Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 1 2016

Ida luba wárügüdagun woungua lídangiñe machouruni le wasandirubei?

Ida luba wárügüdagun woungua lídangiñe machouruni le wasandirubei?

ÚATI amu mégeitimati lounigirúniwa kei aban irahü figigili. Hawagu meha wagübürigu dipeni wamá lun sun katei lidan dan ligía. Dan le wagumeserunbei éibuga, ariha wamutiña meha gürigia kei hígandei, ábatiha wéibaagun áluahaña wagübürigu, le wanufude. Ma meha lichourun wasandiragun woungua dan le tárügüdüni wáguchu o wáguchi wáhabu!

Dan meha ñǘraügidiwa, adügati meha hídehan wagübürigu luma hínsiñehabu lun buidu lan wadariragun woungua. Ídehati meha wasubudiruni hínsiñe wamá houn lun chouru lan wasandiragun woungua, dan méhati hariñagun woun buidu lan wadügüni katei, adügatiña meha lun wafiñerun wawougua luma lun buídutima lan wadügüni.

Dan le aweirideina wabéi, ídehatiña meha giñe umadagu buítiña ha wámabaña lun chouru lan wasandiragun woungua. Buiti meha wasandiragun woungua hama, ani adügatiña meha lun maweirin lan wanufude woudin leskuela.

Buiti hamuga ítara lan hañüraü sun gürigia. Gama lumoun, híruti gibe hamá úntiña hénrengu lan hadarirun umadagu, ani gíbetiña irahüñü ha metenitiña hagübürigu houn. “Sagü narihin hayawa iduheñu adaagua katei úara, aba nasaminarun: ‘Ítaradügü hamuga niduheñu’”, tiña Melisa. * Másiñati susere lan aban katei ítarati hun.

LE LANÜGÜBEI LAWEIRIDUN GÜRIGIA ASANDIREINA MACHOURUNI LUOUGUA

Másiñati machourun lan meha hasandiragun hungua dan le aweirideina hubéi. Ka meha gayaraabei ladügün lun hasandiragun hungua ítara? Másiñati mouserún humá lau ínsiñehabuni, míchugun ligía ídemuei le hemegeirubei hun dan ñǘraügidün. Gayaraati giñe gabügürügua lan meha hageindagun hagübürigu lubaragiñebei hígiragun ani háfuga saminatün hidurun lan. O amu katei wuribatimati, bulesei lanün meha húguchi o húguchu dandu lau dimurei kei lau hagayuahan huagu.

Ka gayaraabei lasuseredun lun aban irahü anhein asusereda lira lun? Añahein hádangiñe, gumesetiña átagua o ayusura düroga dan le wéiriaraühaña. Añahein amu, aba hagumeserun óundaragua hama salufuritiña lun hasandiragun houngua lílana lan aban sétanu. Kei añahein lubéi hádangiñe memeniha hanigi hadarirun kaba lan óuseraña lau areini luma ínsiñehabuni, gadarigiatiña; ani liibe-agei dan, madurati adariguaü ligía, ábati machouruntima lan hasandiragun houngua.

Íbini nibureintiña machourunti hasandiragun houngua ha esefurubaña luéi sun le, sanditiña mebegi hamá ni kata. Kéiburi Ana, to ariñaguboun: “Chouru numuti meha ua lan buiti nadüga, lugundun ligía  meha tariñagunbei núguchu nun sun oura. Maritaguntina tariñagun nun ni aban wéiyaasu buidu lan nadüga o tarufuduni nun hínsiñe nan tun”.

Gama lumoun, mámarügüñein ligaburi wagüriarúniwa adügübei lun wasandirun machouruni. Gayaraati giñe ladügün ígiraguni, turobuli le lanügübei aweiyaduni o lasandirun gürigia busiganu luagu ligaburi laríawagun lun machourun lan lasandiragun lungua. Ka lan yebe lébunabei, chóuruti hiru lan hasandiragun hungua ani gaturóbulin humá dan le hóuserun hama amu gürigia. Ka gayaraabei hadügüni lun hárügüdagun hungua lídangiñe luriban katei le hasandirubei?

HÍNSIÑETIWA LUN BUNGIU

Gayaraati wachoururuni mama lan wábuguarügüñadiwa. Anihein aban le gayaraati líderaguniwa ani busenti ladügüni: Bungiu.

Liyumulugugiñe profeta Isaíasi, füramaseti Bungiu woun: “Manufudedaba au Bubungiutebei. Rútina erei bun, íderagua numutibu, ágüdaha numutibu lau núhabu” (Isaíasi 41:10, 13). Ma lueirin dǘgüdaguaü le wasandirubei lau wasaminarun ragǘ lani Bungiu wáhabu. Úati kaba lan uagu wadiherida!

Ayanuhatu Bíbülia hawagu lubúeingu Bungiu ha meha asandirubaña saragu idiheri, ani furendeitiña árügüda luéigiñe lúhabu, lau hafiñerun líderagubaña lan. Lubaragiñe meha garáü tani Ana Samueli, saminatu meha wuriba lan lidin tun ladüga maráü tan. Awandatéi ladügǘniwa bula tau ladüga maraühei tan. Gidá lumuti meha lira tilama, ayahua tuguya (1 Samueli 1:6, 8). Gama lumoun, lárigiñebei tariñaguni tigarigu lun Bungiu, aba masigiharu lan adiherida (1 Samueli 1:18).

Anihein meha dan ladiheridun Dawidi, aban hádangiñe abürühatiña Sálumu. Sügüti meha urúei Saulu saragu irumu éibaahei lun láfaruni hilagubei. Íbini sefu lan Dawidi luéi, chülüti meha dan lasandirun lañaradaguagüdaali lan lituróbulin (Sálumu 55:3-5; 69:1). Íbini ítara, abürühati: “Róuntina tidan nigabanan lau darangilaü lárigiñe aba narumugun, ladüga rútibu darangilaü luma achoururuni nun” Heowá (Salumu 4:8).

Dandu Ana kei Dawidi amuriahatiña ídemuei luma Bungiu lun hawanduni hasufurirun luma hagarigu, ani íderagua lumutiña (Sálumu 55:22). Gayaraati san wadügüni ligiaméme?

 ǗRÜWA ADUNDEHANI LE GAYARAABEI LÍDERAGUNIWA ASANDIRA ICHOURUNI

1. Ariha huméi Heowá kei Húguchi

Amisuraha lumutiwa Hesukrístu asubudirei Lúguchi, le “Bungiu ábanrügüti, le inarüniti” (Huan 17:3). Chóurugüda lumuti apostolu Pábulu woun “inarüni lan luagu madise lan Bungiu luéi kada aban wádangiñe” (Adügaü 17:27). Ligíati, lariñagunbei Santiagu: “Yarafa humá lun Bungiu, ábame giñe layarafadun hun” (Santiagu 4:8).

Súdiniti gabaroun wamani anihein lan aban Wáguchi sielu le unbei hínsiñe wamá, berese ligía wau lun wadarirun awalidaguni lídangiñe idiheri. Lau sun mégeiwa lan dan lun lasandirúniwa ichouruni le, gíbeeña asandirutiña íderagua lániña. Ariñagatu Karolina: “Dan le nagumeserunbei afiñera luagu Heowá, ligíaali nasandirun anihein lan aban Núguchi le unbei gayara lan nariñaguni ida liña lan nasandiragun nungua. Ruti katei le saragu awalidaguni nun”.

Abahüdaguatu Rakeli: “Heowá meha íderagubalina asandiragua nungua darangilañu dan le hígirunbadina nagübürigu. Ayanuhatina meha luma amuriaha nuguya luma lun líderagunina lau nituróbulin. Ani súnwandan meha líderagunina”. *

2. Áluaha huméi hídehan gürigia ha hínsiñehabubaña lun Bungiu

Ariñagati meha Hesusu houn lani disipulugu: “Íbirigu sun huguya” (Mateo 23:8, Traducción del Nuevo Mundo). Busenti meha hínsiñegua hamá hámagua aban hamaamuga iduheñu lidan afiñeni ha gíbetiña (Matéu 12:48-50; Huan 13:35).

Adüga hamuti gefentiña luagu Heowá ha lídanbaña saragu damuriguaü sun hayaraati lun harufuduni hínsiñehabu, híchugun ídemuei luma dǘgüdaguaü houn ha emegeirubalin, kei ladügǘniwa hadan iduheñu ha inarünitiña (Ebüréu 10:24, 25). Ariha hamaali saragu gürigia ítara liña lan hadamuridagun gefentiña luagu Heowá kei aban árani lun tigarigu hanigi.

Ariñagatu Ewa: “Anuhein meha aban numada lidan damuriguaü to úmaboun buidu lan nanaagun nungua, gunfuranda tumuti meha nigarigu. Aganba tumutina meha, aliiha tuguya bérusu tídangiñeti Bíbülia nun furíei tuguya numa. Adüga tumuti meha sun tiyaraati lun merederun nan nábugua. Ínchaha tumutina asagarei sun tigarigu nanigi. Seremei ídemuei le tíchugubei nun, aba nagumeserun asandira ichouruni nuougua”. Ánhounti Rakeli, ariñagatu: “Aba meha ítarahaña lan lílana damuriguaü nun kei ‘núguchu luma núguchi’. Adügatiña lun nasandiruni hínsiñe nan houn luma lun darangilu lan nasandiragun nungua”.

 3. Hínsiñehabu humá, gamadoun huguyame

Dan le hínsiñehabu wamá derebugutimati wamadagua hama amu. Ariñagati Hesusu: “Gúndaatimáati le íchugubei sügǘ lau le erésibirubei” (Hechos 20:35, Lererun Bungiu to lánina iseri daradu). Chóuruti wíchuguba lan fe eibu lan laganwoundun warufudun ínsiñehabuni houn amu, hínsiñehabutimabaña lan woun. Ariñagati Hesusu houn lani disipulugu: “Ru humá, rúa láamuga giñe hun” (Lúkasi 6:38).

Adügati wouserúniwa luma wóuseruniña amu lau ínsiñehabuni lun chouru lan wasandiragun woungua. Kei tariñaguni Bíbülia: “Magumuchagunbei ínsiñeni” o machararunbei (1 Korintuna 13:8). Ariñagatu María: “Subudi numuti anihein lan lídangiñe katei wuribati le nasaminarubei nuougua mítaranti kei nasaminaruni. Anúrahatina luéi ligaburi saminaü le dan le níderagun amu gürigia, ítara liña nabulieidagun luéi saminaü le íchugubei anufudei nun. Sagü nadügün katei buiti hawagu amu aba nasandiragun nungua buidu”.

ABAN UBÓU CHÓURUTI

Magidarun lubéi ǘrüwa adundehani le sun waturóbulin lau lóufudagun kei aban milaguru, íbini ítara, líderagubadiwa. Ariñagatu Karolina: “Chülügili dan nasandirun machouruni, gama lumoun maweirin haali nasaminarun mebegi nan ni kata. Subudi numuti berese lan Heowá nau ani gamadatina saragu gürigia ha íderagubalina asandira ichouruni”. Ariñagatu Rakeli aban katei ítarati: “Anihein dan híruti nasandiragun nungua. Gama lumoun, gíbetiña níbirigu ha úmabaña gayara lan namuriahan adundehani. Súnwandan híderagunina lun masaminarun nan wuriba. Leti buídutimabei Gáguchi nan aban le úmabei gayara lan nadimurehan sagü weyu. Ligía adügübei lun amu lan narihini katei”.

Ariñagatu Bíbülia málühali lan Ubóu adügǘwa paraísume le ñeinba lubéi chouru lan wasandiragun woungua

Lagidarúba turobuli le sunsuinagubei. Ariñagatu Bíbülia málühali lan Ubóu adügǘwa paraísume le ñeinba lubéi chouru lan wasandiragun woungua. Füramasetu Lererun Bungiu: “Haganóuba súngubei manufudeuga, gayaraabei hemeraagun lábugiñe tamuñadiri hanadürigu” (Mikeasi 4:4). Úaalime adügüti wuribati woun. “Labulieidúaba sun le sügühalibei, úaalime aritaguti luagun” (Isaíasi 65:17, 25). Lanügüba Bungiu luma Hesukrístu, le Liráü, irichaü ubouagun. Ábameti ñein lan darangilaü luma emenigini lun súnwandan (Isaíasi 32:17).

^ par. 5 Sánsiwaali iri.

^ par. 21 Rútiña gefentiña luagu Heowá aturiahani tídangiñeti Bíbülia maguburahanga houn sun ha busentiña hayarafadun lun Bungiu.