Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2016

Ruti Heowá hafayeiruáha ha áluahabalin tau sun hanigi

Ruti Heowá hafayeiruáha ha áluahabalin tau sun hanigi

“Lun wayarafadun lun [Bungiu], gasu wafiñerun luagu anihein lan ani líchuguba lan hafayeiruáha ha áluahabalin” (EBÜRÉU 11:6).

UREMU: 26, 55

1, 2. a) Ka lánibei ínsiñeni luma afiñeni? b) Kaba álügüdahani wóunaba?

HEOWÁ WÁGUCHIBEI, ani füramase haali labiniruniña lubúeingu ha úaraguabaña lun. Anihán aban lídangiñe igaburi le ídanbei larufudei Heowá wínsiñe lun. Ani “hínsiñeti Bungiu woun ladüga wínsiñedun lun furumiñe” (1 Huan 4:19). Eibu laganwoundun ínsiñeni le wasandirubei luagu Bungiu aba giñe laganwoundun wafiñen luagu ani ábatima giñe wachoururuni líchuguba lan hafayeiruáha ha hínsiñebaña lun (aliiha huméi Ebüréu 11:6).

2 Wéiriti layumahan Heowá líchugun hafayeiruáha lubúeingu. Ligía ligaburibei. Ani lun here lan wafiñen, mosu wachoururuni líchuguba lan Heowá hafayeiruáha sun ha áluahabalin tau sun hanigi. Ka uagu wariñagei le? Lugundun, “afiñeni, achoururuni le gumuti luagu wabihibei lan le wagurabubei” (Ebüréu 11:1). Mini lan afiñeni, wafiñerun sunsuinagubei labinirubaña lan Bungiu ha úaraguabaña lun. Ka buiti wibihibei lau wasubudiruni wibihiba lan aban  afayeiruahaü? Ida liña meha líchugun Heowá hafayeiruáha lubúeingu lidan binadu dan? Ida liña ladügüni uguñe weyu? Ariha waméi.

FÜRAMASETI HEOWÁ LABINIRUBAÑA LAN LUBÚEINGU

3. Ka füramasei wadarirubei lidan Malakíasi 3:10?

3 Füramase haali Heowá labinirubaña lan lubúeingu ha úaraguabaña lun. Füramase haali woun labinirubadiwa lan anhein wíchiga le buídutimabei wama lun. Amisuraha lumutiwa: “Hóuchagua humana”. Lárigiñe, aba lariñagun: “Ábame nadaaraguni lubenari sielu lun nóunahani lubuidun-agei abiniruni huagun” (Malakíasi 3:10). Lau wánharun lun amisurahani lúmagiñeti Bungiu le warufuduñein lun teinki wamani.

4. Ka uagu gayara lubéi wafiñerun luagu le lariñagubei Hesusu lidan Matéu 6:33?

4 Füramaseti Hesusu houn lani disipulugu líchugubei lan Bungiu sun le hemegeirubei houn anhein híchiga Larúeihan lidan furumiñeti lúgaaru lidan habagari (aliiha huméi Matéu 6:33). Lariñagunbalin Hesusu dimurei le ladüga subudi lani súnwandan lan lagunfuliruni Heowá le füramase lubéi (Isaíasi 55:11). Lunti giñe wachoururuni ligiaméme. Ánhawa arufuda afiñe wamá sunsuinagubei luagu Heowá, lagunfulirubei dimurei le: “Nóunigirubadibu; mígirun nubadibu” (Ebüréu 13:5). Íderagua lumutiwa füramasei le lun wafiñerun luagu le lariñagubei Hesusu lidan Matéu 6:33.

Ariñagati meha Hesusu habihiba lan lani disipulugu afayeiruahaü luagu sákürifisiu le hadügübei (Ariha huméi párafu 5).

5. Ka uagu ibiha wabéi dǘgüdaguaü lídangiñe óunabagülei le líchugubei Hesusu lun Féduru?

5 Álügüda lumuti apostolu Féduru Hesusu:  “Wagía, ígira wamaali sun le meha wámabei lun wafalarunibu. Kaba san wibiha?” (Matéu 19:27). Madeinhanti Hesusu lun Féduru luagu ladügüni álügüdahani le lun. Lubaragiñe lira, ariñagati Hesusu houn lani disipulugu labinirubaña lan Heowá luagu sákürifisiu le hadügübei. Inarüni harúeihaba lan apostolugu hama amu kristiánugu luma Hesusu sielu ámuñegü. Gama lumoun, ariñagati giñe Hesusu ñeinbei lan afayeiruahaü lidan dan le, ariñagati: “Sunti ha ígiraañabaña haban, o hamulenu, o hátunu, o hagübürigu, o hasaanigu, o hamúan, nuéigiñe, heresibiruba san wéiyaasu lanwoun, resibi hameime ibagari magumuchaditi” (Matéu 19:29). Uguñe weyu, sun kristiánugu daritiwa wagübürigu, wasaanigu, wamulenu, wátuñu lidan damuriguaü. Chóuruti gebegitima lan abiniruni burí le sügǘ lau furumiñeguarügü sákürifisiu le wadügübei luagu Larúeihan Bungiu.

EMENIGINI LE ÁGÜDAHABARUN WAWANI

6. Ida liña líderaguniwa wasubudiruni líchuguba lan Heowá hafayeiruáha lubúeingu?

6 Íderagua lumutiwa wasubudiruni líchuguba lan Heowá hafayeiruáha lubúeingu ha úaraguatiña lun wawandun dan le gaturóbulin wamá. Mámarügüñein guentó weresibira saragu abinirúni, agurabatiwa giñe weresibirun saragu abinirúni le buídutimati ámuñegü (1 Timotéu 4:8). Íderagua lumutiwa wachoururuni líchuguba lan Heowá “hafayeiruáha ha áluahabalin” lun úaragua wamá lun (Ebüréu 11:6).

7. Ka uagu wariñaga ítara liña lan emenigini kei aban óunguru?

7 Lidan yanu le líchugubei Hesusu luéigiñe wübü ariñagati: “Gúndaañu humá, ladüga heresibiruba aban óunwenbu fáyeiti sielu; ítara liña meha giñe héibaahouniwa profetagu ha ñǘbuinbaña hubaragiñe” (Matéu 5:12). Añahein lubúeingu Bungiu heresibiruba afayeiruahaü lun hawinwandun sielu. Añahein amu ibagariba le magumuchaditi lidan aban paraísu ubouagu heresibira keisi hafayeiruaha. Ani gébunati giñe lun gúndaañu hamá (Sálumu 37:11; Lúkasi 18:30). Ligíati, ítara liña emenigini woun sun wagía keisi aban “óunguru” le ágüdahabarun ugunei (Ebüréu 6:17-20). Ítara kei lágüdahanu óunguru aban ugunei dan le liábingua liñawan dan, íderagua lumutiwa giñe wemenigin lun úaragua wamá luma lun héreñu wamá dan le wagagibudagun luma burí turóbuli.

Wasubudiruni líchuguba lan Heowá hafayeiruaha lubúeingu ha úaraguabaña íderagua lumutiwa lun wawandun dan le gaturobulin wamá

8. Ida liña líderaguniwa wemenigin lun madiheridun wamá saragu?

8 Gayarati giñe líderaguniwa wemenigin lun madiheridun wamá saragu. Ítara kei sandí wamá awalidaguni dan le wáhurudagun somu árani wawougua dan le sandi wamá, gayarati giñe líchugun lani Bungiu füramasei awalidaguni tun wanigi. Ruti gurasu woun wasubudiruni lóunigirubadiwa lan Heowá dan le wariñaguni sun wadiheri lun (Sálumu 55:22). Gayarati wachoururuni gabafu lan Heowá lun “ladügün gibe sügǘ  lau le wamuriahabei o le lan wasaminarubei” (Éfesuna 3:20). Mini lan le ladügüba lan Heowá lóugiñe le wamuriahabei luma lun líderaguniwa.

9. Ka lunbei wadügüni lun labiniruniwa Heowá?

9 Lun labiniruniwa Heowá, mosu wíchuguni sun wafiñen luagu ani gaganbadi wagíame lun. Ariñagati meha Moisesi houn ísüraelina: “Labinirubadibu Wabureme le Bubungiute lidan ageiraü le lunbei líchuguni bun keisi balagante anhein badüga le lubeibei, gúnfulibeime sun gumadi le, le níchugubei bun uguñe. Ítara luba, labinirubadibu Wabureme le Bubungiute” (2 Lúrudu 15:4-6). Chouru wamuti san labinirubadiwa lan Heowá ánhawa asigira eseriwida lun lau úaraguni? Gíbeti resun wamá lun wafiñerun ítara luba lan.

RUTI HEOWÁ HAFAYEIRUÁHA

10, 11. Ida liña meha líchugun Heowá lafayeiruaha Hosé?

10 Bürüwatu Bíbülia lun tíderaguniwa. Gayarati waliihan tidan luagu ida liña lan meha labiniruniña Heowá saragu lubúeingu ha úaraguatiña lidan binadu dan (Rómana 15:4). Hosé aban hádangiñe. Furumiñe alugura hamuti líbirigu idamunime. Lárigiñe, aba tíchugun lani liyubudiri weiriou lidurun luagu aban katei le mama ladüga, aba ladaürǘn Hosé furisunrugu Ehiptu. Adügatu san furisun lun ladisedun luéi Heowá? Uá. Ariñagatu Bíbülia: “Ñeinñein Bungiu luma [Hosé]; aba lóuseruni lau areini”. Lárigiñe, ariñagatu: “Ladüga anihein Bungiu luma, ani adügati lun lasalirun sun katei lun buidu” (Agumesehani 39:21, 23). Íbini lidan dan hénrenguti ligía, gaguraasunti Hosé ani agurabahati lun líderaguni Heowá.

11 Ka lafayeiruahabei Hosé lúmagiñe Heowá? Fiú irumu lárigiñe, aba lesefuruni Faraón tídangiñe furisun. Aba mámaali lan idamuni le ǘnabugutimabei, aba ligíaali lan gürigia le súdinitimabei Ehiptu lárigiñe urúei (Agumesehani 41:1, 37-43). Gasaaniti meha Hosé biama tau lani weiriou. Le furumiñeti, aba líchugun Manasési luagu, ladüga lariñaga: “Bulíeigüda laali Bungiu sun nasufurirun nun, bulíeigüda niduheñu”. Le libiaman, aba líchugun Éfürain luagu, lariñaga: “Garahüñügüda láadina Bungiu lidan ageiraü le ñein lubéi súfurihadina lan” (Agumesehani 41:51, 52). Ruti Heowá lafayeiruaha Hosé ladüga úaragua lan. Ligía aba lubéi lesefuruniña Hosé ísüraelina hama ehiptuna lídangiñe ilamaü. Subudi lumuti meha abiniruni lan lúmagiñeti Heowá sun lira (Agumesehani 45:5-9).

Gúndaati meha Hesusu lau larumadahani liri Bungiu

12. Ka meha íderagubalin Hesusu lun úaragua lan?

12 Gaganbaditi meha giñe Hesukrístu lun Bungiu íbini sügǘ lan lídangiñe bandi óuchawaguni. Kei resultóu, aba labiniruni Heowá. Ka meha san íderagubalin Hesusu lun úaragua lan? Ru tumuti Lererun Bungiu óunabagülei woun: “Súfuriti Hesusu luagu [wagabu, TNM], meberesenga ligía lau nibusigarídüna lan luwuyeri óunweni ligía, lugundun subudi lani luagu lásurun lanme lasufurirun, lagundaaruba lan” (Ebüréu 12:2). Chóuruti gunda lan meha Hesusu luagu larumadahani liri Bungiu. Resibi lumuti  meha Hesusu línsiñehabu Lúguchi luma saragu amu katei. Ariñagatu Bíbülia aba lan “lañuurun [Hesusu] luéigiñe lóunwenren Bungiu”. Ariñagatu giñe: “Ligía líchugunbalin Bungiu liñun-agei uéiriguni lun luma iri le wéirigutimabei lídangiñe súngubei” (Filipuna 2:9).

MABULIEIDUN LUMUTI HEOWÁ LE WADÜGÜBEI LUAGU

13, 14. Ida liña larihini Heowá le wadügübei lun weseriwidun lun?

13 Gayarati wachoururuni weiri lan lebegi sun le wadügübei lun weseriwidun lun Heowá. Gunfuranda lumutiwa dan le machourun lan wasandiragun woungua o dan le wasaminarun siñaguabadiwa lan woungua lun wadügün somu katei. Gudemehabuti giñe woun dan le nidiheri wamá luagu wadagimanu o ladüga ibidiñe lan woun ida luba lan wíchuguni hemegeirun tílana waban houn. Ani gunfuranda lumutiwa giñe dan le ladügün lanarime íruni o somu sandi lun siñá lan wadügün saragu lidan weseriwidun lun. Gayarati wachoururuni gebegi lan lun Heowá larihini úaraguni le warufudubei lun íbini gaturobulin wamá (aliiha huméi Ebüréu 6:10, 11).

14 Haritagua waméi giñe ‘aganba lani Heowá afurieiduni’. Gayarati wachoururuni aganba lániwa dan le wafurieidun lun (Sálumu 65:2). Líchugubei Heowá sun le wemegeirubei woun lun úaragua wamá lun ladüga “ligía Wáguchibei le gudemehabubei woun; ani aranseñu liña lun líchugun gurasu woun súnwandan”. Háfuga layusuruniña wíbirigu lun líderaguniwa (2 Korintuna 1:3). Gúndaati Heowá dan le gudemehabu wamá ani aba wíderaguniña ha híbiri. Ariñagatu Bíbülia: “Bafuredeihan lun gudemeti kéigubeirügü bafuredeihan lun Bungiu, ani Bungiu guánarügüba afayeirei dúeiti” (Ariñawagúni 19:17; Matéu 6:3, 4). Ligíati, dan le areida wamá ani íderagua wamaña wíbirigu, ariha lumuti Heowá kamá hamuga wafuredeihaña lun ani füramaseti woun líchuguba lan wafayeiruaha.

AFAYEIRUAHAÜ UGUÑE WEYU LUMA LUN SÚNWANDAN

15. Ka burí afayeiruahaü hagurabubei hibihin? (Ariha huméi dibuhu le lídanbei lagumeseha arütíkulu).

15 Hemenigitiña kristiánugu anuadirúaaña lun hibihini “ridi lánina richaguaü”, aban afayeiruahaü le lunbei líchuguni Hesusu houn (2 Timotéu 4:7, 8). Gama lumoun, anhein amu lubéi wemeniginbei, meferidiruntiwa. Gíbetiña “amu mudún” ha lánigu Hesusu agurabatiña hibihini ibagari magumuchaditi lidan Paraísu ubouagu, “lidan darangilaü le dayarüti” (Huan 10:16; Sálumu 37:11).

16. Ka gurasu líchugubei dimurei le lídanbei 1 Huan 3:19, 20 woun?

16 Háfuga anihein lan dan wasaminarun lougua lan wadügün lidan weseriwidun lun Heowá. O háfuga wálügüdagun woungua anhein gunda lubéi Heowá lau le wadügübei. Háfuga íbini wasaminarun madüna wamá wibihin aban afayeiruahaü. Gama lumoun, mabulieida waméi “wéiritimati [lan] Bungiu sügǘ tau wanigi, lugundun subudi lan sun katei lun” (aliiha huméi 1 Huan 3:19, 20). Ánhawa eseriwida lun Heowá ladüga afiñe wamá luagu ani hínsiñe ligía woun, gayarati wachoururuni labinirubadiwa lan íbini anhein samina wabéi maweirin lan lebegi le wadügübei (Márükosu 12:41-44).

17. Írida humá fiú lídangiñe afayeiruahaü le ibiha wamaalibei.

 17 Biní lumutiña giñe Heowá lubúeingu uguñe weyu, lau sun wawinwanduña lan lidan lagumuhóun dan lun ubóu le lábugiñebei lubafu Satanási. Ida liña labiniruniwa? Ruti Heowá saragu ariñahani tídangiñeti Lererun woun luma darangilaü. Ani ruti giñe saragu íbirigu woun lidan sun ubóu ha hínsiñehabutiña woun keisi waduheñu, ítara kei füramase lani Hesusu (Isaíasi 54:13; Márükosu 10:29, 30). Ruti giñe Bungiu darangilaü lun wasaminan luma ugundani houn sun ha áfaagubaña lun háluahani (Filipuna 4:4-7).

18, 19. Ida liña san wasandiragun woungua keisi lubúeingu Bungiu dan le wasaminarun luagun sun afayeiruahaü le ru laalibei woun?

18 Rúhali Heowá afayeiruahaü buiti houn lubúeingu lidan sun ubóu. Kei hénpulu, ariñagatu aban íbiri yámanina gíritu Bianca: “Madaritina dimurei lun neteingiruni Heowá luagu sun ídemuei le ru laalibei nun dan le gaturobulin nan luma luagu mígirun lánina nábugua. Gíbeti turóbuli ubouagu. Gama lumoun, chóuruti nasandiragun nungua lúhaburugu Heowá dan le nídehan luma. Luagu kada sákürifisiu le nadügübei lun neseriwidun lun, ruti san abiniruni nun”.

19 Guentó, samina wamá tuagun Paula, aban íbiri 70 irumu tau to erederuboun Canadá. Siñati tánhingichun saragu ladüga sandi tan luéigiñe tanaganébu. Gama lumoun, ariñagatu madügün lan lira lun lásiñarun tapurichihan. Ariñagatu: “Apurichihatina luéigiñe gágamuru luma dan le nadarirun chansi. Lun nibihin gurasu, anuhein aban kuadernu numa to ídanboun nabürüha bérusu tídangiñeti Bíbülia luma burí saminaü tídangiñeti wani agumeiraguagüdüni le naliihabei sun dan. Wátina tun kuadernu tuguya ‘nikuadernun to íchuguboun erei nun’. Málütiwa lau maguraasuni dan le wasaminarun luagun füramasei le adüga láalibei Heowá. Súnwandan aranseñu liña lan lun líderaguniwa meberesenga ka lan gádanbaliwa”. Háfuga amu lan gádantiwa tuéi Bianca tuma Paula. Gama lumoun, chóuruti samina wamá luagun saragu afayeiruahaü le ru laalibei Heowá woun luma houn gürigia ha geyegubaña wau. Sun lubúeingu Bungiu ragütiwa gurasu dan le wasaminarun luagun afayeiruahaü le ru laalibei woun guentó luma le lunbei líchuguni woun ámuñegü.

20. Ka gayarabei wachoururuni ánhawa asigira adügei sun wayaraati lun weseriwidun lun Heowá?

20 Mabulieida waméi lóunabubei lan Heowá furíei le wadügübei lun tídangiñe sun wanigi. Gayarati wachoururuni wibihiba lan “aban óunwenbu afayeiruahaü” anhein wadüga lugundan Bungiu (Ebüréu 10:35, 36). Ligíati, sigí wamá éredagüdei wafiñen ani adügei sun wayaraati lun weseriwidun lun Heowá. Anhein wadüga, gayarabei wachoururuni luagu líchuguba lan wafayeiruaha (aliiha huméi Kolosana 3:23, 24).