Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Unsu-hati irumu 2016

Óundaragu asigirei tadundehan liliburun Bungiu

Óundaragu asigirei tadundehan liliburun Bungiu

“Lau lichú aau ladügei Bungiu ubóu; lau lisubudin líchigei sielu lidan lubara” (ARIÑAWAGÚNI 3:19).

UREMU 15, 16

1, 2. a) Ka hasaminarubei fiú gürigia luagu gani lan Bungiu aban óundaruni? b) Kaba wariha lidan arütíkulu le?

AÑAHEIN gürigia ariñagutiña memegeirúniwa lan aban óundaruni le lunti ladundehaniwa lun gayara lan wáhuduragun lun Bungiu. Ariñagatiña buídurügüti lan lau wadügün umadaguaü luma. Inarüni san le?

2 Lidan arütíkulu le warihibei adüga lani Heowá sun katei lábugiñe aban aransehani ani adüga lan aransehani hadan lumutuniña (ariha huméi rekuáduru “ Ka mini lubéi?”). Warihibei giñe ka lan lunbei wadügüni danme le tíchugun lóundarun Heowá adundehani woun (1 Korintuna 14:33, 40). Lidan furumiñeti sígulu, falá hamuti meha kristiánugu adundehani le tídanbei Lererun Bungiu. Ligía gayara lubéi hapurichihani uganu luáguti Larúeihan Bungiu lidan saragu fulasu. Uguñe weyu, ígiratiwa giñe, wagía gefentiña luagu Heowá, lun tadundehaniwa Bíbülia ani gaganbaditiwa lun adundehani le tíchugubei lóundarun Bungiu woun. Ligía gayara lubéi wapurichihani uganu luáguti Larúeihan Bungiu lidan sun Ubóu. Ani kipu wamuti giñe damuriguaü harumañu, lidan úarani luma darangilaü.

 ABAN BUNGIU LÁNINA ARANSEHANI BUITI HEOWÁ

3. Ka adügübei lun wachoururuni luagu hínsiñe lan lubuidun aransehani lun Heowá?

3 Dan le wasaminarun luagun katei burí le adüga láalibei Heowá, aba warihini furangu mínsiñe lan chagaguaü lun. Ariñagati Ariñawagúni 3:19 adüga lani Heowá Ubóu “lau lichú aau” ani adüga lani sielu “lau lisubudin”. Gama lumoun, míbeti wasubudin luagu katei burí le ladügübei Bungiu. Ligía tariñagunbei Bíbülia “murusunrügügili [lan] le waganbubei luagu” (Hobu 26:14). Íbini ítara, murusun le wasubudirubei luagu ubóu íderagua lumutiwa arihei furangu lábugiñe lan aban aransehani ladügǘwa (Sálumu 8:3, 4). Samina wamá tuagun saragu míñunu waruguma to ánhinhaboun huáriñugu. Samina wamá giñe luagun ligaburi lagararaha ubóu burí le aniheinbei geyegu lau Weyu. Susereti sun katei le ladüga Heowá lan aranserubalin lun ítara luba lan. Wasaminarun luagun Heowá lan adügübalin sielu luma Ubóu lau saragu lichú aau ínchaha lumutiwa lun walawahani, lun wáhuduragun lun ani lun úaragua wamá lun (Sálumu 136:1, 5-9).

4. Ka uagu siñaguagiña lubéi aturiahatiña siensia houngua lun hóunabun saragu álügüdahani súdiniti?

4 Furendeihaña aturiahatiña siensia saragu katei luagu Ubóu. Ligía ménrenguntimahali lubéi wabagari. Gama lumoun, siñagili hóunabun saragu álügüdahani súdiniti. Kei hénpulu, siñati hariñaguni furangu ida liña lan lagumeserun sun katei ani ka lan uagu anihein lubéi ibagari ubouagu. Ani hiibe-agei gürigia siñaguatiña houngua lun hafuranguagüdüni ka lan uagu mabusenrun habéi gürigia hounwen (Apurichihati 3:11). Ka uagu ibidiñe lubéi lóunabagüle álügüdahani burí le houn besafu gürigia? Furumiñe, ladüga gibe hamá aturiahatiña siensia hama amu gürigia ariñagutiña úati lan Bungiu ani aba harufudahan saliguarügü lan sun katei lungua. Gama lumoun, ru lumuti Bungiu óunabagülei woun tidan Bíbülia, to liliburun.

5. Ka burí hénpulu arufudubalin megei wamani lúrudu burí le líchugubei Bungiu dan le ladügünbalin katei?

5 Heowá íchugubei aban lúrudu lun kada katei le ladügübei, ani masansirunti lúrudu burí ligía. Dandu ha nadagimeinbaña lau elekütrisida, ha abugahabaña awión, surusiagu hama amu gürigia megei hamuti lúrudu burí ligía lun hadügüni hawadigimari. Kéiburi surusiagu, subudi hamuti halíañoun lan lanigi aban gürigia le unbei hagaraniha. Ka uagu? Ladüga lídanñoun lan ligiaméme fulasu hanigi sun gürigia. Luagu amu oubaü, sun wagía subudi wamuti anhein lan achubara aban gürigia lídangiñe aban fulasu íñuti lábürühaba lan ǘnabun ani gayarati lan lounwen. Ka uagu? Ladüga aban lúrudu le ariñagubei luagu sun lan le achubaruti íñugiñe lunti lan lagiribudun lárigoun múarugun. Ligíati, anhein busén wabéi wasigirun awinwanda, mosu inebe lan lúrudu burí le líchugubei Bungiu luagu katei le ladügübei woun.

KATEI BURÍ LE ARANSEHA LÁALIBEI BUNGIU

6. Ka uagu gayara lubéi wachoururuni busén lan Heowá lun háhuduragun lubúeingu lun lábugiñe aban aransehani?

6 Wéiriti lubuidun ligaburi ladügüni Bungiu ubóu. Ligía gayara lubéi wachoururuni busén lan lun ñein lan aransehani hadan lumutuniña. Ani ru laaru Bíbülia woun lun larufudahan woun ida luba lan wáhuduragun lun. Lun gunda wamá, mosu wafalaruni adundehani le líchugubei Heowá tuma lóundarun woun.

7. Ka wafurendeirubei lídangiñe ligaburi tabürüdǘniwa Bíbülia?

7 Aban lubuidun idewesei lúmagiñetu Bungiu Bíbülia. Añahein sásaamu ariñagutiña  tuagu Bíbülia aban tan líburu huríu tuma líburu kristiánu to úati úarani tidan. Gama lumoun, Bungiu meha desidírübei kaba lan abürüdoun líburu burí to tídanboun Bíbülia, ídaba lan hadügei luma kaba lan habürüda. Ligía ligiaméme lubéi arufudahani tídanbei Bíbülia ani íderagua tumutiwa lun gunfuranda wamani le labusenrubei Bungiu larufudahan woun. Lúmagiñe Agumesehani darí Arufudúni, arufudahatu Bíbülia ñeinbei lan meha aban ‘adügawagúni’ le lunbei ladügüni Ubóu paraísume. Arufudahatu woun Hesukrístu lan ‘adügawagúni’ ligía ani larufudubei lan Larúeihan luagu Heowá lan garichabei lun lagumadihan ubouagu (aliiha huméi Agumesehani 3:15, Matéu 6:10 luma Arufudúni 11:15).

8. Ka arufudubalin anihein lan meha aban aransehani buiti hadan ísüraelina?

8 Adügati meha Bungiu lun ñein lan lubuidun aransehani hadan ísüraelina. Ida? Ruti meha aban Lúrudu houn. Kei hénpulu, añahein meha “würiña ha eseriwidubaña tubenari kianpu lánina óundaraguni” (Áfuriduni 38:8). Ruti giñe adundehani luagu ida luba lan hanügünu kianpu-agei tuma tabernákulu lídangiñe aban fulasu lidoun amu. Dan lárigiñe, adügati Dawidi aransehani hadan fádirigu hama lewitagu lubá wadagimanu le meha hadügübei ténpulurugu (1 Krónikasi 23:1-6; 24:1-3). Dan le meha gaganbadi hamá ísüraelina lun Heowá, aba meha labiniruniña. Anihein meha darangilaü luma úarani hadan (2 Lúrudu 11:26, 27; 28:1-14).

9. Ida liña meha aransehani lidan burí damuriguaü lidan furumiñeti sígulu?

9 Anihein meha giñe aransehani hadan kristiánugu ha lánina furumiñeti sígulu. Lidan dan ligía anihein meha aban sétanu hani wügüriña ha alidihabalin damuriguaü. Furumiñe, apostolugurügüñanu meha lidan sétanu ligía. Lárigiñe, aba giñe hebelurun amu wéiyaaña lidan afiñeni hanwoun (Adügaü 6:1-6; 15:6). Adügati meha Heowá lun habürühan lílana sétanu ligía hama kristiánugu ha íderagubaliña gárada lau adundehani luma eweridihani lun damuriguaü (1 Timotéu 3:1-13; Titu 1:5-9). Ida liña san hasagarun lílana damuriguaü buiti lídangiñe hafalaruni ladundehan sétanu ligía?

10. Ka meha asuseredubei dan le hafalarunbalin lílana damuriguaü ladundehan sétanu le arihibei lau damuriguaü kristiánu lidan furumiñeti sígulu? (Ariha huméi dibuhu le lídanbei lagumeseha arütíkulu).

10 (Aliiha huméi Adügaü 16:4, 5). Lidan furumiñeti sígulu, añahein meha íbirigu ha abisidahabalin damuriguaü lun hariñaguni houn ka lan desidírü habéi “apostolugu hama tábutigu ligilisi ha Herusalénbaña”. Kei aba lubéi hasigiruni lílana damuriguaü adundehani le heresibirubei lúmagiñe sétanu le arihibei lau damuriguaü lidan dan ligía, aba “hederebugudún [...] lidan hafiñen, aba haganwoundun afiñetiña sagü weyu”. Ida luba wáyeihani hani hénpulu lidan damuriguaü?

FALÁ WAMUTI SAN ADUNDEHANI LE WERESIBIRUBEI?

11. Ka lunbei hadügüni íbirigu ha anügübalin ubaraü lidan damuriguaü dan le heresibirun somu adundehani túmagiñe lóundarun Bungiu?

11 Dandu íbirigu ha arihibaña tau kada sukursáli o ha arihibaña lau apurichihani lidan aban ageiraü, óunigirutiña sirkuitu, ídehatiña lidan damuriguaü hama wéiyaaña lidan afiñeni mosu gaganbadi hamá lun adundehani le tíchugubei lóundarun Bungiu. Ariñagatu Bíbülia mosu lan gaganbadi wamá houn ha alidihabaliwa (2 Lúrudu 30:16; Ebüréu 13:7, 17). Anhein úaragua wabéi lun Heowá, gaganbadibadiwa ani mekeherunbadiwa luagu adundehani le wibihibei. Mabusenruntiwa ítara wamá kei Diótürefesi, le meha menebenehabubei houn íbirigu ha arihibaña lau damuriguaü (aliiha huméi  3 Huan 9, 10). Dan le wasigiruni adundehani, ídehatiwa akipurei darangilaü luma úarani le lídanbei damuriguaü. Ligía lunti lubéi wálügüdagun woungua: “Ínchaha numutiña san íbirigu lun úaragua hamá lun Heowá? Gaganbaditina san lun tadundehan lóundarun Bungiu lau lóufudagun?”.

12. Ida liña hiridúniwa wéiyaaña lidan afiñeni hama ídehatiña lidan damuriguaü?

12 Málügili lasansiruni musu úaraguati ligaburi hiridún wéiyaaña lidan afiñeni hama ídehatiña lidan damuriguaü. Afuranguagüdatu Garüdia Awisahatu ruti lan meha sétanu le arihibei lau damuriguaü kristiánu lidan furumiñeti sígulu üma houn óunigirutiña sirkuitu lun hagía lan íridaña wéiyaaña lidan afiñeni hama ídehatiña lidan damuriguaü (ariha huméi seksióun “Álügüdahani burí le hadügübei aliihatiña” tidan garüdia La Atalaya to lánina 15 lidan unsu-hati irumu 2014). Ligíati, lúmagiñe nefu-hati lidan irumu 2014 aba hagumeserun óunigirutiña sirkuitu íridaña íbirigu ha lúnbaña heseriwidun kei wéiyaaña lidan afiñeni o kei ídehatiña lidan damuriguaü. Dan le hariñagun wéiyaaña lidan afiñeni luagu gayara lan leseriwidun somu íbiri kei wéiyaali lidan afiñeni o kei ídehati lidan damuriguaü, hóuchati óunigiruti sirkuitu lasubudiruni íbiri ligía hau sun liduheñu. Ani lun lasubudiruni háfuga láfuridun luma apurichiha (1 Timotéu 3:4, 5). Lárigiñe, aba ladamuridagun óunigiruti sirkuitu hama wéiyaaña lidan afiñeni. Úara aba hakutihani bérusu burí le ayanuhabei luagu sun katei le lunbei lagunfuliruni aban gürigia lun wéiyaali lan lidan afiñeni o ídehati lidan damuriguaü (1 Timotéu 3:1-10, 12, 13; 1 Féduru 5:1-3).

Yusu hamutu wéiyaaña lidan afiñeni Bíbülia lun hadundehaniwa ladüga busén hamá hóunigiruni damuriguaü

13. Ida liña warufuduni wíderaguñanu lan wéiyaaña lidan afiñeni?

13 Yusu hamutu wéiyaaña lidan afiñeni Bíbülia lun hadundehaniwa ladüga busén hamá hóunigiruni damuriguaü. Mosu wíderaguniña ani sigí wameime hadundehan, ladüga lunti wabuidun guánarügü (1 Timotéu 6:3). Lidan furumiñeti sígulu, añahein meha fiú kristiánugu “máhatiña hawadigimaridun”. Ani aba herederun etenira lun habagari amu. Álugatiña meha wéiyaaña lidan afiñeni híderaguniña lun hasansirun, gama lumoun mabusenruntiña meha hasansirun. Aba lariñaguni Pábulu houn íbirigu ha lídanbaña damuriguaü ligía ida luba lan hóuseruniña ha óuserubaña ítara. Ariñagati houn: “Ariha huméi katei lan” ani “móundara humá luma”. Mosu meha hígiruni íbirigu hásügürün dan luma gürigia ligía, gama lumoun, moun lumuti meha hóuseruni kei ágani (2 Tesalónikana 3:11-15). Uguñe weyu, álugatiña giñe wéiyaaña lidan afiñeni híderaguniña kristiánugu ha maganbadibaña lun lilurudun Bungiu. Kéiburi anhein gadaradun lubéi aban íbiri tuma aban gürigia to meseriwiduntu lun Heowá, hayanuhaba wéiyaaña lidan afiñeni luma lun lasansiruni ligaburi (1 Korintuna 7:39). Ánheinti mabusenrun íbiri ligía lasansirun? Háfuga híchuguba lan hamuga wéiyaaña lidan afiñeni aban yanu lun hafuranguagüdüni gayarati lan ladügün igaburi ligía lun hayanuhan amu gürigia wuriba luagu damuriguaü. Kaba san wadüga ánhaña íchiga wéiyaaña lidan afiñeni aban  yanu ítarati lidan wani damuriguaü? Ánheinti subudi wabalin íbiri le uágubei lichugúa yanu ligía, wígirubei san lubuidun wamadagua luma? Ítara gayarabei wíderaguni íchiga fe luagu adüga lan ligaburi lóuserun dañu lun ani magundan lan Heowá lau. Ani háfuga desidírü lan lasansirun [1] (ariha huméi abürüdǘni lidan lagumuha arütíkulu).

KIPU WAMÉI DAMURIGUAÜ HARUMAÑU, LIDAN ÚARANI LUMA LIDAN DARANGILAÜ

14. Ida liña gayara lan wídehan lun harumañu lan damuriguaü?

14 Ariñaga tumuti Lererun Bungiu ka lan lunbei wadügüni lun ua lan wuribani lidan damuriguaü. Samina wamá luagun le asuseredubei uburugu Korintu. Wéiriti meha hínsiñe íbirigu ha awinwandubaña ñein lun Pábulu. Ligía meha arufudahabalin inarüni le tídanbei Bíbülia houn saragu hádangiñe (1 Korintuna 1:1, 2). Samina wamá ida liña lan lasandiragun lungua dan le líchugun fe anihein lan aban wügüri adaaguti figóu lánina agamariduni ñein, ani madügünti damuriguaü ni kata. Aba lariñagun Pábulu houn wéiyaaña lidan afiñeni: “Derege huméi wügüri ligía lun Mafia”. Mosu meha hasagaruni o habuguni wügüri ligía lídangiñe damuriguaü (1 Korintuna 5:1, 5-7, 12). Uguñe weyu, gayarati habugun wéiyaaña lidan afiñeni aban gürigia anhein masakürihan luagu lifigoun. Ánhaña wóusera abugútiña kei tariñaguni Bíbülia, wídehaba lun harumañu lan damuriguaü (ariha huméi rekuáduru “ Ka mini lubéi?”). Ani háfuga giñe wíderaguniña lun hasakürihan ani lun háluahan ferudun luma Heowá.

15. Ida luba wakipuruni darangilaü luma úarani lidan damuriguaü?

15 Anihein meha ámuya turóbuli lidan damuriguaü le Korintubei. Añahein meha fiú anügütiña híbirigu kristiánu ligibugiñoun lúrudu. Aba lariñagun Pábulu houn: “Buítimati lun hawanduni marichaü le adügǘbei hun” (1 Korintuna 6:1-8). Uguñe weyu, adügaaña fiú íbirigu bísinisi hama amu íbirigu ani féridihaña seinsu o sanditiña eyeeda hamaaña lan híbirigu guánarügü. Ligía hanügünbaliña ligibugiñoun lúrudu. Anhein asusereda katei le, gayarabei hayanuhan gürigia wuriba luagu Heowá luma tuagu lóundarun. Gayarati giñe ladügün katei le lun ñein lan turóbuli lidan damuriguaü. Ariñagatu Lererun Bungiu mosu lan wakipuruni darangilaü hama wíbirigu, íbini anhein lunti lubéi weferidirun seinsu [2] (ariha huméi abürüdǘni lidan lagumuha arütíkulu). Arufuda lumuti Hesusu ida luba lan laransehóun turóbuli wéinamuti (aliiha huméi Matéu 5:23, 24 luma 18:15-17). Gaganbadi wamá lun ladundehan. Ítara luba wakipuruni darangilaü luma úarani lidan damuriguaü.

16. Ka uagu anihein lubéi úarani hadan lumutuniña Bungiu?

16 Ariñagatu Bíbülia: “Ariha humá ida liña lan lubuidun lun haganóun íbirigu lidan aban hámagua!” (Sálumu 133:1). Dan le meha gaganbadi habéi ísüraelina lun Heowá, anihein  meha aransehani buiti luma úarani hadan. Dan le layanuhan Bungiu hawagu lubúeingu, ariñagati: “Nóundarubaña kei mudún lidan fárüga” (Mikeasi 2:12). Ariñagati giñe Heowá heseriwiduba lan lubúeingu lun lidan úarani ladüga hafurendeirubei lan inarüni le tídanbei Bíbülia. Ariñagati: “Nadügüba lun máhuduragun hama lílana fulasu houn guáriuagu lun núnrügü lan háhuduragua” (Sofoníasi 3:9). Ma seremei wamuti Heowá lau gayara lan wáhuduragun lun lidan úarani?

Íderagua hamuti wéiyaaña lidan afiñeni gürigia le héiguamemeeli lidoun figóu. (Ariha huméi párafu 17).

17. Ka lunbei hadügüni wéiyaaña lidan afiñeni anhein adüga aban lílana damuriguaü aban figóu wéiriti?

17 Anhein adüga aban íbiri aban figóu wéiriti, lunti hererehan wéiyaaña lidan afiñeni lun lau lóufudagun ani lau ínsiñeni. Subudi hamuti busén lan Heowá lun hóunigiruni damuriguaü luéi luriban usa. Ítara luba gayara lan harumañu lan damuriguaü ani ñein ligíame úarani lidan (Ariñawagúni 15:3). Hínsiñetiña meha íbirigu korintuna lun Pábulu. Ligía meha lererehanbei houn dan le megei hamani. Ligía meha ladügübei tidan furumiñetu gárada to labürühaboun houn. Ani gaganbaditiña meha wéiyaaña lidan afiñeni ha Korintubaña lun ladundehan Pábulu. Ida liña wasubudiruni? Ladüga tidan tibiaman gárada to labürühaboun houn ariñagati houn buidu lan hadüga. Ligíati, ánhaña ariha wéiyaaña lidan afiñeni ábürühaali lan aban íbiri lidoun figóu, lunti híderaguni lau ínsiñeni (Galasiana 6:1).

18. a) Ka meha uagu buidu lubéi lun damuriguaü le lánina furumiñeti sígulu hafalaruni adundehani le tídanbei Lererun Bungiu? b) Kaba wariha lidan leweñegua arütíkulu?

18 Kei aba lubéi meha hafalaruni kristiánugu ha lánina furumiñeti sígulu tadundehan Lererun Bungiu, kipu hamuti damuriguaü harumañu, lidan úarani luma darangilaü (1 Korintuna 1:10; Éfesuna 4:11-13; 1 Féduru 3:8). Seremei hadügüni ítara, ligía gayara lubéi meha hapurichihani íbirigu uganu buiti “lidan sun ubóu” (Kolosana 1:23). Uguñe weyu, anihein giñe aransehani buiti hadan lubúeingu Bungiu ani lídanñadiwa aban, ani apurichiha wamuti uganu buiti lidan sun Ubóu. Lidan leweñegua arütíkulu warihuba saragu amu katei le arufudubalin wíchugun lan inebesei lun Wabungiute Heowá wabusenrubei luma lun gaganbadi wamá lun adundehani le tídanbei Bíbülia, to liliburun (Sálumu 71:15, 16).

^ [1] (párafu 13): Ariha humóun líburu Organizados para hacer la voluntad de Jehová, páhina 134 darí 136.

^ [2] (párafu 15): Ariha humóun líburu “Redei humá lidan línsiñehabu Bungiu”, páhina 223, furumiñeti abürüdǘni. Ñein hadariruba lanwoun ariñahani luagu burí katei le uágubei gayara lan desidírü lan aban kristiánu lanügün amu íbiri ligibugiñoun lúrudu.