Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 1 2016

 BINADU ADUNDEHANI LE HUUTI UGUÑE WEYU

Madiherida humá

Madiherida humá

ADUNDEHANI TÍDANGIÑETI BÍBÜLIA: “Madiheri humá” (Matéu 6:25).

Ka mini lubéi? Lidan Yanu le líchugubei Hesusu luéigiñe Wübü lariñagei dimurei burí le. Según aban líburu to afuranguagüdübalin lila dimurei burí le tídanbei Bíbülia, layanuhaña dimurei güriegu le ásügürawagüdübei ya kei “adiherida” luagu “le ladügübei gürigia dan le lagagibudagun luma gudemei, ilamaü o amu turobuli lidan libagari sagü weyu”. Liibe-agei dan, katei burí le wasaminarubei gayara lan lasuseredun ámuñegü adügübei lun wadiheridun. Agurabúati wadiheriduba lan luagu katei burí le wemegeirubei luma hawagu gürigia ha hínsiñebaña woun (Filipuna 2:20). Gama lumoun, dan le lariñagunbei Hesusu: “Madiheri humá”, layanuhaña luagu idiheri le wéiriyati darí lun ladügün lun weferidiruni wagundan lau werederun asaminara luagu wuribati le gayaraabei lasuseredun ámuñegü (Matéu 6:31, 34).

Huuti san adundehani le? Arihúati lichú aau lidan le lariñagubei Hesukrístu. Anuhein líburu to arufudutu dan le lan márügüdagun lan gürigia lungua luéi ladiheridun saragu, adüga lan furumiñeguarügü katei lun lachubarun lani nérübiu. Ani ligía lan “lébunabei sandi kéiburi guméi múnadagiñe o bóugudigiñe libiti gürigia, tisandi anigi luma tiñǘ anigi”.

Ruti Hesusu resun buiti woun lun máhüchürün wamá: meseriwínti lun ni kata. Ariñagati: “Saminatün san híchuguba lan aban weyu lanwoun hibagari anhaün hadiheridun?” (Mateo 6:27, Traducción en lenguaje actual). Madügünbei wíchuguni wasaminan luágunrügü wadiheri lun labuidurun wabagari ni lun wíchugun aban segundu lanwoun lidura. Díseguati giñe lasuseredun katei wuribati le wasaminarubei. Kei lariñaguni aban sásaamu: “Leferidiruñein gürigia lidaani adiherida luagu le gayaraabei lasuseredun ámuñegü, díseguati [...] lasuseredun katei ítara kei hanufude wamá lasuseredun”.

Ka lunbei wadügüni lun wárügüdagun woungua luéi wadiheridun saragu? Furumiñe, afiñe humá luagu Bungiu. Anhein ru lubéi Bungiu heigin dunuru wéndegüdalei fuluri, ma lóunigirubaña giñe gürigia ha eseriwidubaña lun? (Matéu 6:25, 26, 28-30). Masaminara humá luagu haruga: winwan huméi le lanügün kada weyu. Ariñagati Hesusu: “Madiherida humá lubeiti luagu haruga, ladüga barǘ lumuti giñe haruga lidiheridüna lúmagua” (Matéu 6:34).

Anhein wafalara ladundehan Hesusu, wóunigirubei wátuadi ani líchugubei “Bungiu lidarangilan” woun (Filipuna 4:6, 7).