Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2016

Wati Heowá lun “numada”

Wati Heowá lun “numada”

“Aganbabána Ísüraeli, lílana Hakobu, eseriwiduti nun le nanúadirubei, gürigia ladügawagun numada Abüraámü” (ISAÍASI 41:8)

UREMU 51, 22

1, 2. a) Ida liña wasubudiruni gayara lan gamadagua wamá luma Bungiu? b) Kaba wariha lidan arütíkulu le?

LÚMAGIÑE nasirua wamá darí lun wóunwegun, ínsiñenitima wemegeirubei. Mégeitiwa wagía gürigia umadagu buítiña ha arufuduti hínsiñe wamá houn, mámarügüñein libe ínsiñeni le lasandirubei aban wügüri tuagu aban würi wemegeira. Gama lumoun, mégeitima wamuti lumadagu wamá Bungiu luma lun wasandiruni línsiñehabu. Gíbetiña gürigia asaminarutiña siñati lan lasuseredun le, ladüga marihínwa lan Bungiu ani weiri lan lubafu. Ánheinti wagía, subudi wamuti gayara lan lumadagu wamá Heowá.

2 Ida liña wasubudiruni? Ladüga ayanuha tan Bíbülia hawagu gürigia ha meha gamadaguabaña luma Bungiu. Buiti lun wasaminarun hawagun gürigia hagía ani falá wameime hani hénpulu. Ka uagu? Ladüga Bungiu lan Umadaü buítimati le gayarabei wadariruni. Lidan arütíkulu le wayanuhaba luagu lani Abüraámü hénpulu (aliiha huméi Santiagu 2:23). Lumada meha Bungiu  Abüraámü ladüga afiñe lan luagu. Ligía tariñagunbei Bíbülia ligía lan “háguchibei [...] sun ha richaguabaña lau hafiñerun luagu Bungiu” (Rómana 4:11). Éibume waturiahani arütíkulu le, gayarati wálügüdagun woungua: “Ka gayarabei nadügüni lun here lan nafiñen kei meha Abüraámü ani lun lumada nan Heowá?”.

IDA LIÑA GAMADAGUA LAN ABÜRAÁMÜ LUMA BUNGIU?

3, 4. a) Ka meha san óuchawaguni hénrengutimabei le úmabei lagagibudagun Abüraámü? b) Kei le weiri lubéi meha lafiñen Abüraámü, ka ichouruni luágubei?

3 Samina humá luagun Abüraámü dan le 125 irumu lau awarira luagun aban wübü [1] (ariha huméi abürüdǘni lidan lagumuha arütíkulu). Aningira Isaakü, le lisaani, lárigi lárigi, kéiburi meha 25 irumu lau. Barüina liña Abüraámü aban gusiñu luma burí katei le lemegeirubei lun láfuragun watu. Barüina liñalin Isaakü watu. Chóuruti ligía lan meha wéiyaasu hénrengutimati le ladügübei Abüraámü lidan sun libagari. Ani mama meha ladüga wéiyaali lan, lugundun héregili meha lidan dan ligía. Hénrenguti ladüga mosu lan láfaruni lisaani lun ladagaragüdüni keisi sákürifisiu, kei meha lariñaguni Heowá lun (Agumesehani 22:1-8).

Madügün lumuti Abüraámü lugundan Bungiu masaminarunga. Gaganbaditi meha lun ladüga lueirin lafiñen

4 Chóuruti anihán lan óuchawaguni le wéiritimabei lun lafiñen Abüraámü. Añahein ariñagutiña wuriba lan Bungiu ladüga lamuriahan luma Abüraámü lun ladagaragüdüni liráü kei sákürifisiu. Añahein amu ariñagutiña aranseñu liña lan Abüraámü lun ladügüni katei ligía ladüga mínsiñe lan lisaani lun. Ha ariñagubaña ítara mafiñetiña ani ibidiñeti houn ka lan afiñenibei (1 Korintuna 2:14-16). Mama meha adügarügü lumuti Abüraámü le lamuriahabei Bungiu luma sin lasaminarun luagun le ladügübei. Gaganbaditi lun Bungiu ladüga inarüniti lan lafiñen. Chouru lumuti meha móunahan lubéi lan Heowá adüga aban katei le gayarabei ladügün dañu lun. Ani chouru lumuti giñe anhein lan gaganbadi lun Bungiu, labinirubei lan ani binileime lisaani. Lun ñein lan aban afiñeni derebuguti luagu Abüraámü, mégeiti meha subudi luma lun larihini lídehan Bungiu. Ida liña libihini?

5. a) Ida liña funa san lasubudiruni Abüraámü Heowá? b) Ka meha lánibei efekütu lidan libagari Abüraámü lasubudiruni Heowá?

 5 Subudi. Lidan meha aban fulasu gíriti Uru nasirua lan Abüraámü. Ani huduguatiña meha gürigia ha ñéinbaña houn búngiugu mama inarünitiña. Huduguati meha lúguchi Abüraámü houn (Hosué 24:2). Ida liñati lasubudiruni Abüraámü Heowá? Arufudahatu Bíbülia hádangiñe lan liduheñu Semü, le liráü Noé, liabin Abüraámü. Kéiburi san-dimí irumu lau Abüraámü dan le lóunwenbei Semü. Afiñeti meha Semü luagu Heowá saragu, chóuruti ayanuha lan meha luagu Heowá houn liduheñu. Háfuga ítara liña lasubudiruni Abüraámü Heowá. Seremei lun subudi ligía, aba hínsiñe lan Heowá lun Abüraámü ani afiñe ligía luagu.

6, 7. Ka meha ladügübei Abüraámü lun lederebudagüdüni lafiñen?

6 Le lawinwandubei. Ka ladügübei Abüraámü lun here lan lafiñen? Añahein ariñagutiña dan le lan basubudirun aban gürigia aba lan bagumeserun asandira somu katei luagu, ani ínchaha lumutibu le basandirubei lun badügün somu katei. Ani ligía meha asuseredubei lun Abüraámü. Furendeiti meha saragu katei luagu Bungiu. Subudi ligía adügübei lun lasandirun inebesei luagu Heowá, “Bungiu le íñutimabei” (Agumesehani 14:22). Lidan amu dimurei, mabusenrunti meha ladügün somu katei le mínsiñeti lun Heowá (Ebüréu 5:7). Ani ligía adügübei lun gaganbadi lan lun Heowá súnwandan. Anhein busén wabéi lumadagu wamá Bungiu, mosu giñe warufudun saragu inebesei lun (Sálumu 25:14).

7 Ruti meha Heowá gumadi lun Abüraámü tuma Sara lun háfuridun hageiragiñe lun houdin lidoun amu fulasu le ibidiñeti houn. Wéiyougaaña meha, ani mosu meha hawinwanduni sun habagari tidan kianpu. Subudi lumuti meha giñe Abüraámü lagagibudaguba lan luma saragu peliguru. Ani íbini ítara, desidírühali meha gaganbadi lan lun Heowá. Ladüga laganbadi, biní lumuti Heowá ani góunigilei. Kei hénpulu, ariñagatu Bíbülia lidan lan bián ókaasion barüwa tan Sara ladüga tumagadiñen. Gayarati meha lafarún Abüraámü hilagubei ladüga katei le. Gama lumoun, lidan bián ókaasion ligía aba ladügün Heowá aban milaguru lun lóunigiruni Abüraámü tuma Sara (Agumesehani 12:10-20; 20:2-7, 10-12, 17, 18). Héregüda lumuti sügǘ burí le lafiñen Abüraámü.

8. Ida luba wibihini subudi le wemegeirubei lun wabuiduragüdüni wamadagua luma Bungiu?

8 Agia wagía? Gayarati san buidu lan wamadagua luma Heowá? Anha. Lun wibihini, mosu wafurendeirun luagu Heowá, ítara kei meha Abüraámü. Lunti giñe wibihin  subudi luma lichú aau. Ida luba wibihini? Úatu meha Bíbülia luma Abüraámü, ánheinti wama anuhein (Danieli 12:4; Rómana 11:33). Buin tiña Bíbülia lau subudi luáguti “Bungiu le íñutimabei”. Le wafurendeirubei ladügüba lun laganwoundun ínsiñeni luma inebesei le wasandirubei luagu Heowá. Ani ladügüba le wasandirubei lun gaganbadi wamá lun. Ábameti lóunigiruniwa ani biniláwame, ani ligíaba íderaguawa lun laganwoundun wasubudin luma wafiñen. Weseriwidun lun Heowá tau sun wanigi ladügüba lun gunda wamá ani lun darangilu lan wasandiragun woungua (Sálumu 34:8; Ariñawagúni 10:22). Eibu wasubudiruni Bungiu, buídutimabei wamadagua luma.

IDA LIÑA MEHA LÓUNIGIRUNI ABÜRAÁMÜ LUMADAGUA LUMA HEOWÁ?

9, 10. a) Ka lunbei wadügüni lun wakipurun aban lubuidun umadaguaü? b) Ida liña meha lóunigiruni Abüraámü lumadagua luma Heowá?

9 Wéiriti lebegi aban lubuidun umadaguaü. Ani anhein busén wabéi wakipuruni, mosu wóunigiruni (aliiha huméi Ariñawagúni 17:17). Mítaranti kei aban katei séruti le ahuudubei lun tewendedagüdüniwa aban muna. Ítara liña aban umadaguaü kei aban fuluri le buídumeraüti le emegeirubei lounigirúniwa. Subudi lumuti meha Abüraámü gebegi lan lumadagua luma Bungiu. Ligía lóunigirubalin súnwandan. Ida liña ladügüni?

Ítara liña aban umadaguaü kei aban fuluri buídumeraüti le emegeirubei lounigirúniwa

10 Súnwandan meha láfaagun Abüraámü lun gaganbadi lan lun Bungiu ani lun inebe lan lun. Kéiburi dan le laweiyasuhanbei hama liduheñu luma hama lidamun lidoun fulasu le ñeinhin lubéi lóunahei Bungiu, súnwandan meha lasigiruni ladundehan Bungiu lidan sun le desidírü lubéi. Aban irumu lubaragiñe nasirua lan Isaakü, aba lariñagun Heowá lun lun lan líchugun seini tuagu hóustarun sun wügüriña ha lúbiñebaña (ariha huméi rekuáduru “Ka mini lubéi?”). Lidan meha dan ligía, 99 irumu lau Abüraámü. Ka ladügübei? Álügüdaguati san lungua ka lan funa uagu líchigei Bungiu gumadi ligía lun? Áluahati san lébuna maganbadi lan? Uá. Gaganbaditi meha lun Heowá ani adüga lumuti le lariñagubei lun “lidan weyu ligía” (Agumesehani 17:10-14, 23).

11. a) Ka meha san uagu ladiherida Abüraámü? b) Ida liña meha líderaguni Heowá Abüraámü?

11 Buiti meha lumadagua Abüraámü luma Heowá ladüga súnwandan meha lafiñerun luagu lidan sun le ladügübei. Sandiguati meha lungua gayara lan layanuhan luma luagu furumiñeguarügü katei, íbini luagu katei hénrenguti le siñá lumuti gunfuranda. Kéiburi dan le lariñagunbei Heowá lagünrinchagubei lan uburugu Sodoma luma Gomora, aba ladiheridun Abüraámü saragu. Ka uagu? Lugundun saminati hóunweguba lan sun gürigia, dandu buítiña kei wuribatiña. Háfuga lasaminaruña luagun Lotu le libase hama liduheñu ha awinwandubaña ñein. Gama lumoun, afiñeti Abüraámü luagu Heowá, Bungiu le “íñugutimati lidan sun ubóu”. Ligía labahüdagunbalin lidiheri lun Bungiu  lau ǘnabuguni. Ida liña san líderaguni Heowá? Gaguraasunti meha ani íderagua lumuti lun larihini aban lan Bungiu gudemehabuti ligía. Afuranguagüda lumuti lun dan le lan laguseragüdüniña gürigia, áluaha lumutiña ha buídubaña lun lesefuruniña (Agumesehani 18:22-33).

12, 13. a) Dan le lamuriahanbei Heowá luma Abüraámü lun ladagaragüdüni Isaakü kei sákürifisiu, ida liña líderaguni lisubudin luma lichú lau? b) Ida liña wasubudiruni afiñe lan Abüraámü luagu Heowá?

12 Chóuruti íderagua lani lichú aau luma subudi le luágubei Abüraámü lun lóunigiruni lumadagua luma Heowá. Ligíati, dan le lamuriahanbei Heowá luma Abüraámü lun lederegeruni Isaakü kei sákürifisiu, chouru lumuti meha luagu buidu lan Bungiu, gaguraasun lan ani gudemehabu ligía. Subudi lumuti meha mama lan aban Bungiu furundeti Heowá. Ida liña wasubudiruni?

13 Lubaragiñe meha lamudeirun luagu wübü luma Isaakü, ariñagati Abüraámü houn lidamun: “Redei humá ya lau burigü. Au luma irahü le, wawansera wabaruaguóun, ábame wafurieidún, ábame wagiribudun” (Agumesehani 22:5). Ka san uagu lariñaga Abüraámü houn lidamun lagiribuduba lan giñe Isaakü? Leyeeduñanu san? Uá. Ariñagatu Bíbülia afiñe lan Abüraámü gayarabei lan meha láguyuguagüdüni Heowá Isaakü (aliiha huméi Ebüréu 11:19). Dandu Abüraámü kei Sara subudi hamuti Bungiu lan adügübei lun gasaani hamá lau sun wéiyougaaña lan (Ebüréu 11:11, 12, 18). Ligía subudi lubalin ua lan ni kata lásiñarun Bungiu adüga. Anha, ibidiñeti meha lun kaba lan asusereda weyu ligía. Gama lumoun, afiñeti anhein lan ounwe Isaakü, gayarati lan meha láguyuguagüdüni Heowá lun lagunfuliruni lani füramasei. Ligía tariñagunbei Bíbülia Abüraámü lan “háguchibei [...] sun ha richaguabaña lau hafiñerun luagu Bungiu”.

Afiñeti meha Abüraámü anhein lan ounwe Isaakü, gayarabei lan láguyuguagüdüni Heowá lun lagunfulirun le füramase lubéi

14. a) Ka lénrengunga úmabei hagagibudagua fiú lubúeingu Bungiu? b) Ida liña líderaguniwa lani Abüraámü hénpulu?

14 Uguñe weyu, mamuriahanti Heowá wama lun wadagaragüdüniña wasaanigu keisi sákürifisiu. Gama lumoun busenti lun gaganbadi wamá lun lugumadin. Gayarati anihein lan dan ua lan gunfuranda wamani ka lan uagu líchiga somu gumadi woun, o hénrengu lan woun gaganbadi wamá lun. Susereñahaali san le hun? Añahein íbirigu hénrenguti houn hapurichihan. Háfuga ladüga nibusigari hamá o hénrenguti lan houn hayanuhan hama gürigia ha ibidiñetiña houn. Añahein amu háfuga hanufudetiña amu hamá hawéi hánigu paaná lidan wadagimanu o leskuelarugu (Áfuriduni 23:2; 1 Tesalónikana 2:2). Ánhawa asandiragua woungua ítara, ka lunbei wadügüni? Waritaguni lubuidun hénpulu lánina afiñeni luma ganigi le líchugubei Abüraámü. Ánhawa ígira dan lun wasaminarun luagun le hadügübei wügüriña hama würiña úaraguatiña kei ligía, gayarabei wafalaruni hani hénpulu ani ábame buídutima lan wamadagua luma Heowá (Ebüréu 12:1, 2).

 ABAN UMADAGUAÜ LE AGUNDAARAGÜDÜBALIWA

15. Ida liña wasubudiruni masakürihan lan meha Abüraámü luagu gaganbadi lan lun Bungiu?

15 Masakürihanti meha Abüraámü luagu gaganbadi lan lun Heowá. Ida liña wasubudiruni? Ladüga ariñaga tan Bíbülia hilati lan “dan le wéirihali lueiyan”, gúnfulihali meha 175 irumu (Agumesehani 25:8). Íbini wéiyaali lan meha Abüraámü saragu, gúndaati lidan sun libagari ladüga ru lumuti meha leseriwidun lun Heowá lidan furumiñeti lúgaaru.

16. Kaba uagu lagundaara Abüraámü lidan Paraísu?

16 Ariñagatu Bíbülia agurabaha lan meha Abüraámü “lebelurun lidoun lubuidun uburugu le derebugubei ebu, uburugu le ladügübei Bungiu” (Ebüréu 11:10). Larúeihan Bungiu mini lubéi “uburugu” ligía. Afiñeti meha Abüraámü lachülürüba lan oura lun larihini “uburugu” ligía agumadiha ubouagu. Ani ítara luba. Samina humá luagun ugundani le lunbei lasandiruni Abüraámü danme le lawinwandun lidan Paraísu ani ábame gayara lan buídutima lan lumadagua luma Bungiu. Gúndaabei giñe danme le lasubudiruni íderagua lániña lani hénpulu saragu lubúeingu Bungiu luagu saragu dan. Lasubudirubei giñe le lan meha ladügübei lau Isaakü luagun wübü liyawadinarügüñein lan meha aban katei le asuseredubei dan lárigiñe (Ebüréu 11:19). Ani lasubudirubei giñe íderagua lániña igarigu le meha lasandirubei dan le mosu lubéi yebe ladagaragüdüni Isaakü saragu lubúeingu Bungiu. Ka uagu? Ladüga íderagua lániña lun gunfuranda hamani igarigu le lasandirubei Heowá dan le lóunahanbalin Hesusu lun lounwen hawagu gürigia (Huan 3:16). Íderagua láadiwa lani Abüraámü hénpulu lun gebegitima lan lani Hesusu sákürifisiu woun, ladüga ligía ligaburi larufudún ínsiñeni le wéiritimabei.

17. a) Ka katei lunbei wasaminarun luagu? b) Kaba wariha lidan le aban arütíkulu?

17 Áfaagua wamá súnwandan lun wafalaruni hénpulu lánina afiñeni le larufudubei Abüraámü. Ítara kei ligía, mégeitiwa subudi luma lichú au. Ánhawa asigira afurendeira luagu Heowá ani gaganbadi wagíame lun, warihibei ida luba lan labiniruniwa luma ida luba lan lóunigiruniwa (aliiha huméi Ebüréu 6:10-12). Ítara luba wakipuruni lubuidun wamadagua luma Heowá lun súnwandan. Lidan le aban arütíkulu warihibei hénpulu le hígirubei ǘrüwa lumadagu Bungiu ha buítiña.

^ [1] (párafu 3): Lubaragiñe meha lasansiruni Heowá liri Abüraámü tuma sara, Abürámü meha tuma Saraí híribei. Lidan arütíkulu le wayusurubei iri le líchugubei Heowá houn.