Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 1 2016

 TÍTULU LE LUÁGUBEI TIDÁÜ | HUUTI SAN LOUSERÚNIWA LAU ARUMANI?

Huuti wóuserun lau arumani

Huuti wóuserun lau arumani

“Lun míweruhan hamá, lun haruma lan hagaburi le gumuti.” (Titu 2:10).

Dimurei güriegu le ásügürawagüdübei tidoun Bíbülia kei “haruma lan hagaburi le gumuti”, anihein dan layanuhaña lan luagu le buídubei ladüga ítara liña lan. Adügati giñe lun lasaminarúniwa luagun aban katei le wéiriti lubuidun weiri ligía lebegi lidan ligaburi lanügǘniwa ibagari.

Wéiriti meha lisudinin dimurei le lariñagubei apostolu Pábulu houn kristiánugu: “Lun haruma lan hagaburi le gumuti”. Ka mini lubéi dimurei burí le?

WAGEINDAGUÑA LUMA WASAMINAN

Aríaguatiña hiibe-agei gürigia houngua tidan isubusei lubaragiñe háfuridun hábiñegiñe. Ka uagu? Ladüga busén hamá buidu lan haríawagun. Gama lumoun, anihein aban katei súdinitimati luéi lubuidun lasansiragun gürigia luma ligaburi laranseruni lídiburi. Gayaraati ladügün ídatima waña lan múnadagiñe wabiti lun labuidurun o laribadun ligaburi wariawagún.

Furanguti tarufuduni Bíbülia weiri lan warabachun luagun ladügǘn le wuribabei. Lúmagiñe liñüraü “gürigia luágugubeirügü wuribani lasaminara”, tiña lidan Agumesehani 8:21. Anhein busén wabéi wóuserun lau arumani súnwandan, mosu wageindagun luma wagaburi. Afuranguagüda lumuti apostolu Pábulu ida liña lan lageindagun luma figóu le lídanbei: “Lidan nisaminan, hínsiñeti lilurudun Bungiu nun; gama lumoun arihatina luagu anihein lan ábanya lúrudu lidan núgubu, ageindaguti luma nisaminan; katei ligía, igaburi lánina figóu le nídanbei, le gámabalina dáüwañu.” (Rómana 7:22, 23).

Mama mosu wígiraguagüdün woungua lun luriban wayumahan dan le wasandirun busén wamá wóuserun lau liwiye igaburi, kamá hamuga siñarügü liña wárügüdagun woungua. Mama lidamun óuchawaguni wagía; wagía anúadirubalin anhein wadügübei lubéi le buídubei o madügün wabéi lan. Dan le mafalarun wamani luriban wasaminan, anúadiratiwa wóuserun lau arumani haganagua gürigia ha wíyeti hóuserun.

GAYARAATI WAGAÑEIRUN

Wóuseruba lau arumani anhein chouru wabalin ligía lan súdinitimabei. Leti hírubei, gibe hamá gürigia ha únbaña súdinitima lan haramuduni hagaburi sügǘ lau hadügüni le buídubei. Richaguagüda hamuti hóuserun lau liwiye igaburi anhein ligía lubéi buídubei houn. Adimurehatu líburu to gíriboun The (Honest) Truth About Dishonesty (Inarüni [furanguti] libügürü louserúniwa lau liwiye igaburi) luagu katei le dan le tariñagunbei: “Mariñagunga saragu, eyeeda wamutiña amu darí ñein lumuti wasigira asaminara gürigia wamá ha óuserutiña lau arumani”. Kábati íderaguawa asubudirei anhein wóuseruña lubéi lau liwiye igaburi?

Ariha hamaali saragu míñunu gürigia ha lídangiñetiña sun ubóu ru tan Bíbülia adundehani huuti. Anihein gumadi móubawati tidan, le adundehabaliwa lidan wabagari (Sálumu 19:7). Ariñaga tumuti woun ida luba lan wáhuduragun lun Bungiu, haruma lan wanügüni wabagari, wóuseruniña waduheñu luma wóuserun lidan wadagimanu. Huumémegili lúrudu luma adundehani le tídanbei lidan wadaani houn sun gürigia meberesenga hanechanin, harasan, hañeñe o halíana lan. Anhoun waliiha, ráramagua wagía asaminara luagu le tariñagubei ani falá wameime tadundehan, gayaraabei wafurendeirun óusera lau arumani tau sun wanigi.

Keiti wawinwanduña lan lidan aban ubóu le ídanbei ladügüdarúa wawagu lun wafalaruni lagübüri saminaü  le kamanibei lidan, ligía ua lubéi buídurügü lan wasubudiruni le tariñagubei Bíbülia. Lun wagañeirun lidan wuribu le wageindagubei luma louserúniwa lau liwiye igaburi, mégeitiwa wafurieidun amuriaha luma Bungiu lun líderaguniwa (Filipuna 4:6, 7). Ligíaalimeti ganigi wamá lun wadügüni le buídubei óusera wagíame lau arumani lidan sun katei.

HAFAYEIRUAHA HA ÓUSERUBAÑA LAU ARUMANI

Sagati Hitoshi, le buga uágubei wayanuha lidan furumiñeti arütíkulu, saragu buiti ladüga subudiwa lan kei aban gürigia le óuserati lau arumani lidan luadigimari, lugundun ruti aban gürigia le unbei gebegi lan louserúniwa lau arumani wadagimanu lun. “Wéiriti neteingiradi —liña Hitoshi—. Darihadina aban wadagimanu le ídanti darangilu lan nisaminan”.

Susereeli ligiaméme houn amu gürigia ha afalarubalin tadundehan Bíbülia libügürü “haruma lan hagaburi le gumuti”. Ariha wamá fiu hénpulu.

  • Darangilu lan wasaminan

    “Dan le 13 lubéi irumu nau, aba nígirunu leskuela lun ‘nawadigimaridun’ hama fiu híwerutiña. Sun meha 95% lídangiñe seinsu le nagañeirubei lídangiñeti meha wadagimanu le múaranti luma lúrudu. Lau lásügürün dan, aba namarieidun, ábati nagumeserun aturiahoun Bíbülia hama gefentiña luagu Heowá úara luma nani weiriei. Furendeitiwa iyereegu lan louserúniwa lau liwiye igaburi lun Heowá, * ligía desidírü wabéi wasansiruni wabagari [Ariñawagúni 6:16-19]. Badiseitiwa kei gefentiña luagu Heowá lidan irumu 1990.

    ”Luagu aban dan buin tiña meha nuban lau ílagu le íweruhouarügüti, mítaranhaali. Harumaali nanügüni nibagari, darangilu haali nisaminan. Dan le nasaminarun luagun sun irumu le násügürübei íweruha, aba neteingiruni Heowá luagu lugudemehabu nun. Úati katei buítimati luéi narounrun sagü guñoun subudiñunéi gunda lan Heowá numa” (Cheryl, Irlanda).

    “Dan le líchugunbei niyubudiri fe maha nan nárügüdüni seinsu le lálugubei aban agañeihati líchuguni nun keisi gürüti, aba lariñagun nun: ‘Adügaali Bubungiute lun gayara lan lafiñerúniwa buagu. Gabunuruntiwa lau bawadigimariduña lan tidan kónpeni to’. Ídehati nóuserun lau arumani lun darangilu lan nisaminan liñúarü Heowá. Gayaraati giñe níderaguniña niduheñu hama amu gürigia lun hadügüni ligiaméme” (Sonny, Hong Kong).

  • Darangilaü

    “Nadagimeintina ariha tau aban banku to anuheinboun lidan ámuñegueinarügü ageiraü. Lidan burí luwuyeri bísinisi le kamaniti hóuserun gürigia lau liwiye igaburi lúntima gibe lan hagañeirun. Sun gürigia saminatiña: ‘Ka luágubei lóuserun gürigia lau murusun liwiye igaburi anhein lagañeiruba lubéi lanwoun liseinsun lun buídutima lan dan lun?’. Ánheinti au ariha naali íderagua lánina nóuserun lau arumani lun darangilu lan nibagari. Ani bunagua naali naritagun ítarameme luba lan nóuserun, meberesenga le ñǘbuinti. Subudi hamuti niyubudirigu meyeedun nubaña lan, meyeehan aume hawagu” (Tom, Meriga).

  • Inebesei

    “Amuriahati gürigia le ichugúbei ariha hau nadagimeintiña numa lun neyeehan luagu fiu ílagu le eferidirubei, máhatina. Dan le lasubudirúnwabei kátaña lan íweruhabalin, ruti tabureme bísinisi seremei nun luagu nóuserun lau arumani. Mégeiwati ganigi lun louserúniwa lau arumani lidan ubóu le. Gama lumoun, ídehati lun hafiñerun amu luagu gürigia ani inebeti giñe houn” (Kaori, Hapón).

Dan le wóuserun lau arumani ibihatiwa lubuidun afayeiruahaü: darangiluti wasaminan luma wabagari ani adügati lun inebe wamá houn amu. Ma inarüni barǘ lan saragu buiti?

^ par. 18 Ariñagatu Bíbülia Heowá lan líribei Bungiu.