Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Sedü-hati irumu 2016

Apurichiha waméi uganu buiti luáguti línsiñehabu Bungiu

Apurichiha waméi uganu buiti luáguti línsiñehabu Bungiu

“Ni nibagari guánarügü, mebegiti ni kata nun, adügarügü naali ligía le uágubei lóunahana Bungiu lau ugundani darí lumoun lagumuhóun, lun nadimurehani uganu buiti luáguti línsiñehabu Bungiu” (ADÜGAÜ 20:24).

UREMU 10, 25

1, 2. Ida liña meha larufuduni Pábulu leteingiradi luagu lareini Bungiu?

ÉIBAAHA laaña meha apostolu Pábulu kristiánugu. Ligía subudi lubalin buidu maricha lan lun gudeme lan lun Bungiu. Ligía lariñagunbei lau sun taruman lanigi: “Meredeti areini ligía masagarunga ni kata buiti nídangiñe” (aliiha huméi 1 Korintuna 15:9, 10).

2 Murusun dan lubaragiñe lounwen, abürüha lumuti Pábulu dimurei burí le lun Timotéu: “Seremei numuti Wabureme Hesukrístu, le íchugubei ubafu nun lun wadagimanu le, luagu lanügünina keisi aban wügüri gúnfuliti, luma luagu líchugunina lun neseriwidun lun” (1 Timotéu 1:12-14). Katei meha san wadagimanu ligía? Ariñagati Pábulu houn wéiyaaña lidan afiñeni ha lídanbaña damuriguaü le Éfesubei: “Ni nibagari guánarügü, mebegiti ni kata nun, adügarügü naali ligía le uágubei lóunahana  Bungiu lau ugundani darí lumoun lagumuhóun, lun nadimurehani uganu buiti luáguti línsiñehabu Bungiu” (Adügaü 20:24).

3. Ka meha wadagimanu espechaliti leresibirubei Pábulu? (Ariha huméi dibuhu le lídanbei lagumeseha arütíkulu.)

3 Ka meha uganu buiti le lapurichihabei Pábulu? Ani ka uagu arufuda lubalin meha uganu buiti ligía weiri lan lareini Heowá? Ariñagati meha Pábulu houn kristiánugu ha Éfesubaña: “Mosu subudi humaali lan luagu ru laali lan Bungiu wadagimanu le nun lau lareini, luagu hufulesein” (Éfesuna 3:1, 2). Ru laali meha Hesusu gumadi lun Pábulu lun lapurichihan houn gürigia ha mámabaña huríu. Ariñagati meha uganu ligía gayarahali lan hebelurun gürigia hagía lidoun larúeihan Mesíasi (aliiha huméi Éfesuna 3:5-8). Apurichihati meha Pábulu lau ubebeni ani aba líchugun aban lubuidun hénpulu houn kristiánugu ha awinwandubaña uguñe weyu. Ítara liña meha larufuduni leteingiradi luagu lareini Bungiu.

ARUFUDA WAMUTI SAN WETEINGIRADI LUAGU LAREINI BUNGIU?

4, 5. Ka uagu gayara lubéi wariñagun ligiaméme lan ‘uganu buiti le luáguti larúeihan Bungiu’ luma ‘uganu buiti le luáguti línsiñehabu Bungiu’?

4 Lidan lagumuhóun dan le, ru laali Heowá gumadi woun lun wapurichihani “uganu buiti le luáguti larúeihan”. Ani mosu wagunfulirun lau wadagimanu le “lidan sun ubóu lun lasubudirúniwa lidan sun fulasu” (Matéu 24:14). Dan le wayanuhan luagu “uganu buiti le luáguti larúeihan Bungiu”, wayanuhaña luagu ‘uganu buiti le luáguti línsiñehabu Bungiu’. Ka uagu wariñagei katei le? Ladüga sun abinirúni le lunbei lanügüni Larúeihan Bungiu wibihibei ladüga lueirin lareini Heowá (Éfesuna 1:3). Arufuda lumuti meha Pábulu leteingiradi luagu lareini Bungiu lau lapurichihan lau saragu ubebeni. Wáyeihañein san Pábulu? (Aliiha huméi Rómana 1:14-16).

5 Lidan arütíkulu le lubaragiñebei le arihatiwa gayara lan wasagarun buiti lídangiñe lareini Bungiu lau sun gafigoun wamá. Ani arihatiwa giñe barǘ lan lareini Bungiu saragu buiti woun. Ligía mosu lubéi wayanuhan houn amu luagu lueirin línsiñehabu Heowá luma luagu le lunbei hadügüni lun hasagarun buiti lídangiñe línsiñehabu. Ida luba wíderaguniña amu lun harufuduni heteingiradi luagu línsiñehabu Bungiu?

AYANUHA WAMÉI UGANU LUÁGUTI LANI HESUSU SÁKÜRIFISIU

6, 7. Ka uagu gayara lubéi wariñagun dan le lan wafuranguagüdüni luáguti lebegi asalbaruni wayanuhañein lan uganu buiti luáguti lareini Bungiu?

6 Gíbetiña gürigia uguñe weyu masandiraguntiña houngua lau duru dan le hafigouhan. Ligía ua lubéi gunfuranda hamani ka lan uagu megei habalin lani Hesusu sákürifisiu. Luéigiñe amu oubaü, gíbetimahaña gürigia rúhaña fe manügün lan ligaburi hawinwandun ugundani houn. Gama lumoun, dan le hayanuhan hama gefentiña luagu Heowá, saragu hádangiñe aba gunfuranda hamani ka lan mini lubéi figóu, ida liña lan gadan lániña luma ka lan lunbei hadügüni lun mama hamá lidamun figóu. Dan le buidu tan hanigi, arufuda hamuti heteingiradi lau hafurendeirun óunaha lani Bungiu Liráü ubouagun lun lesefuruniwa lídangiñe figóu luma óunweni. Gunfuranda hamuti giñe adüga lani Heowá katei ligía ladüga lueirin línsiñehabu woun (1 Huan 4:9, 10).

7 Ariha waméi le lariñagubei Pábulu luagu Liráü Heowá: “Ligía afayeihabei wawagu lau lita, ferudunalei wafigoun según  lueirin lareini”. Ariñagati giñe Pábulu susereti lan katei le seremei lareini Bungiu (Éfesuna 1:7). Lau lani Kristu sákürifisiu larufudei Bungiu lueirin línsiñehabu luma lueirin lareini. Ruti awalidaguni woun wasubudiruni anhein lan warufuda afiñe wamá luagu lani Hesusu sákürifisiu, wibihiba lan ferudun luagu wafigoun ani harumabei giñe wasaminan (Ebüréu 9:14). Ma lubuidun ñunsu! Ma busentiwa wasubudiragüdüni houn sun gürigia?

ÍDERAGUA WAMAÑA GÜRIGIA LUN GAMADAGUA HAMÁ LUMA BUNGIU

8. Ka uagu megei habéi gürigia harandarun luma Bungiu?

8 Sun gürigia ha mafiñenbaña luagu lani Hesusu sákürifisiu ariha lumutiña Bungiu kei láganiñu. Ligía mosu lubéi wariñagun houn gayara lan gamadagua hamá luma Bungiu. Abürühati apostolu Huan: “Le afiñebei luagu Liráü Bungiu, gabagariti le magumuchaditi; ánheinti le máhabei lafiñerun luagu Liráü Bungiu, mabagaribei libe ibagari ligía [...] lábürüharügüba ligañi Bungiu luagun” (Huan 3:36). Gúndaatiwa lau wasubudiruni íderagua lániwa lani Kristu sákürifisiu lun warandarun luma Bungiu (ariha huméi rekuáduru “Ka mini lubéi”). Afuranguagüda lumuti Pábulu katei le ítara: “Láganigu meha [Bungiu] huguya tidan hanigi ladüga katei wuribati le hadügübei. Ánheinti guentó, arandaragüda laadün Bungiu lúmagua lau lounwen Kristu” (Kolosana 1:21, 22).

Mosu wariñagun houn gürigia gayara lan lumadagu hamá Bungiu

9, 10. a) Ka wadagimanu súdiniti ru láalibei Kristu houn kristiánugu anuadirúaaña? b) Ida liña híderaguniña “amu mudún” kristiánugu anuadirúaaña?

9 Ru laali Kristu wadagimanu houn kristiánugu anuadirúaaña lun ‘harandaragüdüniña sun gürigia luma’. Ariñagati Pábulu houn: “Adüga lumuti Bungiu sun katei le. Gáganiguatiwa meha luma Bungiu ladüga wafigoun, aba lóunahani Kristu lun lachibuni wafigoun, gayara láamuga warandarun luma. Ru lumuti wadagimanu ligía woun lun warandaragüdüniña sun gürigia luma. Mabahüdün lumuti Bungiu hafigoun gürigia, ani busenti harandarun sun gürigia luma lídangiñe Hesukrístu. Ru lumuti wadagimanu ligía woun lun warandaragüdüniña sun gürigia luma. Wayabiña lubeiti keisi wügüriña ha lóunahabaña Kristu, kéisigubeirügü hamuga layumuragun Bungiu guánarügü hun wádangiñe. Ayumuraguatiwa lubeiti hun luéigiñe lóubadina Kristu: Arandara humá luma Bungiu” (2 Korintuna 5:18-20).

10 Wéiriti chansi le hámabei “amu mudún” lau gayara lan híderaguniña kristiánugu anuadirúaaña lidan apurichihani (Huan 10:16). Íderagua hamutiña “amu mudún” kristiánugu anuadirúaaña lau heseriwidun kei lóunagüle Kristu. Hagía adügübalin lueirin-agei wadagimanu lánina apurichihani lau harufudahani inarüni le tídanbei Bíbülia houn gürigia. Íderagua hamutiña giñe lun lumadagu hamá Bungiu. Ligía aban fánreinti súdiniti lidan lapurichihóun “uganu buiti le luáguti línsiñehabu Bungiu”.

ARUFUDAHA WAMÁ HOUN GÜRIGIA LUAGU AGANBA LANI BUNGIU FURÍEI

11, 12. Ka uagu aban lubéi ñunsu buiti houn gürigia hasubudiruni gayara lan hafurieidun lun Heowá?

11 Gíbetiña gürigia afurieidutiña lun hasandiragun houngua buidu. Ani mama ladüga  afiñe hamá luagu aganba lániña Bungiu. Mégeitiña hasubudiruni luagu aganba lani Bungiu furíei. Lidan aban uremu, ariñagati Dawidi lun Heowá: “Aganba bumuti afurieiduni! Ñǘbuintiña sun gürigia bumoun. Héreti wariban sügǘ wau, gama lumoun feruduna bumuti wafigoun” (Sálumu 65:2, 3).

Dan le warufudahan houn gürigia ida luba lan hafurieidun, íderagua wamutiña lun lumadagu hamá Heowá

12 Ariñagati meha Hesusu houn lani disipulugu: “Líchugubei [...] Núguchi sun le hamuriahan lidan niri luma, hun” (Huan 16:23). Lau dimurei le busenti meha Hesusu lariñagun gayarati lan wamuriahan furumiñeguarügü katei luma Heowá le úarati luma lugundan. Abürühati meha Huan: “Hemenigitiwa luagu Bungiu, lugundun subudi wamuti luagu ánhawa lan amuriaha furumiñeguarügü katei keisi lugundan, laganbubadiwa lan” (1 Huan 5:14). Gúndaatiwa lau wíderaguniña gürigia gunfurandei mámarügüñein lan aban katei le adügübei lun wasandiragun woungua buidu furíei. Íderagua lumutiwa furíei lun wayarafadun “lun lálana larúeihan Bungiu le hínsiñehabubei woun” (Ebüréu 4:16). Mosu warufudahan houn gürigia lun hafurendeirun afurieida, lun hasubudiruni kaba lan un hafurieida luma ka lan lunbei hamuriahan lidan furíei. Ítara luba wíderaguniña lun lumadagu hamá Heowá luma lun hadarirun dǘgüdaguaü dan le hasufurirun (Sálumu 4:1; 145:18).

LARIHÍBA LAREINI BUNGIU LIDAN ISERI UBÓU

13, 14. a) Kaba abinirúni heresibira kristiánugu anuadirúaaña ámuñegü? b) Kaba hadüga kristiánugu anuadirúaaña hawagu gürigia?

13 Larufudatimabei Heowá lareini lárigiñeme lagumuchun ubóu wuribati le. Ida luba ladügüni? Ladügüba lun heresibirun 144,000 ha lúnbaña harúeihan luma Kristu sielu aban lubuidun abinirúni. Katei san abinirúni ligía? Ariñagati apostolu Pábulu: “Gama lumoun wéiriti wagudemen luma wínsiñe lun Bungiu; aba líchugun ibagari woun lidangiñe Kristu lau sun meha hilañugidiwa lan ladüga wafigoun. Sálbatün lubeiti luagu lareini Bungiu. Saragüda lumutiwa giñe Bungiu lídangiñe óunweni úara luma Kristu, aba larúeihagüdüniwa luma Kristu yágüta sielu. Ladügünbalin lira lun larufuduni lueirin wínsiñe lun luma lareini woun lidan Kristu Hesusu lídounme dan le lunbei liabin” (Éfesuna 2:4-7).

14 Hénrenguti woun wasaminarun luagun sun abinirúni le lunbei líchuguni Heowá houn kristiánugu anuadirúaaña danme le harúeihan luma Kristu sielu (Lúkasi 22:28-30; Filipuna 3:20, 21; 1 Huan 3:2). Larufudubei Heowá ‘lueirin lareini’ houn lidan aban igaburi espechaliti. Hounba laguarúa “Iseri Herusalén” luma “Ladari” Kristu (Arufudúni 3:12; 17:14; 21:2, 9, 10). Hídehaba luma Kristu lidan “lagaranihóun houn néchanigu”. Mini lan le híderagubaña lan gürigia lun hesefurun luéi figóu luma óunweni (aliiha huméi Arufudúni 22:1, 2, 17).

15, 16. Ida luba larufuduni Heowá lueirin línsiñehabu houn “amu mudún” lidan iseri ubóu?

15 Ariñagati Éfesuna 2:7 larufudubei lan  Bungiu lareini houn sun gürigia “lídounme dan le lunbei liabin”. Lídanme dan ligía, sun ha lúnbaña hawinwandun ya ubouagu hagundaaruba lau línsiñehabu Bungiu (Lúkasi 18:29, 30). Larufudubei Heowá lueirin lareini lau láguyuguagüdüniña hilaaña (Hobu 14:13-15; Huan 5:28, 29). Kátaña san ha lúnbaña háguyugun? Haganagua ha lúnbaña háguyugun ñéinbaña fiú lubúeingu Bungiu ha úaraguatiña ani ha óunwegubaña lubaragiñe lounwen Kristu. Háguyuguba giñe “amu mudún” ha óunwegubaña lidan lagumuhóun dan le. Súngubei hagía háguyuguba ani heseriwidayaba lun Heowá lau úaraguni.

16 Gama lumoun, háguyuguba giñe saragu míñunu gürigia ha óunwegubaña sin hasubudiruni Bungiu. Abürühati Huan: “Aba narihiniña hilaguaaña, wéinamuhaña hama ñǘbürigiña rara ligibugiñe Bungiu; aba tadaarawagun burí líburu tuma ábanya líburu, tomeme líburu to lánina ibagari. Aba haguserawagüdün hilaguaaña luagu burí katei le meha hadügübei, según le bürüwañubei tidan burí líburu tuguya. Derege lumutiña barana sun ha óunwegubaña lidan; derege laña giñe óunweni luma habara hilaaña sun hilaguaaña ha lábugiñebaña lubafu, ábati haguserawagüdün luagu burí katei le meha hadügübei” (Arufudúni 20:12, 13). Sun ha lúnbaña háguyugun gachansinbaña lun hasubudiruni Heowá ani lun hánharun lun keisi harúeite. Mósume hafurendeirun awinwanda según lúrudu le tídanbei Bíbülia luma según iseri adundehani le lunbei weresibiruni tídangiñe iseri “líburu”. Lau iseri adundehani  ligía larufudubei giñe Heowá lueirin línsiñehabu woun.

SIGÍ WAMA APURICHIHEI “UGANU BUITI”

17. Ka lunbei waritaguni dan le wapurichihan?

17 Yarafaali lagumuchagüle ubóu. Ligía súdini lubéi wapurichihani uganu buiti luáguti Larúeihan Bungiu (Márükosu 13:10). Mabulieida waméi busén wamá wíchugun uéiriguni lun Heowá lau wapurichihan. Ida luba san wadügüni? Mosu wariñaguni houn gürigia sun lan katei buiti le lunbei wibihini lidan Paraísu, wibihibei lan ladüga lanarime lareini Heowá.

Seriwi wamá lun Heowá lau ubebeni “keisi óunigirutiña buítiña” ani buidu ligíame wóuseruni idewesei le weresibirubei lúmagiñe (1 Féduru 4:10). (Ariha huméi párafu 17 darí 19).

18, 19. Ida liña weteingiruni Heowá luagu lareini?

18 Dan le wapurichihan, gayarati wafuranguagüdüni houn gürigia kaba lan asusereda danme le larúeihan Kristu ubouagu. Lidan dan ligía, hibihibei sun gürigia abinirúni le lanügübei lani Kristu sákürifisiu ani ábame agidareina lan figóu hawéi murusun murusun. Ariñagatu Bíbülia: “Anihein [...] emenigini luagu lesefuruba lan ubóu lídangiñe asufuriruni luma agadeiruni le gádanbalin lun gafanranbei lan lidan haweirigun lirahüñü Bungiu” (Rómana 8:21). Lagunfuliruba dimurei burí le seremei lueirin línsiñehabu Heowá.

19 Aban lubuidun chansi gayara lan wayanuhan houn gürigia luagu lubuidun füramasei le waliihabei lidan Arufudúni 21:4, 5. Ayanuhati bérusu burí le luagu le lunbei ladügüni Bungiu hawagu gürigia: “Laragahabei sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei”. Lúmagiñe lídangiñe lálana larúeihan Heowá, ariñagati: “Arihabá, adüga numuti sun katei iserime”. Ariñagati giñe: “Babürüha, ladüga inarüniti dimurei burí le, ani gayaraati lafiñerúniwa luagu”. Apurichiha waméi uganu buiti le lau ubebeni, ítara luba weteingiruni Heowá luagu lareini.