Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2016

Seriwi humá lun Heowá lau ugundani

Seriwi humá lun Heowá lau ugundani

KA SAN weyu súdinitimabei lidan hibagari? Añahein ariñagutiña weyu lan le hamarieidunbei. Añahein amu ariñagutiña dan le lan nasirua lubéi furumiñeti hasaani. Gama lumoun chóuruti luéyuri lan habadiseirun súdinitimabei hun. Gúndaatiña meha híbirigu kristiánugu lau harihinün arufudei hínsiñe lan Heowá hun tau sun hanigi, tau sun huani, lau sun hisaminan luma lau sun here (Márükosu 12:30).

Chóuruti gunda humá eseriwida lun Heowá lau ugundani lúmagiñe habadiseirun. Gama lumoun, añahein fiú íbirigu meseriwidunhaña lun Bungiu lau saragu ugundani. Ka uagu? Ka uagu lunti lubéi wasigirun eseriwida lun Bungiu lau ugundani? Ariha waméi.

KA UAGU HEFERIDIREI FIÚ HAGUNDAN?

Gúndaagüda lumutiwa uganu luáguti Larúeihan Bungiu ladüga füramaseti Heowá woun lagumuchuba lan Larúeihan lau ubóu wuribati le yarafa madise ani ladügübei lan Ubóu ábanme paraísu. Ariñagati Sofoníasi 1:14: “Yarafaali lanarime luéyuri Wabureme”. Íbini ítara, háfuga genege lan woun darasa lan liabin luéyuri Heowá. Ánhawa asaminara ítara, gayarati weferidiruni wagundan luma ubebeni le aubei weseriwida lun Bungiu (Ariñawagúni 13:12).

Íderagua lumutiwa wásügürün dan hama wíbirigu lun weseriwidun lun Bungiu lau ugundani. Le linarün katei, háfuga lubuidun lan hagaburi lumutuniña Bungiu adügübei lun webelurun lidoun inarüni (1 Féduru 2:12). Gama lumoun, anhein adüga somu íbiri aban katei mabuidunti ani aba lererehóun lun, gayarabei weferidiruni waguraasun luma wagundan.

Ínsiñeni luagu umegeguni luma luagu seinsu ligía ábanya katei le gayarati ladügün lun weferidiruni waguraasun. Busenti Mafia luma ubóu le lun wasaminarun megei wamá katei burí le memegeirun wamuti. Haritagua waméi le lariñagubei Hesusu: “Úati ni aban gayaraati leseriwidun houn bián iyubudirigu, ladüga línsiñeduba aban hádangiñe lun, liyereegudáme le aban lun; úaraguabei luma aban hádangiñe, líchigame mebereseni luagu le aban. Siñati leseriwidúniwa lun Bungiu luma lun seinsu” (Matéu 6:24). Ánhawa áfaagua lun wibihini sun le líchugubei ubóu, meseriwidunbadiwa lun Heowá lau ugundani.

RESUN BURÍ LUN WESERIWIDUN LUN HEOWÁ LAU UGUNDANI

Dan le hínsiñe lan Heowá woun, marihin wamuti weseriwidun lun keisi aban ihürügu (1 Huan 5:3). Ariñagati Hesusu: “Higougu numoun, sun huguya ha buchaañabaña uagu lárigi huádigimari luma lihürü hanügün, emeraaguagüda náamugaün. Resibi huméi narufudahan, furendei huguyame númagiñe; lau gaguraasun nan, ñulú tuguya nanigi, ábame hadarirun emeraaguni tun huani. Ménrengunti lun heseriwidun nun, huáliti giñe anügüni le níchugubei hun lun hanügüni” (Matéu 11:28-30). Ligía gunda wabéi lau kristiánugu wamá ha inarünitiña. Furanguti gíbeti lan resun wama lun weseriwidun lun Heowá lau ugundani. Akutiha wamá ǘrüwa lídangiñe (Abakúku 3:18).

 Seriwitiwa lun Bungiu le adügübaliwa, Bungiu le gúndaabei (Adügaü 17:28; 1 Timotéu 1:11TNM). Súngubei wagía subudi wamuti Heowá lan íchugubalin wabagari woun. Wasaminarun luagun katei le líderagubadiwa lun wasigirun eseriwida lun lau ugundani, meberesenga átiri lan irumu lúmagiñe wabadiseirun.

Áfaaguati Héctor lun lasigirun apurichiha luma lun lakipuruni lemenigin luáguti Paraísu.

Ariha waméi le asuseredubei lun Héctor, aban íbiri le meha eseriwidubei luagu bián wein irumu kei óunigiruti sirkuitu. Guentó íbini wéiyaali lan, gúndaagili eseriwida lun Heowá (Sálumu 92:12-14). Sánditu lani weiriou, ligía siñá lubéi ladügün saragu kei meha ladügüni furumiñe. Íbini ítara, meferidirun lumuti lugundan. Ariñagati gari lan lun larihini wéiritimahali lan tisandin eibu dan. Íbini hénrengu lan lun lóunigirunu, mígirunti lun ladügün katei le lun leferidiruni lugundan. Dan le lasaminarun gasuuni lan Heowá lun ladügüniwa, ábatima línsiñedun lun ani busenti leseriwidun lun tau sun lanigi. Ligía aba lubéi láfaagun lun lasigirun apurichiha luma lun mabulieidun lani lemenigin luáguti Paraísu. Íderagua lumuti katei le lun lasigirun eseriwida lun Heowá lau ugundani.

Óunaha lumuti Heowá Liráü lun lounwen wawagu. Ariñagatu Bíbülia: “Wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Ánhawa afiñera luagu lubuidun idewesei lúmagiñeti Bungiu le, gayarati feruduna lani wafigoun ani ru ligíame ibagari magumuchaditi woun. Ma anihán aban resun lun geteingiradi wamá? Ladügüba weteingiradi lun Bungiu lun weseriwidun lun lau ugundani.

Desidírüti Jesús lakipurun aban ibagari sensiyuti ani seriwiti lun Heowá lau ugundani saragu irumu.

Ariñagati aban íbiri méhikuna gíriti Jesús lidamun lan meha luadigimari. Anihein meha dan luadigimaridun sin lemeraagun lúnrügü lagañeirun saragu seinsu. Gama lumoun, aba lasubudiruni Heowá ani aba lafurendeirun derege laali lan meha Liráü wawagu. Aba laweiridagun layumahan leseriwidun lun Bungiu darí lun füramase lan lun Heowá lederegerubei lan libagari lun. Ani íbini barühali lan meha 28 irumu awadigimarida tidan tuguyameme kónpeni, aba desidírü lan lígiruni luadigimari. Ítara liña meha lagumeserun Jesús eseriwida lun Bungiu lau ugundani.

Wagía kristiánugu harumati wabagari. Haritagua humagili san ida liña lan meha hibagari lubaragiñe hasubudiruni Heowá? Haritaguagüda lumuti meha apostolu Pábulu houn íbirigu rómana luagu ‘lidamunñanu lan meha figóu’ furumiñe, lárigiñe aba lidamun hamá Bungiu. Kei le haruma lubéi meha habagari, hemenigitiña hawinwandun lun súnwandan (Rómana 6:17-22). Wagía giñe gaganbaditiwa lun lilurudun Bungiu. Ligía moun lumuti lubéi wasufurirun luagu resultóu le lanügübei aban  ibagari wíyeti. Ma adügati katei le lun wasandirun ugundani?

Ariñagati Jaime gumese lan asandira saragu ugundani lúmagiñe lagumeserun eseriwida lun Heowá.

Samina wamá luagun aban íbiri gíriti Jaime. Lubaragiñe lafurendeiruni inarüni, ageindagua meha lifisiutebei. Ani mafiñenti meha luagu Bungiu, saminati meha saliguarügü lan sun katei lungua. Dan le lagumeserunbei abasiiha lidoun adamuridaguni, aba taweiridun lanigi lau larihini ínsiñeni le harufudubei íbirigu hámagua. Aba desidírü lan lasansiruni libagari, gama lumoun, mosu meha lamuriahan luma Bungiu lun líderaguni afiñera luagu. Ariñagati Jaime: “Murusun murusun aba níchugun fe aban lan Bungiu hínsiñehabuti Heowá ani gudemehabu ligía”. Ariñagati íderagua laali lan gaganbadi lan lun Bungiu. Ariñagati giñe lun lan hamuga masansirun lani ligaburi lawinwandun, hilaali hamuga kei saragu hádangiñe lánigu paaná. Ariñagati gúndaatimahali lan libagari lúmagiñe lagumeserun eseriwida lun Heowá tau sun lanigi.

MABUCHADALÁ WAWAGU

Lidan awanha lan agurabahei lagumuchagüle ubóu wuribati le, ka lunbei wadügüni? Wadügüñein lugundan Bungiu ani agurabatiwa wawinwandun lun súnwandan. Ligíati, sigí wamá afalarei adundehani le lídanbei Galasiana 6:8, 9: “Moun lumuti lubeiti labuchadun wawagu adügei katei le buídubei, lugundun ánhawa ítarameme, walubahaba buiti danme le lachülürün dan lun weresibiruni”. Afiñe wamá luagu Heowá tau sun wanigi, ani áfaagua wamá lun wawandun, lun wakipuruni igaburi le lunbei wemegeiruni lidan “óunwenbu asufuriruni” ani lun wasigirun eseriwida lun Bungiu lau ugundani (Arufudúni 7:9, 13, 14; Santiagu 1:2-4).

Ánhawa awanda, gayarabei wachoururuni labinirubadiwa lan Heowá. Ka uagu? Ladüga subudi lumuti sun le wadügübei luagu ani subudi lumuti giñe hínsiñe lan woun hínsiñe ligía liri woun. Ánhawa asigira eseriwida lun lau ugundani, wasandiraguba woungua kei Dawidi, dan le lariñagunbei: “Súnwandan anihein lan Nabureme nigibugiñe, lau Bungiu luéigiñe nóunwenren, úabei éiguadagüdütina. Ligía buin tiña lubéi nanigi lau ugundani” (Sálumu 16:8, 9).