Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2016

“Heowá le Wabungiute ligíarügüñein Heowá”

“Heowá le Wabungiute ligíarügüñein Heowá”

“Aganbabá, Ísüraeli: Heowá le Wabungiute ligíarügüñein Heowá” (2 LÚRUDU 6:4, TNM).

UREMU 138, 2

1, 2. a) Ka uagu subudiwa lubéi dimurei burí le wadarirubei lidan 2 Lúrudu 6:4? b) Ka meha uagu líridei Moisesi dimurei burí le?

ANIHEIN aban furíei hama huríu ani wéiriti lisudinin houn sagawati lídangiñe 2 Lúrudu 6:4. Wáwati lun furíei ligía shemá, ladüga ligía furumiñeti dimurei le lídanbei bérusu ligía lidan ebüréu. Lúmagiñe lidan saragu dan, águyuguagüda hamuti huríu dimurei burí le binaafin luma rábounweyu lun harufuduni lúnrügüñein lan aban Bungiu háhuduragua.

2 Ariñaga lumuti Moisesi dimurei le lidan irumu 1473 lubaragiñe Kristu lidan lagumuhóun yanu le líchugubei houn ísüraelina. Moábüñanu meha ani aranseeña meha lun hánhiñuraguni duna Hordán ani lun hebelurun lidan Fulasu Füramasewati (2 Lúrudu 6:1). Adundeha laaña meha Moisesi luagu 40 irumu. Ani lau le lariñagubei, busenti meha línchahaniña lun ganigi hamá, lun hafiñerun luagu Heowá ani úaragua hagíame lun. Ka uagu? Ladüga subudi lumuti hadunraguba lan luma saragu turóbuli. Ligíati, lárigiñebei layanuhan houn luagu Diisi Gumadi  luma luagu amu lilurudun Heowá, aba laritaguagüdüniña Moisesi luagun dimurei súdiniti le waliihabei lidan 2 Lúrudu 6:4, 5 (aliiha huméi).

3. Kaba burí álügüdahani wóunaba lidan arütíkulu le?

3 Subudi hamuti meha ísüraelina Heowárügüñein lan ‘Habungiute’. Ani lúnrügüñein meha giñe aban Bungiu háhuduragua ísüraelina ha úaraguabaña, lun Bungiu le Habungiute hagüchagu. Kati uagu laritaguagüdei Moisesi houn Heowárügüñein lan Bungiu? Ida liña úara lan inarüni le luma línsiñedun Bungiu houn tau sun hanigi, hawani luma here? Ani ka uagu súdini lubéi dimurei le lídanbei 2 Lúrudu 6:4, 5 woun uguñe weyu?

“HEOWÁ LE WABUNGIUTE LIGÍARÜGÜÑEIN HEOWÁ”

4, 5. a) Ka mini lubéi dimurei “ligíarügüñein Heowá”? b) Ka uagu amu lubéi Heowá hawéi habungiutegu amu néchani?

4 Úati amu kei Heowá. Gíbeti lila dimurei “ligíarügüñein Heowá”. Mini lan aban lídangiñe úati lan ni aban ítarati kei Heowá. Ka uagu layusurei Moisesi dimurei le? Furanguti mama lan lun larufuduni iyeeni lan arufudahani luáguti Trinidad. Heowá adügübalin sielu luma ubóu. Ligía lurúeitebei sun ubóu ani ligíarügüñein Bungiu inarüniti. Úati amu bungiu kei ligía (2 Samueli 7:22). Ligía layusurunbalin Moisesi dimurei “ligíarügüñein Heowá” lun laritaguagüdüni houn ísüraelina lúnrügübei lan Heowá háhuduragua. Moun lumuti meha hadügün kei lílana ageiraü le yarafabei houn, ha meha áhuduragubaña houn búngiugu mama inarünitiña. Saminatiña meha gürigia hagía habungiutegu lan gamaniharibaña lau fiú katei ubouagu.

5 Kéiburi hamuga ehiptuna, huduguatiña meha lun Ra, le lubungiute Weyu; tun Nut, to lubungiute sielu; lun Geb, le lubungiute Múa, luma lun Hapi, le lubungiute duna Nilu. Huduguatiña meha giñe houn bandi animaalugu. Gama lumoun arufuda lumuti Heowá lau diisi íñanaü gabafutimati lan hawéi búngiugu mama inarünitiña hagía. Houn kananna Baali meha bungiu le súdinitimabei. Saminatiña meha ligía lan íchugubalin ibagari houn. Saminatiña meha giñe ligía lan lubungiutebei sielu, huya luma durumandei. Lidan saragu fulasu, afiñetiña meha gürigia lóunigirubaña lan Baali (1 Lúrudu 25:3). Gama lumoun, mosu meha haritaguni ísüraelina Heowá lan le Habungiute “Búngiubei le inarüniti” (2 Lúrudu 4:35, 39).

Masansirun lumuti Heowá le lariñagubei. Úaraguati ani ariñaga lumuti inarüni súnwandan

6, 7. a) Ka amu katei mini lubéi dimurei “ligíarügüñein Heowá”? b) Ida liña meha larufuduni Bungiu ‘ligíarügüñein lan Heowá’?

6 Masansirun lumuti Heowá le lariñagubei ani úaraguati giñe. Dimurei “ligíarügüñein Heowá” mini lan giñe gayara lan lafiñerúniwa luagu Heowá ani gúnfuli lumuti lan le füramase lubéi. Maweiyasunti Bungiu asansira. Úaraguati ani súnwandan lariñaguni inarüni. Ida liña meha larufuduni? Kei hénpulu, füramaseti meha lun Abüraámü hawinwanduba lan ladügawagun lidan Fulasu Füramasewati. Masansirun lumuti Heowá lisuuni ani adügati saragu milaguru lun lagunfuliruni füramasei ligía 430 irumu lárigiñe (Agumesehani 12:1, 2, 7; Áfuriduni 12:40, 41).

 7 Saragu irumu lárigiñe, ariñagati Heowá houn ísüraelina: “Huguya nánibei gefentiña”, ani ariñagati giñe houn: “Úagubeiñein ni aban bungiu nubaragiñe, ani úabei giñe nárigiñe”. Ígira lumuti giñe Heowá furangu luagu maweiyasunbei lan asansirei lisuuni, dan le lariñagun: “Bungiu au lúmagiñe súnwandan” (Isaíasi 43:10, 13; 44:6; 48:12). Wéiriti meha chansi le hámabei ísüraelina lun heseriwidun lun aban Bungiu le maweiyasunbei asansira ani le gayarati lafiñerúniwa luagu. Wagía, anihein giñe ligiaméme chansi le wama (Malakíasi 3:6; Santiagu 1:17).

8, 9. a) Ka lagurabubei Heowá hámagiñe lubúeingu? b) Ka lariñagubei Hesusu le arufudubalin súdini lan dimurei le meha lariñagubei Moisesi?

8 Dimurei le lariñagubei Moisesi houn ísüraelina haritaguagüda lumutiña luagu hínsiñe hamá lun Heowá ani lóunigirubaña lan súnwandan. Gama lumoun, agurabati meha Heowá lúnrügüba lan háhuduragua ani hínsiñe ligíame houn tau sun hanigi, hawani luma lau here (ariha huméi rekuáduru “Ka mini lubéi?”). Ani mosu meha giñe hayanuhan agübürigu houn hasaanigu luagu Heowá sagü gayara lan. Ítara luba meha giñe háhuduragun nibureintiña lúnrügü Heowá (2 Lúrudu 6:6-9).

9 Kei le masansirun lan lisuuni Heowá, uguñe weyu agurabati lun wadügüni le meha hadügübei ísüraelina. Ligíati, anhein busén wabéi lun gunda lan lau wáhuduragun, mosu giñe lúnrügü lan wáhuduragua ani hínsiñe ligíame woun tau sun wanigi, wasaminan luma were. Ariñagati meha Hesusu ligía lan gumadi súdinitimabei ani ítara liña larufuduni súdini lan dimurei le lariñagubei Moisesi (aliiha huméi Márükosu 12:28-31). Guentó ariha waméi ida luba gayara lan warufuduni afiñe wamá ‘Heowárügüñein lan Bungiu’.

LÚNRÜGÜLA HEOWÁ WÁHUDURAGUA

10, 11. a) Ka mini lubéi lúnrügü lan Heowá wáhuduragua? b) Ida liña meha harufuduni fiú nibureintiña ebüréu lúnrügüñein lan Heowá háhuduragua?

10 Lúnrügüñein Heowá wáhuduragua. Máhuduraguntiwa lun amu bungiu ani moun lumuti giñe wádarun saminaü o échuni mama inarüniti lidoun wáhuduragun lun Heowá. Mámarügü ladüga ligía lan Bungiu le héretimabei, ladüga giñe ligía lan Bungiu le inarünibei. Ligía lunti lubéi lúnrügü lan wáhuduragua (aliiha huméi Arufudúni 4:11).

11 Ayanuhatu liliburun Danieli hawagu gádürü nibureintiña gíritiña Danieli, Ananíasi, Misaeli luma Asaríasi. Ida liña meha harufuduni lúnrügüñein lan Heowá heseriwida? Máhatiña meha heigin éigini le moun lumuti héigini lubúeingu Heowá. Ani máhuduraguntiña giñe ǘrüwagubei lumadagu Danieli ligibugiñe aban guáriua lauti golu le meha ladügübei lurúeite Babilónia. Chouru hamuti meha lúnrügüba lan Heowá háhuduragua. Ligía úaragua habéi lun súnwandan (Danieli 1:1–3:30).

Mosu wíchuguni Heowá lidan furumiñeti lúgaaru lidan wabagari

12. Anhein busén wabéi lúnrügü lan Heowá wáhuduragua, ka katei lunbei wóunigiragun woungua luéi?

12 Mosu wíchuguni furumiñeti lúgaaru lun Heowá lidan wabagari. Anhein busén wabéi lúnrügü lan Heowá weseriwida, mosu wóunigiragun woungua lun magidarun lani amu katei lilugaarun Bungiu luéi. Ka burí  katei lunbei wóunigiragun woungua luéi? Lidan Diisi Gumadi, ariñagati meha Heowá houn lubúeingu moun lumuti lan háhuduragun houn amu búngiugu. Mosu meha hadisedun sunsuinagubei luéi furumiñeguarügü áhuduraguni mama inarüniti (2 Lúrudu 5:6-10). Uguñe weyu gíbeti katei le gayaraati konparárua lan luma áhuduraguni houn guáriua, ani anihein ligía hénrenguti lasubudirúniwa. Gama lumoun, masansirungili Heowá ani aniheingua aguraba lun mádaragun wamá woungua lidoun luwuyeri áhuduraguni ligía. “Ligíarügüñein Heowá”. Ligíati, ariha waméi ka lan gayarabei wadügüni lun wadisedun luéi áhuduraguni mama inarüniti.

13. Ka katei gayarabei ladügün lun weferidiruni wamadagua luma Heowá?

13 Lidan Kolosana 3:5 (aliiha huméi) ayanuhóuati luagu fiú katei le gayarabei lagadeiruni lubuidun wamadagua luma Heowá. Ariñagati bérusu le ítara liña lan “igaaduaü” kei áhuduraguni houn guáriua. Ka uagu? Ladüga dan le weiri lan wabusenrun wibihin umegeguni o seinsu, gayarati lagumadiruniwa ayumahani ligía kamá hamuga aban bungiu gabafuti. Sun figóu le iridúbei lidan Kolosana 3:5 úarati luma igaaduaü. Anhein weiri lubéi wabusenrun wibihini katei burí ligía, gayarabei línsiñedun woun sügǘ lau Bungiu. Ani ábame umegeguni lan wabungiute. ‘Mámarügaalime Heowá wabungiute’. Maweiyasun wamá ígira lun lasuseredun katei le woun.

14. Ka eweridihani líchugubei apostolu Huan?

14 Ruti giñe apostolu Huan aban eweridihani ítarati. Ayanuhati luagu katei burí le aniheinbei lidan ubóu wuribati le, kéiburi “luriban hayumahan gürigia, háfaagun lun habihini katei le harihibei luma pantaü luagu irisini”. Ani ariñagati anhein lan ínsiñeda katei le lun aban gürigia, ‘mínsiñeti lan Bungiu lun’ (1 Huan 2:15, 16). Ligía lunti lubéi wakutihani ka lan tídanbei wanigi súnwandan. Háfuga wíchugun fe hínsiñe lan somu isebáhari, ligaburi hasansiragun luma haranseragun gürigia ubouaguna houngua woun. O háfuga busentiwa waturiahan tidan luban furendei íñuti lun wibihin “katei [...] le hanarimeguti” lidan ubóu le (Heremíasi 45:4, 5). Gama lumoun, yarafaali iseri ubóu. Ligía lunti lubéi waritaguni dimurei le lariñagubei Moisesi. Anhein inarüni lubéi gunfuranda wamani ‘Heowárügüñein lan Bungiu’, lúnrügüba wáhuduragua, ani weseriwiduba lun kei aubei labusenra (Ebüréu 12:28, 29).

GÓUNIGI WAMÉI ÚARANI LE LÍDANBEI DAMURIGUAÜ

15. Ka meha uagu mosu lubéi laritaguagüdüni Pábulu houn kristiánugu Heowárügüñein lan Bungiu?

15 Dimurei “ligíarügüñein Heowá” haritaguagüda lumutiwa giñe busén lan Heowá lun ñein lan úarani hadan lubúeingu ani lun hasaminarun luagun ligiaméme katei. Lidan hadaani furumiñetiña kristiánugu, saragu hádangiñe huríu meha, güriegu, rómana o lídangiñe amu ageiraü. Ámuñegueinarügüti meha hechun, hagaburi luma ligaburi hasaminan. Ligía hénrengu lubéi houn fiú hádangiñe gaganbadi hamá lun le hafurendeirubei o lun  hígiruni somu binadu échuni. Ligía mosu lubéi meha laritaguagüdüni apostolu Pábulu houn ábanrügüñein lan Habungiute keisi kristiánugu: Heowá (aliiha huméi 1 Korintuna 8:5, 6).

Busenti Heowá lun ñein lan úarani hadan lubúeingu

16, 17. a) Ka profesía agunfulirubei lidan wadaani, ani ka lánibei resultóu? b) Ka gayarabei lagadeiruni úarani le wádanbei?

16 Kati asuseredubei lidan damuriguaü kristiánu uguñe weyu? Ariñagati meha profeta Isaíasi háhuduraguba lan gürigia lídangiñetiña sun néchani lun Heowá lidan ‘lagumuhóun dan le’. Hariñaguba gürigia hagía: “Arufuda láamugei [Bungiu] lémeri woun, gayara láamuga wéibugun lidan lémeri” (Isaíasi 2:2, 3). Gúndaatiwa lau warihini ligaburi lagunfulirun profesía le. Kei resultóu, lídangiñetiña ámuñegueinarügü fulasu wíbirigu, ayanuhatiña ámuñegueinarügü iñeñein, ani ámuñegueinarügü giñe hechun. Íbini ítara, súngubei wagía huduguatiwa lun Heowá lidan úarani. Gama lumoun, gayarati ladügün katei burí le lun ñein lan turóbuli wadan.

Áfaaguatiwa san lun wakipuruni úarani lidan damuriguaü? (Ariha huméi párafu 16 darí 19).

17 Kei hénpulu, ida liña warihiniña íbirigu ha lídangiñetiña amu fulasu? Háfuga amu lan hañeñe, amu lan ligaburi hadaüragun, amu  lan hagaburi o íbini amu lan heigin. Mayarafaduntiwa san houn íbirigu hagía ani aba wásügürün dan hámarügü ha ábanbei hechun wama? Ida liñagia warihiniña wéiyaaña lidan afiñeni ha yarafabaña woun ani nibureintimagiña wawéi o amu lan harasan wawéi? Ánhawa móunigi, gádeileime turóbuli burí le úarani le wádanbei.

18, 19. a) Ka adundehani wadarirubei lidan Éfesuna 4:1-3? b) Ka gayarabei wadügüni lun wakipuruni úarani lidan damuriguaü?

18 Ka gayarabei wadügüni lun madan lániwa turóbuli burí le? Wafalaruni adundehani le líchugubei apostolu Pábulu houn kristiánugu ha awinwandubaña Éfesu, aban uburugu rísiti le ñein lubéi hawinwanda gürigia ha ámuñegueinarügüti hechun (aliiha huméi Éfesuna 4:1-3). Ayanuhati Pábulu luagu igaburi kéiburi ǘnabuguni, darangilaü, gurasu luma ínsiñeni. Ítara liña igaburi burí le kei wagabu héreti le ágüdahabarun muna. Gama lumoun lun takipurúniwa aban muna buidu, mosu tounigirún buidu. Ligía lariñagunbei Pábulu houn kristiánugu ha Éfesubaña lunti lan meha háfaagun lun hóunigiruni úarani le lídanbei damuriguaü.

19 Súngubei wagía mosu wídehan lun ñein lan úarani lidan damuriguaü. Ida? Furumiñe, lau wakipurun ani arufuda wameime igaburi burí le lariñagubei Pábulu, kéiburi ǘnabuguni, darangilaü, gurasu luma ínsiñeni ani libiaman, lau wáfaagun lun ñein lan darangilaü. Lidan damuriguaü, ítara liña turóbuli hadan íbirigu kei katei le gayarabei lagadeirunu aban muna. Gayarati lagadeiruni turóbuli burí ligía úarani le wádanbei. Ligía mosu lubéi wáfaagun lun waransehani. Ítara luba wakipuruni darangilaü luma úarani wámagua.

20. Ida liña warufuduni luagu gunfuranda wamani ‘Heowárügüñein lan Bungiu’?

20 “Heowá le Wabungiute ligíarügüñein Heowá”. Ruti inarüni le gurasu woun. Ruti meha erei houn ísüraelina lun hawanduni turóbuli le úmabei hagagibudagua dan le hebelurunbei lidoun Fulasu Füramasewati ani gañei haméi. Gayarabei giñe líchugun erei woun lun wásügürün lau ibagari lídangiñe óunwenbu asufuriruni ani lun wadügün lun ñein lan darangilaü luma úarani lidan Paraísu. Gunfuranda wamuti san ‘Heowárügüñein lan Bungiu’? Anhein ítara liña lubéi, lúnrügüla weseriwida. Sigí wamá eseriwida lun tau sun wanigi, lau sun wasaminan luma lau sun were. Sigí wamá áfaagua lun lidan wamá darangilaü luma úarani hama wíbirigu. Ánhawa asigira adügei katei le, lanúadirubadiwa Hesusu keisi mudún, ani ábame lariñagun woun: “Higougu, huguya le biní láalibei Núguchi; resibi huméi arúeihani le aranseelibei hubá lúmagiñe ladügüni Bungiu ubóu” (Matéu 25:34).