Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sedü-hati irumu 2016

Ka uagu lunti lubéi agagudúañu wamá?

Ka uagu lunti lubéi agagudúañu wamá?

“Ibidiñeti hun kaba lan oura niabin, au le Habureme” (MATÉU 24:42).

UREMU 136, 54

1. Ka uagu súdini lubéi wetenirun lun dan le ídanbei wawinwanda luma lun sun le asuseredubei geyegu wau? Ru humá aban hénpulu (ariha humóun iyawaü to lídanboun lagumeseha arütíkulu).

SAMINA wamá gumesemémeeli lan aban adamurini. Aba lawarirun alidihati sesióun luagun plataforma ani aba líchuguni lubuidun achülürüni houn sun gürigia. Aba lagumeserun músika. Subudi hamuti sun lílana adamurini óuraali lan lun houdin añuura. Busentiña haganbuni lubuidun burí uremu ani busentiña giñe haganbuni yanu burí le lunbei lichugún. Gama lumoun, añahein fiú míchutiña arigei lun le lariñagubei alidihati adamurini o míchutiña lan fe luagu gumeseeli lan músika. Kei le heteniruña lubéi lun amu katei, míchutiña fe lagumeseruña lan adamurini ani añaheingua éibuga bóugudi o ayanuha hama hamadagu. Arufuda lumuti hénpulu le le gayarabei lasuseredun ánhawa abulieidagua luéi dan le ídanbei wawinwanda luma lun le asuseredubei geyegu wau. Wéiriti lebegi arufudahani le, ladüga málühali agumesera aban katei le súdinitimati, ani mosu aranseñu wamá. Ka san uagu wayanuha?

2. Ka meha uagu lariñaga Hesusu houn lani disipulugu lun agagudúañu hamá?

2 Ariñagati meha Hesusu houn lani disipulugu lun agagudúañu  hamá ani lun aranseñu hamá lubá liabin “lagumuchagüle ubóu”. Aba lariñagun houn: “Aranseñu humá, agagudúañu, afurieida lun Bungiu; ladüga ibidiñeti hun ídaame lan lachülüra oura ligía”. Lárigiñe aba lariñagun houn saragu wéiyaasu: “Agagudúañu humá!” (Matéu 24:3; aliiha huméi Márükosu 13:32-37). Arufuda tumuti giñe liliburun Matéu ayanuha lan Hesusu houn lani disipulugu luagu katei le. Aba lariñagun houn: “Agagudúañu humá ladüga ibidiñeti hun kaba lan oura niabin, au le Habureme”. Lárigiñe, ábaya lariñagun: “Ligía aranseñu humá lubéi; ladüga leme oura magaradahan humá, ligíaba niabin” (Matéu 24:42-44; 25:13).

3. Ka uagu lunti lubéi gaganbadi wamá lun leweridihan Hesusu?

3 Wagía gefentiña luagu Heowá gaganbaditiwa lun leweridihan Hesusu. Ka uagu? Ladüga subudi wamuti wawinwanduña lan lidan “lagumuhóun dan” ani yarafaali lagumeserun “saragu asufuriruni” (Danieli 12:4; Matéu 24:21). Kei meha lariñaguni Hesusu lidan aban profesía, hapurichihañein lumutuniña Heowá uganu luáguti Larúeihan Bungiu lidan sun Ubóu. Ani kei meha giñe lariñaguni Hesusu, sagü weyu warihin wuribu, sandi, hárabaganali, gudemei luma sun luwuyeri wuribani lidan saragu fulasu. Ani gíbetimahaña lábutigu relihión ha eyeehabaliña gürigia (Matéu 24:7, 11, 12, 14; Lúkasi 21:11). Busenhadiwa lachülürün dan lun liabin Hesusu agunfulirei lubalinti Lúguchi (Márükosu 13:26, 27).

YARAFATIMAHALI WEYU LIGÍA

4. a) Ka uagu afiñe wabéi luagu subudi laali lan Hesusu ídaba lan lagumesera Arümahedón? b) Lau sun ibidiñe lan woun ídaba lan lagumesera óunwenbu asufuriruni, ka gayarabei wachoururuni?

4 Súnwandan subudi wamani kaba lan oura lagumesera adamurini. Gama lumoun, siñati wasubudiruni ídaba lan lagumesera óunwenbu asufuriruni. Dan le ya lubéi Hesusu ubouagu, ariñagati: “Ánheinti luagu weyu luma oura [...], ibidiñeti ni ka un, ni houn ánheligu ha siélubaña, ni nun, au le Liráü Bungiu; Búngiurügüñein [...] asubudirei” (Matéu 24:36). Kei le Hesusuba lubéi alidihei wuribu le gíribei Arümahedón, gayarati wasaminarun subudi laali lan ídaba lan lagumesera wuribu ligía (Arufudúni 19:11-16). Anhein wagía, ibidiñemémegili luéyuri luma lóurate liabin lagumuchagüle ubóu woun. Ligía súdini lubéi lun werederun agagudúañu. Desidírü laali Heowá kábatima lan oura lagumesera saragu asufuriruni. Ani yarafatimahali eibu dan. Kei tariñaguni Bíbülia: “Lachülürüba lidan dan” (aliiha huméi Abakúku 2:1-3). Ka uagu chouru wabalin ítara luba lan?

Desidírü laali Heowá ídaba lan lagumesera saragu asufuriruni

5. Ru humá aban hénpulu le arufudubalin súnwandan lan lagunfulirun lani Heowá profesía lidan lidaani.

5 Súnwandan lagunfulirun lani Heowá profesía lidan dan. Kei hénpulu, samina wamá luagun weyu 14 lidan hahatira huríu le gíribei nisán lidan irumu 1513 lubaragiñe Kristu. Ligía weyu ligía lasagaruniña Bungiu ísüraelina Ehiptugiñe. Dan lárigiñe, abürühati Moisesi sefu lániña Heowá lidan “weyu” ligía dan le lagumuchunbei “gádürü-san-darandi irumu” (Áfuriduni 12:40-42). Gumeseti gádürü-san-darandi irumu ligía lidan weyu 14 lidan nisán lidan irumu 1943 lubaragiñe Kristu, dan le  lagumeserunbei lani Heowá profesía agunfulira luagu labinirubaña lan ladügawagun Abüraámü (Galasiana 3:17, 18). Dan lárigiñe, aba lariñagun Heowá lun Abüraámü hawinwanduba lan ladügawagun lidan ageiraü le mama hageira, idamunibaña lan ani houserúba lan wuriba “luagu gádürü-san irumu” (Agumesehani 15:13; Adügaü 7:6). Gumeseti 400 irumu ligía lidan irumu 1913 lubaragiñe Kristu, dan le lagumeserunbei Ísümaeli adüga bula lau Isaakü. Ani gumuti weyu le lesefurunbaliña Heowá ísüraelina Ehiptugiñe (Agumesehani 21:8-10; Galasiana 4:22-29). Kei aubei warihei, desidírü laali meha Heowá saragu irumu lubaragiñe ídaba lan lesefuraña lumutuniña.

6. Ka uagu gayara lubéi wachoururuni lesefurubaña lan Heowá lumutuniña?

6 Hosué meha aban hádangiñe ha áfuridubaña Ehiptugiñe. Saragu irumu lárigiñe aba lariñagun houn ísüraelina: “Busentina lun hasubudiruni tau sun hanigi luma tau sun huani luagu gúnfulihali lan sun katei buiti le buga füramase lubéi Wabureme hun. Meredeti ni ábanrügü lídangiñe le füramase lubéi magunfulirunga” (Hosué 23:2, 14). Füramasehaali Heowá houn lubúeingu lesefurubaña lan lidan lidaani saragu asufuriruni ani líchugubei lan ibagari magumuchaditi houn lidan iseri ubóu. Gayarati wachoururuni lagunfulirubei lan lani füramasei. Ligíati, anhein busén wabéi wawinwandun lidan iseri ubóu, mosu agagudúañu wamá.

ANHEIN BUSÉN WABÉI WABAGARIDUN, MOSU AGAGUDÚAÑU WAMÁ

7, 8. a) Ka meha luadigimaribei aban óunigiruti lidan binadu dan, ani ka wafurendeirubei lídangiñe? b) Ka meha gayarabei lasuseredun anhein arumuga óunigiruti? Ru humá aban hénpulu.

7 Gayarati wafurendeirun aban katei hámagiñe wügüriña ha meha óunigirubalin uburugu lidan binadu dan. Dandu Herusalén kei amu burí uburugu anihein meha baríeiru le íñuti geyegu lau lun siñá lan hebelurun áganiñu ñeinhin. Aba meha herederun óunigirutiña rara ligibuagu baríeiru, le ñéingiñe lubéi gayara lan harihin lidoun sun fulasu geyegu hau. Ha híbiri aba meha herederun óunigirei lubenari uburugu. Sun hagía mosu meha herederun agagudúañu wéyuagu áriebu. Ani dan le harihin hayabin áganiñu, mosu meha hawisaruniña lílana uburugu (Isaíasi 62:6). Subudi hamuti meha mosu lan agagudúañu hama ani mosu meha giñe hetenirun lun sun le asuseredubei. Anhein meha madügün hamá, gayarabei meha hounwen bandi gürigia (Esekiéli 33:6).

8 Lidan irumu 70 lárigiñe Kristu, aba hebelurun súdaragu rómana Herusaléun. Ida liña hadüga? Según lariñagun aban abahüdaguti huríu gíriti Josefo, aba harumugun ha óunigirubaña luéigiñe aban louba uburugu. Ligía aba lubéi hebelurun rómana, aba hágudunu ténpulu ani aba hagünrinchaguni sun uburugu. Ítara liña lagumuchun agünrinchaguni wéiritimati le hasufurirubei huríu.

9. Ka ibidiñebei houn hiibe-agei gürigia?

9 Uguñe weyu, libe-agei ageiraü gasudaranti ani anihein amu burí katei le iseriti hama lun hóunigiruni ebelaagülei lidoun ageiraü. Ítara liña hachoururuni úabei lan ebeluruti adüga chagaguaü lidan hageira. Gama lumoun, míchutiña gumadimatiña ha fe anihein lan aban arúeihani gabafutimati sielu lúhaburugu Hesukrístu. Yarafa madise, lageindaguba arúeihani ligía hama sun urúeigu ha ubouagubaña (Isaíasi 9:6, 7; 56:10; Danieli 2:44). Busenhadiwa lun lachülürün weyu ligía ani busentiwa lun aranseñu wamá danme le lachülürün. Ligía agagudúañu waña lubéi arihei lagunfulirun  profesía burí le tídanbei Bíbülia ani sigitiwa eseriwida lun Heowá lau úaraguni (Sálumu 130:6).

MARUMUGA WAMÁ

10, 11. a) Ka lunbei wadügüni, ani ka uagu? b) Ka uagu chouru hubalin adügaali lan Mafia lun madügün hamá gürigia gasu lau profesía burí le tídanbei Bíbülia?

10 Samina wamá luagun aban óunigiruti le erederubei marumugunga bou larugan. Lidan lagumuhóun burí oura lubaragiñe larugadun wéirihali lubucha luagu, ani hénrengutimahali lun lerederun agagudúañu. Ítarameme, wawinwanduña lidan lagumuhóun dan lidan ubóu wuribati le. Ligía mosu lubéi wóunigiragun woungua lun gayara lan werederun agagudúañu. Ka uagu? Ladüga eibu wayarafadun lun lagumuchagüle ubóu, hénrengutimabei woun werederun agagudúañu. Hírubei hamuga ánhawa arumuga guentó. Ariha wamá ǘrüwa katei le gayarabei ladügün lun warumugun lidan weseriwidun lun Heowá.

11 Eyeeda lumutiña Mafia gürigia. Lubaragiñeraü lounwen Hesusu, haritaguagüda lumutiña lani disipulugu ǘrüwa wéiyaasu luagu Satanási lan “agumadihabei lidan ubóu le” (Huan 12:31; 14:30; 16:11). Yusu laali Mafia relihión mama inarüniti lun leyeeduniña gürigia. Ligía añahein lubéi bandi gürigia ha madügüntiña gasu lau profesía burí le tídanbei Bíbülia lau sun arufuda lani furangu murusunrügaali lan dan lubá lagünrinchawagun ubóu le (Sofoníasi 1:14). Furanguti “daruguaali [lan] lubungiute ubóu le lau harihin luma hasaminan” gürigia (2 Korintuna 4:3-6). Kei resultóu, gíbetiña gürigia mabusenruntiña haganbuniwa dan le wouchun wariñaguni houn yarafaali lan lagumuchagüle ubóu ani larúeihaña lan Kristu. Gíbetiña ariñagutiña: “Mabusenruntina naganbun ni kata”.

12. Ka uagu moun lumuti lubéi wígirun lun leyeeduniwa Mafia?

12 Añahein saragu gürigia mebereseguntiña lau profesía burí le tídanbei Bíbülia. Gama lumoun, moun lumuti wígirun lun ladügün hagaburi lun weferidiruni waguraasun. Subudi wamuti ka lan uagu mosu lubéi agagudúañu wamá. Ariñagati meha apostolu Pábulu houn líbirigu: “Subudi humaali buidu buidu luagu lachülürüba lan weyu ligía danme magurabúniwa lan, keisi liabin aban íweruhati áriebu” (aliiha huméi 1 Tesalónikana 5:1-6). Ani  ariñagati giñe Hesusu woun: “Aranseñu humá giñe, ladüga lídanme magaradahan humá ligíame nagiribudun ubouagun, au le Wügüri Garaüwarügüti” (Lúkasi 12:39, 40). Yarafa madise, leyeedubaña Satanási gürigia lau amu burí igaburi. Ladügüba lun hafiñerun anihein lan “darangilaü luma achoururuni”. Sódini ábame liabin luéyuri Heowá. Ibidiñebei houn gürigia kaba lan hadüga. Agia wagía? Anhein busén wabéi aranseñu wamá lubá weyu ligía, moun lumuti wígirun lun leyeeduniwa Satanási kei ladüga houn híbiri gürigia. Ligía lunti lubéi wadügüni le lariñagubei Pábulu: “Agagudúañu wamá, súruañu wagíame”. Ani lun wadügüni katei le mosu waliihanu Bíbülia sagü weyu ani samina wagíame buidu luagun le lariñagubei Heowá woun.

13. a) Ka lánibei ubóu le efekütu hawagu gürigia? b) Ka gayarabei wadügüni lun máyeihan wamani hagaburi?

13 Gadei lumuti ubóu le ligaburi hasaminarun gürigia. Uguñe weyu, gíbetiña gürigia asaminarutiña memegeirun hamá hasubudiruni Bungiu (Matéu 5:3). Lubaragiñe lira, aba hayusuruni libe-agei hadaani luma here lun hibihini katei burí le lídanbei ubóu (1 Huan 2:16). Ani gíbetimahali giñe isebáhari uguñe weyu. Adügati isebáhari burí le lun hasaminarun gürigia luágunrügü hadügüni le habusenrubei luma le hínsiñebei houn (2 Timotéu 3:4). Ani kei resultóu, aba habulieidagun luéi le súdinitimabei ani masaminaruntiña hadügün umadaguaü luma Bungiu. Ka gayarabei wadügüni lun máyeihan wamani igaburi le lídanbei ubóu le? Ariñagati Pábulu moun lumuti lan wetenirun adügei lérügü hínsiñebei woun. Ánhawa gaganbadi lun adundehani le, agagudúañu waba lidan weseriwidun lun Bungiu (Rómana 13:11-14).

Busentiwa lun ladundehaniwa lani Heowá sífiri, mama le lani ubóu

14. Ka eweridihani wadarirubei lidan Lúkasi 21:34, 35?

14 Busentiwa lun lani lan Bungiu sífiri adundehawa, mama le lani ubóu. Yusu laali Heowá lani sífiri sandu lun líderaguniwa lun gunfuranda wamani le lunbei lasuseredun yarafa madise (1 Korintuna 2:12) [1] (ariha huméi abürüdǘni lidan lagumuha arütíkulu). Gama lumoun, mosu duari wamá. Íbini katei le kamaniti ubouagu gayarati ladügün lun meseriwidun wamá lun Heowá buidu buidu (aliiha huméi Lúkasi 21:34, 35). Gayarati hariñagun fiú gürigia woun ibidiougua lan wau ladüga wafiñerun wawinwanduña lan lidan lagumuhóun dan (2 Féduru 3:3-7). Mígira wamá lun ladügün katei le lun weferidiruni waguraasun. Anihein saragu katei le arufudubalin furangu yarafaali lan lagumuchagüle ubóu. Anhein busén wabéi lun ladundehaniwa lani Bungiu sífiri sandu, mosu woudin adamuridagua súnwandan.

Wadügüñein san sun wayaraati lun werederun agagudúañu? (Ariha huméi párafu 11-16).

15. Ka meha asuseredubei lun Féduru, Santiagu luma Huan, ani ida liña gayara lan lasuseredun ligiaméme woun?

15 Adügati wadebilin lun hénrengu lan woun werederun agagudúañu. Subudi lumuti meha Hesusu gafigoun wamá ani charatiwa lan. Samina wamá luagun le asuseredubei aban guñoun lubaragiñe lounwen Hesusu. Mafigounti meha Hesusu, gama lumoun subudi lumuti meha mosu lan lamuriahan luma Heowá lun líderaguni lun úaragua lan. Aba lamuriahan Hesusu hama apostolugu Féduru, Santiagu luma Huan lun lan marumugun hamá dan le lafurieiduña  lan. Gama lumoun, míchutiña meha fe súdini lan herederun agagudúañu oura ligía. Ka asuseredubei? Kei le buchá lubéi hawagu, aba harumugun. Buchá meha giñe luagu Hesusu, gama lumoun aba lerederun marumugunga afurieida lun Lúguchi. Ligía yebe giñe lunbei hadügüni apostolugu (Márükosu 14:32-41).

16. Según Lúkasi 21:36, ka lariñagubei Hesusu lun wadügüni lun agagudúañu wamá?

16 Kaba íderaguawa lun werederun agagudúañu ani lun aranseñu wamá lubá luéyuri Heowá? Mégeitiwa lun busén wamá wadügüni le buídubei tídangiñe sun wanigi. Ani úati buídurügü lan le. Fiú weyu lubaragiñe lounwen Hesusu, ariñagati houn lani disipulugu mosu lan hasigirun amuriaha luma Heowá lun líderaguniña (aliiha huméi Lúkasi 21:36). Lun werederun agagudúañu lidan lagumuhóun dan le, mosu giñe wafurieidun súnwandan (1 Féduru 4:7).

MOSU AGAGUDÚAÑU WAMÁ

17. Ka gayarabei wadügüni lun waranserun lubá le lunbei liabin yarafa madise?

17 Ariñagati Hesusu houn lani disipulugu liábinba lan lagumuchagüle ubóu ‘le oura magaradahan hamá’ (Matéu 24:44). Ligía lunti lubéi aranseñu wamá súnwandan. Mama lidaani wáluahani katei burí le lídanbei ubóu le lani Satanási. Saminatiña lílana ubóu le gayara lan ladügün katei burí le lun wagundaarun. Gama lumoun, subudi wamuti mítaran lan. Ariñaga lumuti Heowá woun luma Hesusu ka lan lunbei wadügüni lun agagudúañu wamá. Ligíati, teni wamá lun profesía burí le tídanbei Bíbülia luma ida liña lan lagunfulirun. Sigí wamá abuiduragüdei wamadagua luma Heowá ani ru waméi Larúeihan lidan furumiñeti lúgaaru lidan wabagari. Ítara luba aranseñu wamá danme le lachülürün lagumuchagüle ubóu (Arufudúni 22:20). Haritagua waméi ligíaba lan íchiga ibagari woun.

^ [1] (párafu 14): Ariha humóun líburu El Reino de Dios ya está gobernando, kapítulu 21.