Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2016

Aban igaburi kristiánu le gebegitimabei sügǘ lau déimani

Aban igaburi kristiánu le gebegitimabei sügǘ lau déimani

Wéiriti lebegi déimani houn gürigia. Anihein fiú lídangiñe séruti, ani mosu lafayeirúniwa saragu míñunu dólarü luagu. Gama lumoun anihein aban katei gebegitimati lun Bungiu sügǘ lau déimani o furumiñeguarügü amu dübü. Katei san?

 Haykanush, tugía aban würi to erederuboun luma tani weiriei Armenia. Apurichihatiña biángubei hagía íbini mabadiseirungiña lan kei gefentiña luagu Heowá. Aban weyu, aba tadarirun aban dugumedu lánina aweiyasuhani yarafa tun tuban. Daritu giñe saragu seinsu ñein tuma dugumedu tánina banku. Aba tabahüdaguni katei ligía lun tani weiriei.

Lídanñanu meha gudemei ani anihein meha dúeiti lun hafayeiruni. Gama lumoun, lubaragiñe herederun lau seinsu ligía, aba desidírü hamá houdin íchigei lidan fulasu le bürüñübei tidan dugumedu lánina aweiyasuhani. Mafiñen lumuti yebe tabureme dugumedu tuguya le larihibei. Aba tafunraguagüdüni Haykanush luma tani weiriei lun haturiahañoun lan Bíbülia ani furendei haña lan lunti lan hanügün aban ibagari harumati. Yusu hamuti chansi ligía lun hayanuhan lun hawagu gefentiña luagu Heowá luma lun híchugun agumeiraguagüdüni tídangiñetu Bíbülia houn.

Busentiña yebe iduheñu hagía híchugun seinsu tun Haykanush, gama lumoun máhatu teresibiruni. Aban weyu lárigiñe, aba tidin lani wügüri ligía weiriou arihoun Haykanush luma tani weiriei. Ani lun tarufuduni teteingiradi, aba tamuriahan tuma Haykanush lun tánharun teresibiruni aban bagü lauti déimani.

Ítara kei iduheñu ha, taweiriduña hamuga giñe hanigi saragu gürigia luagu lubuidun tóuserun Haykanush luma tani weiriei. Ágiati Heowá, aba san taweiridun lanigi? Ka lisaminanbei luagu laruman igaburi? Huuti san houn hóuserun lau irichaü?

IGABURI LE WÉIRITIMATI LEBEGI LUÉI UMEGEGUNI

Ménrengunti lounabún álügüdahani burí le. Ka uagu? Ladüga subudi hamuti lubúeingu Bungiu wéiritima lan lebegi wáyeihani ligaburi Heowá sügǘ lau golu, déimani o furumiñeguarügü umegeguni. Anihein aban katei wéiriti lebegi lun Heowá, íbini mebegi lan houn besafu gürigia (Isaíasi 55:8, 9). Wéiriti lebegi lun Heowá larihini háfaagun lubúeingu lun háyeihani ligaburi.

Kei hénpulu, ariha waméi le tariñagubei Bíbülia luagu lichú aau lidan Ariñawagúni 3:13-15: “Fuleseiwatiña gürigia ha adarirubaña lichú aau, ha ibihubaña lualin ichügü; ladüga buítimati sun lira sügǘ lau pülata; gebegitimati sügǘ lau golu. Gebegitimati lichú aau sügǘ lau dübü buíduburiti; buiti sügǘ lau katei le burí hínsiñegutimabei!”. Furanguti gebegi lan sun igaburi le lun Heowá sügǘ lau furumiñeguarügü irisini.

Ka gayarabei wariñaguni luagu wóuserun lau arumani lidan sun katei?

Harumati lóuserun Heowá lidan sun katei. Ariñagatu Bíbülia ‘meyeehan lan Bungiu’ (Titu 1:2). Ani ligía adügübei lun labürüdüni apostolu Pábulu dimurei burí le houn kristiánugu ebüréu: “Afurieida humá lun Bungiu wawagu; chouru wamuti luagu darangilañu liña lan waritagun kei busén wabéi buidu lan wóuserun lidan sun katei” (Ebüréu 13:18).

Ruti meha Hesusu aban lubuidun hénpulu lau lóuserun lau arumani súnwandan. Lidan aban ókaasion, ariñagati fádiri le íñutimabei lun: “Luagu liri Bungiu le wínwanbei nariñaguña bun lun bariñaguni inarüni. Ariñagabéi woun anhein buguya lubéi Krístubei le Liráü Bungiu”. Buiti meha lóuserun Hesusu, ani ariñagati ligía lan Mesíasibei. Ariñaga lumuti inarüni íbini subudi lani gayara lan híchugun lidurun lau hariñagun lanabaguñein lan Bungiu ani gayarati lan háfaragüdüni (Matéu 26:63-67).

Ágiati wagía? Kaba wadüga ánhawa hamuga gachansin lun wibihin somu katei anhein mariñagun wamá inarüni o ánhawa asansira somu katei lídangiñe inarüni? Wariñagamémebei san inarüni?

 KA UAGU HÉNRENGU LUBÉI LOUSERÚNIWA LAU ARUMANI?

Lidan lagumuhóun dan le, gayarati hénrengu lan louserúniwa lau arumani ladüga hawouguounrügüñein gürigia hasaminara ani hínsiñeti seinsu houn (2 Timotéu 3:2). Dan le weiri lan gudemei ani késiti wadagimanu, mebereseguntiña fiú gürigia híweruhan o hadügün furumiñeguarügü katei. Kamaniti igaburi le darí lun hasaminarun saragu gürigia ítararügüñein lan gayara lan hibihin somu katei. Íbini fiú kristiánugu óuseraaña ítara. Ani kei resultóu, aba heferidiruni lubuidun hiri lidan damuriguaü (1 Timotéu 3:8; Titu 1:7).

Gama lumoun hibe-age kristiánugu falá hamuti lani Hesusu hénpulu ani harumati hóuserun. Subudi hamuti súdinitima lan háyeihani ligaburi Bungiu sügǘ lau furumiñeguarügü irisini o amu katei le lunti hibihini. Ligía madügün habéi nibureintiña kristiánugu katei mabuidunti lun buidu lan lidin houn lidan égüsamini leskuelarugu (Ariñawagúni 20:23). Mama súnwandan weresibiruba lan afayeiruahaü luagu wóuserun lau arumani, ítara kei lasuseredun tun Haykanush. Íbini ítara,  ariñagati Bungiu buiti lan louserúniwa lau arumani. Íderagua lumutiwa katei le lun haruma lan wasaminan, aban katei le wéiriti lebegi.

Arufuda lumuti lani Gagik hénpulu buidu lan louserúniwa lau arumani. Ariñagati nadagimeinti lan meha tun aban kónpeni wéiritu lubaragiñe gefén lan luagu Heowá. Ani lun mafayeirun hamani liseinsuna gumadi, aba larufudun tabureme murusunrügü lídangiñe seinsu le hagañeirubei. Ani kei le Gagik lubéi meha arihibei tau kónpeni tuguya, lunti meha líchugun seinsu lun nadagimeinti luma urúei le achülürübei ñeinhin lun ladouragun lau marichaü le adügǘbei ñein. Kei resultóu, aba larihín Gagik kei aban wügüri le móuserunti lau arumani. Gama lumoun, aba lafurendeiruni inarüni le tídanbei Bíbülia, ani aba lamahadun lasigirun óusera lau marichaü, lau sun fayei lan luadigimari. Ábati ladügün lani bísinisi lungua. Lúmagiñe furumiñeti weyu, sagati ligaradan lani bísinisi ani fayei lumuti liseinsuna gumadi keisi lubudubu (2 Korintuna 8:21).

Ani ariñagati giñe Gagik aba lan lagumeserun agañeira lamidan le meha lagañeirubei furumiñe, ani hénrenguti lan meha lun letenirun lun sun hemegeirun liduheñu. Gama lumoun, buídutimahali lasandiragun lungua ani harumati lisaminan ligibugiñe Heowá. Ruti aban lubuidun hénpulu houn bián lisaanigu ani gániti giñe buligasion lidan damuriguaü. Ani buiti giñe liri hagibugiñe gürigia ha nadagimeinbaña luma urúei luma hagibugiñe amu gürigia ha úmabaña lawadigimarida, ladüga subudi hamuti haruma lan ligaburi.

ÍDERAGUA LUMUTIWA HEOWÁ

Hínsiñetiña gürigia ha íchugubaña inebesei lun Heowá lun ani áyeiha haméi lubuidun burí ligaburi, kéiburi lun hóuserun lau arumani (Titu 2:10). Füramaseti woun líderagubadiwa lan anhein wáyeiha ligaburi. Adügati meha Heowá lun labürühan Dawidi: “Nibureintina meha, guentó wéiyaadina, ani marihingidina láguruniña Bungiu gürigia ha buídubaña, marihin naña hasaanigu arihadiha” (Sálumu 37:25).

Samina wamá luagun tani Rudu hénpulu. Aban meha würi úaraguatu Rudu, ani mígirun tumutu tágürü tábugua íbini wéiyaaru lan. Aba tidin Rudu awinwanda tuma tágürü Ísüraeli, ñeinba lubéi meha gayara lan teseriwidun lun Bungiu le inarüniti (Rudu 1:16, 17). Aban meha würi to buiti tóuserun ani nadagimeintu meha abudaha lin türigu le hígirahan alubahatiña áraabu habá gudemetiña, kei meha lariñaguni lilurudun Moisesi. Góunigi lumutu meha Heowá Rudu tuma tágürü súnwandan, ítara kei meha ladügün luma urúei Dawidi saragu irumu lárigiñe (Rudu 2:2-18). Gama lumoun, mámarügüñein katei ligía ladüga Bungiu luagu tufulesein Rudu. Adügati giñe lun liabin urúei Dawidi luma Mesíasi hádangiñe tadügawagun (Rudu 4:13-17; Matéu 1:5, 16).

Uguñe weyu, hénrenguti houn saragu lubúeingu Bungiu hadeiruni sun le hemegeirubei lun hawinwandun. Gama lumoun, móuseruntiña lau marichaü lúnrügü hibihini le hemegeirubei. Lubaragiñe lira, áfaaguatiña lun nadagimeintiña hamá ha buítiña. Ítarati, arufuda hamuti gebegitima lan sun ligaburi Bungiu sügǘ lau furumiñeguarügü irisini (Ariñawagúni 12:24; Éfesuna 4:28).

Lidan sun ubóu, falá hamuti kristiánugu tani Rudu hénpulu, ani arufudatiña afiñe hamá luagu gayara lan lóunigiruniña Bungiu. Afiñetiña luagu füramasei le: “Nóunigirubadibu; mígirun nubadibu” (Ebüréu 13:5). Arufuda laali Heowá súnwandan lan líderaguniña ha richaguabaña. Súnwandan lagunfuliruni füramasei le ladügübei luagu líchugubei lan sun le hemegeirubei lubúeingu houn (Matéu 6:33).

Wéiriti lebegi déimani luma amu burí umegeguni houn gürigia. Ánheinti lun Wáguchi le siélubei, gebegiti lun hóuserun gürigia lau arumani luma burí amu igaburi le buiti sügǘ lau furumiñeguarügü katei le gebegiti.

Dan le wóuserun lau arumani, gayarati wapurichihan lau aban saminaü harumati.