya lubá le meha lunbei liabin ani rutu erei houn.

3. Ka uagu lunti lubéi wetenirun buidu tun gárada houn Ebüréu?

3 Uguñe weyu, wagía kristiánugu lunti wetenirun buidu lun le tariñagubei gárada houn Ebüréu. Ka uagu? Ladüga genegeguati dan le wawinwandubei luma le meha hawinwandubei kristiánugu hudéana. Besafu wádangiñe lídanñadiwa darangilaü ani masufuriruntiwa saragu éibaahouni. Gama lumoun, añahein saragu íbirigu ha asufurirubaña éibaahouni luma burí turóbuli le hénrenguti lidan “weyu hénrenguti” le, ani íbini ítara úaraguatiña lun Bungiu (2 Timotéu 3:1, 12). Gama lumoun, ítara kei kristiánugu ha lánina lidaani Pábulu, mosu agagudúañu wamá ladüga yarafatimahali óuchawaguni le wéiritimabei lun wafiñen (aliiha huméi Lúkasi 21:34-36).

4. a) Kaba san bérusu lánina irumu 2016? b) Ka uagu lanuadirúa bérusu le?

4 Kaba íderaguawa lun aranseñu wamá lubá le lunbei liabin? Líderagubadiwa lubuidun adundehani le lídanbei Ebüréu 13:1, ñein lubéi lariñaga: “Hínsiñeguameme humá húmagua keisi íbirigu”. Anihán aban lídangiñe saragu adundehani le líchugubei Pábulu houn ebüréu lun líderaguniña lun héretima lan hafiñen. Anuadirúaali bérusu le lun ligía lan bérusu lánina irumu 2016. Ka uagu? Ladüga gayara lan giñe líderaguniwa lun léredun wafiñen.

Bérusu lánina irumu 2016: “Hínsiñeguameme humá húmagua keisi íbirigu” (Ebüréu 13:1).

KA MINI LUBÉI WÍNSIÑEDAGUN WOUNGUA KEISI ÍBIRIGU?

5. Ka mini lubéi wínsiñedagun woungua keisi íbirigu?

5 Ka mini lubéi wínsiñedagun woungua keisi íbirigu? Layanuhaña dimurei le luagu ínsiñeni le wasandirubei hawagu waduheñu o luagu somu wamada (Huan 11:36) (ariha huméi rekuáduru “Ka mini lubéi?”). Ligíati, keisi kristiánugu mama óuserarügütiwa wámagua kamá hamuga íbirigu wagía. Adüga wamuti ladüga íbirigu wamá (Matéu 23:8TNM). Ariñagati Pábulu: “Lunti hínsiñegua humá húmagua keisi iduheñu. Hímeigua humá hungua inebegua huguyame húniwagua” (Rómana 12:10). Arufudati dimurei burí le mosu lan weiri lan ínsiñeni le wasandirubei hawagu wíbirigu. Ínsiñeni le wasandirubei hawagu wíbirigu keisi kristiánugu ligía adügübei lun gamadagua wamá ani lun úara wamá.

6. Keisi kristiánugu inarünitiña, Ka un warufuda insiñeni keisi íbirigu?

6 Según aban sásaamu, kristiánugutima ayusurubalin dimurei “ínsiñeni keisi íbirigu” tidan burí haliburun. Lidan binadu dan, hóunrügüñein meha haduheñu huríu o lun somu hamada hariñaga “íbiri”. Mayusurun hamuti meha dimurei le lun hayanuhan luagu aban gürigia le mama huríu. Ánheinti kristiánugu inarünitiña, ariha hamutiña sun lubúeingu Heowá keisi híbirigu, meberesenga halíana hamá (Rómana 10:12). Ligía hínsiñegua wabéi woungua sun wagía keisi íbirigu inarünitiña, ladüga ligía lan larufudahabei Heowá woun (1 Tesalónikana 4:9). Ka san uagu súdini lubéi lun wasigirun arufuda ínsiñeni wóuniwagua keisi íbirigu?

KA UAGU LUNTI LUBÉI WASIGIRUN ARUFUDA ÍNSIÑENI WÓUNIWAGUA KEISI ÍBIRIGU?

7. a) Ka uagu mosu lubéi wínsiñedagun woungua keisi íbirigu? b) Írida humá amu resun le uágubei mosu lan waganwoundagüdüni ínsiñeni le wasandirubei hawagu wíbirigu.

7 Mosu hínsiñegua wamá woungua keisi íbirigu ladüga Heowá lan ariñagubei woun lun wadügüni. Siñati línsiñedun Heowá woun anhein mínsiñe habéi wíbirigu woun (1 Huan  4:7, 20, 21). Mosu giñe hínsiñegua wamá wóuniwagua ladüga mégeigua wamá woungua, dántima le lidan wamá turóbuli. Dan le labürühanbei Pábulu houn ebüréu, subudi lumuti meha mosu lanme hanurahan saragu hádangiñe murusun dan lárigiñe ani mosu lanme hígiruni sun katei hárigiñegua. Eweridihaali meha Hesusu luagu hénrengubei lan dan ligía (Márükosu 13:14-18; Lúkasi 21:21-23). Lubaragiñe meha lachülürün dan ligía, mégeitiña meha kristiánugu hagía haganwoundagüdüni ínsiñeni le hasandirubei hawagu híbirigu (Rómana 12:9).

Gánwoungüda waméi ínsiñeni le wasandirubei hawagu wíbirigu, ladüga líderagubadiwa lun wawanduni óuchawaguni

8. Ka lunbei wadügüni guentó, lubaragiñe lagumeserun óunwenbu asufuriruni?

8 Yarafaali óunwenbu asufuriruni (Márükosu 13:19; Arufudúni 7:1-3). Danme le lagumeserun, mósume wasigiruni adundehani le: “Heiba, nánigu, belú humá húbiñoun hadouragueime bena haugua. Aramudagua humá luagu murusun dan, darí lásügürün [n]igañi” (Isaíasi 26:20). Dan le lariñagun “belú humá húbiñoun”, háfuga layanuhaña luagu damuriguaü. Ñein wáhuduragua lun Heowá úara hama wíbirigu. Gama lumoun, mosu wadügün amu katei lanwoun wadamuridagun sagü dimaasu. Haritaguagüda lumutiña Pábulu kristiánugu ebüréu mosu lan híchugun dǘgüdaguaü hóuniwagua lun harufudun ínsiñeni ani adüga hagíame katei buiti hawagu amu (Ebüréu 10:24, 25). Mosu waganwoundagüdüni ínsiñeni le wasandirubei hawagu wíbirigu, ladüga ínsiñeniba ligía íderaguawa lun wawanduni óuchawaguni le lunbei liabin.

9. a) Ka chansi wámabei uguñe weyu lun warufuduni hínsiñe hamá wíbirigu woun b) Abahüdaha humá somu sügǘ le ídanbei harufuda íbirigu ínsiñeni hámagua lidan fulasu le ñein lubéi heredera o lidan amu fulasu.

9 Gíbeti wachansin lun warufuduni hínsiñe hamá wíbirigu woun guentó, lubaragiñe liabin óunwenbu asufuriruni. Gíbetiña asufurirutiña ladüga hárabaganali, durumandei, herigini luma amu burí liñawan dan. Añahein amu asufurirutiña ladüga éibaahouni (Matéu 24:6-9). Ani añahein amu súfuritiña ladüga luan seinsu ladügaméme marichaü le ubouagubei (Arufudúni 6:5, 6). Gama lumoun, eibu gíbetima lan haturóbulin wíbirigu, wéiritimati wachansin lun warufuduni hínsiñe hamá woun. Íbini lougua lan harufudun gürigia ínsiñeni lidan ubóu le, mosu wasigirun arufuda ínsiñeni wóuniwagua keisi íbirigu (Matéu 24:12) [1] (ariha huméi abürüdǘni lidan lagumuha arütíkulu).

IDA LUBA WARUFUDUNI HÍNSIÑEGUA WAMÁ WOUNGUA KEISI ÍBIRIGU?

10. Kaba wariha guentó?

10 Ka gayarabei wadügüni lun wasigirun asandira ínsiñeni hawagu wíbirigu lidan ubóu le buinbei lau turóbuli? Ani ida luba warufuduni sandí wamani ínsiñeni ligía? Arufudati apostolu Pábulu fiú igaburi lidan Ebüréu kapítulu 13, lárigiñe lariñagun “hínsiñeguameme humá húmagua keisi íbirigu”. Ariha wamá sisi igaburi ida luba lan warufuduni.

11, 12. Ka mini lubéi webelaagüdüniña achülürütiña wábiñoun? (Ariha humóun iyawaü to lídanboun lagumeseha arütíkulu).

11 “Mabulieida huméi lun hebelaagüdüniña  achülürütiña húbiñoun lau ugundani” (aliiha huméi Ebüréu 13:2). Ka mini lubéi le? Mini lan mosu lan wóuserun buidu hama gürigia ha ibidiñetiña woun. Háfuga haritaguagüda lumutiwa luagun katei le ladügübei Abüraámü luma Lotu. Biángubei hagía óusera hamutiña bián chülüdügütiña buidu, ani lárigiñe aba híchugun fe ánheligu lan heresibirubaña (Agumesehani 18:2-5; 19:1-3). Írida lumuti Pábulu hénpulu le houn kristiánugu ebüréu lun línchahaniña lun harufudun ínsiñeni lau hebelaagüdün gürigia hábiñoun.

12 Ida luba warufudun hínsiñe lan woun weresibirun gürigia wábiñe? Gayarati wamisurahaniña íbirigu wábiñoun eiga o lun hásügürün murusun dan buiti wama. Ani danme le lidin óunigiruti sirkuitu tuma lani weiriou abisidahei damuriguaü, gayarati wamisurahaniña íbini lougua lan wasubudiruniña (3 Huan 5-8). Mama mosu wadügün aban lanarime éigini ni lun wagastarun saragu seinsu. Busenrügütiwa wíchugun dǘgüdaguaü houn íbirigu, mama lun wadügün katei lun taweiridun hanigi. Ani mamarügülá gürigia ha gayarati hagiribudagüdüni fulesei ligía woun wamisuraha (Lúkasi 10:42; 14:12-14). Íbini gibe lan weberesegun, mabulieida waméi wamisurahan gürigia wábiñoun.

13, 14. Ida liña gayara lan wíderaguniña íbirigu ha furisunrugubaña?

13 “Haritagua humá hawagun adaürǘtiña” (aliiha huméi Ebüréu 13:3). Dan le labürüdünbalin Pábulu dimurei burí le, lasaminaruña meha hawagun kristiánugu ha furisunrugubaña ladüga úaragua hamá lun Heowá. Ariñagati Pábulu houn kristiánugu ebüréu buidu lan hadüga lau gudemehabu hamá “houn ha furisunrugubaña” (Ebüréu 10:34). Lidan gádürü irumu le laubei Pábulu adaürǘwa, íderagua hamuti íbirigu ha erederubaña yarafa ñein. Ágiati ha dísebaña, ida liña híderaguni? Furíeitiña luagu saragu (Filipuna 1:12-14; Ebüréu 13:18, 19).

Gayaraati wafurieidun hawagu wíbirigu wügüriña, würiña hama irahüñü ha furisunrugubaña Eritrea

14 Uguñe weyu, añahein bandi íbirigu furisunrugu ladüga úaragua hamá lun Heowá. Rútiña íbirigu ha yarafabaña ñein ídemuei houn lidan ámuñegueinarügü igaburi. Gama lumoun, besafu wádangiñe dísetiwa. Ida luba wíderaguniña ani arufuda wameime houn mabulieidun wamaniña? Anhein hínsiñe habéi woun kei wíbirigu, wafurieiduba hawagu súnwandan. Gayarati wafurieidun hawagu wíbirigu wügüriña, würiña hama irahüñü ha furisunrugubaña lidan ageiraü le gíribei Eritrea. Haganagua anihein Paulos Eyassu, Negede Teklemariam luma Isaac Mogos. Barühaña íbirigu ha lóugiñe 20 irumu furisunrugu.

15. Ida liña warufuduni inebe lan maríei woun?

15 “Inebelá maríei hun súngubei” (aliiha huméi Ebüréu 13:4). Arufuda wamuti giñe hínsiñe hamá wíbirigu woun dan le inebe lan maríei woun ani aba wáfaagun lun méiguadun wamá lidoun figóu lánina agamariduni (1 Timotéu 5:1, 2). Kéiburi lun hamuga wábürühan lidoun figóu lánina agamariduni luma somu íbiri wügüri o würi, wadügüña hamuga saragu dañu lun gürigia ligía luma  houn liduheñu. Ani leferidiruña hamuga afiñeni le waganaguabei (1 Tesalónikana 4:3-8). Samina wamá giñe luagu ida luba lan hamuga tasandiragun aban íbiri tungua anhoun íchiga fe aríagua lan tani weiriei pornografía. Tasandiruña hamuga san hínsiñe tan lun ani inebe lan maríei lun? Uá (Matéu 5:28).

16. Ida liña yarafagua lan wagundaarun lau le wámabei luma ínsiñeni hawagu wíbirigu?

16 “Gunda humá lau le húmati” (aliiha huméi Ebüréu 13:5). Anhein afiñe wabéi luagu Heowá, gufurumabadiwa lau le wámabei. Gama lumoun, ida liña san yarafagua lan wagundaarun lau le wámabei luma ínsiñeni hawagu wíbirigu? Anhein gunda wabéi lau le wámabei, wasubudirubei súdinitima hamá wíbirigu sügǘ lau umegeguni luma seinsu (1 Timotéu 6:6-8). Mayanuhanbadiwa wuriba hawagu wíbirigu ani mekeherunbadiwa luagu ida liña lan lidin woun lidan wabagari. Magimuganbadiwa giñe houn amu ani máluahanbadiwa wibihin saragu katei. Lubaragiñe lira, gíchigadibadiwa (1 Timotéu 6:17-19).

17. Ida liña líderaguniwa gurasu luma ganigi lun warufuduni hínsiñe hamá wíbirigu woun?

17 Gayaraati manufude wamá (aliiha huméi Ebüréu 13:6). Ánhawa afiñera luagu Heowá, ganigibadiwa lun wawandun turóbuli le wéinamuti ani buídubei wasaminan. Líderagubadiwa igaburi le lun wíchugun dǘgüdaguaü houn íbirigu. Ítara luba warufuduni hínsiñe hamá woun (1 Tesalónikana 5:14, 15). Ánhawa afiñera luagu Heowá, gaguraasunbadiwa giñe ani ganigi wagíame danme le lachülürün óunwenbu asufuriruni, ladüga subudi wamuti lesefurubadiwa lan yarafa madise (Lúkasi 21:25-28).

Ragǘ wamá ganigi, ladüga subudi wamuti málühadiwa lan sefu lan Heowá

18. Kaba íderaguawa lun hínsiñetima hamá wéiyaaña lidan afiñeni woun?

18 “Haritagua humá hawagun ha adundehabalün” (aliiha huméi Ebüréu 13:7, 17). Wéiriti hawadigimaridun wéiyaaña lidan  afiñeni luagu damuriguaü ani yusu hamuti hadaani lun hetenirun lun. Ligía lunti lubéi “hínsiñe hamá [wo]un saragu luagu wadagimanu le hadügübei” (1 Tesalónikana 5:13). Mosu wasaminarun luagun sun le hadügübei luagu wafulesein. Anhein wadüga, geteingiradibadiwa houn ani hínsiñetimabaña woun. Mabusenruntiwa lun heferidiruni hagundan luma haguraasun ladüga katei le wadügübei. Busenrügütiwa wíderaguniña ani gaganbadi wagíame houn.

Gebegiti san wadagimanu le hadügübei wéiyaaña lidan afiñeni wawagu woun? (Ariha huméi párafu 18).

HÍNSIÑETIMA HAMÁ WÍBIRIGU WOUN EIBU DAN

19, 20. Kaba íderaguawa lúntima hínsiñedun wíbirigu woun eibu dan?

19 Wagía lubúeingu Heowá subudiwatiwa ladüga ínsiñeni le wádanbei. Ani ítara liña meha giñe lidan lidaani apostolu Pábulu. Ani íbini ítara, ínchaha lumutiña meha Pábulu kristiánugu lun hínsiñedaguntima houngua eibu dan. Ariñagati houn: “Ayumuraguatiwa hun lúntima laganwoundun hínsiñehabu” (1 Tesalónikana 4:9, 10). Ka larufudahabei le woun? Arufudahati woun mosu lan hínsiñetima hamá wíbirigu woun eibu dan.

20 Ligíati, ságüme warihini bérusu lánina irumu 2016 tidan Luban Wadamuridagun, álügüdagua wamá woungua: “Gayarati san buídutima nan lidan namisurahan gürigia núbiñoun? Ida liña san gayara lan níderaguniña íbirigu ha furisunrugubaña? Inebeti san maríei nun? Gúndaatina san lau le númabei? Kaba íderaguana lúntima nafiñerun luagu Heowá? Ida luba san gaganbaditima nan houn wéiyaaña lidan afiñeni?”. Áfaagua wamá lun buídutima wamá lidan sisi katei le. Ítara luba marihin wamani bérusu lánina irumu kéirügü fiú dimurei tóubuagu luban wadamuridagun. Ábanbei aritaguagülei le lunbei líderaguniwa lun gaganbadi wamá lun ladundehan Pábulu le: “Hínsiñeguameme humá húmagua keisi íbirigu” (Ebüréu 13:1).

^ [1] (párafu 9): Anhein busén hubéi harihini ida liña lan harufudun gefentiña luagu Heowá ínsiñeni dan le lasuseredun somu chagaguaü, ariha humóun garüdia La Atalaya to lánina 15 lidan sedü-hati irumu 2002, páhina 8 luma 9, tuma líburu Proclamadores, kapítulu 19.