Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 1 2017

Gúndaagüda lumutiwa gíchigadi

Gúndaagüda lumutiwa gíchigadi

“GAYARATI tidin busu, anhein cheiní le leredera!”. Anihán dimurei le taganbubei Alexandra chülǘ lidoun tala lidan anuhán lan agurabaha lun tánhiñuraguni láfadaragun bián ageiraü Sudamérica. Dan le tararirunbei ariha ka lan asuseredubei, aba tarihin aban nibureinti cheiní áfaagua lun lafunranguagüni lituróbulin lidan murusun chumagü le lasubudirubei lun aban úfisi le lídanbei láfadaragun ageiraü. Keiti lídanñoun lubéi aban damuriguaü hani gefentiña luagu Heowá lidan iñeñein cheiní, aba teseriwidun lun tásügüragüdüni le lariñagubei cheiní ligía.

Aba lariñagun wügüri ligía gagaradan lan lidan ageiraü ligía, gama lumoun íweruhoua lan sun ligaradan lau sun liseinsun. Mafiñenti yebe úfisi lun furumiñe darí lun lasaminarun tebelaagüdüña lan Alexandra gürigia lidoun ageiraü lanagangiñe bena. Lagumuhóun, aba lafiñerun lun le lariñagubei fugiabu pasaheru ligía, ani mosu meha lafayeihan wügüri ligía ladüga úa tan gárada to mégeiwaboun luma. Aba tafurederun Alexandra 20 dolar lun. Mararamagunti líchugun wügüri ligía seremei tun ani aba füramase lan tun lagiribudagüdübei lan seinsu tun ani líchuguba lan lanwoun. Aba tafuranguagüdüni Alexandra lun magurabun tan líchugun lanwoun seinsu, gunda tan tíderaguni lugundun ligía lan le buídubei. Rutu giñe fiú agumeiraguagüdüni tídangiñetu Bíbülia lun ani aba tínchahani lun laturiahanu Bíbülia hama Gefentiña.

Súnwandan hingí lanu wanigi waganbun sügǘ hawagu gürigia ha íderagubaña amu gürigia ha ibidiñetiña houn. Chóuruti dandu lan gürigia ha ariñagubaña gani hamá relihión hama ha mánibaña adügatiña katei libe le tadügübei Alexandra. Gama lumoun, híderaguña hamuga san aban gürigia le ibidiñeti hun? Súdiniti álügüdahani le, ladüga ariñagati Hesusu: “Fuleseiwatimati le íchugubei sügǘ lau le eresibirubei” (Adügaü 20:35). Súdiniti giñe katei le houn aturiahatiña siensia ladüga subudi hamaali adüga lan gíchigadi buiti woun. Ariha waméi ida liña lan.

“LE ÍCHUGUBEI LAU UGUNDANI”

Arufudati burí sügǘ le úara lan gíchigadi luma ugundani. Abürühati apostolu Pábulu: “hínsiñehabuti Bungiu lun le íchugubei lau ugundani”. Layanuhaña hawagu kristiánugu ha íchugubaña budagia lun híderaguniña hánigu paaná lidan afiñeni ha ásügürübaña lénrengunga (2 Korintuna 8:4; 9:7). Mariñagunti Pábulu ladüga lan gunda hamá gíchigadi habéi; ariñagati gunda hamá ladüga híchigadi.

Según aturiahani le adügǘwaalibei, adügati gíchigadi lun “lawadigimaridun aban fánreinti lidan wachügü le adügübei lun wagundaarun, lun buidu lan wanaagun woungua hama amu luma lun wafiñerun wawougua ani ligía anügübei ugundani  woun”. Ariñagati giñe amu aturiahani “ha lan íchugubaña seinsu houn somu gürigia gunda hamá sügǘ hau ha agastarubalin haseinsun hawouguoun”.

Saminañahadün san mígirun lan gádantün lun hadügün saragu katei kei le aubei habusenra? Le linarün katei gayarati wasandiruni súngubei wagía le lasansirubei “le íchugubei lau ugundani”. Dan le wedewehan lau sun wagundan mama mosu ábanbei lan katei wéiriti. Óunahatu aban gefentu luagu Heowá budagia houn ha adügübarun garüdia to lau dimurei le: “Lidan sun irumu le sügühalibei murusunrügügili seinsu níchugun tidan Luban Wadamuridagun”. Ani ariñagatu giñe: “Rúhali Heowá saragu nun sügǘ lau le níchugubei. [...] Seremei luagu hánharun lun le níchugubei, adügati lira lun buidu lan nasandiragun nungua”.

Inarüni, mámarügüñein seinsu gayara lan wíchugun; anihein amu burí igaburi lun warufuduni gíchigadi wamá.

BUITI LUN ÁTUADI GÍCHIGADI WAMÁ

Adügati gíchigadi buiti lun le gíchigadibei luma lun le eresibirubei.

Ariñagatu Bíbülia anhein buidu lubéi aban gürigia, buídubei lidin lun, gama lumoun anhein wuriba lubéi wuribabei lidin lun (Ariñawagúni 11:17). Gürigia ha buídubaña gíchigaditiña ani aransetiña lun híchugun lídangiñe hadaani, here, luma amu burí katei. Barüti ligaburi hanügüni habagari saragu katei buiti houn ani le súdinitimabei ídehati lun buidu lan hátuadi.

Arufudati fiú aturiahani ha lan íderagutiña amu lougua lan hasandi. Gíbetimati dan buidu lan hátuadi. Inarüni katei le íbini hadan ha hanarimeti hasandi kéiburi ha gawagubaña esclerosis múltiple o VIH. Arufudúwaali giñe dan le lan líderagun gürigia le áfaagubei lun lígiruni átaguni amu gürigia, hénrengutimati lun ladagarun lanarime íruni luagu o léiguadunya lidoun átaguni.

Ka uagu lasusereda le? Afiñewati “mígirun lan gudemehabu, areini luma gíchigadi lun ñein lan luriban saminaü wáchuguwagu”. Adügati gíchigadi lun madaga lan lanarime íruni luagu gürigia ni lun ladagarun liñun hitaü. Ani ha hilaañabaña hani weiriou o weiriei furesetimati lagidarun íruni hawéi dan le híderagun amu.

Chóuruti anhein lan gíchigadi gürigia ídehati lun buidu lan lasandiragun lungua.

ANHAWA GÍCHIGADI GÍCHIGADIBAÑA GIÑE AMU

Ariñagati Hesusu houn lani disipulu: “Ru humá, rúa láamuga giñe hun. Líchuguba Bungiu saragu hun; ladügüba hun kéigubeirügü hadüga houn amu” (Lúkasi 6:38). Dan le gíchigadi wamá, chóuruti heteigirubadiwa lan gürigia ani hadügübei giñe ligiaméme. Le linarün katei, adügati igaburi le lun gídehadi hamá gürigia luma lun gamadagu hamá.

Adügati gíchigadi lun gídehadi hamá gürigia ani lun gamadou hamá.

Arufudati fiú aturiahani luáguti hanaagun gürigia houngua hama amu “ha lan gíchigadibaña ínchaha hamutiña amu adügei ligiaméme”. Le linarün katei, “láurügü waliihan luagu gíchigadi adügati lun gíchigaditima wamá”. Según aban aturiahani “kada aban wádangiñe gayarati wínchahan saragu gürigia lun hadügüni le buídubei, meberesenga anhein subudi wabaliña o ibidiñe hamá woun”. Lidan amu dimurei, láurügü gíchigadi humá gayarati gíchigadi hamá gürigia ha lídanbaña fulasu le ñein lubéi hawinwanda. Ma  hínsiñeti hamuga hun lun hawinwandun lidan aban fulasu ítarati? Furanguti lun hamuga gíchigadi hamá sun gürigia lahuuduña hamuga woun súngubei.

Arufuda lumuti aban katei le asuseredubei Florida (Mériga) buidu lan gíchigadi. Lárigiñe aban lanarime durumandei, aba hachülaagun fiú gefentiña luagu Heowá lun híderaguniña gürigia ha asufurirubaña. Dan le añaha lan agurabahei umegegu lun haransehan aban muna, aba híchugun íbirigu fe gádeiha lan lubarieirun aban besinu ani aban hariñagun haransehaali lan. Murusun dan lárigiñe, aba lóunahan gürigia ligía aban gárada tidoun áfisi to arihiboun luagu hawadigimari gefentiña luagu Heowá lidan sun ubóu. Abürühati: “Súnwandan seremei nubadün lan. Huguya gürigia ha buídutimabaña hádangiñe sun ha nasubudirubaña”. Le leteingiradi aba lóunahan budagia le gágürügüti le unbei lagúara “lubuidun wadagimanu le hadügübei Gefentiña”.

AYEIHA WAMÉI HÉNPULU LÁNINA GÍCHIGADI LE BUÍDUTIMABEI

Según aban aturiahani le hadügübei sásaamu, “genegeti anihein lan lidan gürigia busén lan líderagun amu”. Ariñagati giñe íbini lan irahüñü “gagaburi hamuti igaburi le lubaragiñe hafurendeirun ayanuha”. Ariñagatu Bíbülia susere lan lira ladüga “lenege guánarügü” lan Bungiu ladügawa, mini lan le gagaburi wamani ligaburi Bungiu (Agumesehani 1:27).

Gíchigadi ligía aban lídangiñe lubuidun ligaburi Heowá, Bungiu le adügübaliwa. Ru lumuti ibagari woun luma sun le wemegeirubei lun gunda wamá (Adügaü 14:17; 17:26-28). Íderagua tumutiwa Bíbülia lun buídutima lan wasubudiruni Wáguchi le siélubei luma lun wasubudiruni lubuidun lisuuni houn sun gürigia. Ani ariñagatu giñe ru laali lan le megei wabéi lun gayara lan wagundaarun ámuñegü * (1 Huan 4:9, 10). Kei lúmagiñe lubéi Bungiu liabin gíchigadi ani lenege guánarügü ladügawa, ligíati buidu lubéi lidin woun dan le gíchigadi wamá ani ídehati lira lun lagundaarun wau (Ebüréu 13:16).

Ida liña lidin tun Alexandra to uáguboun wayanuha lidan lagumeseha arütíkulu le? Aba lariñagun aban hádangiñe pasaheru tun mibihin taali lan tiseinsun. Gama lumoun aba lagúarun wügüri le tíderagubei Alexandra houn fiú lumadagu ha awinwandubaña lidan aban uburugu le ñeinba lubéi tararamagua busu, ani ítara liña lagiribudagüdüni 20 dolar tun. Ani sigí lumuti le tariñagubei Alexandra lun ani aba lagumeserun aturiahoun Bíbülia. Ǘrüwa hati lárigiñe, aba tagundaarun saragu ladüga tarihini, ani guentó lidan aban adamurini lidan cheiní le hadügübei gefentiña luagu Heowá Peru. Le leteingiradi wügüri ligía lun sun le tadügübei luagu, aba lamisurahanu Alexandra hama gürigia ha úarabaña tuma eiga tidan lani éigagülei.

Furanguti adüga lan gíchigadi luma híderawagun amu lun wagundaarun. Ani laganagua lira lun hasubudiruni Heowá Bungiu, Bungiu le gíchigadibei (Santiagu 1:17). Agia huguya? Hasagaruña san buiti lídangiñe gíchigadi humá?

^ par. 21 Anhein busén hubéi lanwoun ariñahani, ariha huméi le tariñagubei líburu Kátima san tarufudahabei Bíbülia?, hadügün gefentiña luagu Heowá ani anuhein giñe lidan Internet lidan jw.org/cab. Belú humá lidoun AGUMEIRAGUAGÜDÜNI > AGUMEIRAGUAGÜDÜNI TO GAYARATI HARARIRAGÜDÜNU.