Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2016

 ABAHÜDAGUNI LUÁGUTI IBAGARI

Íderagua láadina Heowá lun neseriwidun lun lau úaraguni

Íderagua láadina Heowá lun neseriwidun lun lau úaraguni

Anihán meha libiaman lóunahadina aban hábuti súdaragu lun nebelurun hadoun lisudaranigu Meriga. Ariñagatina lun dáüwaadina lan aban wéiyaasu ladüga midin nan ageindagua lidan aban wuribu. Aba nálügüdüni anhein hadaürayaadina lubéi.

LIDAN irumu 1926 nasirua nan Crooksville, aban aüdü Ohio (Meriga). Sédüñanu meha níbirigu. Mídindatiña meha nagübürigu ligilisirugu, gama lumoun óunaha hamutiwa súngubei wagía ligilisirugu. Tidan meha Ligilisi Metodista nidin. Dan le 14 lubéi irumu nau aba neresibirun aban idewesei tidan ligilisi ladüga merederun nan ni aban dimaasu sin nidin ligilisirugu lidan sun irumu.

Arufudaha tumuti Margaret Walker inarüni le tídanbei Bíbülia nun (habiaman luéigiñe wabaünan).

Lidan dan ligía aba tagumeserun aban wabesinan gefentu luagu Heowá abisidahoun núguchu lun tayanuhan tun tuagu Bíbülia. Margaret Walker tíribei. Aban weyu aba desidírü nan nerederun ñein aganba, gama lumoun, aba tariñagun núguchu lun lan náfuridun múnadagiñe ladüga nadarasahabei lan hayanun. Ani rédeimemetina ñein yarafa áluga naganbuni le hayanuhabei. Lárigiñe fiú dan, aba tálügüdünina Margaret anhein subudi nubalin ka lan liri Bungiu. Aba nariñagun tun subudi hamani sun mutu Bungiu lan líribei. Aba tariñagun nun lun lan náluahani Sálumu 83:18 tidan nibibülian. Aba nasubudiruni Heowá lan líribei Bungiu. Aba náfuridun éibaagueina áluahaña numadagu. Aba nariñagun houn anhein lan busén habéi hasubudiruni liri Bungiu lun lan háluahani Sálumu 83:18 tidan habibülian. Gayarati nariñagun weyu lan ligía napurichiha luagu furumiñeti wéiyaasu.

Lárigiñe, aba nagumeserun aturiahoun Bíbülia, ani lidan irumu 1941 aba nabadiseirun. Fiú dan lárigiñe, aba lichugún buligasion nun lun nalidihani taturiahóun líburu lidan damuriguaü. Aba namisurahanu núguchu hama níbirigu, ani aba hagumeserun súngubei abasiiha. Ánheinti núguchi, máhati lidin.

LAGUMESERUN NÚGUCHI ÍCHIGA LIDERE DAN

Murusun murusun aba ichugúeina lan lanwoun nuadigimari lidan damuriguaü. Anuhein meha bandi líburu numa to hadügün gefentiña luagu Heowá. Aban weyu, aba lariñagun núguchi nun lun lan nasagarunu sun líburu tuguya ani lun lan nidin múnadagiñe. Ligía giñe nadügübei. Aba nidin awinwanda lidan aban fulasu gíriti Zanesville. Gabügürüguati meha nabisidahanu núguchu hama namulenu lun níchugun erei houn.

Álugati yebe núguchi lararamunu núguchu luéi tidin adamuridagua. Anihein meha dan, dan le lamidanharu üma, aba meha lidin tárigi ani aba lachawahanu lun tagiribudun múnadoun. Ani ábaha táfuridun luéigiñe amu bena, aba tidin. Aba nariñagun tun lun lan  madiheri tan, lugundun lachülürüba lan dan lun labuchadun luagu núguchi. Lau lásügürün dan, aba lígirunu tungua ani aba gayarahali lan tidin adamuridagua lau darangilaü.

Dan le tagumeserunbei Leskuela Kristiánu lánina Apurichihani lidan irumu 1943, aba nagumeserun íchiga lirahüñü yanu lidan damuriguaü. Íderagua lumutina adundehani le meha ichugúbei nun lárigiñe niyanun lun buídutima lan nadügüni.

MÁDARAGUNTINA NUNGUA LIDOUN WURIBU

Lidan lidaani libiaman wuribu wéiriti lidan irumu 1944, aba nounahóun lun nidin asudaraha. Aba nidin arufudagua nungua tidan áfisi hani súdara Columbus (Ohio). Ñein hadüga egüsámini nun ani aba nabuinchagüdün fiú dugumedu. Gama lumoun, aba nariñagun lun hábuti súdara masudarahanbadina lan. Aba hígirunina lun nidin, ani aban weyu lárigiñe aba lachülürün aban súdara núbiñoun lun lanügünina adaürúa.

Bián dimaasu lárigiñe aba nanügǘn agusera. Aba lariñagun aguseragüdüti nun luágurügü lan, lígiruñadina lan hamuga furisunrugu darí nounwen. Aba lálügüdünina anhein anihein lubéi lunti nariñaguni. Aba nariñagun lun: “Anha. Minisi lani Bungiu au. Apurichihatina houn gürigia hábiñe ani apurichihaadina houn besafu luagu Larúeihan Bungiu”. * (Ariha huméi abürüdǘni). Ábati larihin aguseragüdüti hawagun lílana liñun-agei lúrudu, aba lariñagun houn: “Mama hiábiña ya lun hasubudiruni anhein lílana lubéi somu relihión nibureinti le. Hiábiña lun hasubudiruni anhein maha lubéi lóundarun hanwoun lisudaranigu wageira”. Lubaragiñe dimí oura, aba hariñagun gadurun nan. Aba nasiadirún lun nadaürǘn luagu seingü irumu furisunrugu Ashland (Kentucky).

GÓUNIGI LUMUTINA HEOWÁ FURISUNRUGU

Sügǘ numuti furumiñeti bián dimaasu tidan aban furisun Columbus. Le furumiñeti weyu máfuriduntina tídangiñe rumu le ñeinhin lubéi nadaürǘwa. Ñein nafurieida lun Heowá ani aba nariñagun lun mawandunbadina lan nerederun seingü irumu tidan rumu tuguya ani ibidiñeti lan nun kaba lan nadüga.

Le libiaman weyu, aba hígirunina óunigirutiña lun náfuridun tídangiñe rumu tuguya. Aba néibugun ñeinhin lubéi aban adaürǘti gágubuti ani héreti. Aba waríagun wawouguoun lídangiñe aban funedera. Aba lálügüdünina: “Agia amürü ñüraü túgubu, ka uagu badaürǘwa?”. Aba nariñagun lun gefentina lan luagu Heowá. Aba lariñagun nun: “Luáguti le badaürǘwa?”. Aba nafuranguagüdüni lun midin wamá wagía gefentiña luagu Heowá awuribuha ani máfarahan wamá. Aba lariñagun nun: “Daü hamutiña mutu ha gürigia ladüga háfarahan. Ánheinti amürü abunha ya ladüga mabusenrun ban báfarun ni aban gürigia. Garichati san le?”. Aba nariñagun: “Marichati”.

Paul meha liri adaürǘti ligía. Abahüdahati nun barühali lan meha 15 irumu furisunrugu. Ñein lan laliiha fiú tídangiñe wani agumeiraguagüdüni. Dan le naganbunbalin katei le, aba namuriahan luma Heowá lun ladügün lun luéigiñe lan nóubadina wügüri ligía. Ouraméme ligía aba lariñagun Paul nun: “Anhein aguura somu gürigia buagu waguabá. Auba ariha luagu”. Sun dan le naubei ñein maturobulintina hama ni aban hádangiñe 50 adaürǘtiña ha lídanbaña seksióun le ñein nubéi.

Au hama amu Gefentiña tidan aban furisun Ashland (Kentucky) ladüga midin wamá awuribuha.

 Lárigiñe, aba nanügǘn tidoun furisun to lídanboun fulasu le gíribei Ashland. Ñein nasubudira fiú íbirigu ha lǘhaña lidan inarüni ani hadaürǘña meha ñein. Hagía íderagubalina ani íderagua hagía amu íbirigu lun wakipurun aban lubuidun umadaguaü luma Heowá. Ábaha hariñagun woun lun waliihan somu fánreinti tídangiñe Bíbülia lidan aban dimaasu, ani lárigiñe aba wadügün somu huraraü lau álügüdahani luma óunabagülei le tídangiñeti Bíbülia. Tídanñadiwa meha aban rumu wéiritu to ñein tubéi bandi gabana luagu sun touba muna. Aban íbiri adügübei aransehani lun wapurichihan furisunrugu. Aba burí lariñagun nun: “Robison, buguyaba apurichiha tidan gabana burí tura tuma burí túguta. Houchabá bapurichihan houn ha ñéinbaña lubaragiñe houdin”. Ítara liña wadüga lun wapurichihan.

NÁFURIDUN FURISUNRUGUGIÑE

Lidan irumu 1945 lagumucha Libiaman Wuribu Wéiriti, gama lumoun, lǘtina lubá náfuridun furisunrugúgiñe. Nidiheritina meha hawagu niduheñu, ladüga ariñagati meha núguchi nun ánhana lan ua ñein, gayarabei lan ladügün lun hígiruni ha híbiri niduheñu taturiahóun Bíbülia. Gama lumoun lárigiñe náfuridun, aba nadunragun luma aban katei le anügübei saragu ugundani nun. Íbini merederun lan líchugun núguchi lidere dan, sedü hádangiñe niduheñu habasihaña meha adamuridagua ani aban hádangiñe nítunu badiseiharu meha.

Napurichihaña luma Demetrius Papageorge, aban íbiri kristiánu anuadirúaali le agumeserubei eseriwida lun Heowá lúmagiñe irumu 1913.

Lidan irumu 1950 aba lagumeserun wuribu Corea. Kei le anihein lubéi meha Meriga lidan wuribu ligía, ábaya hariñagun nun lun nidin arufudagua nungua tidan áfisi to hani súdara Columbus. Lárigiñe hóuchagunina, aba lariñagun aban hábuti súdaragu nun au lan aban hádangiñe ha buídutimabaña hadan nánigu paaná. Aba nariñagun lun buidu lan, gama lumoun, masaminarun nan nasudarahan. Lárigiñe aba naliihani 2 Timotéu 2:3 lun ani aba nariñagun lun: “Lisudaran Kristu au”. Aba lámanichagun, lárigiñe aba lariñagun nun gayarahali lan nidin.

Murusun dan lárigiñe aba woudin lidan aban adamurini Cincinnati (Ohio). Ñein nidin lidan aban adamuridaguni le adügǘbei houn ha busenbaña heseriwidun Betelirugu. Lidan adamuridaguni ligía aba lariñagun íbiri Milton Henschel mégeiwa hamá íbirigu ha busentiña hawadigimaridun luagu Larúeihan Bungiu. Aba nabuinchagüdün aban gárada ani aba hánharun nun. Gumesetina eseriwida Betelirugu Brooklyn lidan widü-hati irumu 1954, ani lúmagiñe dan ligía ñéinñadina darí guentó.

Súnwandan gibe lan nuadigimari Betelirugu. Nadagimeintina tuagu burí máhina to lánina imprimírua tan agumeiraguagüdüni luma tidan áfisi. Nadagimeintina giñe tidan Luban Adamurini uburugu Nueva York.

Nawadigimariduña tidan Beteli Brooklyn.

Hínsiñeti programa le wafalarubei Betelirugu nun, kéiburi áhuduraguni le lánina binaafin luma taturiahóun Garüdia Awisahatu keisi iduheñu. Hínsiñeti giñe nun napurichihan hama lílana damuriguaü. Anihán katei burí le yebe lunbei hadügüni sun kristiánugu. Lunti haliihanu agübürigu bérusu lánina sagü weyu hama  hasaanigu, háhuduragun lun Bungiu keisi iduheñu, híchugun óunabagülei buiti lidan adamuridaguni luma hapurichihan lau ubebeni. Anhein hadüga, gayarabei hadügün aban umadaguaü buiti luma Heowá.

Gíbeeña numadagu Betelirugu luma lidan damuriguaü. Fiú hádangiñe kristiánugu meha anuadirúaaña ani guentó añahein sielu. Ha híbiri mama kristiánugu anuadirúaaña. Gama lumoun sun wagía le eseriwidubei lun Heowá gafigountiwa, íbini ha eseriwidubaña Betelirugu. Ligíati, anhein gaturobulin nubéi luma aban íbiri, áfaaguatina lun naransehani súnwandan. Saminatina luagun le lariñagubei Matéu 5:23, 24, ariñawagúati woun ñein ida luba lan waransehani turóbuli burí le. Libe-agei aranserúati láurügü bariñagun “sarí numuti”, íbini anihein lan dan hénrengu lan.

BINÍ LÁADINA HEOWÁ

Kei le wéiyaadina lubéi, hénrengu haali nun nidin apurichiha muna tuagu muna. Ani meredetina múnada. Furendeihadina ayanuha murusun cheiní, ani hínsiñeti nun napurichihan houn cheiní ha nadarirun ǘmadarugu. Buiti lidin nun ani anihein binaafin deregetina 30 o 40 garüdia.

Napurichihaña houn cheiní Brooklyn (Nueva York).

Darí lun abisidahaadina lan aban gürigia to awinwanduboun China. Ida liña gayara lan lasuseredun le? Aban weyu, tafarenhaña meha aban nibureintu agumeiraguagüdüni tani aban talugurahagüle furuda aba tarihinina ani aba táhayachun nuagun. Aba giñe náhayachun tuagun aba nariñagun tun anhein busén tubarun Garüdia Awisahatu tuma ¡Despertad! lidan cheiní. Aba teresibirunu ani aba tariñagun nun Katie lan tíribei. Lúmagiñe weyu ligía sagü tarihinina ǘmada aba tiabin ayanuha numa. Arufudaha numuti tiri fiú furuda tuma verdura tun lidan niñeñe. Afuranguagüdatina giñe fiú bérusu tídangiñeti Bíbülia tun ani aba níchugunu líburu Kátima san tun. Gama lumoun lárigiñe fiú dimaasu aba marihindigianaaru lan.

Fiú hati lárigiñe ábaya níchugunu garüdia tun amu nibureintu cheiní to afanreihaboun gárada lau ñunsu luáguti ebegidinaü. Dan le narihinbarun aban dimaasu lárigiñe, aba tíchuguni tinumerun nun, aba tariñagun nun: “Báwarame nageiroun China”. Aba nariñagun tun ibidiñe lan ni aban gürigia nun ñein. Ábati téredun nuagu. Ligía aba lubéi nagúarun. Aba tóunabunina aban gürigia, aba tariñagun: “Katie nuguya. Anahán ya China”. Aba tafuranguagüdüni nun tamulelua lan nibureintu to íchugubalin linumerun tani gágamuru nun. Lárigiñe aba tamuriahan numa lun lan giñe narufudahani ligiaméme katei le narufudahabei tun tun tamulelua. Aba nariñagun tun nadügübei lan sun niyaraati, ani aba níchugun seremei tun luagu tariñaguni nun halíañoun lan. Murusun dan lárigiñe aba nayanuhan tuma tamulelua Katie lagumuhóun wéiyaasu. Ani guentó ibidiñeti nun halíañoun lan. Agurabatina lun hasigirun afurendeira luagu Heowá.

Barühadina 73 irumu lúmagiñe nagumeserun eseriwida lun Heowá. Ani wéiriti neteingiruni luagu líderagunina lun machararun nan lun lidan sun dan le naubei adaürǘwa. Ariñagatiña namulenu nun ruti lan dǘgüdaguaü houn harihini ida liña lan nasigirun nubaruaguóun lau sun líchugun núguchi lidere dan nun. Lau lásügürün dan, aba tabadiseirun núguchu hama sisi hádangiñe níbirigu. Íbini núguchi sánsiti ligaburi murusun ani ñǘdünti meha fiú wéiyaasu adamuridagua lubaragiñe lounwen.

Anhein busén Bungiu, lagiribudagüdübei habagari niduheñu ha hilaañabaña houn lun hawinwandun lidan Paraísu. Buídubei danme lachülürün dan lun wáhuduragun lun Heowá lidan aban lun súnwandan. * (Aliiha huméi abürüdǘni).

^ par. 14 Mama meha mosu hasudarahan minisi lani relihión Meriga.

^ par. 32 Hilati Corwin Robison úaragu lun Heowá dan le laransehóuña lubéi abahüdaguni le.