Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2016

 ABAHÜDAGUNI LUÁGUTI IBAGARI

“Rúguaadina nungua keisi kada hawuyeri gürigia”

“Rúguaadina nungua keisi kada hawuyeri gürigia”

“Ánhabu abadiseira, nígiraadibu!”. Ligía lariñagubei núguchi tun núguchu lidan irumu 1941. Íbini ítara, badiseitu. Gúnfuli lumuti núguchi le lariñagubei aba lidin magiribudunti múnadoun. Widü meha irumu nau lidoun dan ligía.

LUBARAGIÑEBEI meha lira, gumeseedina meha arufuda busén nan nafurendeiruni inarüni. Ibihatu meha núguchu fiu agumeiraguagüdüni tídangiñetu Bíbülia to wéiribei tínsiñe nun, luágutima dibuhu le tídanbei. Mabusenrunti meha núguchi tarufudahani núguchu le tafurendeirubei nun. Ánheinti au, busentina meha nafurendeirun ani adügatina meha saragu álügüdahani, ligía aba lubéi taturiahanu núguchu Bíbülia numa dan le ua lan núguchi múnada. Ábati desidírü nan nederegeragun nungua lun Heowá. Badiseitina uburugu Blackpool (Inglaterra) lidan irumu 1943, dan le meha 10 lubéi irumu nau.

NAGUMESERUN ESERIWIDA LUN HEOWÁ

Lúmagiñe dan ligía, apurichihatina meha liibe-agei dan tuma núguchu. Lau meha lídehan aban katei gíriti fonógrafo wapurichiha lidoun dan ligía. Wéinamuti meha ani yarafa meha lun 10 líburu lihürü. Gayaraati hasaminarun luagun ligürewein lun aban irahü kei au ladiwihan aban katei ítarati.

Lúmounbei meha nagunfulirun 14 irumu, busenhadina meha neseriwidun kei prekursoru. Aba tariñagun núguchu nun lun nayanuhan luma óunigiruti sirkuitu libügürü katei le. Ligía ariñagubei nun lun nafurendeirun somu fisiu furumiñe  gayara láamuga nanuriagun nungua lidan neseriwidun kei prekursoru. Ani ligía nadügübei. Lárigiñe nawadigimaridun bián irumu, aba nariñaguni lun amu óunigiruti sirkuitu busén nan neseriwidun kei prekursoru, ábati lariñagun nun: “Adügabéi!”.

Lidan gádürü-hati irumu 1949, dandu au kei núguchu daritiwa kaba lan wadüga lau ílagu le wábiñebei, ábati wáguyun uburugun Middleton, yarafa lun Mánchester. Ñein wagumesera eseriwida kei prekursorugu. Gádürü hati lárigiñe, aba náluahan aban nani paaná lun weseriwidun kei prekursorugu úara. Lidoun dan ligía, aba lamuriahóun wama tídangiñe sukursáli lun woudin eseriwida lidan aban damuriguaü le meha málügilibei lúmagiñe lagumeserun uburugu Irlam. Ánhounti núguchu teseriwiduña meha úara tuma aban íbiri lidan amu damuriguaü.

Lóuguatiña meha íbirigu wügüriña lun hetenirun lun adamuridaguni lidan iseri damuriguaü le ídanbei wounahóua. Ligía au lubéi luma nupaaná arihibaña lau wadagimanu ligía lau sun meha disedürügügili lan irumu nau. Dan lárigiñe, aba nidin eseriwida lidan damuriguaü le uburugubei Buxton, lóuguatiña meha apurichihatiña ñein ani mégeitiña meha lílana damuriguaü ligía ídemuei. Aranse lumutina sun asansiruni le lubá meha le lunbei liabin.

Awisaha luagu aban yanu hounti sun gürigia le lunbei lichugún uburugu Rochester (Newayoru, irumu 1953).

Lidan irumu 1951, buíngüdatina gárada lun namisurahóun tidoun Leskuela Galaadü to tani Watchtower. Gama lumoun, lidan duusu-hati irumu 1952, aba lagúaragüdüniwa nuagu lun nasudarahan. Amuriahatina lun lagidarúniwa eseriwiduni ligía nuéi ladüga neseriwiduña lan keisi minisi lani Bungiu lidan dan dayarüti. Kei máhawa lubéi lun le namuriahabei tidan aguseragülei to arihiboun lau nikesin, aba nasiadirúniwa lun nadaürün luagu sisi hati. Furisunruguñadina dan le tachülürünbei amisurahani nun lun nidin tidan Leskuela Galaadü, külase 22. Furitina furisunrugúgiñe lidan sedü-hati irumu 1953. Murusun dan lárigiñe, aba naweiyasuhan uburugun Newayoru tidan aban waporu gíritu Georgic.

Dan nachülürünbei uburugu Newayoru, aba nidin lidan adamurini le gíribei “Lílana Iseri Ubóu” (“Sociedad del Nuevo Mundo”) le adügǘbei lidan irumu 1953. Lárigiñe, aba naweiyasuhan tidan íngiini tidoun Leskuela Galaadü to meha lídanboun uburugu South Lansing (Newayoru). Lárigiñe nararirun tídangiñe íngiini, aba nárügüdün aban busu lun nachülürün le ñeinhin bádina lubéi. Kei meha sun liña lan náfuridun  furisunrugúgiñe, lóuguati meha niseinsun. Ligía mosu lubéi meha namuriahan luma aban pasaheru lun ledewehan daransu nun lebegime nupasei.

NOUNAHÓUN LIDOUN ABAN AGEIRAÜ DÍSETI

Aranse tumutiwa Leskuela Galaadü lun wíchaagun woungua “keisi kada hawuyeri gürigia” (1 Korintuna 9:22). Ounahóuati Paul Bruun, Raymond Leach numa eseriwida Filipina, gama lumoun sügüti saragu hati lubaragiñe wibihin gárada lun webelurun lidoun ageiraü ligía. Dan le weresibirunu gárada, aba waweiyasuhan tidan waporu darí wachülürün Rotterdam (Países Bajos). Hiñugua wamuti barana Mediteraniu, óunwenbu chanili le uburugubei Suez luma barana Índiku darí Malasia, lárigiñe aba wachülürün Hong Kong. Bián-wein-sédüñein weyu wau áfayaha! Wéyuhali 19 lidan unsu-hati irumu 1954 wachülüra uburugun Manila, uburugu le lichügüdinabei ageiraü Filipina.

Raymond Leach numa dan le waweiyasuhanbei luagu 47 weyu tidan waporu lun wachülürün Filipina, fulasu le ñeinhin lubéi wounahóua eseriwida.

Lau meha chülühadiwa lan ñeinhin mosu meha wéchudun luagu ageiraü ligía, igaburi le ñeinbei luma luagu iñeñein le ayanuhóubei ñein. Lidan lagumeseha, seriwitiwa meha ǘrüwagubei wagía lidan ábanmeme damuriguaü uburugu Quezón, aban fulasu le ñein lubéi gibe hamá gürigia gariñagaditiña inglesi. Lárigiñe sisi hati ñein, fiúrügügili meha dimurei wafurendeirun lidan iñeñein tagalo. Málühali meha katei le asansira.

Aban weyu lidan seingü-hati irumu 1955 dan le nagiribuduña lubéi lídangiñe apurichihani au luma Raymond, aba weresibirun gárada to ídanboun lariñawagúa woun iridúaadiwa lan keisi óunigirutiña sirkuitu. Wein-biámarügügili meha irumu nau. Ani lídehaba meha eseriwiduni le lun nafurendeirun amu burí katei le gayaraabei líderagunina íchaagua nungua “keisi kada hawuyeri gürigia”.

Níchuguña aban yanu hounti sun gürigia lidan aban adamurini sirkuitu lidan iñeñein becol.

Kei hénpulu, ru numuti furumiñeti niyanun keisi óunigiruti sirkuitu tigibugiñe aban budigü lidan aban aüdü. Le meha lúgubu hounti lan sun gürigia yanu burí le ichugúbei Filipina, lugundun lidan meha furumiñeguarügü fulasu le ñein hamuti saragu gürigia lichugúa. Dan meha bisida nani damuriguaü burí le lídanbei sirkuitu le aubei nariha, rútina meha yanu tigibugiñe gabilidu, saragu bísinisi, mágidu, fili, párüke ani liibe-agei dan lidan burí legeyedun üma. Aban weyu, dan le lídanñadina lubéi uburugu San Pablo, aba lásiñarun níchuguni niyanun tigibugiñe aban mágidu ladüga lere láhuyun huya. Ligía nálügüdünbaliña íbirigu ha anügübalin ubaraü lidan damuriguaü  le ñeinbei anhein gayara lubéi níchuguni yanu tidan Luban Adamuridaguni. Lárigiñe, álügüda hamutina anhein gayara lubéi laguarúniwa lun yanu ligía yanu hounti sun gürigia anhein mama lubéi lidan aban fulasu le ñein hamuti saragu gürigia lichugúa.

Hábiñe meha íbirigu neredera sagü bisida nan somu damuriguaü. Lau sun meha mama lan burí muna wéndegutu, súnwandan meha haruma tan. Anihein meha dan tuagu lan fidadi to abudúboun múarugu le fulansu narumuga. Mosu meha nagoun bóugudi. Keiti gayara lubéi meha larihinina furumiñeguarügü, furendeitina ágawa tau sun nadaüragun. Liibe-agei dan, tidan meha busu naweiyasuha. Ani danha le mosu lan nidin lidan amu burí ubouhu, ábaha nidin tidan waporu. Makarüngubeiñadina.

Lau sun meha meresibirun nan külase lun nafurendeiruni iñeñein tagalo, furendei numuti lau naganbahaniña íbirigu lidan apurichihani luma lidan adamuridaguni. Busentiña meha íbirigu híderagunina afurendeirei hañeñe, ani seremei numuti haguraasun nubá luma hariñaguni nun lau ínsiñehabuni ida luba lan níriduni dimurei dan le níriduni wuriba.

Eibu lásügürün irumu, sigitina échuda luagu burí iseri wadagimanu le ichugúbei nun. Lidan irumu 1956, chülüti íbiri Nathan Knorr bisidei Filipina adüga aba adamurini hounti lílana sun ageiraü. Ariñawagúati nun lun nuguya lan ariha lau tuáguti periodiku. Ibidiñeti meha nun ida luba lan nadügüni, gama lumoun aba harufudahani amu íbirigu nun. Lubaragiñebei lásügürün aban irumu, adügǘwayati amu adamurini hounti lílana sun ageiraü, ani áuhali meha ariha lau. Gíbeti katei nafurendeirun lúmagiñe íbiri Frederick Franz dan le lachülürünbei bisidawa tídangiñe áfisi to ídangiñeboun larihúa lau hawadigimari gefentiña luagu Heowá lidan sun Ubóu. Dan le lamudeirunbei íbiri Franz íchigei liyanun, tauñein meha simisi to ayusurúboun Filipina, to gíriboun barong tagalog. Adügati meha katei  lira lun weiri lan hagundaarun íbirigu arufudahati lira nun mosu lan aranseñu nan lun nadügüni le uágubei héchuda gürigia.

Dan le niridúnbei keisi óunigiruti distritu, mósuya meha néchudun luagu amu burí asansiruni. Lidoun meha dan ligía, warihagüdüñein meha bidéu La felicidad de la Sociedad del Nuevo Mundo houn gürigia. Lidan meha fulasu le ñein hamuti saragu gürigia wíchigei. Anihein meha dan hásühaniwa harahüñü animaalugu. Achawaha lumutiñaha lileitin máhina le aubei wíchigei bidéu ani ábaha lásiñarun háfuridun lídangiñe. Ani úati meha kaba lan arumadahei lárigiñe. Lau sun meha gürewei lan ladügǘn aransehani lun burí adamuridaguni le, ariha wamuti meha hu lan áfaaguni le wadügübei dan le warihiniña saragu gürigia ha achülürübaña arihei bidéu furendei haméi añahein lan tílana lóundarun Heowá lidan sun fulasu ubouagu.

Anihein meha fulasu le ídanbei hadügüdara fádirigu katoliku hawagu gumadimatiña lun míchugun hamá üma woun lun wadügüni adamurini burí le. Ani dan meha le wíchugun somu yanu yarafa tun haligilisin, ábaha háürügüdüni raüwa lun ua lan aganbuti. Íbini ítara, furendei hamuti saragu gürigia inarüni lidan burí fulasu ligía ani guentó heseriwiduña lun Heowá.

NERESIBIRUN AMU BURÍ WADAGIMANU LUMA AMU BURÍ ASANSIRUNI

Lidan irumu 1959, aba namisurahóun eseriwida tidan hani gefentiña luagu Heowá sukursáli to Filipinaboun. Furendeitina saragu katei ñein. Dan lárigiñe, aba nounahóun abisidaha saragu ageiraü keisi óunigiruti le tóunahan Beteli ariha lau fulasu. Lidan aban lídangiñe wéiyaasu ligía nasubudiroun íbiri Janet Dumond, to meha eseriwiduboun keisi misioneru ageiraü Tailandia. Abürühatiwa meha wóuniwagua luagu fiu dan, lárigiñe aba wamarieidun. Barühadiwa 51 irumu wámagua eseriwida lau ugundani lun Heowá.

Abisidaha aban lídangiñe saragu ubouhu le Filipinabei úara tuma Janet.

Ma nugundan lau chansi le ibiha náalibei lun nidin bisidaña íbirigu lidan 33 ageiraü. Íderagua  lumutina meha ámuñegueinarügü eseriwiduni le neresibirubei lidan dan le sügühalibei lun néchudun luagu hagaburi gürigia ha ámuñegueinarügüti hagaburi, harasan luma hechun, ani wéiriti eteingiruni le nasandirubei luagu chansi lira. Adügaali nidin lidan burí sun fulasu le lun gunfuranda nani buidu hínsiñe hamá sun gürigia lun Heowá (Adügaü 10:34, 35).

Gúndaatiwa lau warihini gíbetimarügaaña lan Gefentiña ageiraü Filipina.

AWANHAGUA ÉCHUDA LUAGU ASANSIRUNI

Anahagua eseriwida úara tuma Janet tidan sukursáli to uburuguboun Quezón. Wéiriti wagundan lau weseriwiduña lan ageiraü Filipina. Dan le nachülürünbei lidoun ageiraü le 60 irumu lubaragiñe le, wein-mílurügügiña meha apurichihatiña lidan fulasu le. Ánheinti guentó añahein kéiburi 200,000! Lau sun sügühali lan saragu irumu, anahamémegua aranseñu lun néchudun luagu furumiñeguarügü katei le lamuriahan Heowá numa. Kéiburi guentó, lau sun nugundan nánhara lun burí asansiruni le málügilibei lúmagiñe ladügǘn tidan lóundarun Heowá.

Gabügürüguati wáfuridun apurichiha.

Adüga wamaali sun wayaraati lun wafalaruni ladundehan Heowá, ani adügaali lira lun gunda lan ani gasuuni ligía wabagari. Áfaaguadiwa giñe lun wadügüni asansiruni le mégeiwabei lun buídutima lan weseriwidun houn wíbirigu. Leeme ñein lumuti lígirawa Heowá, aranseñu waña lun wíchaagun woungua “keisi kada hawuyeri gürigia”.

Awanhagua eseriwida tidan sukursáli to uburuguboun Quezón.