Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sisi-hati irumu 2016

Ígiratiwa san lun lasansiruni Heowá wagaburi?

Ígiratiwa san lun lasansiruni Heowá wagaburi?

“Siñati funagia nadügün hau [...] kei ladüga nadagimeinti múa le lau lumúan?” (HEREMÍASI 18:6).

UREMU 23, 22

1, 2. a) Ka meha uagu hínsiñe lubéi ligaburi Danieli lun Heowá? b) Ka lunbei wadügüni lun gaganbadi wamá kei Danieli?

DAN le hóudinbei huríu keisi adaürǘtiña Babilónioun, aba harihin buin liña lan uburugu hau guáriua luma hau gürigia ha áhuduragutiña houn máfianu. Gama lumoun, añahein meha huríu ha úaraguatiña ani mígiruntiña lun haluguruniña babilóniana lau housan. Anihein meha Danieli hama ǘrüwa lumadagu hadan (Danieli 1:6, 8, 12; 3:16-18). Ariha hamuti gádürü nibureintiña ha Heowá keisi Nadagimeinti múa le lunbei lasansiruni hagaburi ani lúnrügüñein meha háhuduragua. Lau sun winwan lani meha Danieli lueirin-agei libagari lidan uburugu wuribati ligía, ariñagati aban ánheli lun: “Hínsiñetibu lun Wabungiute”. Lidan amu dimurei, wéiriti meha lebegi Danieli lun Heowá (Danieli 10:11, 19).

2 Lidan meha tidaani Bíbülia, gayarati meha líchuguni aban nadagimeinti múa múa lidoun aban molde lun ladügün somu katei lídangiñe. Uguñe weyu, sun kristiánugu inarünitiña subudi wamuti gabafu lan Heowá lun laranseruniña néchanigu kei auti labusenra ladüga ligía Lurúeitebei ubóu (aliiha huméi Heremíasi 18:6). Gabafuti giñe Heowá lun lasansiruni ligaburi kada aban  wádangiñe. Gama lumoun mafosurun lumutiwa lun wasansirun. Ígirarügüti lun wagía lan desidírü anhein wígiruba lubéi lun líderaguniwa asansira. Lidan arütíkulu le warihiba ida luba lan gayara lan wígirun lun líderaguniwa Heowá asansirei wagaburi. Wóunabubei ǘrüwa álügüdahani le: Ka lunbei madügün wamani anhein mabusenrun wabéi wamahadun lun ladundehan Bungiu ani lun ítara wamá kei múa le dereti? Kaba íderaguawa lun gaganbadi wamá lun Bungiu súnwandan ani lun ítara wamá kei múa le ñuluti? Ida luba gayara lan híderaguni agübürigu Heowá dan le harufudahan houn hasaanigu?

KA LUNBEI WADÜGÜNI LUN MEDEREDUN TAN WANIGI?

3. Ka katei gayarabei ladügün lun tedererun wanigi? Ru humá aban hénpulu.

3 Ariñagati Ariñawagúni 4:23 lídangiñe lan sun katei le lunbei wóunigiruni mosu lan wóunigirunu wanigi, ladüga según ka lan tídanbei wanigi ítara luba wibihini ibagari. Lun mederedun tan wanigi, mosu wadisedun luéi katei wuribati kéiburi íñuguni, figóu lánina agamariduni luma lilouguan afiñeni (ariha huméi rekuáduru “Ka mini lubéi?”). Ánhawa móunigi, gayarabei ladügün katei le lun maganbadi wamá ani lun webedaagun (Danieli 5:1, 20; Ebüréu 3:13, 18, 19). Ligía meha asuseredubei lun aban urúei Hudá gíriti Usíasi (aliiha huméi 2 Krónikasi 26:3-5, 16-21). Furumiñe, gaganbaditi meha ani buiti meha lumadagua luma Bungiu. Ligía aba lubéi ladügün Heowá lun aban lan urúei héreti. Gama lumoun dan lárigiñe “aba lanaagun lungua”. Wéiriti meha liñun lanaagun lungua darí lun lidin águdaha kupali tidan ténpulu. Dan le hariñagunbei fádirigu lun hagíarügüñanu lan gayara hágudahan kupali, aba lasafaragun. Ligía aba lubéi lǘnabudagüdüni Heowá lau ladügün lun ladagarun lépüra luagu lun sun libagari (Ariñawagúni 16:18).

4, 5. Ka gayarabei lasuseredun ánhawa móunigiragun woungua luéi íñuguni? Ru humá aban hénpulu.

4 Ánhawa móunigiragun woungua luéi íñuguni, gayarabei wasaminarun buídutima wamá hawéi ha híbiri ani ábame wamahadun weresibiruni adundehani le wibihibei tídangiñe Bíbülia (Ariñawagúni 29:1; Rómana 12:3). Samina wamá luagun aban wéiyaali lidan afiñeni gíriti Jim. Magundanti meha lau le desidírü habéi lidan aban adamuridaguni hama amu wéiyaaña lidan afiñeni. Aba lariñagun: “Aba nariñagun houn mama lan harufuduña ínsiñeni, ani aba náfuridun lídangiñe adamuridaguni”. Sisi hati lárigiñe aba láguyun lidoun amu damuriguaü, gama lumoun, míridunwati kei wéiyaali lidan afiñeni ñein. Wéiriti meha magundani le luágubei ani chouru lumuti meha garicha lan darí lun aba lan máfuridunhali lan apurichiha ani midin ligía adamuridagua luagu diisi irumu. Guentó ariha laali weiri lan íñuguni luagu lidan dan ligía darí lun líchuguni duru luagun Heowá luagu le asuseredubei. Luagu saragu irumu ñǘdüntiña meha íbirigu ayanuha luma, ani máhati leresibiruni ídemuei le híchugubei lun.

5 Ariñagati Jim siñaguati lan meha lungua lun masaminarun lan luagu le lasaminarubei wuriba lan hadügüni ha híbiri. Ka larufudahabei hénpulu le woun? Gayarati lan ladügün íñuguni lun wáluahan wadouragun lau luriban wóuserun. Anhein asusereda woun ítara, ábame mítaranhadiwa lan kei múa le ménrengunti lahandilihóun (Heremíasi 17:9). Anhein adügañahaali lubéi somu íbiri somu katei le mínsiñeti woun o anhein féridihadiwa lubéi somu chansi lánina eseriwiduni lidan damuriguaü, ida liña san wóunabun? Lau san íñuguni, o gunfuranda wamuti súdinitima lan lidan wamá darangilaü hama wíbirigu luma lun  úaragua wamá lun Heowá? (Aliiha huméi Sálumu 119:165 luma Éfesuna 4:32).

6. Ka gayarabei lasuseredun ánhawa abagarida lidan figóu?

6 Ánhawa abagarida lidan figóu ani aba waramuduni le wadügübei, háfuga hénrengubei lan woun wánharun weresibirun adundehani. Ménrenguntimahalime woun wafigouhan eibu dan. Ariñagati aban íbiri le meha adügübei katei mabuidunti, lau lan lásügürün dan aba lan masandiragunhali lan lungua wuriba luagu le ladügübei (Apurichihati 8:11). Ámuya íbiri le meha héchubei aríagua pornografía ariñagati míchuti lan fe ida liña lan lagumeserun ayanuha wuriba hawagu wéiyaaña lidan afiñeni. Ani adügati katei ligía lun lagadeirun lumadagua luma Heowá. Dan le hasubudiruni amu le ladügübei, aba lánharun lun ídemuei le híchugubei wéiyaaña lidan afiñeni lun. Inarüni súngubei lan wagía gafigountiwa ani charatiwa. Gama lumoun, ánhawa ayanuha wuriba hawagu ha íchugubaña eweridihani woun o aba lan wáluahan wadouragun lau wadurun, gayarabei tedererun wanigi. Le lunbei wadügüni wamuriahan luma Heowá lun feruduna lániwa ani lun líderaguniwa.

Hilatiña ísüraelina ha maganbadibaña lidan fulasu mageirawati ladüga hedereragüdünu hanigi ani aba harufudun lilouguan afiñeni

7, 8. a) Ida liña larufuduni hani ísüraelina hénpulu gayara lan ladügün lilouguan afiñeni lun tedererun wanigi? b) Ka wafurendeirubei?

7 Dan le háfuridunbei ísüraelina Ehiptugiñe, ariha hamuti ida liña lan meha ladügün Heowá lanarime burí milaguru. Íbini ítara, dan le yarafaaña lubéi lun Fulasu Füramasewati, aba tedererun hanigi. Ka uagu? Ladüga lilouguan hafiñen luagu Bungiu. Lubaragiñe hafiñerun luagu, aba hanufudedun ani aba hadimurehan wuriba luagu Moisesi. Darí lun hariñagun busén hamá hagiribudun Ehiptun, ñein lubéi meha músugu hamá. Wuribati meha lasandiragun Heowá lungua darí lun lálügüdahan ídaba lan lásura hóuseruni lumutuniña lau menebenehabuni (1 Lúrudu 14:1-4, 11; Sálumu 78:40, 41). Hilatiña meha ísüraelina hagía lidan fulasu mageirawati ladüga hígirun lun tedererun hanigi luma ladüga lilouguan hafiñen luagu Heowá.

8 Ka wafurendeirubei lídangiñe le? Uguñe weyu yarafatimahadiwa lun iseri ubóu, ani lóuchawaguña wafiñen. Súdiniti lun wóuchaguni wafiñen lun warihini anhein here lubéi. Ida luba wadügüni? Samina wamá luagun lani Hesusu füramasei lidan Matéu 6:33, ani álügüdagua wamá woungua: “Arufuda lumuti san le nasaminarubei nadügün luma le desidírü nubéi afiñe nan luagu lani Hesusu füramasei? Nígiruñein hamuga san nidin apurichiha o adamuridagua lúnrügü nagañeirun seinsu? Kaba san nadüga anhein agidara nuadigimari saragu dan luma erei nuéi? Nígiruba san lun ladügün ubóu wuribati le efekütu nuagu ani íbini lun mígirun lan lun nasigirun eseriwida lun Heowá?”.

9. Ka uagu mosu lubéi wasigirun achoururei anhein lídanñadiwa lubéi afiñeni, ani ida luba wadügüni?

9 Gaganbaditiwa san lun le tariñagubei Bíbülia hawagu hagübüri umadagu, luagu abugúni luma luagu isebáhari? Ánhawa maganbadi, gayarabei tedererun wanigi. Ani anhein asusereda le woun, súdiniti lun wafalaruni adundehani tídangiñeti Bíbülia le: “Aríagua humá hungua anhein derebuguñu hiña lubéi lidan  hafiñen; hóuchagua humá hungua” (2 Korintuna 13:5). Ida luba wadügüni katei le? Mosu warihini kátima lan tídanbei wanigi ani ábame wayusurunu Bíbülia súnwandan lun waranseruni ligaburi wasaminan.

ÍTARAMEME WAMÁ KEI MÚA LE ÑULUTI

10. Ka gayarabei líderaguniwa lun ítara wamá kei múa ñuluti lúhaburugu Heowá?

10 Lun líderaguniwa Bungiu lun ítarameme wamá kei múa le ñuluti, ru lumutu Bíbülia woun, damuriguaü kristiánu luma apurichihani. Íderagua lumutiwa waliihanu Bíbülia ani samina wagíame luagun le waliihabei sagü weyu lun ítara wamá kei múa le ñuluti lúhaburugu Heowá. Kéiburi houn lurúeitegu Ísüraeli, ruti meha gumadi houn lun hadügün kopia lídangiñe Lilurudun ani lun haliihani sagü weyu (2 Lúrudu 17:18, 19). Subudi hamuti meha apostolugu súdini lan haliihanu Lererun Bungiu luma hasaminarun luagun le tariñagubei lun buidu lan lidin houn lidan hapurichihan. Ligía dan le habürüdünbarün Abürüdǘni Güriegu, sagatiña saragu fánreinti lídangiñe Abürüdǘni Ebüréu. Ani dan le meha hapurichihan, ínchaha hamutiña gürigia lun haliihanu Lererun Bungiu (Adügaü 17:11). Wagía, subudi wamuti giñe súdini lan waliihanu Bíbülia sagü weyu ani samina wagíame tuagun (1 Timotéu 4:15). Íderagua lumutiwa katei le lun wasigirun óusera lau ǘnabuguni ani ígirati lun lasigirun Heowá arufudaha woun.

Yusu waméi sun le líchugubei Bungiu woun lun ítara wamá kei múa le ménrengunti lahandilihóun. (Ariha huméi párafu 10 darí 13).

11, 12. Afuranguagüda huméi lau aban hénpulu ida liña lan layusuruni Heowá damuriguaü lun lasansiruniwa según wemegeiruni.

11 Subudi lumuti Heowá ka lan lemegeirubei kada aban wádangiñe ani aba layusuruni damuriguaü kristiánu lun líderaguniwa. Samina wamá luagun Jim, íbiri le uágubei wayanuha  lidan párafu 4. Gumeseti asansirei ligaburi dan le leberesedun aban wéiyaali lidan afiñeni lau. Ariñagati Jim: “Madimurehanti wuriba nuagu ani mariñagunti giñe au lan gadurunbei luagu gádantina. Lubaragiñe lira, arihati katei buiti nuagu ani ariñaga lumuti nun tídangiñe sun lanigi busén lan líderagunina”. Kéiburi ǘrüwa hati lárigiñe, aba lamisurahani íbiri ligía lidoun aban adamuridaguni. Ariñagati Jim resibi hamuti lan íbirigu lau saragu ínsiñeni. Íderagua lumuti ínsiñeni le arufudúbei lun lun lasansiruni ligaburi lisaminan. Aba líchugun fe mama lan le lasandirubei súdinitimabei. Dandu wéiyaaña lidan afiñeni kei lani weiriou íderagua hamuti, ani murusun murusun ábaya leseriwidun lun Heowá. Sagati giñe buiti lídangiñe laliihan bián arütíkulu tídangiñe Garüdia Awisahatu, to lánina 15 lidan unsu-hati, irumu 1992, le gíribei “Jehová no tiene la culpa” (Mama lidurun Heowá) luma “Sirva a Jehová lealmente” (Seriwi humá lun Heowá lau úaraguni).

12 Lau lásügürün dan, ábaya leseriwidun Jim kei wéiyaali lidan afiñeni. Lúmagiñe dan ligía íderaguali amu íbirigu agagibudagua luma turóbuli libe le lásügürübei ani íderagua lumutiña giñe lun héredagüdüni hafiñen. Ariñagati samina lan yebe meha buidu lan lumadagua luma Bungiu, ani le linarün katei, mítaranti. Sarí lumuti aba lan lígirun lun ladügün íñuguni lun letenirun saragu lun hachara ha híbiri ani mama lun buiti le hadügübei (1 Korintuna 10:12).

Anhein wáyeiha ligaburi Kristu lidan apurichihani, busenbaña gürigia heresibiruni uganu, ani háfuga hasansirubei lan hagaburi

13. a) Ka burí igaburi wibihibei lídangiñe apurichihani? b) Ka asagarubaña buiti lídangiñe wapurichihan?

13 Gayarati giñe líderaguniwa apurichihani lun buídutima wamá. Ka uagu? Ladüga dan le wapurichihani uganu luáguti Larúeihan Bungiu, mosu warufudun ǘnabuguni luma burí igaburi le líchugubei sífiri (Galasiana 5:22, 23). Gayarati san wasaminarun luagun somu igaburi buiti le aniheinhalibei wawagu guentó seremei apurichihani? Anhein wáyeiha ligaburi Kristu lidan apurichihani, busenbaña gürigia haganbuni uganu le wanügübei, ani háfuga lasansirun ligaburi hóuseruniwa. Ariha wamá aban hénpulu. Ñǘdüntiña bián Gefentiña apurichiha túbiñe aban würi Australia. Gama lumoun, aba tagañidun würi tuguya ani aba tóuseruniña wuriba. Íbini ítara, aganba hamutu Gefentiña hagía lau inebesei. Dan lárigiñe, aba tasakürihan würi tugía ani aba tóunahan aban gárada tidoun sukursáli lun tamuriahan ferudun. Ariñagatu: “Ibidiouguati nau ladüga nararamun hagibugiñe bián gürigia ha apurichihabalin Lererun Bungiu ani aba nóuseruniña wuriba”. Arufudahati le woun mosu lan buidu lan wóuserun dan le wapurichihan. Kei aubei warihei, dandu wagía kei amu gürigia sagatiwa buiti lídangiñe wadagimanu le wadügübei, ladüga íderagua lumutiwa lun wabuiduragüdüni wagaburi.

MOSU HÍDEHAN AGÜBÜRIGU ARUFUDAHA HOUN HASAANIGU

14. Ka lunbei hadügüni agübürigu anhein busén habéi lun buidu lan lidin houn lidan harufudahan houn hasaanigu?

14 Hibe-agei irahüñü ǘnabugutiña ani busentiña hafurendeirun (Matéu 18:1-4). Ligía  lunti lubéi híderaguniña agübürigu hasaanigu afurendeirei inarüni luma lun línsiñedun houn dan le ñǘbürigiña (2 Timotéu 3:14, 15). Anhein busén habéi agübürigu lun buidu lan lidin houn lidan harufudahan houn hasaanigu, mosu giñe hínsiñebei lan inarüni houn agübürigu ani gaganbadi hagíame lun le tariñagubei Bíbülia. Ítarati, ménrenguntimabei houn hasaanigu línsiñedun inarüni houn ani gunfuranda hameime arufuda lan adundehani le híchugubei hagübürigu houn luagu hínsiñe hamá houn luma lun Heowá.

15, 16. Da le labugún aban isaani, ka lunbei hadügüni lagübürigu lun harufuduni afiñe hamá luagu Bungiu?

15 Íbini arufudaha hamani agübürigu inarüni houn hasaanigu, añahein hádangiñe aba hígiruni Heowá o aba lan habugún lídangiñe damuriguaü. Gáriti katei le houn iduheñu. Ariñagatu aban íbiri Suru lani Áfürika: “Dan le labugúnbei namulen lídangiñe damuriguaü, ítara liña meha kamá hilarügüti. Gáriti meha woun saragu”. Ka hadügübei dandu íbiri to kei tagübürigu? Gaganbaditiña lun le tariñagubei Bíbülia (aliiha huméi 1 Korintuna 5:11, 13). Subudi hamuti tagübürigu buítimati lan gaganbadi hamá lun ladundehan Bungiu. Gunfuranda hamuti abugúni lan aban lídangiñe abeichúni le líchugubei Heowá ladüga línsiñehabu. Ligía dánrügüñein lubéi anihein lan somu katei lunti laransehóun hadan iduheñu ligíarügüñein hayanuhan luma.

16 Ida liña meha lasandiragun hasaani lungua? Dan lárigiñe aba lariñagun: “Subudi numuti meha miyereegun nan houn niduheñu. Harufudarügüñein meha gaganbadi hamá lun Heowá luma tun lóundarun”. Ariñagati giñe dan le lan larihinbei lúmarügüñein lan Heowá gayara lan lamuriahan ídemuei luma ferudun, aba lan líchugun fe megei lani saragu. Dan le lagiribudunbei nibureinti ligía eseriwida lun Heowá, aba hagundaarun liduheñu. Chóuruti ánhawa lan gaganbadi lun Heowá súnwandan, buídubei lan lidin woun ani gúndaabadiwa (Ariñawagúni 3:5, 6; 28:26).

Ánhawa ǘnabugu súnwandan, gaganbadi wagíame lun Heowá, larihibadiwa kei gürigia ha wéiriti hebegi

17. a) Ka uagu mosu lubéi wadügüni lugundan Heowá súnwandan? b) Ida luba líderaguniwa katei le?

17 Ariñagati meha profeta Isaíasi hasakürihaba lan huríu ha meha Babilóniabaña, ani ábame lan hariñagun: “Lau sun lira Aburemei, buguya Wáguchibei; múa wagía, buguya nadagimeinti múa ligía, ladügün lubeiti búhabu sun wagía”. Hariñaguba lan giñe: “Aburemei, magañidabá saragu, maritagun buguya luagu wariban súnwandan. Bumutuniñatia wagía” (Isaíasi 64:8, 9). Ǘnabugu wamá súnwandan, ani gaganbadi wamá lun Heowá. Adüga waméi lugundan, ani ábame larihiniwa kei gürigia ha wéiriti hebegi, kei meha Danieli. Lasigiruba Heowá asansirei wagaburi tau Bíbülia, lau lani sífiri sandu luma tau lóundarun lun “lirahüñü” wamá ha úaraguatiña ámuñegü (Rómana 8:21).