Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2016

Mígira wamá lun lachugeraguagüdüniwa hachara amu

Mígira wamá lun lachugeraguagüdüniwa hachara amu

“Ferudunagua [humá] húmawagua” (KOLOSANA 3:13).

UREMU 53, 28

1, 2. Ka meha lariñagubei Heowá libügürü haganwoundun lumutuniña?

UGUÑE weyu anihein aban sétanu hani gürigia ha hínsiñeti Bungiu houn ani busentiña heseriwidun lun. Subudiwatiña gürigia hagía kei gefentiña luagu Heowá. Inarüni chará hamá, gama lumoun adundeha lumutiña Heowá ani biní lumutiña lau lani sífiri sandu. Ariha waméi ida liña lan ladügüni.

2 Lidan irumu 1914, míbetiña gürigia ha áhuduragubaña lun Heowá. Gama lumoun kei le biní lani Heowá apurichihani, furendei hamaali saragu míñunu gürigia inarüni le tídanbei Bíbülia, ani badiseihaña kei gefentiña luagu Heowá. Ru lumuti Heowá profesía le luagu hawanserun lumutuniña: “Ha míbebañaha, hóustaruba milu; bianraü gürigia ha, ábanbaña óunwenbu néchani. Au Aburemeibei, nadügüba lun lasuseredun furese, danme lachülürün dan ligía” (Isaíasi 60:22). Chouru wamuti lagunfuliruña lan profesía le lidan wadaani. Ítara haña lubúeingu Heowá kei aban óunwenbu néchani hau hóugiñe widü míñunu gürigia. Le linarün katei, gíbetimatiña  lubúeingu Heowá sügǘ hau lílana saragu ageiraü ubouagu.

3. Ida liña harufudun lubúeingu Heowá ínsiñeni?

3 Lidan lagumuhóun dan le, íderagua laña Heowá lubúeingu lun héredagüdüni ínsiñeni le hasandirubei luagu. “Ínsiñeni Bungiu” ani busenti lun háyeihani lumutuniña (1 Huan 4:8). Ariñagati meha Hesusu houn lani disipulugu lun hínsiñegua hamá hámagua. Ariñagati giñe houn: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:34, 35). Lidan wadaani, arufudaaña lumutuniña Heowá ínsiñeni íbini dan le anihein lan wuribu. Kéiburi lidan Libiaman Wuribu Wéiriti hilatiña kéiburi 55 míñunu gürigia. Gama lumoun, máfaruntiña gefentiña luagu Heowá ni aban gürigia lidan wuribu ligía (Mikéasi 4:1, 3). Íderagua laaña katei le lun masandiragun hamá houngua ‘lau duru’ luéigiñe lita ni aban (Adügaü 20:26).

4. Ka uagu súdini lubéi ligaburi haganwoundun lumutuniña Heowá?

4 Uguñe weyu, aganwoundeina haña lumutuniña Bungiu íbini gágani hamá aban le wéiriti lubafu. Mafia ágani ligía, “lubungiute ubóu le” (2 Korintuna 4:4). Satanási gamaniharibei tau sun óundaruni lánina polítika to ubouaguboun luma burí lau programa lidan Internet, radiu o bigibigitu ani yusu lumuti katei burí le lun lálugun lararamuni apurichihani. Gama lumoun, siñaguati lungua lun lararamuni wadagimanu le. “Subudi lumuti luagu murusunrügaali lan lidaani”, ligía aba lubéi louchun ladügün lun wígiruni weseriwidun lun Heowá (Arufudúni 12:12).

ÚARAGUABADIWA SAN DANME LE HACHARARUN AMU?

5. Ka uagu anihein lubéi dan hadügün amu dañu woun? (Ariha humóun iyawaü to lídanboun lagumeseha arütíkulu).

5 Wagía lumutuniña Heowá, subudi wamuti súdini lan línsiñedun Bungiu woun hínsiñe hagíame amu gürigia woun. Ariñagati Hesusu: “‘Hínsiñela Babureme le Bubungiute bun tau sun banigi, tau sun buani luma lau sun bisaminan. Anihán gumadi wéirigutimabei, furumiñeti giñe lídangiñe sun lugumadin Bungiu. Ani le libiaman lidan uéiriguni lenege le; ítara liña: ‘Hínsiñe hamá bíbirigu bun kei bínsiñegua bungua’” (Matéu 22:35-39). Gama lumoun, ariñagatu Bíbülia gafigoun wamá ladüga lifigoun Adán (aliiha huméi Rómana 5:12, 19). Háfuga ligía adügübei lun ladügün o lariñagun somu íbiri lidan damuriguaü somu katei le gáriti woun. Kaba san wadüga? Hínsiñememebei san Heowá woun tau sun wanigi? Úaraguabadiwa san lun luma houn lumutuniña? (Ariha huméi rekuáduru “Ka mini lubéi?”). Ayanuhatu Bíbülia hawagu fiú lubúeingu Bungiu ha meha ariñagubaña o ha adügübaña katei le gáribei houn amu. Ariha waméi ka lan gayarabei wafurendeiruni lídangiñe le asuseredubei houn.

Kaba hamuga wadüga lun hamuga winwan wamá Ísüraeli lidan lidaani Elí hama lisaanigu? (Ariha huméi párafu 6).

6. Ka idan lacharara Elí?

6 Samina wamá luagun Elí. Aban meha fádiri íñuti Elí Ísüraeli, ani maganbaditiña meha lisaanigu lun lilurudun Heowá. Ariñagatu Bíbülia wuriba hamá lisaanigu Elí ani luagu mineben lan lilurudun Heowá houn (1 Samueli 2:12). Subudi lumuti meha Elí hadügüña lan lisaanigu katei hanarimeti luriban. Gama lumoun, meweridirun lumutiña kei lunti lan yebe ladügüni. Lau  lásügürün dan, bei lumuti Heowá Elí hama bián lisaanigu. Ani mígirunti lun leseriwidun ni aban hádangiñe ladügawagun Elí kei fádiri íñutimati (1 Samueli 3:10-14). Samina wamá wawinwanduña lan lidan lidaani Elí ani aba lan wíchugun fe lígiruña lan lun hadügün lisaanigu katei wuribati. Kaba hamuga wadüga? Wígiruba hamuga san lun ledebilidun wafiñen luagu Heowá? Wígiruñein hamuga san wáhuduragun lun Heowá?

7. a) Ka meha figóu wéiriti ídounbei léiguada Dawidi? b) Ka meha ladügübei Heowá?

7 Guentó, ayanuha wamá luagu Dawidi. Buiti meha ligaburi, ligía hínsiñe lubéi lun Heowá saragu (1 Samueli 13:13, 14; Adügaü 13:22). Gama lumoun, íbini Dawidi héiguati lidoun figóu wéinamuti. Lidan aban ókaasion, aba larounrun tuma lúmari aban hádangiñe lisudaranigu. Uríasi meha líribei súdara ligía ani lídanñein meha aban wuribu. Aba tadageinadun würi tuguya. Ani kei le mabusenrun lubéi Dawidi lasubudirúniwa le ladügübei, aba lóunahan luagu Uríasi lun lariñagun lun lun lan lidin lúbiñoun. Agurabati meha Dawidi lebelurun Uríasi lúbiñoun lun larounrun tuma lani weiriou. Ítara, hasaminaruña hamuga gürigia lisaani lan Uríasi irahü ligía. Gama lumoun, máhati Uríasi lidin lúbiñoun. Ligía ladügünbalin Dawidi sun aransehani lun lounwen Uríasi lidan wuribu. Dandu Dawidi kei liduheñu súfuritiña saragu luagu lifigoun (2 Samueli 12:9-12). Gama lumoun aba lagudemedagun Dawidi lun Heowá ani aba feruduna lani. Subudi lumuti busén lan meha Dawidi ladügüni le buídubei (1 Urúeigu 9:4). Lun hamuga winwan wamá meha lidan dan ligía, ida liña hamuga san wasandiragun woungua luagu  le ladügübei Dawidi? Wígiruñein hamuga san weseriwidun lun Heowá?

8. a) Ka meha füramasei magunfulirun lubéi Féduru? b) Ka meha uagu lasigira Heowá ayusurei Féduru lárigiñe óunwenbu charati le ladügübei?

8 Guentó, ayanuha wamá luagu apostolu Féduru. Anúadira lumuti meha Hesusu Féduru kei aban hádangiñe lani apostolugu. Íbini ítara, anihein meha dan adügati o ariñagati katei mabuidunti. Kéiburi lidan aban ókaasion, aba füramase lan mígirun lubéi lan Hesusu lábugua, íbini hígiruni ha híbiri (Márükosu 14:27-31, 50). Gama lumoun, dan le larügüdǘnwabei Hesusu, aba hígiruni sun apostolugu lábugua, íbini Féduru. Ani ariñagati ǘrüwa wéiyaasu ibidiñe lan Hesusu lun (Márükosu 14:53, 54, 66-72). Gama lumoun, sanditi aban óunwenbu íruni luagu le ladügübei. Ligía feruduna lubalin Heowá ani ru ligía lanwoun luadigimari. Lun hamuga disipulugu wamá lidan dan ligía ani aba hamuga waganbuni le ladügübei Féduru, wasigiruña hamuga san afiñera luagu Heowá?

Gayarati wachoururuni ladügübei lan Heowá le buídubei súnwandan

9. Ka uagu afiñe hubéi luagu lóuseruba lan Heowá lau irichaü súnwandan?

9 Ka wafurendeirubei lídangiñe hénpulu burí le? Luagu añahein lan meha fiú lubúeingu Heowá ha adügütiña katei wuribati ani barütiña saragu igarigu houn amu. Anhein asusereda katei le uguñe weyu, ábame san madamuridagunhadiwa lan? Wígirubei san weseriwidun lun Heowá ani ábame wadisedun hawéi wíbirigu? Odi waritagubei aban lan Bungiu gudemehabuti Heowá, ani líchuguña lan chansi lun gürigia ligía lun lasakürihan? Ánheinti masakürihan gürigia ligía luagu figóu wéiriti le ladügübei? Wafiñeruba san subudi lani Heowá ka lan asuseredubei ani laranserubei lan katei lidan dan? Gayarati lasagaruni gürigia ligía lídangiñe damuriguaü anhein mégeiwa lubéi. Gama lumoun mosu wafiñerun ladügübei lan Heowá le buídubei súnwandan.

ÚARAGUAMEME WAMÁ LUN HEOWÁ

10. Ka meha gunfuranda lubéi Hesusu luagu lichara Húdasi Isükarióte luma Féduru?

10 Ayanuhatu Bíbülia hawagu saragu lubúeingu Bungiu ha úaraguabaña lun luma houn lumutuniña íbini añahein lan amu adügütiña figóu wéinamuti. Hesusu íchugubalin hénpulu le buídutimabei. Dan le mosu lan lanúadiruniña duusu lani apostolugu, sügǘ lumuti sun áriebu afurieida lun Lúguchi lun líderaguni. Gama lumoun, dan lárigiñe aba lagarabaagun Húdasi Isükarióte lun. Ani ariñagati giñe apostolu Féduru luagu ibidiñe lan Hesusu lun (Lúkasi 6:12-16; 22:2-6, 31, 32). Gunfuranda lumuti meha Hesusu mama lan lidurun Heowá hama ha híbiri apostolugu le ladügübei Féduru luma Húdasi Isükarióte. Ligía aba lubéi lerederun Hesusu yarafa lun Lúguchi ani sigí ligía eseriwida lun lau úaraguni. Ábati labiniruni Heowá lau láguyuguagüdüni lídangiñe óunweni ani dan lárigiñe lau líriduni Urúeime lidan Larúeihan Bungiu sielu (Matéu 28:7, 18-20).

11. Ka meha tariñagubei Bíbülia hawagu lubúeingu Bungiu ha lúnbaña hawinwandun lidan dan le?

11 Arufudahati lani Hesusu hénpulu woun  mosu lan úaragua wamá lun Heowá luma houn lumutuniña. Ani anihein saragu resun wama lun wadügüni. Gayarati warihini ligaburi ladundehaniwa Heowá lidan lagumuhóun dan le. Íderagua lumutiwa lun wapurichihani inarüni lidan sun ubóu. Le linarün katei, wagíarügüñein adügei wadagimanu le. Ani lídanñadiwa aban ani gúndaatiwa luagu le larufudahabei Bungiu woun. Lidan aban profesía, ariñagatu Bíbülia “heremuhaba [lan lumutuniña Bungiu] ladüga ugundani le tídanbei hanigi” (Isaíasi 65:14).

Mabuidunbei hamuga wígiruni Heowá hama lumutuniña ladügarügü lachararun somu gürigia woun

12. Ida liña lunti lan warihini hachara amu?

12 Gúndaatiwa ladüga adundeha lániwa Heowá ani íderagua lumutiwa adüga saragu katei. Lidan ubóu le lani Satanási, magundantiña gürigia ani úati giñe aban emenigini buiti hama lubá ámuñegü. Ligíati, danme le hachararun amu lílana damuriguaü woun, samina wamá luagun ida luba lan warihiniña luma ida luba lan wóunabun. Mariha waméi kei aban resun lun wadisedun luéi Heowá ni hawéi lumutuniña, ladüga mabuidunbei hamuga katei le. Lubaragiñe lira, úaragua wamá lun Heowá ani sigí waméi ladundehan. Ariha waméi ida luba lan wadügüni.

IDA LUBA WÓUNABUN?

13, 14. a) Ka uagu lunti lubéi gaguraasun wamá wabaruagua? b) Ka füramasei lunbei waritaguni?

13 Ida luba wóunabun anhein ariñaga o adüga somu íbiri aban katei le gáribei woun? Ariñagatu Bíbülia moun lumuti lan wagañidun lau lufuresen (Apurichihati 7:9). Súngubei wagía gafigountiwa ani charatiwa. Ligía lunti lubéi gaguraasun wamá ani haritagua wameime aniheinbei lan dan hariñagun o hadügün wíbirigu somu katei le mabuidunti. Ani mabuidunti giñe werederun asaminara saragu luagun hachara amu, lugundun gayarabei ladügün lira lun masigirun wamá eseriwida lun Heowá lau ugundani. Ani létima wuribabei, gayarabei lan ledebilidun wafiñen ani gayarabei íbini wígirunu lóundarun Heowá. Ítara, siñabei weseriwidun lun Heowá ni wemenigidun luagu aban ibagari lidan iseri ubóu.

14 Ka gayarabei líderaguniwa lun wasigirun eseriwida lun Heowá lau ugundani dan le hachararun amu woun? Waritaguni lubuidun füramasei le ladügübei Heowá woun: “Nadügüba aban iseri sielu luma aban iseri ubóu. Labulieidúaba sun le sügühalibei, úaalime aritaguti luagun” (Isaíasi 65:17; 2 Féduru 3:13). Líchugubei Heowá abinirúni burí le woun ánhawa asigira eseriwida lun lau úaraguni.

15. Ka lariñagubei Hesusu lun wadügüni dan le hachararun amu?

15 Inarüni mebelugidiwa lan lidoun iseri ubóu. Ligíati, anhein acharara somu gürigia woun, samina wamá luagun le labusenrubei Heowá lun wadügüni. Kei hénpulu, ariñagati Hesusu: “Ánhaña feruduna humá amu luagu wuribati le adüga hamaalibei hun, feruduna lubadün giñe Húguchi Bungiu le siélubei; anhein ua feruduna humá amu, úabei  giñe feruduna lani Húguchi Bungiu hifigoun”. Ani dan le lálügüdünbalin Féduru Hesusu anhein lan mosu lubéi feruduna wamaniña amu darí “sedü wéiyaasu”, aba lariñagun Hesusu lun: “Darí ǘrüwa-wein-disedü wéiyaasu”. Arufudahati meha Hesusu woun mosu lan aranseñu wamá lun feruduna wamani hachara amu súnwandan (Matéu 6:14, 15; 18:21, 22TNM).

16. Ka buiti hénpulu líchugubei Hosé?

16 Arufuda lumuti lani Hosé hénpulu woun ida luba lan wóunabun dan le hachararun amu woun. Hosé luma lamulen hagíarügüñanu meha lisaanigu Hakobu tuma Rakeli. Gasaanigu haali meha Hakobu diisi lubaragiñe Hosé, gama lumoun hínsiñetimati meha Hosé lun sügǘ hau ha híbiri. Adügati katei le lun gimuga hamá ha híbiri lun Hosé. Wéiriti meha liyereegudun houn darí lun haluguruni kei musu. Aba lanügǘn Hosé Ehiptun. Lárigiñe saragu irumu, adügati lurúeite Ehiptu lun ligía lan libiaman wügüri gabafutimati lidan ageiraü. Gúndaati meha urúei luagu sun katei buiti le meha adüga láalibei Hosé. Saragu irumu lárigiñe, ñǘdüntiña líbirigu Hosé agañeiha éigini Ehiptu lugundun úati meha éigini hageira. Dan le harihinbalin Hosé, masubudirun hamuti. Ánheinti ligía, subudi lumutiña. Íbini wuriba lan meha hóuseruni, móuserun lumutiña wuriba. Lubaragiñe lira, aba lóuchaguniña lun larihini anhein sánsihali lubéi hagaburi. Dan le larihinbalin Hosé sansi hamaali lan hagaburi, aba lariñagun houn ligía lan Hosebei. Fiú irumu lárigiñe, aban líchugun dǘgüdaguaü houn ani aba lariñagun houn: “Manufudeda humá [...], níchuguba éigini hun luma houn hirahüñü” (Agumesehani 50:21).

17. Ida luba hóunabun danme le hachararun amu hun?

17 Haritagua waméi sun lan wagía charatiwa, ani adügatiwa giñe katei le gáriti houn amu. Ligíati, ánhawa íchiga fe charadiwa lan lun somu gürigia, falá waméi adundehani le tídanbei Bíbülia. Amuriaha wamá ferudun ani houcha wamá waransehani katei (aliiha huméi Matéu 5:23, 24). Ma hínsiñeti woun dan le feruduna hamani amu wachara? Ligía mosu lubéi feruduna wamani hachara amu. Ru lumuti Kolosana 3:13 adundehani le woun: “Gaguraasun humá hubaruagua, ferudunagua huguyame húmawagua”. Anhein inarüni lubéi hínsiñe hamá wíbirigu woun, feruduna wabéi charati le meha hadügübei woun (1 Korintuna 13:5). Ani anhein feruduna wamani hachara amu, feruduna lubadiwa giñe Heowá. Ligíati, gudemehabu wamá houn amu, ítara kei gudemehabu lan Heowá woun (aliiha huméi Sálumu 103:12-14).