Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 1 2017

Ñǘdünti Hesusu bisidoun límedi Féduru ani aba lareidaguagüdünu (Matéu 8:14, 15; Márükosu 1:29-31).

Mosu san herederun minisi kristiánugu mamarieidunga?

Mosu san herederun minisi kristiánugu mamarieidunga?

LIDAN sun ubóu anihein burí relihión le ñein lubéi lamuriahoua hama alidihatiña lun mamarieidun hamá, kéiburi tidan ligilisi Katólika Romana, ligilisi ortodoxas, budismo, tuma burí amu. Luagu amu oubaü, afiñetiña saragu gürigia úara lan igaburi le luma ñunsu le aganbahóuabei luáguti agamariduni le hadügübei ámuñegueinarügü minisi lani relihión uguñe weyu.

Ligía buidu lubéi wálügüdagun woungua anhein inarüni lubéi tídangiñeti lan Bíbülia arufudahani luáguti moun lumuti lan hamarieidun minisi kristiánugu. Lun gayara lan wadariruni óunabagülei, akutiha waméi halíagiñe lan liabin arufudahani le, ida liña lan lawanserun ani ka lan lisaminanbei Bungiu luagu.

LAGUMESERUN MAMARIEIDUNI HADAN ALIDIHATIÑA RELIHIÓN

Lidan irumu 2006, lidan aban adamurini hama tábutigu ligilisi Roma, adimurehati papa Benedicto XVI luagu moun lumuti lan hamarieidun minisi kristiánugu ani ariñagati “lídangiñeti lan aban échuni le agumeserubei yarafa lun hadaani apostolugu”.

Gama lumoun, mama meha aban échuni hadan furumiñetiña kristiánugu mamarieiduni. Wéridi lumutiña meha apostolu Pábulu, le awinwandubei lidan furumiñeti sígulu, afiñetiña luagu añaheinbaña lan wügüriña “ha eyeehatiña” lun heferidiraguagüdüniña gürigia. Ariñagati hawagu: “Ariñagatiña luagu mabuidun lan lun hagamaridun gürigia” (1 Timotéu 4:1-3).

Lidan meha libiaman sígulu lagumesera igaburi le tidan burí ligilisi “Kristiánu” to asubudiruaboun dan lárigiñe kei Ligilisi Katólika Romana. Afuranguagüdatu líburu Celibacy and Religious Traditions “úarati lan lúrudu le luma saragu lúrudu luáguti lamahadun lun hagamaridun gürigia le agumeserubei lábugiñe lagumadihan Roma”.

Lidan meha sígulu le asigirubei, lidan adamurini le hadügübei fádirigu hama tábutigu ligilisi ídehatiña lun lasigirun lúrudu lun mamarieidun hamá fádirigu. Afiñetiña meha luagu gadei lániña agamariduni  gürigia ani mabuidun lan lun heseriwidun lun Bungiu. Íbini ítara ariñagatu Encyclopædia Britannica, “lidan lan sígulu diisi añaheingua lan meha saragu fádirigu maríeitiña íbini ha íñutimabaña ubaraü”.

Lidan aban adamurini le gíribei Concilios de Letrán le adügǘbei lidan irumu 1123 luma 1139 Roma, ñein híchigei lúrudu dǘgüdati le lun mamarieidun hamá fádirigu, ani aniheingua lúrudu le darí guentó ani ligía tilurudunbei ligilisi Katólika. Adügati lúrudu le lun meferidirun tani ligilisi tubafu luma tiseinsun, lun hamuga ua lan lúrudu le teferidiruñei hamuga tirisin, ladüga ígira hamani meha fádirigu ha maríeitiña tirisin ligilisi halaganteme hasaanigu.

LE LASAMINARUBEI BUNGIU

Dariwati le lasaminarubei Bungiu luagu mamarieiduni furangu tidan Bíbülia to Lererun. Tidan Bíbülia aliiha wamuti le lariñagubei Hesusu hawagu ha mamarieidunbaña kei ligía lun “heseriwidun lun Bungiu” (Matéu 19:12). Ariñagati giñe apostolu Pábulu hawagu kristiánugu ha áyeihabalin le ladügübei, anúadira hamuti lan mamarieiduni lun gayarabei lan hanügüni “uganu le lánina asalbaruni” (1 Korintuna 7:8; 9:23).

Mariñagunti Hesusu ni Pábulu mosu lan herederun minisi kristiánugu mamarieidunga. Afuranguagüda lumuti Hesusu másutiña lan ha asigirubalin lun “habagaridun mámariga”. Dan le labürühanbei Pábulu hawagu ha mamarieidungiñabaña, ariñagati: “Hawagu gürigia ha mámarigiñabaña, úati ni aban gumadi numa le hamuga lúmagiñeti Wabureme; nariñagaali le naritagun” (Matéu 19:11; 1 Korintuna 7:25).

Gama lumoun, arufuda tumuti Bíbülia maríei hamá meha saragu hádangiñe furumiñetiña minisi kristiánugu, apostolu Féduru haganagua (Matéu 8:14; Márükosu 1:29-31; 1 Korintuna 9:5). Lidan furumiñeti sígulu kamaniti meha magíaguni lidan sun fulasu le lábugiñebei hagumadihan rómana, ligía aba lubéi labürühan Pábulu, anhein maríei lubéi aban alidihati kristiánu lunti “túmari lan ábanrügü würi” luma “lun gaganbadi hamá lirahüñü” (1 Timotéu 3:2, 4).

Mama hayanuhaña hawagu maríeitiña ha marounruntiña hámagua, lugundun ariñagatu Bíbülia furangu: “Lunti lagunfulirun wügüri tuma lúmari keisi úmari”. Ariñagatu giñe luagu agamariduni lidan maríei: “Mamahada humá húniwagua” (1 Korintuna 7:3-5). Furanguti mamuriahan lan Bungiu hama lubúeingu lun mamarieidun hamá ani mafosurun lumutiña minisi kristiánugu lun mamarieidun hamá.

LUAGU “UGANU LE LÁNINA ASALBARUNI”

Ánheinti mama lubéi mosu herederun minisi kristiánugu mamarieidunga, kati uagu lariñaga Hesusu luma Pábulu buidu lan mamarieidun hamá gürigia? Lugundun adügati mamarieiduni lun gachansin hamá gürigia lun hapurichihani uganu buiti. Gayarati hadügün ha mamarieidungiña saragu lidan heseriwidun lun Bungiu ladüga madiheri hamá saragu kei ha maríeibaña (1 Korintuna 7:32-35).

Ariha waméi le ladügübei Dawidi, le ígirubei aban wadagimanu le fáyeiti Uburugu Méhiku lun láguyun lidoun aban aüdü Kosu Rísiti lun larufudahan tuagu Bíbülia. Ariha lumuti san mamarieiduni kei aban chansi buiti? “Anha liña Dawidi. Hénrenguti meha nun néchudun luagu iseri échuni luma luagu amu ligaburi awinwanduni, kei le nabuguárügügidina lubéi ménrengunti nun néchudun”.

Lidan aban oubaü, aba meha giñe táguyun Claudia, aban kristiána to mamarieidungiru lun tidin eseriwida lidan amu fulasu le ñein lubéi hemegeirua apurichihatiña, ariñagatu: “Hínsiñeti le nadügübei nun. Dan le narihini ida liña lan lóunigirunina Bungiu ábatima lederebugudun nafiñen luagu luma numadagua luma”

“Meberesenga anhein mamarieidungidibu lubéi o marieihadibu lan, gúndaabei basandiragun bungua anhein bíchiga le buídutimabei lun Heowá Bungiu” (Claudia).

Moun lumuti warihini mamarieiduni kei aban ihürügu. Kei tariñaguni Claudia: “Meberesenga anhein mamarieidungidibu lubéi o marieihadibu lan, gúndaabei basandiragun bungua anhein bíchiga le buídutimabei lun Heowá Bungiu” (Sálumu 119:1, 2).