Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Bián-hati irumu 2016

Áyeiha waméi úaraguni le harufudubei lubúeingu Bungiu

Áyeiha waméi úaraguni le harufudubei lubúeingu Bungiu

“Aburemei, gúnfulitibu hama ha gúnfulibaña, úaragua buguya hama ha úaraguabaña” (SÁLUMU 18:25).

UREMU 18, 43

1, 2. Ida liña meha larufudun Dawidi úaragua lan lun Heowá? (Ariha huméi dibuhu le lídanbei lagumeseha arütíkulu).

LÍDANÑANU meha aban fulasu mageirawati Hudá Dawidi hama luwügüriña. Haramudaguña meha ñein ladüga subudi hamani láluahañein lan Saulu Dawidi hau 3,000 súdaragu lun háfaruni hilagubei. Luagu aban áriebu, aba ladariruni Dawidi hama lisudaranigu fulasu le ñein lubéi Saulu hama lisudaranigu arumuga. Lau duari, aba lachülürün Dawidi luma aban lisudaran gíriti Awisái lidoun fulasu le ñein lubéi Saulu. Aba lamuriahan Awisái luma Dawidi lun lan lígiruni lun láfaruni Saulu hilagubei. Gama lumoun, aba lariñagun Dawidi lun: “Máfarabei, ladüga le áfaruti urúei le lanúadirubei Wabureme, lafayeiruba luagu”. Ábaya lariñagun: “Sefulána Wabureme luéi náfaruni urúei le lanúadirubei” (1 Samueli 26:8-12).

2 Subudi lumuti meha Dawidi Heowá lan anúadirubalin Saulu lurúeiteme Ísüraeli. Ani subudi lumuti meha mosu lan inebe lan Saulu  lun anhein busén lubéi lun úaragua lan lun Heowá. Ligía masaminarun lubéi ladügün dañu lun. Uguñe weyu, agurabati Heowá lun úaragua wamá lun luma lun warufudun inebesei houn ha lanúadirubaña lun halidihaniwa (aliiha huméi Sálumu 18:25).

3. Ida liña meha larufuduni Awisái úaragua lan lun Dawidi?

3 Inebeti meha Dawidi lun Awisái ladüga subudi lani Heowá lan anúadirubalin Dawidi lun urúei lan. Gama lumoun, dan le urúeihali, aba ladügün Dawidi aban katei le hanarimeti luriban. Aba larounrun tuma lúmari amu wügüri. Lárigiñe, aba lariñagun lun aban hádangiñe hábuti lisudaranigu gíriti Hoabü lun lan ladügün lun lounwen túmari würi tuguya lidan wuribu (2 Samueli 11:2-4, 14, 15; 1 Krónikasi 2:16). Lamulen meha Awisái Hoabü. Ligíati, háfuga subudi lani meha Awisái le ladügübei Dawidi. Ani hábuti meha giñe súdaragu Awisái, gayarati hamuga meha layusuruni lubafu lun ladügagun lungua urúeime. Gama lumoun madügün lumuti. Lubaragiñe lira, súnwandan meha inebe lan Dawidi lun, seriwiti lun ani góunigilei hawéi láganiñu (2 Samueli 10:10; 20:6; 21:15-17).

4. a) Ka uagu gayara lubéi wariñagun úaragua lan meha Dawidi lun Heowá lidan sun libagari? b) Kaba wariha lidan arütíkulu le?

4 Úaraguati meha Dawidi lun Heowá lidan sun libagari. Dan le meha nibureingili, áfara lumuti Dawidi Goliadi le hígandei ladüga ladügüña lan meha bula lau Heowá luma hau lumutuniña (1 Samueli 17:23, 26, 48-51). Dan le larúeihanbei, aba lóunahani Heowá profeta Natán lun lererehan lun luagu figóu le ladügübei. Ánhati Dawidi leresibiruni ererehani ligía ani aba lasakürihan (2 Samueli 12:1-5, 13). Dan meha le wéiyaali, ídehati lau saragu katei gebegiti lun tábunawagun litenpulun Heowá (1 Krónikasi 29:1-5). Kei aubei warihei, adügati meha Dawidi óunwenbu burí charati lidan libagari, gama lumoun, súnwandan úaragua lan lun Bungiu (Sálumu 51:4, 10; 86:2). Lidan arütíkulu le warihibei lani Dawidi hénpulu luma hénpulu le híchugubei amu gürigia ha meha awinwandubaña lidan lidaani. Warihibei giñe ida luba lan warufuduni úaraguatima wamá lun Heowá sügǘ lau lun furumiñeguarügü gürigia. Ani warihibei giñe ka lan igaburi gayarabei líderaguniwa lun úaragua wamá lun Bungiu.

KABA SAN UN ÚARAGUA WAMÁ?

5. Ka wafurendeirubei lídangiñe lichara Awisái?

5 Dan le lálugunbei Awisái láfaruni Saulu, lóuchuña meha úaragua lan lun Dawidi. Gama lumoun úati meha gunfuranda lani anhein lan adüga dañu lun “urúei le lanúadirubei” Heowá, larufuduña lan meha ítara múaragun lan lun Bungiu. Ánheinti Dawidi gunfuranda lumuti lira. Ligía mígirun lubéi meha Dawidi lagumuchun Awisái lau Saulu (1 Samueli 26:8-11). Ka wafurendeirubei lídangiñe lichara Awisái? Arufudahati le woun danme lan le machourun wamani kaba lan un úaragua wamá, mosu lan wasaminarun luagun adundehani tídangiñeti Bíbülia le gayarabei líderaguniwa lun desidírü wamá buidu.

Súdinitimati úaragua wamá lun Heowá sügǘ lau lun furumiñeguarügü gürigia

6. Íbini mariban lan úaragua wamá houn waduheñu luma houn wamadagu, ka uagu lunti lubéi duari wamá?

6 Maribanti lun busén wamá warufudun úaraguni houn gürigia ha hínsiñebaña woun, kéiburi waduheñu hama wamadagu. Gama lumoun lunti duari wamá, lugundun gafigountiwa  ani gayarati wachararun lun Bungiu (Heremíasi 17:9). Ligíati, anhein adüga somu waduhe o wamada somu katei wuribati ani aba ladisedun luéi Heowá, haritagua waméi súdinitima lan úaraguni lun Heowá sügǘ lau lun amu gürigia (aliiha huméi Matéu 22:37).

7. Ida liña tarufudun aban íbiri úaragua tan lun Heowá lidan aban sügǘ hénrenguti?

7 Dan le labugún aban waduhe lídangiñe damuriguaü, lunti desidírü wamá anhein úaraguamemebadiwa lubéi lun Heowá. Ariha waméi le asuseredubei tun aban íbiri gíritu Anne [1] (ariha huméi abürüdǘni lidan lagumuha arütíkulu). Bugawaaru túguchu Anne lídangiñe damuriguaü. Luagu aban weyu, aba tagúarun túguchu tun lun tálügüdünu anhein gayara lubéi tachülürün ebeluha tumoun. Aba tariñagun tun wuriba lan tasandiragun tungua ladüga úati lan ni aban hádangiñe tiduheñu ayanuhati tun. Aba tírudun Anne saragu ani aba tariñagun tun tóunahaba lan aban gárada tun lau óunabagülei. Gama lumoun, lubaragiñe tabürüdünu gárada, aba tasaminarun lau duari luagun fiú bérusu tídangiñe Bíbülia (1 Korintuna 5:11; 2 Huan 9-11). Afuranguagüda tumuti Anne tun túguchu lau ínsiñeni tuguya lan ígirubaliña tiduheñu dan le tafigouhanbei ani masakürihantu. Lárigiñe, aba tariñagun tun anhein lan busén tubéi lunya gunda lan tibagari mosu lan tagiribudun lun Heowá (Santiagu 4:8).

8. Ka ǘrüwa igaburi gayarabei líderaguniwa lun úaragua wamá lun Heowá?

8 Lidan meha lidaani Dawidi, úaraguatiña fiú lubúeingu Bungiu lun ladüga arufudatiña ǘnabuguni, ínsiñehabuni luma ganigi. Ariha waméi ida liña gayara lan líderaguniwa ǘrüwa igaburi le lun úaragua wamá lun Heowá.

MOSU ǗNABUGU WAMÁ

9. Ka meha uagu láluga Ábünerü láfaruni Dawidi hilagubei?

9 Liráü meha Saulu Yónatan. Ani Ábünerü ligía meha hábutibei lisudaranigu Saulu. Dandu Yónatan kei Ábünerü ariha hamuti meha dan le lanügünbalin Dawidi lichügü Goliadi lun Saulu. Aba gamadagua lan Yónatan luma Dawidi ani úaraguati meha lun súnwandan (1 Samueli 17:57–18:3). Ánheinti Ábünerü, múaragunti meha lun Dawidi. Íderaguarügü lumuti Saulu éibaahei Dawidi lun háfaruni hilagubei (1 Samueli 26:1-5; Sálumu 54:3). Subudi lumuti meha Yónatan luma Ábünerü Bungiu lan anúadirubalin Dawidi lun ligíaba lan arúeiha leweñegua Saulu. Gama lumoun, lárigiñebei lounwen Saulu, míderagun lumuti Ábünerü Dawidi lun larúeihan,  aba líderagun ábanya hádangiñe lirahüñü Saulu. Háfuga aba lan lálugun Ábünerü ladügagun lungua urúeime. Háfuga ladüga lira larounrunbei tuma aban hádangiñe lani urúei Saulu weiriou (2 Samueli 2:8-10; 3:6-11). Ka uagu aba lubéi gamadagua lan Yónatan luma Dawidi, ánheinti Ábünerü aba lálugun láfaruni Dawidi? Ladüga meha ǘnabugu lan Yónatan ani úaraguati lun Heowá, ánheinti Ábünerü mítaranti.

10. Ka meha uagu múaragun lubéi Abüsalón lun Heowá?

10 Abüsalón, ligía meha aban hádangiñe lisaanigu urúei Dawidi. Barüguati meha lungua, ani ligía ua lubéi úaragua lan lun Heowá. Íbini subudi lani írida laali lan Heowá Dawidi lun larúeihan Ísüraeli, busenmémegili ligía lan urúei. Ligía aba lubéi “libihin Abüsalón aban karü to lánina wuribu hama gabayu, aba líchugun dimí-san wügüriña lun hóunigiruni” (2 Samueli 15:1). Ani aba labimehaniña saragu ísüraelina lun híderaguni. Darí lun lálugun láfaruni lúguchi hilagubei (2 Samueli 15:13, 14; 17:1-4).

11. Ka wafurendeirubei lídangiñe hénpulu le líchugubei Ábünerü, Abüsalón luma Baruku woun?

11 Arufudahati lani Ábünerü luma Abüsalón hénpulu woun anhein lan ua lubéi ǘnabugu wamá ani busentiwa lun wibihin ubafu, hénrengubei lan woun úaragua wamá lun Bungiu. Gama lumoun, anhein hínsiñe lubéi Heowá woun, masaminarunbadiwa wawounguounrügü kei Ábünerü luma Abüsalón. Luagu amu oubaü, lunti wóunigiragun woungua luéi ínsiñeni luagu seinsu, luma luéi ayumahani lun wibihin aban lubuidun aturiahani o wadagimanu le gayarabei ladügün lun íñugu lan wasandiragun woungua. Gayarati lagadeiruni katei le wamadagua luma Heowá. Samina wamá luagun le asuseredubei lun Baruku, le lani profeta Heremíasi sekretariu. Sügüti saragu dan ayumaha katei le úati luma, ligía meha magundanhali lubéi lidan leseriwidun lun Bungiu. Ligía lariñagunbei Heowá lun: “Günringua numuti le nábunagubei, hulaguanéi le nábunubei. Ani ligiamémeba nadüga lau sun ubóu. Busentibu san bamuriahan somu katei bungua le hanarimeguti? Málugagubeibei” (Heremíasi 45:4, 5). Ǘnabuguti meha Baruku ani aba lasigiruni ladundehan Heowá. Wagía, lunti giñe gaganbadi wamá lun eweridihani le, ladüga málühali günringua lan Bungiu ubóu wuribati le.

Ánhawa ariñaga lun aban íbiri lun lamuriahan ídemuei hama wéiyaaña lidan afiñeni, warufuduña ínsiñehabuni lun luma úaraguni lun Heowá

12. Afuranguagüda huméi lau aban hénpulu ka lan uagu siñá lubéi úaragua wamá lun Bungiu anhein wawounguounrügü lubéi wasaminara.

12 Anihein aban íbiri Méhiku gíriti Danieli, mosu meha desidírü lan kaba lan un úaragua lan.  Wéiriti meha ínsiñeni le lasandirubei tuagu aban nibureintu mama gefentu luagu Heowá ani busenti meha lamarieidun tuma. Ariñagati: “Sun meha oura nabürühaña tun íbini neseriwiduña lan kei prekursoru”. Gama lumoun, aba líchugun fe mama lan larufuduña úaraguni lun Heowá. Aba larihini luouguounrügüñein lan lasaminara ani mosu lan ǘnabugu lan. Aba lamuriahan ídemuei luma aban wéiyaali lidan afiñeni le lǘhali lidan inarüni. Aba lariñagun Danieli: “Aba líderagunina íbiri ligía lun gunfuranda nani mosu lan nígiruni nabürühan tun nibureintu tuguya lun úaragua nan lun Heowá. Lárigiñe saragu furíei luma lárigiñe nayahun saragu, aba nadügüni. Murusun dan lárigiñe, ábatima nagundaarun lidan apurichihani”. Uguñe weyu, leseriwiduña Danieli keisi óunigiruti sirkuitu ani maríeihali tuma aban íbiri to hínsiñeti Heowá tun.

ANHEIN BUSÉN WABÉI ÚARAGUA WAMÁ, HÍNSIÑEHABU WAMÁ

Ánhawa íchiga fe adügaali lan aban wamada somu katei wuribati, lunti wayanuhan luma ani chouru wameime ayanuhaali lan hama wéiyaaña lidan afiñeni. (Ariha huméi párafu 14).

13. Ka meha ladügübei Natán lun úaragua lan lun Heowá luma lun Dawidi?

13 Ánhawa úaragua lun Heowá, úaraguabadiwa giñe houn amu gürigia ani wíderagubaña. Ariha waméi le ladügübei profeta Natán. Dan le larounrunbei Dawidi tuma lúmari amu wügüri, ani lárigiñe aba láfaragüdüni, aba lóunahani Heowá Natán lun lererehan lun. Úaraguati meha profeta Natán lun Heowá luma lun Dawidi. Ida liña larufuduni? Úaraguati lun Heowá ladüga ganigi lan ani gaganbadi ligía lun. Úaraguati meha giñe lun Dawidi ladüga erereha lan lun lau ínsiñeni. Lun líderaguni lun gunfuranda lani weiri lan luriban katei le ladügübei, aba labahüdagun aban sügǘ lun. Aba lariñagun lun aba lan líweruhanu aban wügüri rísiti ábanrügü lilügün aban wügüri gudemeti mudún. Dan le laganbunbalin Dawidi abahüdaguni, aba lagañidun saragu luagu le ladügübei wügüri rísiti ligía. Aba lariñagun Natán lun: “Buguya wügüri ligía!”. Ítara liña líchugun Dawidi fe luagu afigouhaali lan (2 Samueli 12:1-7, 13).

14. Ida luba warufuduni úaragua wamá lun Heowá luma houn waduheñu o wamadagu?

14 Warufudun ínsiñehabuni gayarati giñe líderaguniwa lun úaragua wamá lun Heowá luma houn amu. Samina humá luagu chouru humani luagu adügaali lan aban íbiri aban katei wuribati. Háfuga busentün úaragua humá lun, dántima aban lan hiduhe o aban humada. Gama lumoun, subudi humuti súdinitima lan úaragua humá lun Heowá. Ka gayarabei hadügüni? Sigí huméi lani Natán hénpulu. Gaganbadi humá lun Heowá ani óusera huméi híbiri lau ínsiñehabuni. Ariñaga humá lun lun láluahan ídemuei hama wéiyaaña lidan afiñeni lau lóufudagun. Anhein madügün lan, lunti hadügüni. Ítara luba úaragua humá lun Heowá. Ani harufuduba giñe ínsiñehabuni lun híbiri, lugundun hererehaba wéiyaaña lidan afiñeni lun lau ínsiñehabuni ani híderagubei lunya gamadagua lan luma Heowá (aliiha huméi Fádirigu 5:1 luma Galasiana 6:1).

ARUFUDA WAMÁ GANIGI

15, 16. Ka meha uagu mosu lubéi ganigi lan Usaí lun úaragua lan lun Heowá?

15 Usaí meha aban hádangiñe lumadagu Dawidi ha úaraguabaña. Mégeiti meha ganigi lun úaragua lan lun Heowá luma lun Dawidi. Ka uagu?  Ladüga busentiña meha lílana ageiraü híchugun aban hádangiñe lisaanigu Dawidi le gíribei Abüsalón lun ligía lan urúei. Subudi lumuti meha Usaí chülühali lan Abüsalón hau lisudaranigu Herusaléun ani anuraha lan Dawidi (2 Samueli 15:13; 16:15). Ka ladügübei Usaí? Aba san lagarabaagun lun Dawidi ani aba lidin luéigiñe lóubadina Abüsalón? Uá. Íbini wéiyaali lan meha Dawidi ani gíbetiña meha busentiña háfaruni, busenti meha Usaí úaragua lan lun ladüga subudi lani ligía lan lanúadirubei Heowá lun urúeime. Ligía aba lubéi lidin luagu wübü Oliwu áluahei Dawidi (2 Samueli 15:30, 32).

16 Amuriahati Dawidi luma Usaí lun lan lagiribudun Herusaléun ani lun lafamurun kamá hamuga lumada Abüsalón. Mosu meha ladügün Usaí lun laganbuni Abüsalón ladundehan lubaragiñe laganbuni ladundehan Aitoféli. Mosu meha ganigi lan Usaí lun gaganbadi lan lun Dawidi ani úaragua ligíame lun Heowá. Ka uagu? Ladüga mosu meha líchuguni libagari lidan peliguru lun ladügüni le lamuriahabei Dawidi luma. Ayumuraguati Dawidi lun Heowá lun líderaguni Usaí. Ani aganba lumuti Heowá. Aganba lumuti meha Abüsalón ladundehan Usaí, mama le lariñagubei Aitoféli (2 Samueli 15:31; 17:14).

17. Ka uagu megei wabéi ganigi lun úaragua wamá lun Heowá?

17 Mégeitiwa giñe ganigi lun úaragua wamá lun Heowá. Ka uagu? Ladüga gayarati hamuriahan waduheñu, wánigu paaná lidan wadagimanu o gumadimatiña lun wadügün somu katei le mínsiñeti lun Heowá. Ariha waméi le asuseredubei lun Taro, aban gefenti luagu Heowá Hapón. Lúmagiñe liñüraü, súnwandan ladügüni sun liyaraati lun lagundaaragüdüniña lagübürigu. Gaganbaditi meha houn ladüga hínsiñe hamá lun, mámarügü ladüga mosu lan ladügüni. Gama lumoun, dan le lagumeserunbei aturiahoun Bíbülia hama gefentiña luagu Heowá, aba hariñagun lagübürigu lun lun lan masigirun lan aturiaha. Aba lírudun saragu. Íbini hénrengu lan lun, ariñagati houn desidírühali lan labasiihan adamuridagua. Ariñagati Taro: “Aba hagañidun numa saragu darí lun lásügürün saragu irumu lun gayara lan híchugun üma nun lun nabisidahaniña. Aba namuriahan luma Heowá lun masansirun nani le desidírü nubéi. Guentó, buíduhali hóuserunina, ani gayarahali nabisidahaniña sagü busén nan” (aliiha huméi Ariñawagúni 29:25).

18. Ka furendei wamaalibei lidan arütíkulu le?

18 Anhein wasigira hénpulu le líchugubei Dawidi, Yónatan, Natán luma Usaí, buídubei wasandiragun woungua lau úaragua wamá lun Heowá. Móusera wamá lau múarani kei ladügüni Ábünerü luma Abüsalón. Inarüni gafigoun wamá ani charatiwa. Gama lumoun, gayarati warufuduni súdinitima lan woun úaragua wamá lun Heowá.

^ [1] (párafu 7): Sánsiwaali fiú iri.