Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2016

Gúndaatiwa lau Heowá lan arufudahabei woun

Gúndaatiwa lau Heowá lan arufudahabei woun

“Aburemei, buguya Wáguchibei; múa wagía, buguya nadagimeinti múa ligía, ladügün lubeiti búhabu sun wagía” (ISAÍASI 64:8).

UREMU 11, 26

1. Ka uagu Heowá lubéi Nadagimeinti múa le buídutimabei?

LIDAN unsu-hati irumu 2010, ariñagati aban gürigia lafayeiruba lan kéiburi 70 míñunu dólarü luagu aban binadu ágeidinaü cheiní le alugurúbei Alundu. Wéiritu wanigi dan le warihini layusurun aban gürigia aban katei le kamaniti kei múa lun ladügün aban katei le buiti ani séruti. Ítara liña Heowá kei aban Nadagimeinti múa. Gama lumoun, ligía Nadagimeinti múa le buídutimabei sügǘ lau furumiñeguarügü gürigia ya ubouagu. Ariñagatu Bíbülia yusu lani Bungiu “múa” lun ladügüni Adán, le furumiñeti wügüri mafigounti (Agumesehani 2:7). ‘Liráü meha Bungiu’ wügüri ligía ani adügǘwati lau ubafu lun láyeihani sun ligaburi Heowá (Lúkasi 3:38TNM).

2, 3. Ida luba wáyeihani hagaburi ísüraelina ha meha asakürihaañabaña?

2 Dan le lebedaagunbei Adán lun Bungiu, aba mámaali lan liráü Bungiu. Gama lumoun, gíbetiña hádangiñe ladügawagun ñǘdüntiña luéigiñe lóubadina Heowá keisi harúeite (Ebüréu 12:1). Gaganbaditiña lun Bungiu le adügübaliña lau ǘnabuguni. Ítara liña hamahadun lun Satanási ani aba harufuduni busén hamá lun  Heowá lan Háguchi ani lun ligía lan adundehei habagari (Huan 8:44). Úaraguni le harufudubei lun Bungiu haritaguagüda lumutiwa luagu le hariñagubei fiú ísüraelina lidan aban ókaasion: “Aburemei, buguya Wáguchibei; múa wagía, buguya nadagimeinti múa ligía, ladügün lubeiti búhabu sun wagía” (Isaíasi 64:8) (ariha huméi rekuáduru “Ka mini lubéi?”).

3 Uguñe weyu, sun lubúeingu Bungiu ha inarünitiña áfaaguatiwa lun wáyeihani igaburi ligía ani lun gaganbadi wamá lun Wabungiute lau ǘnabuguni. Aban katei wéiriguti gayara lan wariñagun Heowá lan Wáguchibei. Ligía mosu lubéi wálügüdagun woungua: “Ítara niña san kei múa le ménrengubei lahandilihóun, gayara láamuga layusurunina Bungiu lun ladügün aban lubuidun ágeidinaü? Ariha numutiña san níbirigu kei múa le laransehañeinbei Bungiu?”. Warihiba ǘrüwa katei lidan arütíkulu le le lunbei líderaguniwa lun buidu lan wagaburi. Furumiñe, ida liña lan lanúadiruniña Heowá ha únbaña larufudaha. Libiaman, ka uagu larufudaha houn. Ani le lǘrüwan, ida liña lan larufudahan houn.

IDA LIÑA LANÚADIRUNIÑA HEOWÁ HA ÚNBAÑA LARUFUDAHA?

4. Ida liña lanúadahaniña Heowá ha lachawahabaña luouguoun? Ru humá aban hénpulu.

4 Mítaranti larihiniña Heowá gürigia kei wagía. Ariha lumutu hanigi gürigia ani subudi lumuti kátima lan hagaburibei (aliiha huméi 1 Samueli 16:7b). Arihúati katei le furangu dan le ladügünbalin Bungiu damuriguaü kristiánu. Achawahati saragu gürigia luouguoun luma luagun Liráü. Ani gürigia hagía genegeti meha mebegi hamá (Huan 6:44). Saulu meha aban hádangiñe gürigia hagía, aban lábuti relihión huríu. Aban meha wügüri íñuguti ani furundeti le meha éibaahabaliña kristiánugu ani ayanuha ligía iyeeni hawagu (1 Timotéu 1:13). Gama lumoun aba larihinu Heowá lanigi ani aba larihini mítaran lan Saulu kei múa le meseriwínti lun ni kata (Ariñawagúni 17:3). Lubaragiñe lira, ariha lumuti Bungiu Saulu kei aban gürigia le gayarabei layusuruni “lun ladimurehan [luagu] houn gürigia ha mámabaña huríu luma houn harúeitegu, luma giñe houn Ísüraelina” (Adügaü 9:15). Anúadirati giñe Heowá amu gürigia ani aba larufudahan houn kada aban lun ítara hamá kei ágeidinaü le buiti (Rómana 9:21). Saragu hádangiñe gürigia hagía híwerutiña meha, gátaatiña meha ani adüga hagía figóu lánina agamariduni (1 Korintuna 6:9-11). Gama lumoun dan le hafurendeirun luagu Bungiu, aba hederebudagüdüni hafiñen ani aba hígirun lun ladundehaniña.

Moun lumuti wasaminarun wuriba hawagu wíbirigu ni hawagu gürigia ha únbaña wapurichiha

5, 6. a) Anhein afiñe wabéi Heowá lan asansirubalin wagaburi, ida luba warihiniña gürigia ha únbaña wapurichiha? b) Anhein afiñe wabéi Heowá lan asansirubalin wagaburi, ida luba warihiniña íbirigu lidan damuriguaü?

5 Afiñetiwa luagu gayara lan lachawahaniña Heowá gürigia ha richabaña luouguoun. Ligía moun lumuti lubéi wasaminarun wuriba ni hawagun wíbirigu ni hawagun gürigia ha únbaña wapurichiha. Masaminara wamá giñe machülübei lan aban gürigia lun gefén lan luagu Heowá. Samina wamá luagun aban wügüri gíriti Michael. Ariñagati: “Dan meha  le hachülürün gefentiña luagu Heowá núbiñoun, aba meha nadouruni bena hawéi ani ábaha nadügün kamá le úatina múnada. Óusera numutiña meha lau menebenehabuni. Lau lásügürün dan, aba nasubudirun fiú iduheñu ha aweiridagüdübarun nanigi ladüga lubuidun hóuserun. Aban weyu, aba níchugun fe gefentiña lan luagu Heowá. Aba taweiridun nanigi. Adügati ligaburi hóuserun lun nálügüdagun nungua ka lan uagu nasaminara wuriba hawagun. Aba níchugun fe mébuna lan ligaburi nóuseruniña wuriba”. Aba meha busén lan Michael laganwoundagüdüni lisubudin hawagu gefentiña luagu Heowá, ligía aba lubéi laturiahanu Bíbülia hama. Lau lásügürün dan aba labadiseirun ani seriwiti giñe lidan dan dayarüti.

6 Ánhawa afiñera Heowá lan íderagubaliwa lun abuidureina lan wagaburi, buídutimabei wóuserun hama wíbirigu lidan damuriguaü. Warihibaña kei múa le aniheinguabei Heowá aransehei. Ítara liña larihiniña Heowá. Ariha lumuti ida tiña lan hanigi ani subudi lumuti giñe mámaba lan súnwandan hachararun. Ani subudi lumuti giñe gayara lan hasansirun gürigia (Sálumu 130:3). Ida luba wáyeihani Heowá? Mosu warihiniña wíbirigu lau aban lubuidun igaburi. Gayarati íbini wíderaguni Bungiu lau wíderaguniña wíbirigu lun hasigirun asansira (1 Tesalónikana 5:14, 15). Lidan katei le, mosu híchugun wéiyaaña lidan afiñeni aban buiti hénpulu (Éfesuna 4:8, 11-13).

KA UAGU LARUFUDAHA HEOWÁ WOUN?

7. Ka uagu lunti lubéi weteingiruni ladundehan Heowá?

7 Añahein gürigia ariñagutiña dánrügüñein lan gasaanigu wamá ligía lan waritaguni gebegi lan sun ererehani luma abeichúni le wibihibei hámagiñe wagübürigu. Dan le wéinamuhadiwa, wéiritimati lebegi sun katei ligía woun ladüga aba gunfuranda wamani ladüga lan wínsiñe houn wagübürigu hadügünbalin (aliiha huméi Ebüréu 12:5, 6, 11). Hínsiñetiwa lun Heowá ladüga lirahüñü wamá. Ligía larufudahanbei woun ani íderagualawa lau gurasu lun wasansirun. Busenti lun desidírü wamá buidu lidan wabagari, lun gunda wamá ani lun línsiñedun woun keisi Wáguchi (Ariñawagúni 23:15). Mabusenrunti larihiniwa asufurira ni lun wóunwegun ladüga masakürihan wamá luagu wafigoun (Éfesuna 2:2, 3).

Hínsiñetiwa lun Heowá ladüga lirahüñü wamá, ligía líchugunbei eweridihani woun lau gurasu lun wasansirun

8, 9. a) Ida liña larufudahan Heowá woun uguñe weyu? b) Ida luba lasigirun Heowá arufudaha woun ámuñegü?

8 Lubaragiñe wasubudiruni Heowá, háfuga mínsiñeti lan meha wagaburi lun. Gama lumoun, aba líderaguniwa lun wasansirun ani guentó gürigiahadiwa buítiña (Isaíasi 11:6-8; Kolosana 3:9, 10). Uguñe weyu, lun larufudahan woun ani íderagualawa asansirei wagaburi, adügati Heowá aban aransehani espechaliti lun ñein lan darangilaü hadan lumutuniña. Dan le hadan wamá lumutuniña Heowá, chóuruti wasandiragun woungua íbini wawinwanduña lan lidan ubóu wuribati le. Ani íbirigu ha meha meresibirunbaña ínsiñeni hámagiñe haduheñu, gúndaatiña lau hibihin ínsiñeni inarüniti hámagiñe íbirigu (Huan 13:35). Ani súngubei wagía furendeihadiwa arufuda  ínsiñeni houn amu. Gama lumoun le súdinitimabei subudi wamaali lan Wáguchi le siélubei buidu buidu ani resibi wamuti línsiñehabu (Santiagu 4:8).

9 Lidan iseri ubóu wibihiba saragu abinirúni lábugiñe lubuidun aransehani le ladügübei Heowá. Ani wagundaaruba giñe lidan aban paraísu ubouagu lábugiñe Larúeihan Bungiu. Lídanme dan ligía, lasigiruba Heowá asansirei wagaburi luma arufudaha woun (Isaíasi 11:9). Ladügüba giñe Bungiu lun ua lan figóu lidan wasaminan ni lidan wágubu. Ménrenguntimahalime woun wafurendeirun luagu luma lun gaganbadi wamá lun sun le lariñagun woun. Ligíati, sigí wamá ígira lun larufudahan Heowá woun. Arufuda waméi lun teinki wamani luagu larufuduni línsiñehabu woun lidan igaburi le (Ariñawagúni 3:11, 12).

IDA LIÑA LARANSEHANI HEOWÁ WAGABURI?

10. Ida liña meha larufuduni Hesusu luguraasun luma lichú lau Nadagimeinti múa le Wéirigutimabei?

10 Ítara kei subudi lani nadagimeinti múa múa le layusurubei buidu, ítara liña giñe subudi lániwa Heowá buidu. Subudi lumuti wachara, katei le wásiñarubei adüga luma katei le ídanbei buídutimahali lan wóuserun keisi kristiánugu. Dan le líderaguniwa, gabaroun lumuti katei burí le (aliiha huméi Sálumu 103:10-14). Lun gunfuranda wamani buidu ida liña lan larihiniwa Heowá, samina wamá luagun ligaburi lóunabun Hesusu dan le meha hachararun apostolugu. Anihein meha dan, aba hasigenehan luagu ka lan hádangiñe súdinitimabei. Lun hamuga meha ñéinñadiwa lan, kaba hamuga meha wasaminara hawagun apostolugu? Háfuga wasaminaruña lan hamuga ítara haña lan kei múa le hénrenguti lahandilihóun. Gama lumoun mítaranti meha larihiniña Hesusu. Subudi lumuti meha gayarabei lan líderaguniña lun hasansirun. Ida? Lau líchugun adundehani houn lau gurasu luma ínsiñehabuni, ani lau líchugun aban hénpulu lánina ǘnabuguni houn (Márükosu 9:33-37; 10:37, 41-45; Lúkasi 22:24-27). Lárigiñebei láguyugun Hesusu, aba heresibiruni apostolugu sífiri sandu ani aba madiheridunhaña lan luagu ka lan hádangiñe súdinitimabei. Aba hetenirun adügei wadagimanu le líchugubei Hesusu houn (Adügaü 5:42).

11. a) Ida liña meha larufuduni Dawidi ítara liña lan kei múa ñuluti? b) Ida luba wáyeihani Dawidi?

11 Uguñe weyu, yusu lumutu Heowá Bíbülia, sífiri sandu luma damuriguaü lun larufudahan woun. Anhein busén wabéi lun tasansiruni Bíbülia wagaburi, mosu waliihanu, wasaminarun luagun le waliihabei ani amuriaha wagíame luma Bungiu lun líderaguniwa lun gaganbadi wamá. Ariñagati urúei Dawidi lun Heowá: “Dan le róunhadina áriebu aba naritagun samina au buagun” (Sálumu 63:6). Ani abürühati giñe: “Nalawahabei Nabureme, ladüga ligía adundehabalina, íbini áriebu arufudahati nun tidoun tilulin-agei nanigi” (Sálumu 16:7). Kei aubei warihei, ítara liña meha Dawidi kei múa le ñuluti. Saminati meha luagun ladundehan Heowá ani ígirati meha lun lasansiruni adundehani ligía lisaminan luma le lasandirubei tidan lanigi. Íbini dan le hénrengu lan lun lánharun lun somu eweridihani, resibi lumuti (2 Samueli 12:1-13). Ida luba wáyeihani lubuidun hénpulu lánina ǘnabuguni luma gaganbadi le larufudubei Dawidi? Álügüdagua wamá woungua: “Dan le naliihanu Bíbülia, ráramaguatina san asaminara ani ígira nuguya lun lasansiruni leweridihan Heowá nisaminan luma le nasandirubei? Gayaragili san buídutima lan nadügüni katei le?” (Sálumu 1:2, 3).

12, 13. Ida liña layusuruni Heowá lani sífiri sandu luma damuriguaü kristiánu lun líderaguniwa asansira?

 12 Gayarati giñe ladundehaniwa sífiri sandu lidan amu burí igaburi. Gayarati líderaguniwa lun wáyeihani Hesusu luma lun warufuduni igaburi burí le líchugubei sífiri sandu (Galasiana 5:22, 23). Ínsiñeni aban lídangiñe igaburi ligía. Kei le hínsiñe lubéi Bungiu woun, busentiwa gaganbadi wamá lun ani ígira wagíame lun ladundehaniwa ladüga subudi wamuti sun lan le lamuriahabei wama lunti wabuidun guánarügü. Gayarati giñe líchugun sífiri sandu erei woun lun mígirun wamá lun ladügün ubóu le lun wóuserun kei gürigia ubouaguna (Éfesuna 2:2). Samina wamá luagun apostolu Pábulu. Dan le meha nibureingili, aba meha lóuserun kei lábutigu relihión huríu ha barüguabaña houngua. Gama lumoun, íderagua lumuti sífiri sandu lun lasansirun. Ligía labürühanbei dan lárigiñe lúmagiñe lan Heowá liabin “ubafu” le lemegeirubei lun lasansirun (Filipuna 4:13TNM). Wagía lunti giñe wamuriahan sífiri sandu luma Heowá, ani ábame lóunabuni wafurieidun (Sálumu 10:17).

Yusu lumutiña Heowá wéiyaaña lidan afiñeni lun líderaguniwa asansirei wagaburi, ligía lunti lubéi wasigiruni sun adundehani le híchugubei woun. (Ariha huméi párafu 12, 13).

13 Yusu lumuti giñe Heowá damuriguaü hama wéiyaaña lidan afiñeni lun líderaguniwa asansira. Kéiburi dan le harihin wéiyaaña somu igaburi le mabuidunti wawagu, álugatiña híderaguniwa. Gama lumoun, mama rúrügütiña adundehani según le hasaminarubei (Galasiana 6:1). Lubaragiñe lira, lau ǘnabuguni aba hamuriahan lichú aau luma gunfurandaü luma Heowá. Lárigiñe, aba háluahan ariñahani tidan Bíbülia luma tidan burí wani agumeiraguagüdüni lun hadundehaniwa. Ligíati, danme le híchugun wéiyaaña lidan afiñeni aban eweridihani woun lau ínsiñeni luagu ligaburi wasansiragun o luagu amu katei, haritagua waméi larufuduñein lan Bungiu woun hínsiñe wamá lun. Anhein wafalara leweridihan, ítara waba kei múa le ñuluti le gayarati laransehani Heowá. Ani lahuuduba adundehani ligía woun.

14. Lau sun gayara lan lafosuruniwa Heowá lun wasansirun, ida liña larufuduni inebe wamá lun?

 14 Anhein gunfuranda wabalin ida liña lan asansireina lani Heowá wagaburi, buídutimabei wanaagun woungua hama wíbirigu. Ani masaminarunbadiwa giñe wuriba hawagun gürigia ha lídanbaña fulasu le ñein lubéi wapurichiha ni hawagu ha aturiahabarun Bíbülia wama. Lidan meha tidaani Bíbülia, lubaragiñe luadigimariduni gürigia múa, mosu meha larumadahani murusun murusun ani gidaléi dübü le lídanbei. Ani Heowá íderagua lumutiña gürigia ha ígirubaña lun lasansiruni hagaburi. Gama lumoun, inebeti le desidírü habéi lun. Mafosurun lumutiña lun hasansirun. Lubaragiñe lira, arufudaha lumuti lilurudun houn murusun murusun, ani aba lígiruniña lun desidírü hamá anhein hasansiruba lubéi.

15, 16. Ida liña harufuduni aturiahatiña Bíbülia busén hamá lun lasansiruni Heowá hagaburi? Ru humá aban hénpulu.

15 Samina wamá tuagun aban íbiri australiana gíritu Tessie. Dan le tagumeserunbei aturiahoun Bíbülia, ménrengunti meha tun gunfuranda tani le tafurendeirubei. Gama lumoun madügütu asansiruni lidan tibagari ani midin tuguya lidan adamuridaguni. Aba meha tafurieidun Gefentu to meha íchuguboun aturiahani tun lun Heowá ani aba desidírü tan tararamuni aturiahani. Gama lumoun, aba lasuseredun aban katei. Dan le haturiahaña lan, aba tafunranguagüdüni Tessie tun íbiri tuguya ka lan uagu madügün tubéi asansiruni lidan tibagari. Aba tariñagun tun sanditu lan kamá biánguati tigibu ladüga hínsiñe lan tun táhurerun luagu seinsu. Ani aba tariñagun tun desidírüharu lan tígiruni huraraü.

16 Murusun dan lárigiñe, aba tagumeserun Tessie ñüdün adamuridagua ani aba tagumeserun óusera kei kristiánu, íbini aba lan hadügün binadu tumadagu bula tau. Lau lásügürün dan, aba tabadiseirun ani aba giñe teseriwidun kei prekursora to adügüboun 70 oura luagu hati, íbini gasaanigu tan ha ñǘbürigiña. Chóuruti dan le lan lagumeserun aban gürigia le aturiahabarun Bíbülia adüga asansiruni lidan libagari, aba lan layarafadun Heowá lun ani aba líderaguni asansirei ligaburi darí lun ítara lan kei aban ágeidinaü lauti múa le séruti.

17. a) Ka uagu hínsiñe lubéi hun lun Heowá lan íchiga adundehani hun? b) Kaba wariha lidan le aban arütíkulu?

17 Uguñe weyu, aniheingua fulasu le ñein lubéi añaheingua lan gürigia ha nadagimeintiña lau múa ani adügatiña katei buíduburiti lau háhabu. Ítarameme, ruti giñe Heowá adundehani woun lun asansireina wamá, ani adüga lumuti lau gurasu ani téniti giñe lun ligaburi wóunabun (aliiha huméi Sálumu 32:8). Ariha wamuti san berese lan Heowá lau kada aban wádangiñe? Ariha wamuti san ida liña lan líderaguniwa lau duari lun wasansirun? Kaba íderaguawa lun ítarameme wamá kei múa le gayarabei laransehani Heowá? Ka katei lunbei wadisedun luéi anhein mabusenrun wabéi lun ítara wamá kei múa dereti le siñati laransehóun? Ani ida liña gayara lan hídehan agübürigu luma Heowá lun híderaguniña hasaanigu? Warihibei lidan le aban arütíkulu.