Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Duusu-hati irumu 2016

Barüti ugundani luma darangilaü wabagaridun keisi lugundan sífiri sandu

Barüti ugundani luma darangilaü wabagaridun keisi lugundan sífiri sandu

“Ha abagaridubaña keisi lugundan [s]ífiri [s]andu, luagun katei le lánina sífiri haritagua” (RÓMANA 8:5).

UREMU 22, 52

1, 2. Ka uagu weiri lubéi lisudinin Rómana kapítulu 8 houn kristiánugu anuadirúaaña?

LIDAN aritaguagülei lánina lounwen Hesusu, háfuga aliiha wamaali lan Rómana 8:15-17. Afuranguagüda lumuti bérusu burí le ida liña lan hasubudiruni kristiánugu anuadirúaaña luagu ibagari lan sielu lun súnwandan hemenigibei. Ariñagati Rómana 8:1 kristiánugu lan anuadirúaaña “lídanbaña aban luma Hesusu”. Gama lumoun, hóunrügüñein san kristiánugu anuadirúaaña labürüdǘwa Rómana kapítulu 8? Gayarati giñe san leseriwidun houn ha hemenigibaña lun hawinwandun ubouagu?

2 Hóuntima kristiánugu anuadirúaaña labürüdǘwa Rómana kapítulu 8. Ariñagati kapítulu le resibi hamani kristiánugu anuadirúaaña “[s]ífiri [s]andu” ani aguraba hamuti lan lidaani ‘lirahüñühaña lanme Bungiu le tímatimaati, danme le laseridagun hágubu’ (Rómana 8:23). Dan le háguyugun sielu, aba  lirahüñühaña lan Bungiu. Seremei lebegi asalbaruni, feruduna laali Heowá hafigoun ani írida laaña keisi gürigia richaguatiña, ligía gayara lubéi lisaanigu hamá (Rómana 3:23-26; 4:25; 8:30).

3. Ka uagu lunti lubéi haturiahani kristiánugu ha lúnbaña hawinwandun lun súnwandan ya ubouagu Rómana kapítulu 8?

3 Lidan Rómana kapítulu 4, abürühati Pábulu luagu Abüraámü. Wínwanti meha Abüraámü saragu irumu lubaragiñe líchuguni Hesusu libagari lun lesefuruniwa. Lau sun mama lan meha aban kristiánu anuadirúaali Abüraámü, ariha lumuti Heowá kei aban gürigia richaguati (aliiha huméi Rómana 4:20-22). Ítarameme, gayarati giñe larihiniña Heowá kristiánugu úaraguatiña ha lúnbaña hawinwandun lun súnwandan ubouagu keisi gürigia richaguatiña. Ani lunti giñe haturiahani kristiánugu ha Rómana kapítulu 8 ladüga gayarati líderaguniña adundehani burí le ñeinbei.

4. Ka álügüdahani lunbei wadügüni wóuniwagua dan le waliihani Rómana 8:21?

4 Lidan Rómana 8:21, füramaseti Heowá “lesefuruba lan ubóu lídangiñe asufuriruni” le lanügübei figóu luma óunweni. Mini lan le sun lan ha lúnbaña hawinwandun lidan paraísu hagundaaruba lan “lidan haweirigun lirahüñü Bungiu”. Dan le waliihani bérusu burí le lunti wálügüdagun woungua: “Aríaguatina san nungua lidan iseri ubóu?”. Ariha waméi ka lan lunbei wadügüni lun wawinwandun ñein.

 ABAGARIDA “SEGÚN IGABURI LÁNINA FIGÓU”

5. Ka meha uagu layanuha Pábulu lidan Rómana 8:4-13?

5 (Aliiha huméi Rómana 8:4-13). Lidan Rómana kapítulu 8, ayanuhati Pábulu hawagu bián hawuyeri gürigia. Ayanuhati hawagu ha abagaridubaña “según igaburi lánina figóu” luma hawagu ha abagaridubaña “keisi lugundan [s]ífiri”. Gayarati hamuga wasaminarun layanuhaña lan meha Pábulu hawagu kristiánugu luma hawagu ha mámabaña kristiánu. Gama lumoun bürǘ lumutu meha Pábulu gárada to houn kristiánugu, houn “ha hínsiñebaña lun Bungiu” (Rómana 1:7). Ligíati, dandu ha awinwandubaña “según igaburi lánina figóu” kei ha awinwandubaña “keisi lugundan [s]ífiri” kristiánugu meha. Ka meha san uagu amu habéi hawariuagua?

6, 7. a) Ka amu katei mini lubéi dimurei le ásügürawagüdübei tidan Bíbülia garifuna kei “igaburi lánina figóu”? b) Ka uagu layanuha Pábulu dan le layusuruni dimurei “igaburi lánina figóu” lidan Rómana 8:4-13?

6 Dimurei güriegu le ásügürawagüdübei kei “igaburi lánina figóu” lidan Rómana 8:4-13 gayarati layusurún lun layanuhóun luagu saragu katei. Kéiburi lidan Rómana 2:28 luma 1 Korintuna 15:39, 50 sügügüdawati ligiaméme dimurei güriegu kei úgubu. Yúsuati giñe lun layanuhóun luagu iduheguaü. Kéiburi lidan Rómana 1:3 tidan Bíbülia garifuna sügügüdawati kei ‘adügawaguni’.

7 Kati uagu layanuha Pábulu dan le layusuruni dimurei “igaburi lánina figóu” lidan  Rómana 8:4-13? Lun gunfuranda wamani buidu, akutiha waméi le lariñagubei Rómana 7:5. Ñein afuranguagüdati Pábulu dandu lan ligía kei amu kristiánugu winwan hamá meha según “igaburi le lánina figóu” lubaragiñe kristiánugu hamá, ladüga ígiratiña meha lun lagumadiruniña luriban hayumahan. Ligíati, ha awinwandubaña según “igaburi lánina figóu” hagía ha ígirubaña lun lagumadiruniña luriban hayumahan ani aba hadügüni le habusenrun.

8. Ka meha uagu leweridiraña Pábulu kristiánugu anuadirúaaña lun mabagaridun hamá “según igaburi lánina figóu”?

8 Ka meha uagu leweridiraña Pábulu kristiánugu lun mawinwandun hamá según “igaburi lánina figóu”? Ladüga furumiñeguarügü lubúein Bungiu gayarati lígirun lun layumahan lan súdinitima lidan libagari. Kéiburi dan le lariñagunbei Pábulu hawagu fiú íbirigu rómana luagu lidamun hamá hayumahan. Háfuga le labusenrubei lariñagun luagu agamariduni lan, éigini luma amu burí katei súdinitimabei lidan habagari (Rómana 16:17, 18; Filipuna 3:18, 19; Húdasi 4, 8, 12). Ani lidan uburugu Korintu, anihein meha aban kristiánu le agamaridubarun “lúmari lúguchi” luagu fiú dan (1 Korintuna 5:1). Chóuruti megei hamani meha kristiánugu lánina furumiñeti sígulu hagía leweridihan Pábulu lun mawinwandun hamá “según igaburi lánina figóu” (Rómana 8:5, 6). Ani uguñe weyu, megei wamuti giñe.

9. Ka mini lubéi Rómana 8:6?

9 Súdiniti giñe eweridihani le lidan wadaani. Íbini aban gürigia le barühali saragu irumu eseriwida lun Heowá gayarati lagumeserun awinwanda según “igaburi lánina figóu”. Gama lumoun, mini lan san le lariñagubei Pábulu lidan Rómana 8:6 wuriba lan hasaminarun gürigia luagun éigini, wadagimanu, isebáhari o luagun ínsiñeni le lasandirubei aban wügüri tuma aban würi hawougua? Uá. Kamaniti lira lidan ibagari. Íbini Hesusu gúndaati meha lau éigini darí lun hóugüda lan saragu gürigia. Ani anihein meha giñe dan megei lan lemeraagun. Ani ariñagati giñe Pábulu súdini lan agamariduni hadan bián gürigia maríeitiña.

Ka san uagu hínsiñetima lan woun wayanuhan? (Ariha huméi párafu 10 luma 11).

10. Ka mini lubéi “wasaminarun luagun” aban katei?

10 Ka mini lubéi “wasaminarun luagun” aban katei o wawinwandun según aban katei? Layanuhaña Pábulu luagu lichugúniwa sun saminaü luagun aban katei. Ariñagati aban sásaamu yusua lan dimurei le lun layanuhóun hawagu ha asaminarubaña luagun luriban hayumahan ani ayanuha hagía luagu súnwandan. Ayumahani ligía súdinitimabei houn ani ligía alidihabalin habagari.

Ka katei súdinitimabei lidan wabagari?

11. Ka burí katei gayarabei súdinitima lan woun?

11 Mosu meha haríagun kristiánugu rómana houngua lun harihini ka burí lan katei súdinitimabei houn. Katei meha san “lánina figóu” súdinitimabei houn? Ani wagía, lunti giñe warihini ka lan súdinitimabei woun. Ka katei gayarabei súdinitima lan lidan wabagari? Lun wasubudiruni, álügüdagua wamá woungua: “Ka san katei uágubei hínsiñetima lan nun nayanuhan? Ka san hínsiñetimabei nun nadügün?”. Añahein íchugutiña fe hasaminaruña lan súnwandan luagu houchun ámuñegueinarügü  tuwuyeri diwéin, luagu hawendedagüdünu haban, hagañeihan daüguaü o hayusuruni haseinsun lun houdin bakechanu. Maribanti katei burí le. Haritagua wamá bián hénpulu tuáguti diwéin. Saliguagüdati Hesusu duna diweinme lidan aban maríei, ani ariñagati meha giñe Pábulu lun Timotéu lun latun “murusun diwéin” lun látuadi (1 Timotéu 5:23; Huan 2:3-11). Gama lumoun, mama meha diwéin súdinitimabei houn. Agia wagía? Ka katei súdinitimabei lidan wabagari?

12, 13. Ka uagu lunti lubéi warihini ka lan súdinitimabei lidan wabagari?

12 Ka uagu lunti lubéi warihini ka lan súdinitimabei lidan wabagari? Eweridihati Pábulu: “Dan le habagaridun gürigia según igaburi lánina figóu le hádanbei, barǘ lumutiña lidoun óunweni” (Rómana 8:6). Ánhawa abagarida según “igaburi lánina figóu”, gayarabei weferidiruni wamadagua luma Bungiu guentó ani ámuñegü gayarabei weferidiruni wabagari. Gama lumoun, gayarati wadügün lun masuseredun lan lira. Sun wagía gayarati wasansirun. Haritagua wamagili san wügüri le meha awinwandubei lidan magíaguni Korintu ani mosu meha labugún? Sánsiti meha, aba lígiruni liwiye libagari ani ábaya leseriwidun lun Heowá lau arumani (2 Korintuna 2:6-8).

13 Íbini weiri lan meha luriban katei le ladügübei gürigia ligía lidan lawinwandun “según igaburi lánina figóu”, sánsiti. Anhein gumeseeli lubéi aban kristiánu adügei luriban layumahan lubaragiñe lasigiruni lilurudun Heowá, gayarati giñe lasansirun. Laritaguni eweridihani le líchugubei Pábulu gayarati líchugun erei lun lun lasansiruni ligaburi lóuserun.

“HABAGARIDUN KEISI LUGUNDAN SÍFIRI SANDU”

14, 15. a) Kaba uagun lunti lan wíchuguni wasaminan? b) Ka mini lubéi wabagaridun “keisi lugundan [s]ífiri [s]andu”?

14 Lárigiñe layanuhan luagu peliguru lan habagaridun gürigia “según igaburi lánina figóu”, ariñagati Pábulu: “Habagaridun keisi lugundan [s]ífiri [s]andu, barǘ lumutiña lidoun ibagari tímatimaati luma darangilaü”. Chóuruti aban lan lubuidun afayeiruahaü lira.

15 Gama lumoun, dan le lariñagun lun wabagaridun “keisi lugundan sífiri” mama lariñaguña luágurügübei lan Heowá luma tuagun Bíbülia wasaminara sun dan, o luágurügübei lan katei le wayanuha. Súnwandan hawinwanduni kristiánugu habagari keisi lubudubu. Kéiburi kristiánugu ha lánina furumiñeti sígulu, hóutiña meha, gurá hagía, maríei hagía, gasaanigutiña meha ani nadagimein hagía (Márükosu 6:3; 1 Tesalónikana 2:9).

Leseriwidun meha Pábulu lun Heowá súdinitimabei lun

16. Ka meha súdinitimabei lun Pábulu?

16 Gama lumoun, ni meha Pábulu ni kristiánugu lánina furumiñeti sígulu mígiruntiña lun katei burí lan le súdinitima lidan habagari. Kei hénpulu, subudi wamuti gañei lumuti lan meha Pábulu libagari adaagua kianpu. Gama lumoun, mama meha luadigimari súdinitimabei lun. Leseriwidun meha lun Bungiu súdinitimabei.  Téniti meha lun lapurichihan luma lun larufudahan (aliiha huméi Adügaü 18:2-4; 20:20, 21, 34, 35). Lunti meha hasigiruni íbirigu rómana lani Pábulu hénpulu, ani ligía giñe lunbei wadügüni (Rómana 15:15, 16).

17. Kaba wibiha ánhawa abagarida “keisi lugundan [s]ífiri [s]andu”?

17 Kaba buiti wibiha ánhawa abagarida “keisi lugundan sífiri”? Ariñagati Rómana 8:6: “Dan le habagaridun keisi lugundan [s]ífiri [s]andu, barǘ lumutiña lidoun ibagari tímatimaati luma darangilaü”. Mini lan dimurei burí le ígira wamá lun Heowá lan adundehei wasaminan lau lani sífiri ani furendei wamá asaminara kei ligía. Füramaseti Bungiu aba ibagari lau ugundani woun guentó luma ibagari magumuchaditi ámuñegü.

Seremei lun Heowá gayarati wibihin aban saminaü darangilati

18. Ida luba wibihin darangilaü ánhawa abagarida “keisi lugundan [s]ífiri [s]andu”?

18 Ariñagati giñe Pábulu ánhawa lan abagarida “keisi lugundan [s]ífiri” wibihiba lan darangilaü. Sun wagía busentiwa darangilaü, lúntima darangila lan wasaminan. Ani fiúrügüñanu adariruti. Ida liña san wibihin darangilaü dan le wawinwandun “keisi lugundan [s]ífiri”? Seremei lun Heowá gayara lubéi darangilu lan wasaminan. Gayarati giñe wagundaarun lau darangilaü hama waduheñu luma hama amu kristiánugu. Kei le sun lubéi wagía gafigountiwa, anihein dan gaturobulin wamá hama wíbirigu. Dan le lasuseredun ítara, aba wafalaruni ladundehan Hesusu lun woudin “arandara luma gürigia ligía” (Matéu 5:24). Haritagua waméi seriwi hamá giñe wíbirigu lun Heowá, Bungiu le “íchugubei darangilaü” (Rómana 15:33; 16:20).

19. Ka darangilaü espechaliti gayarabei wibihini?

19 Ánhawa awinwanda “keisi lugundan [s]ífiri”, wagundaaruba giñe lau aban darangilaü espechaliti, lidarangilan Bungiu. Ariñagati profeta Isaíasi lóunigirubaña lan Heowá ha afiñerutiña luagu sunsuinagubei ani líchuguba lan darangilaü le magumuchaditi houn (Isaíasi 26:3; aliiha huméi Rómana 5:1).

20. Kaba wibiha anhein wafalara adundehani le lídanbei Rómana kapítulu 8?

20 Dandu anhein hemenigi wabéi wawinwandun lun súnwandan sielu o ya ubouagu, sun wagía gayarati wasagarun buiti lídangiñe Rómana kapítulu 8. Geteingiraditiwa luagu tínchahaniwa Bíbülia lun wetenirun lun weseriwidun lun Heowá ani lun mafalarun wamani luriban wayumahan. Ánhawa awinwanda “keisi lugundan [s]ífiri”, gayarabei wibihin aban lubuidun emenigini: “Ibagari le magumuchaditi lidan Wabureme Hesukrístu” (Rómana 6:23).