Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sedü-hati irumu 2016

“Manufudedabá, ladüga anahein buma”

“Manufudedabá, ladüga anahein buma”

SAMINA wamá wéibuguña lan ǘmada áriebu. Sódini aba warihin lasigiruñadiwa lan somu gürigia. Dan le wararamagun, aba giñe lararamagun. Dan le wasigirun éibuga, aba giñe lasigirun. Ábati waritaguni yarafa lan ñein leredera aban wamada. Aba wéibaagun darí wachülürün lúbiñe. Dan le ladaaruni bena wabá, aba wasandirun aban óunwenbu awalidaguni ladüga subudi wamuti séfuhadiwa lan.

Gayarati masuseredunñahagili lan le woun. Gama lumoun, háfuga anihein lan amu katei lidan wabagari le adiheridagüdübaliwa. Kei hénpulu, wáfaaguña san lun wígiruni ladügǘn somu katei mabuidunti ani awanheingua ábürüha lidoun? Barühadiwa san saragu dan mawadigimariga ani hénrenguti woun wadarirun amu wadagimanu? Nidiherigüda lumutiwa san waweiyaduña lan ani wagumeseruña asandira? Anihein san amu katei adügüti lun wadiheridun?

Meberesenga ka lan wadiheribei, buiti lun gamada wamá aban le aganbubaliwa ani le busenti líderaguniwa. Gamadatiwa san aban ítarati? Anha. Heowá umadaü ligía. Gamadaguati meha Abüraámü luma Heowá, kei waliihani lidan Isaíasi 41:8-13. Lidan bérusu 10, füramaseti Heowá lun kada aban wádangiñe: “Manufudedabá, ladüga anahein buma; manufudedabá au Bubungiutebei. Rútina erei bun, íderagua numutibu, ágüdaha numutibu lau núhabu le gagañeiradibei”. Ani lidan bérusu 13 ariñagati: “Lugundun au le Bubungiute, ragǘ naali búhabu; ani ariñagaadina bun: ‘Manufudedabá, íderagua numutibu’”.

“ÁGÜDAHA NUMUTIBU LAU NÚHABU LE GAGAÑEIRADIBEI”

Ruti lererun Heowá le waliihabei tidan liliburun Isaíasi gurasu woun. Ráramaguaadiwa san asaminara luagun le füramase lubéi Heowá woun? Ariha waméi mariñagun lan bérusu wéibuguña lan louba louba Heowá ani ragüina liñalin lan wáhabu. Ariñagati bérusu le ágüdaha lumutiwa lan Heowá lau lúhabu le “gagañeiradibei” luéi wéiguadun lidoun peliguru. Dan le lágüdahaniwa lau lúhabu le gagañeiradibei, ruti erei woun lau lariñagun: “Manufudedabá, ladüga anahein buma”.

Ariha wamuti san Heowá kei aban umadaü o aban úguchili le hínsiñehabubei woun? Afiñetiwa san líderagubadiwa lan danme le gaturobulin wamá? Bereseti Heowá wau ani busenti líderaguniwa. Dan le gaturobulin wamá, busenti lun darangilu lan wasandiragun woungua. Ka uagu? Ladüga hínsiñetiwa lun saragu. “Ligía íderagubaliwa lidan nidiheri wamá” (Sálumu 46:1).

DAN LE WASANDIRAGUN WOUNGUA WURIBA LUAGU WACHARA

Añahein kristiánugu siñaguatiña houngua lun masaminarun hamá luagun charati le meha hadügübei ani aba hálügüdagun houngua anhein feruduna laaña lubéi Bungiu. Anhein ítara liña lubéi wasandiragun woungua, samina wamá luagun Hobu. Subudi lumuti meha Hobu charati lan dan  le nibureingili (Hobu 13:26). Ariñagati giñe Dawidi afigouha lan dan le meha nibureingili. Ligía lamuriahanbei luma Heowá lun maritagun lan luagun lifigoun (Sálumu 25:7). Kei le gafigoun wabéi súngubei wagía, ariñagatu Bíbülia: “Afigouhaaña sun gürigia ani díseeña luéi luéirigun Bungiu” (Rómana 3:23).

Houn meha ísüraelina labürüdǘwa dimurei le lídanbei Isaíasi 41. Adügaaña meha figóu le hanarimeti lueirin darí lun lariñagun Heowá labeichubaña lan lau ladügün lun hanügǘn Babilónioun (Isaíasi 39:6, 7). Gama lumoun, füramaseti giñe lesefurubaña lan ha asakürihabaña ani giribu hagía lun (Isaíasi 41:8, 9; 49:8). Uguñe weyu, arufudati giñe Heowá ínsiñeni luma gudemehabu houn ha asakürihabaña tídangiñe sun hanigi ani aba háfaagun lun hadügüni lugundan (Sálumu 51:1).

Samina wamá luagun aban kristiánu gíriti Takuya. * Lafaaguña meha kóntüra aba luriban échuni lánina taríawagun iyawaü luma burí bidéu lánina agamariduni luma amulidaaguni unguaü. Gama lumoun, anihein meha dan léiguadun lidoun ligiaméme. Ariñagati sandigua lan lungua kamá mebegiti ni kata. Gama lumoun dan le meha layumuragun lun Heowá lun feruduna lani, sandiguati lungua iñuragua lani Bungiu lárigiñe lábürühan lidoun figóu. Ida liña meha ladügüni Heowá katei ligía? Yusu lumutiña wéiyaaña lidan afiñeni. Ariñagatiña lun Takuya lun lan láwarun houn luéigiñe gágamuru sagü lachararun. Ariñagati Takuya hénrengu lan lun lagúarun houn, gama lumoun dan le meha ladügüni, buiti lasandiragun lungua. Aban weyu, aba hamuriahan wéiyaaña lidan afiñeni luma óunigiruti sirkuitu lun lidin abisidahei Takuya. Dan le lídinbei óunigiruti sirkuitu abisidahei, aba lariñagun lun anihán lan ñein ladüga anúadaha hamaali lan wéiyaaña lidan afiñeni lun leresibirun ídemuei. Ariñagati Takuya íbini lan lafigouhaña lan, yusu lumutiña lan Heowá wéiyaaña lidan afiñeni lun híderaguni. Lau lásügürün dan, aba lígiruni luriban échuni ani aba leseriwidun kei prekursoru. Guentó leseriwiduña tidan aban sukursáli. Íderagua lumuti Heowá íbiri le, ani líderagubadiwa giñe danme le wachararun.

DAN LE NIDIHERI WAMÁ LADÜGA LIKESIN WADAGIMANU

Añahein gürigia nidiheritiña ladüga féridi hamaali lan hawadigimari ani madaritiña amu. Ma funa lirun sun lan ñein lumuti bidin áluaha wadagimanu lariñawagún bun uá. Adügati le lun hasandiragun gürigia houngua kamá meseriwíntiña lun ni kata. Anhein asusereda katei le woun, ida liña gayara lan líderaguniwa Heowá? Háfuga madari wabéi wadagimanu le hínsiñebei woun lau lóufudagun, gama lumoun gayarati líderaguniwa lun waritaguni dimurei le lariñagubei urúei Dawidi: “Nibureintina meha, guentó wéiyaadina, ani marihingidina láguruniña Bungiu gürigia ha buídubaña, marihin naña hasaanigu arihadiha” (Sálumu 37:25). Gebegitiwa lun Heowá saragu. Ágüdaha lumutiwa lau lúhabu “le gagañeiradibei” lun wibihini sun le wemegeirubei lun weseriwidun lun.

Ida liña gayara lan líderaguniwa Heowá ánhawa eredera mawadigimariga?

Anuhein aban íbiri gíritu Sara Colombia ani ariha tumuti ida liña lan líderagunu Heowá. Nadagimeintu meha íbiri tuguya sun weyu tun aban kónpeni súdinitu ani gíbeti meha seinsu tagañeirun. Gama lumoun, busentu meha taganwoundagüdüni teseriwidun lun Heowá. Ligía aba lubéi tígiruni wadagimanu ani aba teseriwidun kei prekursora.  Kei le hénrengu lubéi tun tadeirun aban wadagimanu le lunbei líderagunu lun tasigirun eseriwida kei prekursora, aba tadararun aban talugurahagüle ice-cream. Gama lumoun, aba terederun maseinsunga ani mosu meha tadourunu tani bísinisi. Ariñagatu hénrenguti lan meha tásügürüni ǘrüwa irumu ligía, gama lumoun íderagua lumutu Heowá lun tawandun. Furendeitu kátima lan katei temegeirubei luma ka lan meha lunbei tadügüni lun madiheridun tan saragu (Matéu 6:33, 34). Lau lásügürün dan, aba lagúarun binadu tábuti tun lunya tawadigimaridun. Aba tariñagun lun tárügüdübei lan wadagimanu anhoun lígira lun tawadigimaridun lamidan weyu ani anhein íchiga üma tun lun tidin adamuridagua luma lidan adamurini wéiriti. Ánhati tábuti. Uguñe weyu, magañeiruntu Sara saragu seinsu kei meha furumiñe, gama lumoun, teseriwiduña kei prekursora. Ariñagatu ariha tani líderagunu Heowá lau ínsiñeni lidan dan hénrenguti ligía.

DAN LE NIDIHERI WAMÁ LUAGU AWEIYADUNI

Gíbetiña adiheridutiña ladüga haweiyaduña lan ani málühaña ígiragüdüwa lídangiñe wadagimanu. Aba hálügüdagun houngua anhein gaseinsunbaña lubéi le buídurügüti lun hawinwandun darangilu. Nidiheritiña giñe saragu luagu hátuadi. Háfuga urúei lan Dawidi ayumuragubei lun Heowá: “Mágurabana danme le wéiyaadina; mígirun báname danme le méreedina” (Sálumu 71:9, 18).

Kaba íderaguaña wéiyaaña lun madiheridun hamá saragu luagun dan le lunbei liabin? Mosu héredagüdüni hafiñen luagu Bungiu ani afiñe hagíame líchugubei lan sun le hemegeirubei houn. Añahein hagía adügatiña meha saragu katei dan le gibe lubéi haseinsun. Ligía mosu lubéi hafurendeirun anüga aban ibagari sensiyuti ani lun hagundaarun lau murusun katei. Gayarati íbini híchugun fe buídutima lan lun hátuadi heigin “fagudiya” sügǘ lau úi le semeeti (Ariñawagúni 15:17). Ánhawa etenira lun weseriwidun lun Heowá, ladügübei sun le mégeiwabei lun wibihini sun le wemegeirubei danme le wéiyougaadiwa.

Hosé tuma Rose luma Tony tuma Wendy

Samina wamá luagun Hosé tuma Rose, aban feru maríeitiña ha barühaña 65 irumu eseriwida lun Heowá lidan dan dayarüti. Lidan sun irumu ligía sügütiña saragu lénrengunga. Kei hénpulu, mosu meha hetenirun lun túguchi Rose, le meha mégeibei lounigirún wéyuagu áriebu. Ani mosu meha lagaranihóun lun Hosé ladüga anihein meha kánserü luagu ani mosu meha giñe libugún. Ida liña meha líderaguniña Heowá íbirigu úaraguatiña ha? Lau layusurun bián Gefentiña, Tony tuma Wendy. Anihein meha aban rumu hama ani busentiña híchuguni houn íbirigu ha eseriwidubaña lidan dan dayarüti. Haritagua lágili Tony dan le meha leskuelarugu lubéi, súnwandan meha larihiniña Hosé tuma Rose apurichiha. Hínsiñeti meha lun larihini ubebeni le aubei hapurichiha. Adügati meha katei ligía lun taweiridun lanigi. Kei le barüha lubéi Hosé tuma Rose saragu irumu eseriwida lun Heowá, aba líchuguni Tony tuma Wendy rumu ligía houn. Keinsi irumu hau guentó íderaguaña, ani 85 irumu lau Hosé tuma Rose guentó. Ariha lumuti Hosé tuma Rose Tony tuma Wendy kei aban idewesei lúmagiñeti Heowá.

Adüga lumuti Heowá füramasei le woun: “Manufudedabá, ladüga anahein buma; [...] ágüdaha numutibu lau núhabu”. Wínchubei san wáhabu lun wárügüdüni lúhabu Heowá?

^ par. 11 Sánsiwati fiú iri.