Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2016

Úaragua wamá lun Heowá

Úaragua wamá lun Heowá

“Amuriahaadiwa lun ñein lan Wabureme wadan luma lidan hamadagua badügawagun hama nadügawagun” (1 SAMUELI 20:42).

UREMU 139, 31

1, 2. Ka uagu súdini lubéi aba lan meha gamadagua lan Yónatan luma Dawidi ani úaragua ligía lun?

CHÓURUTI weiri tan meha lanigi Yónatan lau Dawidi. Sun liña meha láfaruni nibureinti ganigiti ligía Goliadi le hígandei ani aba lanügüni lichügü lun Saulu, le meha lurúeite Ísüraeli ani lúguchi Yónatan (1 Samueli 17:57). Chouru lumuti meha Yónatan íderagua lani Bungiu Dawidi. Lúmagiñe dan ligía, aba gamadagua lan Yónatan luma Dawidi. Füramasetiña úaraguabaña lan hóuniwagua (1 Samueli 18:1-3). Ani ligía meha asuseredubei.

2 Súdiniti aba lan ladügün Yónatan aban lubuidun umadaguaü luma Dawidi ani úaragua ligía lun. Ka uagu? Ladüga liráü lan meha urúei Saulu Yónatan. Ani ligíaba yebe meha arúeiha lárigiñe lúguchi. Gama lumoun desidírühali meha Heowá mámaba lan Yónatan arúeiha, Dawidiba lan arúeiha. Íbini ítara, úaraguamemeti Yónatan lun Dawidi. Dan le anihán lubéi Saulu áluahei Dawidi lun láfaruni, aba ladiheridun Yónatan saragu luagu lumada. Kei le subudi lubalin Yónatan anihein lan meha Dawidi lidan fulasu mageirawati Oresi, aba lidin ñein íchiga gurasu lun lun lasigirun afiñera luagu Heowá. Lariñaga lun: “Manufudedabá,  lásiñarubadibu núguchi Saulu adarira. Bachülürüba lurúeiteme Ísüraeli, aume bibiaman lidan uéiriguni” (1 Samueli 23:16, 17).

3. a) Ka meha súdinitimabei lun Yónatan sügǘ lau úaragua lan lun Dawidi? b) Ida liña wasubudiruni súdinitima lan lun Yónatan úaragua lan lun Heowá? (Ariha huméi dibuhu le lídanbei lagumeseha arütíkulu).

3 Sun wagía hínsiñetiña gürigia ha úaraguatiña woun. Gama lumoun, hínsiñeti san lani Yónatan hénpulu woun ladügarügü úaragua lan meha lun Dawidi? Uá. Hínsiñeti woun ladüga súdinitimati meha lun Yónatan úaragua lan lun Bungiu. Ligía úaragua lubéi meha lun Dawidi ani magimuganti meha lun. Íderagua lumuti Yónatan Dawidi lun lafiñerun luagu Heowá. Biángubei hagía úaraguatiña meha hóuniwagua luma lun Heowá. Gúnfuli hamuti füramasei le hadügübei hóuniwagua: “Amuriahaadiwa lun ñein lan Wabureme wadan luma lidan hamadagua badügawagun hama nadügawagun” (1 Samueli 20:42).

4. a) Ka íchugubei ugundani woun? b) Kaba wariha lidan arütíkulu le?

4 Wagía, lunti giñe úaragua wamá houn waduheñu, wamadagu luma houn wíbirigu lidan damuriguaü (1 Tesalónikana 2:10, 11). Gama lumoun, mósutima úaragua wamá lun Heowá, ladüga ligía adügübaliwa (Arufudúni 4:11). Dan le úaragua wamá lun Bungiu, gúndaatiwa ani gasuunitimati giñe wabagari. Gama lumoun, subudi wamuti mosu lan úaragua wamá lun Heowá súnwandan, íbini lidan lénrengunga. Lidan arütíkulu le warihibei ida liña lan líderaguniwa lani Yónatan hénpulu lun úaragua wamá lun Bungiu lidan gádürü katei. Furumiñe, dan le genege lan woun madüna lan aban gürigia lun wíchugun inebesei lun. Libiaman, dan le wanúadahan kaba lan un úaragua wamá. Lǘrüwan, dan le lóuseruniwa aban íbiri le íñuti lubara wuriba. Ligadürün, dan le hénrengu lan woun wagunfuliruni le füramase wabéi.

DAN LE GENEGE LAN WOUN MADÜNA LAN ABAN GÜRIGIA LE GÁMABALIN UBAFU LUN WÍCHUGUN INEBESEI LUN

5. Ka meha uagu hénrengu lubéi houn ísüraelina úaragua hamá lun Heowá dan le larúeihanbei Saulu?

5 Dandu Yónatan kei ha híbiri ísüraelina lídanñanu meha lénrengunga. Aba maganbadi haali lan lúguchi Yónatan lun Heowá. Ligía meha lariñagunbei Heowá lagidarubei lan arúeihani luéi (1 Samuel 15:17-23). Gama lumoun, ígirati meha Heowá lun larúeihan Saulu luagu fiú irumu. Kei le Saulu lubéi meha lurúeitebei Ísüraeli, ani ladügüña meha katei wuribati, hénrenguti meha houn ísüraelina úaragua hamá lun Heowá (1 Krónikasi 29:23).

6. Ida liña wasubudiruni úaragua lan meha Yónatan lun Heowá?

6 Úaraguati meha Yónatan lun Heowá. Ida liña wasubudiruni? Luagu le ladügübei murusun dan lárigiñe lagumeserun Saulu lau maganbadi lan lun Bungiu (1 Samueli 13:13, 14). Lidan dan ligía, haransehaña meha súdaragu áganiñu tau 30,000 karü lánina wuribu lun hawuribuhan hama ísüraelina. Ánhaña súdaragu ísüraelina, sisi-sánrügüñanu meha. Ani biánrügüñanu meha gárümatetiña, Saulu luma Yónatan. Gama lumoun manufudedunti Yónatan. Haritagua lágili meha le lariñagubei profeta Samueli: “Luagu liri Wabureme, mígirun lubadün” (1 Samueli 12:22). Ligía lariñagunbei Yónatan lun aban súdara: “Kei ua lubéi ni kata hénrenguti lun [Heowá], gayaraati lagañeiragüdüniwa hau saragu gürigia ítara kei hau biánrügü”. Biángubei hagía áfaratiña kéiburi 20 súdaragu áganiñu. Furanguti afiñe lan meha Yónatan luagu Heowá. Ani biní lumuti Bungiu. Adügati Bungiu lun ñein lan aban hárabaganali, ani aba hanufudedun áganiñu saragu darí lun hagumeserun áfaragua houngua hilagubei. Ítara liña  hagañeiruni ísüraelina wuribu (1 Samueli 13:5, 15, 22; 14:1, 2, 6, 14, 15, 20).

7. Ida liña meha lóuseruni Yónatan lúguchi?

7 Íbini sigí lan meha Saulu lau maganbadi lan lun Heowá, gaganbadimémeti Yónatan lun lúguchi súnwandan dan le gayara lan. Kei hénpulu, ñǘdünti luma lidan aban wuribu lun hageindagun luagu hafulesein lumutuniña Heowá (1 Samueli 31:1, 2).

8, 9. Ka uagu lunti lubéi warufudun inebesei houn ha gabafubaña?

8 Ida luba wasigiruni lani Yónatan hénpulu ani úaragua wagíame lun Bungiu? Mosu gaganbadi wamá houn gumadimatiña ha lídanbaña wageira dan le gayara lan. Ígirati Heowá lun lábugiñe wamá hererehan “gumadimatiña” ani agurabati lun inebe hamá woun (aliiha huméi Rómana 13:1, 2). Ligía gaganbadi wabéi houn sun gumadimatiña, íbini anhein adüga habéi katei le mabuidunti ani genegeti woun luagu madüna hamá lun inebewa hamá. Agurabati giñe Heowá lun inebe hamá sun gürigia ha líchugubaña lun harihin wawagu hadan iduheñu luma lidan damuriguaü woun (1 Korintuna 11:3; Ebüréu 13:17).

Úaraguatiwa lun Heowá dan le wóuseruni wani weiriei o wani weiriou lau inebesei, íbini mama hamá gefentiña luagu Heowá. (Ariha huméi párafu 9).

9 Anuhein aban íbiri Sudamérica gíritu Olga, arufudatu úaraguni lun Heowá lau tarufudun inebesei lun tani weiriei [1] (ariha huméi abürüdǘni lidan lagumuha arütíkulu). Wuribati meha lóuserunu tani weiriei. Anihein meha dan mayanuhan lan tun o aba burí lariñagun katei le mabuidunti tun ladüga aban tan gefentu luagu Heowá. Darí lun lariñagun tun lígiraaru lan ani aba lanme lanügüniña  lisaanigu. Gama lumoun, súnwandan tóuseruni lau inebesei ani magiribudagüdüntu “wuribani luagu wuribani” lun. Lubaragiñe lira, áfaaguatu lun aban tan würi buitu. Ábouguatu lun, chibaguatóun ladaüragun ani teni tuguya houn ha híbiri iduheñu (Rómana 12:17). Dan le gayara lan, aba burí tidin luma arihaña liduheñu hama lumadagu. Kéiburi dan le lóunwenbei lúguchi, aranse tumuti Olga sun katei lun tidin lidan óunweni ligía lidan amu uburugu. Kei le barüwa lubéi hilaali tidoun aban ligilisi, aba tagurabahan bóugudi darí láfuridun tani weiriei. Lárigiñe saragu irumu, aba lagumeserun óuseroun buidu. Sun le ladüga gaguraasun tan ani óuseratei lau inebesei. Guentó ariñagati tun lun lan meferidirun tani adamuridaguni ani barǘ lumutu giñe tidoun Luban Adamuridaguni. Ani anihein dan rédeiti tuma Olga lidan adamuridaguni (1 Féduru 3:1).

DAN LE MOSU LAN WANÚADAHAN KABA LAN UN ÚARAGUA WAMÁ

10. Ka íderagubalin Yónatan lun lanúadahan kaba lan un úaragua lan?

10 Dan le lariñagunbei Saulu busén lan láfaruni Dawidi hilagubei, mosu meha lanúadahan Yónatan anhein úaraguabei lubéi lun lúguchi o lun Dawidi. Hénrenguti meha katei le ladüga busenti meha Yónatan úaragua lan houn biángubei. Ka meha íderagubalin? Subudi lumuti meha líderaguñein lan Bungiu Dawidi, ani mama lan Saulu líderagubei. Ligía desidírü lubéi úaragua lan lun Dawidi. Furumiñe, wisá lumuti Yónatan Dawidi lun laramudagun, lárigiñe aba lamuriahan luma Saulu lun lan máfarun lani Dawidi (aliiha huméi 1 Samueli 19:1-6).

11, 12. Anhein hínsiñe lubéi Bungiu woun, kaba wadüga?

11 Anhein hínsiñe lubéi Bungiu woun, úaraguatimabadiwa lun sügǘ lau lun furumiñeguarügü gürigia, íbini waduheñu hamá. Ariha waméi hénpulu le tíchugubei aban íbiri australiana gíritu Alice. Mosu meha tanúadahan kaba lan un úaragua tan. Dan le tafurendeirubei tuagu Bíbülia, aba burí meha tabahüdaguni houn tiduheñu sun le tafurendeirubei. Aban weyu, aba tariñagun houn mefeduhandigia taali lan Fedu ani aba tafuranguagüdüni houn ka lan uagu. Magundantiña yebe furumiñe. Ani lárigiñe, aba hagañidun tuma saragu. Sanditiña meha mínsiñehaña lan tun. Darí lun tariñagun túguchu tun mabusenrun tan tarihinu. Ariñagatu Alice: “Gáriti meha katei ligía nun saragu, lugundun hínsiñetiña niduheñu nun. Gama lumoun, desidírühadina meha níchuguni Heowá luma Hesusu lidan furumiñeti lúgaaru lidan nibagari, ligía nabadiseirunbei lidan le aban adamurini” (Matéu 10:37).

12 Anhein hínsiñe lubéi Bungiu woun, úaraguabadiwa giñe lun lubaragiñe úaragua wamá lun furumiñeguarügü katei, kéiburi aban sétanu lánina huraraü, waleskuelan o wageira. Samina wamá luagun aban íbiri nibureingili gíriti Henry. Áhurerati meha ajedrez lidan aban sétanu le tani lileskuelan ani aranseñu liña meha lun lagañeiruni huraraü. Kei meha le sagü lubéi dimaasu láhurerun, madaaniti meha lun láfuridun apurichiha luma lun ladamuridagun. Aban weyu, aba líchugun fe úaraguati lan tun lileskuelan sügǘ lau lun Heowá. Ligía aba lubéi láfuridun lídangiñe sétanu ligía (Matéu 6:33).

13. Anhein busén wabéi úaragua wamá lun Bungiu, kaba wadüga danme le gaturobulin wamá hama waduheñu?

13 Anihein dan hénrenguti lun úaragua wamá houn bandi gürigia lidan aban. Ariha waméi le asuseredubei lun aban íbiri gíriti Ken. Ariñagati wéiyaaru lan lúguchu, ligía busén lubéi meha lun yarafaguatima lan lidin  ebeluha tumoun o lamisurahanu lun terederun luma lúbiñe. Gama lumoun, manaaguntu lúguchu tungua tuma lani weiriou. Ariñagati Ken ibidiñe lan lun kaba lan ladüga lun lagundaaragüdüniña biángubei. Busenti meha úaragua lan lun Heowá. Ligía aba lubéi lasaminarun luagu le tariñagubei Bíbülia. Ábati líchugun fe aguraba lan Heowá lun lagundaaragüdünu lani weiriou ani úaragua ligíame tun. Ligía láluahanbei laransehani katei lun lagundaaragüdünu. Lárigiñe, aba layanuhan tuma lani weiriou lun lafuranguagüdüni tun ka lan uéigiñe lunti lubéi tarufudun ínsiñehabuni tun lúguchu. Afuranguagüda lumuti giñe tun lúguchu ka lan uagu mosu lubéi inebe tan lani weiriou tun (aliiha huméi Agumesehani 2:24 luma 1 Korintuna 13:4, 5).

DAN LE LÓUSERUNIWA ABAN ÍBIRI LE ÍÑUTI LUBARA WURIBA

14. Ka meha ladügübei Saulu lun Yónatan?

14 Dan le lanúadirun Heowá aban gürigia lun lalidihan, ani ñéingiñe aba lóuseruniwa íbiri ligía wuriba, ligía aban chansi lun warufuduni úaragua wamá lun Heowá. Heowá meha anúadirubalin Saulu lun urúei lan, gama lumoun óusera lumuti Saulu liráü guánarügü wuriba. Úati gunfuranda lani ka lan uagu luéirinbei línsiñe Dawidi lun Yónatan. Ligía dan le lálugunbei Yónatan líderaguni Dawidi, aba lagañidun Saulu saragu darí lun lágawagüdüni busiganu hagibugiñe saragu gürigia. Gama lumoun, sigiti meha Yónatan arufuda inebesei lun lúguchi. Ani sigiti giñe arufuda úaraguni lun Heowá ítara kei lun Dawidi, le meha lanúadirubei Bungiu lun  larúeihan Ísüraeli leweñegua Saulu (1 Samueli 20:30-41).

15. Ánhawa lóusera somu íbiri lau marichaü, ka lunbei wadügüni?

15 Uguñe weyu, áfaaguatiña wéiyaaña lidan afiñeni lun hóuseruniña sun lílana damuriguaü buidu. Gama lumoun, kei le gafigoun habéi, háfuga aniheinbei lan dan ua lan gunfuranda hamani ka lan uagu wadüga somu katei (1 Samueli 1:13-17). Ánhawa ouserúa lau marichaü, sigí wamá arufuda úaraguni lun Heowá.

DAN LE HÉNRENGU LAN WOUN WAGUNFULIRUNI WERERUN

16. Ka burí sügǘ ídanbei mosu lan úaragua wamá lun Bungiu ani lun masaminarun wamá wawouguounrügü?

16 Busenti meha Saulu lun Yónatan lan arúeiha lárigiñe, mama Dawidi (1 Samueli 20:31). Gayarati hamuga meha lasaminarun Yónatan lun lan yu lan arúeihani ani aba hamuga láfaagun lun ligía lan ibihei. Gama lumoun, kei le hínsiñe lubéi Heowá lun ani úaraguati meha lun, gúnfuli lumuti füramasei le meha ladügübei lun lumada. Ariñagatu Bíbülia ha lan úaraguabaña lun Heowá ani hínsiñe ligía houn gúnfuli hamuti le füramase habéi íbini heferidirun (Sálumu 15:4). Kéiburi ánhawa adüga somu daradu lánina bísinisi, mosu wagunfuliruni íbini hénrengu lan woun. Ani anhein gaturobulin wabéi lidan wamarieidun, úaraguabadiwa tun wani weiriou o lun wani weiriei ladüga hínsiñe lan Heowá woun (aliiha huméi Malakíasi 2:13-16).

Ánhawa adüga bísinisi, wagunfulirubei ladüga busén wamá úaragua wamá lun Bungiu. (Ariha huméi párafu 16).

17. Ka hafurendeirubei lídangiñe arütíkulu le?

17 Ítara kei Yónatan, busentiwa úaragua wamá lun Bungiu, íbini lidan lénrengunga. Ligíati, úaragua wamá houn wíbirigu, íbini anihein lan dan hachararun woun. Ítara luba wagundaaragüdüni Heowá, ani gúndaatimabadiwa giñe (Ariñawagúni 27:11). Gayarati wachoururuni lóunigirubadiwa lan Heowá súnwandan. Lidan le aban arütíkulu wayanuhaba hawagu amu gürigia ha awinwandubaña lidan lidaani Dawidi. Warihibei añahein lan meha fiú hádangiñe úaraguatiña lun Bungiu, ani añahein amu múaraguntiña. Ani warihibei ka lan gayarabei wafurendeirun lídangiñe hani hénpulu.

^ [1] (párafu 9): Sánsiwati fiú iri.