Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2016

Ígira waméi sun wadiheri lúhaburugu Heowá

Ígira waméi sun wadiheri lúhaburugu Heowá

“Ígira huméi sun katei lun Bungiu, lugundun lóunigiruñadün le tímatimaati” (1 FÉDURU 5:7).

UREMU 38, 23

1, 2. a) Ka uagu añahein lubéi lubúeingu Bungiu asandirutiña saragu idiheri? (Ariha huméi dibuhu le lídanbei lagumeseha arütíkulu). b) Kaba wariha lidan arütíkulu le?

UGUÑE weyu, “éibugañahadügü liña Mafia [...] keisi liñún gáñiti áluaha kaba lan lagünrinchagua” (1 Féduru 5:8; Arufudúni 12:17). Ladüga Satanási súngubei wagía sanditiwa ihürügu, íbini lubúeingu Heowá. Íbini meha lubúeingu Heowá ha lánina binadu dan anihein meha dan mederaaguagüdün lan hasaminan. Ariñagatu Bíbülia anihein lan meha dan weiri lan idiheri luagu urúei Dawidi (Sálumu 55:2). Sanditi meha giñe apostolu Pábulu idiheri “hawagu tílana sun ligilisi” (2 Korintuna 11:28). Ka san gayarabei wadügüni ánhawa ariha lagumadiruñadiwa lan wadiheri?

2 Lidan binadu dan íderagua lumutiña meha Wáguchi le siélubei lubúeingu ha meha wéiribei hadiheri lun hasandirun murusun awalidaguni. Ani ligía labusenrubei ladügün wau uguñe weyu. Ínchaha tumutiwa Bíbülia lun wíchuguni sun wadiheri  lun Bungiu, ladüga bereseti wau (1 Féduru 5:7). Lidan arütíkulu le warihiba gádürü katei le gayarabei líderaguniwa lun wibihin awalidaguni. Furumiñe, furíei. Libiaman, waliihanu Lererun Bungiu luma wararamagun asaminara luagun le waliihabei. Lǘrüwan, wígirun lun ladundehaniwa lani Heowá sífiri sandu. Luma ligadürün, wabahüdahani lun somu gürigia le uáguti wafiñera ida liña lan wasandiragun woungua. Danme le wakutihani gádürü puntu le, samina wamá luagun katei le wabusenrubei lun buídutima lan wadügüni.

“ÍGIRABEI BIDIHERI LUN” HEOWÁ

3. Ida luba san wíchuguni sun wadiheri lúhaburugun Heowá?

3 Le furumiñeti katei le gayarabei wadügüni lun wibihin awalidaguni, mosu wíchuguni sun wadiheri lun Heowá lau wafurieidun lun tídangiñe sun wanigi. Dan le anihein lan katei le adügübei lun mederaaguagüdün lan wasaminan, busenti Heowá lun wabahüdahani sun le wasandirubei lun. Ayumuraguati Dawidi lun Heowá: “Nubungiute, aganbabéi nafurieidun”. Lárigiñe aba lariñagun: “Ígirabei bidiheri lun Aburemei, ábame líderagunibu” (Sálumu 55:1, 22). Anhein adüga wamaali lubéi sun wayaraati lun waranserun aban turóbuli, hebé wadiheridun luagun. Le lunbei líderaguniwa, wafurieidun lun Heowá tídangiñe sun wanigi. Gama lumoun, ida luba san lagalumaruni furíei wadiheri? (Sálumu 94:18, 19).

4. Ka uagu súdini lubéi lun wafurieidun dan le weiri lan idiheri wawagu?

4 (Aliiha huméi Filipuna 4:6, 7). Ida liña san lóunabuniwa Heowá dan le wafurieidun lun tídangiñe sun wanigi saragu wéiyaasu? Gayarati líderaguniwa lun darangilu wamá ani lun lagidaruni saminaü luma katei burí le adügübei dañu woun. Dan le wafurieidun ladüga anihein lan somu katei le adiheridagüdübaliwa o le íchuguti anufudei woun, ru lumuti Heowá darangilaü wéiritimati le gayarabei wasandiruni woun. Sandi hamaali saragu hádangiñe wíbirigu luwuyeri darangilaü ligía, ani gayarati giñe wasandiruni. Gayarati líderaguniwa “lidarangilan” Bungiu lun wáfuridun lídangiñe furumiñeguarügü turóbuli. Ariñagati Heowá woun moun lumuti lan wanufudedun, ladüga füramase haali lan woun luagu wámabei lan lun líchugun erei woun luma lun líderaguniwa (Isaíasi 41:10). Gayarati wafiñerun luagu füramasei le sunsuinagubei.

RUTU LERERUN BUNGIU DARANGILAÜ WOUN

5. Ida luba tíderaguniwa Lererun Bungiu lun wibihin awalidaguni?

5 Le libiaman katei le lunbei wadügüni lun wibihin awalidaguni, waliihanu Bíbülia luma wasaminarun luagun le waliihabei. Ka uagu gayara lubéi tíderaguniwa Bíbülia? Ladüga Lererun tan Bungiu ani anihein adundehani buiti le lúmagiñeti Bungiu tidan ani gayarati líderaguniwa. Ligíati, ságüme  wasandirun lanarime idiheri, samina wamá luagun lisaminan Bungiu luma luagu ida liña lan líderaguniwa. Ítara luba gayara lan wawalidagun o lagumuchun wadiheri. Ariñagati Heowá mosu lan waliihanu Lererun lun gayara lan ‘ganigi wamá’ ani lun mígiraguagüdün wamá woungua lun anufudei (Hosué 1:7-9).

Anhein here lubéi wafiñen luagu Heowá, wafiñeruba luagu líchugubei lan sun le wemegeirubei woun

6. Ida liña líderaguniwa lererun Hesusu uguñe weyu?

6 Gayarati giñe wafurendeirun tidan Lererun Bungiu luagu ligaburi layanuhan Hesusu houn gürigia. Hínsiñeti meha houn gürigia haganbuni, ladüga ruti meha Hesusu erei houn luma gurasu lau lererun, hóuntima meha ha débilibaña o ha hírubaña (aliiha huméi Matéu 11:28-30). Nidiheriti meha Hesusu luagu ida liña lan hasandiragun ha híbiri houngua (Márükosu 6:30-32). Íderagua lumutiña meha Hesusu lani apostolugu, ani líderagubadiwa giñe uguñe weyu. Inarüni mama lan lúmañadiwa Hesusu kei meha lani apostolugu. Gama lumoun, mama mosu luma wamá Hesusu lun wibihini ídemuei le füramase lubéi. Ligía warúeitebei ani aniheingua arufuda ínsiñeni woun siélugiñe. Ligíati, danme le anihein lan somu katei adiheridagüdütiwa, gayarati wachoururuni wámabei lan Hesusu ani líderagubadiwa lan danme le megei wamani. Ruti Hesusu emenigini woun luma ganigi, le íderagubaliwa lun madiheridun wamá saragu (Ebüréu 2:17, 18; 4:16).

ÍDERAGUA LUMUTIWA IGABURI LE LÍCHUGUBEI SÍFIRI

7. Ida liña líderaguniwa lani Bungiu sífiri sandu?

7 Guentó ariha waméi lǘrüwan ídemuei le wámabei lun wibihin awalidaguni. Füramaseti Hesusu líchuguba lan Wáguchi le siélubei sífiri sandu woun anhein wamuriaha luma (Lúkasi 11:10-13). Lubafu Bungiu sífiri sándubei, ani íderagua lumutiwa lun warufudun igaburi libe le luágubei Bungiu (Kolosana 3:10). Watu Bíbülia lun igaburi burí le “igaburi le líchugubei sífiri” (aliiha huméi Galasiana 5:22, 23). Dan le warufuduni igaburi burí le, buítimati wanaagun woungua hama amu ani aba wadisedun luéi sügǘ burí le gayarabei ladügün lun wadiheridun o lun wírudun. Ariha wamá fiú igaburi le ídanbei líderaguawa igaburi le líchugubei sífiri.

8-12. Ida liña gayara lan líderaguniwa igaburi le líchugubei sífiri?

8 “Ínsiñehabuni, ugundani, darangilaü”. Dan le wóuseruniña amu lau inebesei luma lau ínsiñeni, madiheriduntiwa. Ka uagu? Ladüga dan le wóuserun lau igaburi burí le masuseredunti ni kata le gayarati ladügün lun wagañidun o lun wadiheridun. Ítara luba ménrenguntima lan woun lidan wamá darangilaü hama amu (Rómana 12:10).

Dan le warufudun igaburi buiti, buítimati wanaagun woungua hama amu

9 “Gaguraasuni, areiduni, lubuidun igaburi”. Ariñagatu Bíbülia: “Buidu humá, gudemehabu huguyame húmagua, ferudunagua humá húmagua” (Éfesuna 4:32). Dan le gaganbadi wamá lun adundehani le, lídanñadiwa darangilaü hama amu ani aba madügün wamá katei le gayarati ladügün lun wadiheridun. Ani ménrenguntimabei giñe woun waransehani turóbuli  le gayarabei wagagibudagun luma ladüga wachara.

10 Afiñeni. Uguñe weyu, gíbeti dan wadiheridun luagu umegeguni luma seinsu (Ariñawagúni 18:11). Kaba wadüga lun madiheridun wamá luagu katei burí le? Mosu gaganbadi wamá lun leweridihan apostolu Pábulu lun ‘gunda wamá lau wámati’. Anhein here lubéi wafiñen luagu Heowá, wafiñeruba luagu líchugubei lan le wemegeirubei woun. Füramaseti woun: “Nóunigirubadibu; mígirun nubadibu”. Ligía gayara lubéi wariñaguni le lariñagubei Pábulu: “Nabureme Bungiu íderagubalina; manufudebadina. Kábati gayara hamá gürigia adüga nau?” (Ebüréu 13:5, 6).

11 “Ǘnabuguni, ragüguaü unguaü”. Ida liña líderaguniwa ǘnabuguni luma ragüguaü unguaü? Seremei bián igaburi le, madügünbadiwa ani mariñagun wagíame katei le gayarati ladügün lun wadiheridun. Magahüdünboun wanigi, magañidun wagíame, magúaragunbadiwa houn amu, manabun wamañame (Éfesuna 4:31).

12 Lun wafiñerun luagu “lúhabu Bungiu le gabafubei” ani ígira wameime sun wadiheri lun, mosu ǘnabugu wamá (1 Féduru 5:6, 7). Ánhawa ǘnabugu, lóunigirubadiwa Heowá. Dan le wíchugun fe luagu anihein lan katei gayara wamuti adüga luma katei le siñá wamuti adüga, arufudatiwa mafiñerun wamá wawouguarügü. Ábati darangilu wamá, ladüga aba wíchuguni wafiñen luagun Bungiu (Mikeasi 6:8).

“MADIHERIDA HUMÁ”

13. Ka meha labusenrubei Hesusu lariñagun lau dimurei “madiherida humá”?

13 Ru lumuti Hesusu lubuidun adundehani le: “Madiherida humá” (aliiha huméi Matéu 6:34). Gayarati wasaminarun siñabei lan wagunfuliruni adundehani le. Gama lumoun, ka meha san labusenrubei Hesusu lariñagun? Mama lariñaguña masandirunbaña lan lubúeingu Bungiu idiheri. Ladüga furendeihadiwa chülüti lan meha dan lun lasandiragun urúei Dawidi luma apostolu Pábulu houngua ítara. Le linarün katei, busenti meha Hesusu lun gunfuranda hamani lani disipulugu maranserun hamá ni kata lau hadiheridun saragu. Wagagibudaguba luma turóbuli sagü weyu, ligíati maganwoundagüda waméi wadiheri asaminara luagun turóbuli le meha úmabei wagagibudagua lidan dan le sügühalibei ni luagun le úmabei wagagibudagua guentó o le  lunbei wagagibudagun luma ámuñegü. Ida liña gayara lan líderaguniwa leweridihan Hesusu lun madiheridun wamá saragu?

14. Ida luba wagidaruni lanarime ihürügu wawariua kei meha ladügüni Dawidi?

14 Anihein dan wadiheridun luagu katei le sügühali. Gayarati sandiguagidiwa lan woungua lau duru luagu charati le meha wadügübei, íbini sügühali lan saragu irumu. Íbini urúei Dawidi anihein meha giñe dan lasandiragun lungua ítara dan le lasaminarun luagun figóu le meha ladügübei. Dan le layanuhan luagu lichara, aba lariñagun sánditi lan sun lúgubu ladüga lichara (Sálumu 38:3, 4, 8, 18). Ábati ladügün Dawidi aban katei le buiti, ani gayarati giñe wadügüni ligiaméme. Aba lafiñerun luagu gudemehabubei lan Heowá lun ani feruduna lubéi lan. Aba lagundaarun Dawidi saragu lau lasubudiruni feruduna laali lan Heowá (aliiha huméi Sálumu 32:1-3, 5).

15. a) Ka amu katei wafurendeirubei lúmagiñe urúei Dawidi? b) Ka gayarabei wadügüni lun wagidaruni lanarime idiheri wawariua? (Ariha huméi rekuáduru “ Adundehani lun manarime lan wadiheridun”).

15 Lidan amu dan, gayarati wadiheridun luagu le wawinwandubei lidan dan ligía. Kéiburi dan le labürüdünbalin Dawidi Sálumu 55, hanufudeti meha ladüga lídanñein lan peliguru libagari (Sálumu 55:2-5). Gama lumoun, mígirunti lun ladügün idiheri lun leferidiruni lafiñen luagu Heowá. Ayumuraguati Dawidi lun Heowá lun líderaguni. Gama lumoun, subudi lumuti meha giñe mosu lan láluahan ida luba lan laransehani turóbuli ligía (2 Samueli 15:30-34). Furendeitiwa amu katei lúmagiñe Dawidi. Lubaragiñe wígirun lun láfaruniwa idiheri, adüga waméi sun wayaraati lun waransehani turóbuli ani afiñe wamá luagu líderagubadiwa lan Heowá.

16. Ida liña ladügün le mini lubéi liri Bungiu lun léredun wafiñen?

16 Anihein dan gayarati giñe wadiheridun luagun le lunbei lasuseredun ámuñegü. Gama lumoun, moun lumuti wadiheridun luagu katei le masuseredungili. Dan le lachülürün oura, gíbeti katei maribanti kei wasaminaruni. Haritagua waméi giñe gayara lan lahandilihani Heowá katei. Adügati le mini lubéi liri lun léredun wafiñen. Gunfuranda wamuti le mini lubéi liri Bungiu: “Ladügüba lun lasuseredun” (Áfuriduni 3:14). Arufuda lumuti le mini lubéi liri Bungiu gúnfuli lani sun le füramase lubéi woun. Ligía moun lumuti lubéi wadiheridun luagu le lunbei lasuseredun  ámuñegü. Gayarati wachoururuni labinirubaña lan Bungiu lubúeingu ha úaragubaña ani líderagubaña lan lun madiheridun hamá saragu luagu turóbuli le sügühali luma luagu le asuseredubei guentó, o luagu katei le lunbei lasuseredun ámuñegü.

AYANUHA WAMÁ LUMA ABAN GÜRIGIA LE UÁGUBEI WAFIÑERA

17, 18. Dan le nidiheri wamá, ida luba líderaguniwa wayanuhan hama gürigia ha uágubaña wafiñera?

17 Le ligadürün ídemuei le wámabei, wabahüdaguni lun aban gürigia le uágubei wafiñera ka lan adiheridagüdübaliwa luma ida liña lan wasandiragun woungua. Gayarati líderaguniwa wani weiriei o wani weiriou, aban wamada o aban wéiyaali lidan afiñeni lun gunfuranda wamani buidu ka lan suserebei woun. Ariñagatu Bíbülia: “Hírugüda lumuti idiheri gürigia; anhein dimurei buiti, gúndaaguagüda lumuti” (Ariñawagúni 12:25). Ariñagatu giñe wuriba lan lasalirun katei dan le málügüdahan wamá hama amu gürigia (Ariñawagúni 15:22).

18 Gayarati giñe líderaguniwa adamuridaguni lun wibihin awalidaguni. Lidan adamuridaguni sügütiwa dan hama wíbirigu ha beresetiña wau ani busentiña híchugun gurasu woun (Ebüréu 10:24, 25). Dan le “wíchugun gurasu wóuniwagua” ragütiwa erei ani íderagua lumutiwa lun wararamun lun turóbuli (Rómana 1:12).

RUTI WAMADAGUA LUMA BUNGIU EREI WOUN

19. Ka uagu chouru hubalin líchuguba lan humadagua luma Heowá erei hun danme le lidan humá lénrengunga?

19 Furendei lumuti aban íbiri le lídangiñeti aban damuriguaü Canadá súdini lan lun wígiruni wadiheri lúhaburugu Heowá. Hénrenguti wadagimanu le ladügübei íbiri le. Luadigimariña kei máisturu luma íchiga adundehani houn aturiahatiña. Ani sánditi giñe, dagati lanarime idiheri luagu ani mañuuragunti lisaminan. Halíagiñe san lasagara erei lun lasigirun lubaruaguóun? Áfaaguati saragu lun léredagüdüni lumadagua luma Heowá. Íderagua lumuti giñe labahüdaguni tun lani weiriou ida liña lan lasandiragun lungua luma hídehan lumadagu. Íderagua hamaali ha híbiri wéiyaaña lidan afiñeni luma óunigiruti sirkuitu lun larihini katei kei larihini Heowá. Lagumuhóun, íderagua lumuti giñe aban surusia lun gunfuranda lani lisandi. Ábati gunfuranda lani íbiri le mosu lan ladügün asansiruni lidan lóurate ladügüni katei lun gayara lan lemeraagun luma lun ladügün ehersísiu. Aba afurendeireina lan murusun murusun ida luba lan lahandilihani gádanti. Guentó sun katei le siñá lubéi aranseha ígira lumuti lúhaburugu Heowá.

20. a) Ida liña gayara lan wíchuguni wadiheri lun Heowá? b) Kaba wariha lidan leweñegua arütíkulu?

20 Ariha wamaali lidan arütíkulu le súdini lan lun wíchuguni sun wadiheri lun Heowá dan le wafurieidun, ani lunti lan waliihanu Bíbülia samina wagíame luagun le waliihabei. Súdiniti giñe wígirun lun líderaguniwa lani Bungiu sífiri sandu, lun wayanuhan luma aban gürigia le uágubei wafiñera ani lun woudin adamuridagua. Lidan le aban arütíkulu warihibei ida liña lan líderaguniwa lani Heowá füramasei luagu líchuguba lan wafayeiruaha (Ebüréu 11:6).