Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Unsu-hati irumu 2016

Inarüni san hínsiñe tan liliburun Bungiu woun?

Inarüni san hínsiñe tan liliburun Bungiu woun?

“Dan meha le haganbunbalin luganute Bungiu le wapurichihabei hun, resibi humuti keisi luganute Bungiu” (1 TESALÓNIKANA 2:13).

UREMU 37, 51

1-3. a) Ka funa san tituróbulinbei tánibei Ewodía tuma Síntike? (Ariha huméi dibuhu le lídanbei lagumeseha arütíkulu). b) Ka gayarabei wadügüni lun mebelurun wamá lidoun turóbuli hama wíbirigu?

WÉIRITI tebegi Bíbülia woun wagía kristiánugu ladüga subudi wamani liliburun tan Bungiu. Íderagua lumutiwa adundehani le tídanbei lun mábürühan wamá lidoun turóbuli ani ererehatu woun dan le wachararun. Ida liña san wóunabun lun adundehani burí le? Samina wamá luagun le asuseredubei haganagua bián íbirigu anuadirúaaña gíritiña Ewodía tuma Síntike lidan furumiñeti sígulu. Ariñagatu Bíbülia anihein lan meha aban turóbuli haganagua, íbini mariñagun tani ka lan uagu. Samina wamá anihán lan asuseredubei.

2 Háfuga aba lan tamisurahan Ewodía fiú íbirigu eiga tuma túbiñe, ani mamisurahan tumutu Síntike. Lárigiñe, dan le taganbunbaliña Síntike íbirigu ayanuha luagu lubuidun hásügürüni, aba tagañidun. Aba funa tasaminarun: “Mafiñegidina mamisurahan tánina Ewodía túbiñoun. Nariñaga yebe buidu lan wamadagua!”. Háfuga aba lan tasaminarun Síntike anihein lan somu  katei tidan tanigi Ewodía tubá ani mabusenrun tan tamisurahanu. Ligía aba lubéi tamisurahaniña sun íbirigu hagía túbiñoun ani mamisurahan tumutu Ewodía. Háfuga mínsiñe lan meha katei ligía houn amu íbirigu lidan damuriguaü. Ariñagatu Bíbülia erereha lan Pábulu houn bián íbirigu ha ani ariñaga lan houn lun haransehani turóbuli ligía. Chóuruti sigí hamani ladundehan ani aba hasigirun eseriwida lun Heowá lau ugundani (Filipuna 4:2, 3).

3 Uguñe weyu, gayarati giñe gaturobulin wamá luma somu íbiri lidan damuriguaü. Gama lumoun, gayarati waransehani o wídehan lun masuseredun lan turóbuli lidan damuriguaü. Ida luba wadügüni? Lau gaganbadi wamá lun adundehani le tídanbei Bíbülia. Dan le gaganbadi wamá lun adundehani burí le, arufuda wamuti hínsiñe tan Bíbülia to liliburun Bungiu woun (Sálumu 27:11).

ARUFUDAHATU BÍBÜLIA WOUN LUN WÁRÜGÜDAGUN WOUNGUA

4, 5. Ka adundehani tíchugubei Lererun Bungiu woun lun wárügüdagun woungua?

4 Anihein dan hénrengu lan woun wárügüdagun woungua. Kei hénpulu, háfuga hiru wamá o aba lan wagañidun dan le hariñagun o hadügün amu somu katei le mínsiñeti woun o ladüga hóuseruniwa wuriba luagu warasan o luagu amu lan waríaagun hawéi. Gáritimati katei le woun dan le aban lan lílana damuriguaü óuserubadiwa wuriba. Ka adundehani tídangiñeti Lererun Bungiu gayarabei líderaguniwa ararama lun turóbuli burí le?

5 Subudi lumuti Heowá ka lan gayarabei lasuseredun ánhawa márügüdagun woungua. Dan le gáñiñadiwa lan o anihein lan katei le mínsiñeti woun, gayarati wariñagun o wadügün somu katei ani ábame wasakürihan lárigiñe. Ariñagati Heowá woun tidan Bíbülia lun lan wárügüdagun woungua. Ariñagati: “Mígiraguagüdaba bungua lun igañi”. Samina wamá luagun sun turóbuli le uéibei wadireira dan le wafalaruni adundehani le, magañidun wagía lau lóufudagun (aliiha huméi Apurichihati 7:9 luma Ariñawagúni 16:32). Ariñagatu giñe Bíbülia woun lunti lan feruduna wamaniña amu. Le linarün katei, ariñagati Hesusu anhein lan madügün wamá, úabei lan feruduna lániwa Heowá (Matéu 6:14, 15). Mégeitiwa san lúntima gaguraasun wamá ani aranse wagíame lun feruduna wamá?

6. Ka gayarabei lasuseredun ánhawa márügüdagun woungua?

6 Ánhawa márügüdagun woungua, gayarabei werederun gáñiñu súnwandan o íbini lun liyereegudun somu gürigia woun. Gayarabei íbini wadügün lun hasandiragun amu íbirigu lidan damuriguaü houngua kei wagía. Háfuga gayarabei waramuduni igañi o iyereehabúni le wawagubei. Gama lumoun, lachülürüba oura lun harihini amu ani ábame hadisedun wawéi (Ariñawagúni 26:24-26). Anhein asusereda aban katei ítarati woun, hóuchuña hamuga wéiyaaña lidan afiñeni híderaguniwa tau Bíbülia lun wagidaruni katei ligía tídangiñe wanigi ani lun feruduna wamaniña amu (Fádirigu 19:17, 18; Rómana 3:11-18). Lun hamuga lasuseredun aban katei ítarati woun, gaganbadibadiwa hamuga san lun adundehani le tídanbei Bíbülia?

ADUNDEHA LUMUTIÑA HEOWÁ LUMUTUNIÑA

7, 8. a) Ida liña ladundehaniña Heowá lumutuniña? b) Ka adundehani tíchugubei Bíbülia woun, ani ka uagu mosu lubéi gaganbadi wamá lun?

7 Uguñe weyu, adundeha lumutiña Heowá gürigia ha tídanbaña lóundarun ani arufudaha ligía houn. Ida liña ladügüni? Írida laali  Kristu ‘lichügüdiname damuriguaü’ (Éfesuna 5:23). Ani írida laali Kristu “musu úaraguati” lun larufudahan houn lumutuniña Bungiu ani adundeha láñame (Matéu 24:45-47). Kei Lererun lubéi Bungiu Bíbülia, wéiriti tebegi lun musu úaraguati. Ligiaméme meha ladügübei sétanu le arihibei lau damuriguaü kristiánu lidan furumiñeti sígulu (aliiha huméi 1 Tesalónikana 2:13). Ka adundehani tíchugubei Bíbülia woun?

8 Ariñagatu Bíbülia woun lun wadamuridagun súnwandan (Ebüréu 10:24, 25). Ínchaha tumutiwa lun ábanmeme lan wafiñen (1 Korintuna 1:10). Ariñagatu giñe woun lun ‘wáluahani Larúeihan Bungiu furumiñe’ (Matéu 6:33). Ariñagatu giñe woun lun wapurichihan muna tuagun muna, lidan burí guririguaü luma lidan sun fulasu le ñein hamuti gürigia (Matéu 28:19, 20; Adügaü 5:42; 17:17; 20:20). Rutu adundehani houn wéiyaaña lidan afiñeni lun hakipuruni damuriguaü harumañu (1 Korintuna 5:1-5, 13; 1 Timotéu 5:19-21). Ariñagatu giñe woun lun haruma wamá ani lun wadisedun luéi saminaü luma échuni le mínsiñeti lun Heowá (2 Korintuna 7:1).

9. Ka layusurubei Hesusu lun líderaguniwa gunfurandoun Lererun Bungiu?

9 Háfuga añahein gürigia saminatiña memegeirun hamá lafuranguagüdüniwa le tarufudahabei Bíbülia houn. Gama lumoun, lúmagiñe irumu 1919, layusuruñein Hesusu “musu úaraguati” lun líderaguniña lumutuniña Bungiu gunfurandoun Lererun Bungiu ani lun gaganbadi hamá lun le tariñagubei. Dan le gaganbadi wamá lun adundehani le tídanbei Bíbülia, kipu wamuti damuriguaü harumañu, lidan úarani luma lidan darangilaü. Álügüdagua wamá woungua: “Úaraguabadina san lun Hesusu lau nafalaruni ladundehan musu úaraguati?”.

TÉIBAAGUÑA LIKARÜN HEOWÁ LAU LÓUFUDAGUN

10. Ida liña larufudún fánreinti tani lóundarun Heowá le siélubei tidan liliburun Esekiéli?

10 Arufudahatu Bíbülia anihein lan giñe aransehani buiti hadan lumutuniña Heowá sielu. Arihati Esekiéli aban arufudúni le ídanbei larihei Heowá tigibuagu aban karü to hanarimeti loufun téibaagun lidoun furumiñeguarügü oubaü le ñeinhin lumuti labusenra Heowá (Esekiéli 1:4-28). Karü tuguya aban sínbolu lani fánreinti tani lóundarun Heowá le siélubei. Súnwandan aranseñu liña lan fánreinti tánina lóundarun Heowá le lun lafalaruni ladundehan. Ani ligía giñe adundehabalin fánreinti le yaabei ubouagu. Samina wamá luagun sun asansiruni le adügǘwaalibei tidan lóundarun Heowá lidan lagumuhóun 10 irumu. Málühali Kristu le Liráü Bungiu agumucha lau ubóu wuribati le. Ítarati inebebei Heowá houn sun gürigia, inebehabubaña giñe lun liri luma lun liricha lun larúeihan.

Wéiriti weteingiradi hawagu íbirigu ha áfaagubaña saragu lidan wadagimanu lánina ábunaguni (Ariha huméi párafu 11).

11, 12. Ka ibiha táalibei lóundarun Heowá lidan lagumuhóun dan le?

11 Samina wamá luagun sun le ibiha táalibei lóundarun Heowá lidan lagumuhóun dan le. Furumiñe, lidan ábunaguni. Nadagimeinhaaña saragu íbirigu lidan tábunawagun iseri sukursáli hani gefentiña luagu Heowá, Warwick (Nueva York, Meriga). Añahein saragu amu nadagimein lidan tábunawagun Luban Adamuridaguni tuma burí sukursáli lidan sun ubóu. Departamentu le Arihibei lau Taransehóun luma Tábunawagun Luban Adamuridaguni lidan sun Ubóu ligía íchugubei adundehani houn íbirigu ha. Ma seremei waña houn sun íbirigu ha luagu áfaaguni le hadügübei? Gayara lubéi ladügǘn sun burí ábunaguni le seremei  budagia le híchugubei lubúeingu Heowá ha lídanbaña sun ubóu lau saragu áfaaguni. Biní lumutiña Heowá lumutuniña luagu hídehan lau ǘnabuguni luma úaraguni (Lúkasi 21:1-4).

12 Libiaman, ariha waméi le asuseredubei lidan luáguti arufudahani. Hínsiñeti lun Heowá larufudahan houn lumutuniña (Isaíasi 2:2, 3). Samina wamá tuagun burí leskuela to layusuruboun lun larufudahan woun. Kéiburi Leskuela houn Prekursorugu, Leskuela houn Apurichihatiña Larúeihan Bungiu, Leskuela houn ha Agumeserubaña Eseriwida Betelirugu, Leskuela Galaadü, Leskuela houn Óunigirutiña Sirkuitu tuma hani Weiriou, Leskuela houn Wéiyaaña lidan Afiñeni, Leskuela houn Wéiyaaña hama Ídehatiña, Leskuela houn Íbirigu ha Arihibaña tau Beteli tuma hani Weiriou. Anihein giñe wani páhina lidan Internet jw.org, le ñein lubéi gayara lan wadarirunu Bíbülia tuma amu burí agumeiraguagüdüni lidan saragu san iñeñein. Lidan páhina ligía anihein fánreinti espechaliti houn irahüñü, houn iduheñu luma aban fánreinti lau ñunsu. Wayusuruñein san wani páhina lánina Internet jw.org lidan apurichihani luma lidan áhuduraguni keisi iduheñu?

 ÚARAGUA WAMÁ LUN HEOWÁ ANI ÍDEHA WAMÁ TUMA LÓUNDARUN

13. Ka wánibei buligasion keisi lubúeingu Heowá?

13 Aban lubuidun chansi tidan wamá lóundarun Heowá ani lun wasubudiruni ka lan labusenrubei wámagiñe. Kei subudi wabalin le hínsiñebei lun, wani buligasion lun gaganbadi wamá lun ani adüga wameime le buídubei. Hínsiñeti houn besafu gürigia hadügün katei wuribati. Ánheinti wagía mosu liyereegudun le wuribabei woun, ítara kei liyereegun lun Heowá (Sálumu 97:10). Moun lumuti ítara wamá kei ha “agúarubei lun le buídubei wuribati, hagúara lun le wuribabei buiti” (Isaíasi 5:20). Busentiwa wadügüni lugundan Heowá. Ligía desidírühadiwa lubéi lun haruma wamá dandu luagu wágubu, lidan wabagari luma lidan weseriwidun lun Heowá (1 Korintuna 6:9-11). Subudi wamuti sun lan le lariñagubei Heowá woun tidan Bíbülia lunti lan wabuidun guánarügü. Ani hínsiñeti giñe Heowá woun ani busentiwa lun úaragua wamá lun. Ligía gaganbadi wabéi lun lilurudun wábiñe, lidan damuriguaü, lidan wawadigimari, leskuelarugu luma lidan furumiñeguarügü fulasu (Ariñawagúni 15:3). Ariha wamá fiú katei le ídanbei lunti lan úaragua wamá lun Heowá.

Dandu úguchili kei úguchuru ha hínsiñeti Heowá houn busentiña lun buidu lan hamadagua hasaanigu luma

14. Ida luba harufuduni agübürigu úaragua hamá lun Heowá?

14 Dan le larufudahóun houn isaanigu. Ariñaga lumuti Heowá houn agübürigu tidan Bíbülia ida luba lan harufudahan houn hasaanigu. Arufuda hamuti agübürigu kristiánu úaragua hamá lun Heowá lau gaganbadi hamá lun. Mosu góunigi hamá luéi hasaminarun kei ubouaguna (Éfesuna 2:2). Anihein ageiraü le ñein lubéi lasaminara úguchili würiña lan lúnbaña harufudahan houn hasaanigu. Gama lumoun, ariñagatu Bíbülia furangu úguchili lan lunbei larufudahan houn lisaanigu luagu Heowá (Éfesuna 6:4). Dandu úguchili kei úguchuru ha hínsiñehabutiña lun Heowá busentiña lun buidu lan hamadagua hasaanigu luma Heowá, ítara kei meha gamadagua lan Samueli luma Heowá lúmagiñe liñüraü (1 Samueli 3:19).

15. Ida liña warufuduni lun Heowá úaragua wamá dan le desidírü wamá luagu katei súdiniti?

15 Dan le desidírü hamá. Lubaragiñe desidírü wamá luagu katei súdiniti, mosu wakutihani ka lan lisaminanbei Heowá. Ida? Lau wáluahani adundehani le líchugubei tidan Lererun luma túmagiñe lóundarun. Ítara luba warufuduni lun Heowá úaragua wamá lun. Kei hénpulu, añahein gürigia ha nadagimeinbaña lidan amu ageiraü ani aba gasaanigu hamá ñein óunaha hamutiña hageiroun dan le figigiña lun hagüriahaniña haduheñu. Lun gayara lan hasigirun hagübürigu nadagimein lidan amu ageiraü. Kada gürigia lun desidírü lani kaba lan ladüga lidan katei le. Gama lumoun, mosu hálügüdagun agübürigu houngua ka lan lisaminanbei Heowá (aliiha huméi Rómana 14:12). Haritagua waméi lubaragiñe lan desidírü wamá katei súdiniti hawagu waduheñu luma luagu wadagimanu mosu lan wasaminarun luagun le tariñagubei Bíbülia. Mégeitiwa líderaguniwa Wáguchi le siélubei lun wadundehani wémeri (Heremíasi 10:23).

16. Ka meha lubéi desidírü tani aban úguchuru dan le nasirua lubéi tiráü? Ka íderagubarun lun desidírü tan buidu?

 16 Ñǘdüntiña aban feru maríeitiña awinwanda lidan amu ageiraü ani aba gasaani hamá aban irahü ñein. Lárigiñe aba haransehan lun hóunahani awinwanda hama lárugutinu hageira. Gama lumoun, lidan dan ligía, aba tagumeserun würi tuguya aturiahoun Bíbülia tuma aban gefentu luagu Heowá. Aba tafurendeirun tani lan buligasion tarufudahan lun tisaani luagu Heowá (Sálumu 127:3; Ariñawagúni 22:6). Mosu meha desidírü tan anhein tóunahanbei lubéi tisaani hamoun lárugutinu o móunahan tubéi lan. Kei tariñaguni Bíbülia, aba tayumuragun nibureintu tuguya lun Heowá lun líderagunu desidírü buidu (Sálumu 62:7, 8). Ayanuhatu giñe tuma íbiri to íchuguboun aturiahani tun luma hama amu íbirigu lidan damuriguaü luagu tituróbulin. Añaha meha tiduheñu hama tumadagu afuuda tun lun tóunahani irahü ligía hamoun lárugutinu. Gama lumoun, gunfuranda tumuti meha mabuidun lan katei le. Aba larihini tani weiriei weiri lan híderagunu íbirigu ha lídanbaña damuriguaü lani weiriou luma liráü. Aba taweiridun lanigi darí lun aba lan lagumeserun aturiahoun Bíbülia ani ñüdün ligía adamuridagua tuma lani weiriou lau liráü. Samina humá luagun ugundani le tasandirubei úguchuru tuguya dan le tarihini lóunabuni Heowá tafurieidun.

17. Ka adundehani lunbei wafalaruni dan le wíchugun aturiahani tídangiñeti Bíbülia?

17 Dan le wibihin adundehani. Aban lídangiñe katei le gayarabei wadügüni lun warufuduni lun Heowá úaragua wamá lun, gaganbadi wamá lun adundehani le weresibirubei túmagiñe óundaruni. Kei hénpulu, samina wamá luagun le lunbei wadügüni murusun dan lárigiñe wagumeserun aturiahoun Bíbülia luma somu gürigia tau líburu Kátima san. Ariñawagúaali woun mosu lan wígirun fiú minutu lárigiñe kada aturiahani lun wíderaguni gürigia le úmabei waturiaha lun lasubudirunu lóundarun Heowá buidu. Gayarati wíderaguni lau bidéu Ka adügǘbei lidan wadamuridagun? luma tau garüdia Kátaña san adügübalin lugundan Heowá uguñe weyu?. Ariñawagúaali woun danme lan le wagumuchunu líburu Kátima san lun lan waturiahanu líburu “Redei humá lidan línsiñehabu Bungiu”, íbini anhein badiseihaña lubéi. Ítara luba wíderaguniña lun ‘deregüdagu lan hafiñen’ (Kolosana 2:7). Falá wamuti san adundehani le tíchugubei lóundarun Heowá woun?

18, 19. Ka uagu lunti lubéi wíchugun seremei lun Heowá?

18 Anihein saragu katei le uágubei mosu lan weteingiruni Heowá. Furumiñe “ladüga lídangiñeti Bungiu awanhein lubéi, gabagari wagía, éibuga wagía ligibuagu ubóu le” (Adügaü 17:27, 28). Libiaman, ladüga rúlaaru Bíbülia to liliburun woun. Kei kristiánugu tesalónikana, wéiriti giñe lebegi idewesei le woun ladüga “luganute [lan] Bungiu” (1 Tesalónikana 2:13).

19 Lǘrüwan, mosu weteingiruni Heowá luagu larufuduni woun tidan Bíbülia ida luba lan gamadagua wamá luma (Santiagu 4:8). Ligadürün, mosu weteingiruni luagu líchugun chansi woun lun tidan wamá lóundarun. Sandiguatiwa woungua kei abürühati Sálumu 136, le ariñagubei: “Ru humá seremei lun Aburemei ladüga buiti, magumuchaditi línsiñehabu” (Sálumu 136:1). Lidan kada bérusu lidan sálumu le anihein dimurei “magumuchaditi línsiñehabu”. Ánhawa úaragua lun Heowá ani sigí wameime adundehani le líchugubei woun túmagiñe lóundarun, wagundaaruba lau línsiñehabu lun súnwandan.