Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Seingü-hati irumu 2017

Gúndaatiwa lau sensiyu lan wabagari

Gúndaatiwa lau sensiyu lan wabagari

LIDAN nefu-hati lidan irumu 2000 ligía lamarieidun Daniel tuma Míriam ani buiti meha habagari Barcelona (Esüpáña). Afuranguagüdati Danieli: “Lau seinsu le wagañeirubei gayarati meha weigin tidan éigagülei to sérutu, waweiyasuhan lidoun amu burí ageiraü luma lun wasansiragun buidu. Ani furitiwa meha giñe apurichiha súnwandan”. Gama lumoun, aba ladügün aban katei lun lasansirun habagari.

Lidan aban adamurini lidan irumu 2006, aba laganbun Daniel aban yanu le aguurubarun lanigi, lidan yanu ligía álügüdahouati: “Wadügüñein san sun wayaraati lun wadundehaniña ha awanserubaña lidoun óunweni lun houdin luéigiñe üma le anügübei lidoun ibagari magumuchaditi?” (Ariñawagúni 24:11). Afuranguagüdati yanu ligía wani lan buligasion lun wapurichihani uganu le tídanbei Bíbülia ladüga ítararügübei lan gayara lan hesefurun gürigia (Adügaü 20:26, 27). Ariñagati Daniel: “Sanditina kamá layanuhaña Heowá nun”. Ariñawaguati giñe lidan yanu ligía dan le lan wadügüni sun wayaraati lidan weseriwidun lun Heowá gúndaatimatiwa lan. Subudi lumuti meha Daniel inarüni lan lira, ladüga prekursora meha Míriam ani gúndaatu meha.

Dagati meha yanu ligía tidan lanigi Daniel darí lun desidírü lan ouraali lan lun ladügün asansiruni lidan libagari. Aba mawadigimaridunhali lan saragu oura, aba leseriwidun kei prekursoru ani aba lasaminarun luagun ugundani le gayarabei hasandiruni ligía tuma Míriam ánhaña ñüdün eseriwida ñein lubéi mégeiwa lan ídemuei lun apurichihani.

ÑUNSU BUITI LÁRIGIÑE TURÓBULI

Lidan seingü-hati lidan irumu 2007, aba lígiruni Daniel tuma Míriam hawadigimari ani aba háguyun Panamá, aban ageiraü le ñǘdünñahaaña ñein. Apurichihatiña meha lidan fiú ubouhu le lídanbei fulasu le gíribei Bocas del Toro, luagun nórute. Hibe-agei gürigia ha erederubaña ñein ngäbe harasanbei. Saminati meha Daniel tuma Míriam gayarabei lan herederun Panamá kéiburi widü hati lau seinsu le hámabei.

Éibuga hamuti meha ubouhu burí ligía tidan waporu luma tidan beiki. Haritagua hamagili le furumiñeti wéiyaasu le hadügübei tidan beiki awariragueina wübü lidan aban lanarime lárouga, kéiburi 30 kilómeturu (20 maili) lidise wéiyaasu ligía. Wéiriti lubucha luagu Daniel weyu ligía darí yebe lun louwegun. Gama lumoun, buiti meha heresibiruniña iduheñu ngäbe ha hasubudirubaña, dántima le lafurendeirunbei Daniel tuma Míriam fiú dimurei lidan iñeñein ngäbe. Lidan murusun dan gumesetiña 23 aturiahani.

Ka asuseredubei dan le lagumuchunbei haseinsun? Ariñagati Daniel: “Aba labuinchun wagu lau águiraü dan le wasaminarunbei mosu lan wagiribudun Esüpáñoun”. Híruti meha houn hasaminarun hígiruniña gürigia ha aturiahabarun Bíbülia hama. Gama lumoun, aban hati lárigiñe aba hibihin ñunsu buiti. Ariñagatu Míriam: “Aba wamisurahóun lun weseriwidun kei prekursorugu espechalitiña. Gúndaatiwa meha lau gayara lan werederun eseriwida ñein wabéi”.

UGUNDANI LE WÉIRITIMABEI

Ladüga fiú asansiruni tidan lóundarun Heowá lidan irumu 2015, aba meseriwidunhaña lan Daniel tuma Míriam kei prekursorugu espechalitiña. Kaba san hadüga guentó? Aba hafiñerun luagu füramasei le lídanbei Sálumu 37:5 ñein lubéi lariñaga: “Rubei bibagari lúhaburugun Aburemei; hemenigibá luagu, ábame liabin lun líderagunibu”. Aba hadarirun aban wadagimanu le ruti chansi houn lun heseriwidun kei prekursorugu ha adügübaña 70 oura luagu hati, ani guentó heseriwiduña lidan aban damuriguaü lidan uburugu le gíribei Veraguas (Panamá).

Ariñagati Daniel: “Lubaragiñe wáfuridun Esüpáñagiñe machourun wamuti meha anhein gayarabei lubéi wawinwandun aban ibagari sensiyuti. Guentó wadügüñein, ani memegeirúntiwa ni kata le súdiniti”. Ka san ugundani wéiritimati hibihibei? Ariñagatiña: “Wíderaguniña gürigia ǘnabugutiña asubudirei Heowá, ruti aban ugundani le móubati”.