Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Núm. 1 2016

 SANSI TUMUTI BÍBÜLIA HABAGARI

Ábanrügüñein irumu lau ugundani luma darangilaü namuriaha buma

Ábanrügüñein irumu lau ugundani luma darangilaü namuriaha buma
  • IRUMU LE NASIRUA LUBÉI: 1971

  • AGEIRAÜ: FARANSU

  • AMU ARIÑAHANI: WÍYETI MEHA LANÜGÜNI LIBAGARI, HÍWERUTI MEHA, FASI LIGÍA, YUSU DÜROGA

LE MEHA NIBAGARIBEI:

Lidan meha aban liraüraü aüdü gíriti Tellancourt luéigiñe suedi libiti Faransu wawinwanda. Faransuna meha núguchi, italiana núguchu. Dan le widü lubéi irumu nau, aba wáguyun Italioun, lidoun aban aüdü bóugudi luéi Roma le ídanbei gudeme hamá gürigia, benefa hagía. Hénrenguti meha katei múnada; wéiriti meha hasigenehan nagübürigu luagu seinsu.

Dan le 15 lubéi irumu nau, aba tínchahanina núguchu lun náfuridun áluaha umadagu. Wéiritimahali meha dan násügürün ǘmada sügǘ lau múnada, murusunbei dan lárigiñe, gumesetina ásügüra dan hama hagübüri umadagu. Aban weyu, aba layarafadun aban gürigia nun le genegeti gamadoun lan. Ragǘ numuti düroga le líchugubei nun ladüga meha busén nan narihíniwa kei gürigia wéiriyaali. Fureseti nábürühan lidoun düroga luma agamariduni. Águrawaguatina saragu wéiyaasu. Aba meha mebegihali lan ibagari nun; meberesegunhadina meha ánhana ounwe o awinwanda. Sandiguatina meha nungua nábugua. Dan le 16 lubéi irumu nau, álugatina náfaragun nungua: aba natun aban budéin whisky, ábati nachüüragun nungua lidoun aban lagunu. Ǘrüwañein weyu nau masubudiragunga nungua.

Gumesetina asandira ínsiñeni luagu ibagari, gama lumoun fásihadina meha, eyeehanaña amu. Ábaha nariñagun houn ha busentiña narounruba lan hama, dántiha hábiñehadina, aba níchugun düroga houn íweruhanei sun katei gebegiti le hámabei. Rútiña meha laburiña düroga ha hanarimetiña wadagimanu nun lun nafanreinhan düroga lidan sun Italia. Gaturóbulinheitina meha hama lúrudu. Lau sun meha aban lan chagaguaü nibagari, chouru numuti meha gasuuni lan. Ligía nafurieidunbei lun Bungiu: “Ábanrügüñein irumu lau ugundani luma darangilaü namuriaha buma”.

ABA TASANSIRUNI BÍBÜLIA NIBAGARI:

Dan le 24 lubéi irumu nau, aba desidírü nan náguyun Inglatéroun. Lídanñadina meha denchaü lugundun háluahañadina meha fiu laburiña düroga lun háfarunina hilagubei. Ñǘdüntina arihoun núguchu lubaragiñe náguyun,  wéiritu nanigi lau nadariruni Annunziato Lugarà ayanuha tuma tuagu Bíbülia. * Subudi numuti aban lan meha híweruti ligía, ligía taweiridunbei nanigi, ábati nálügüdüni ka lan ladaaguña ñein. Aba labahüdahani óunwenbu burí asansiruni le ladügübei lidan libagari nun lun aban lan gefenti luagu Heowá, adügatiti lun füramase nan lun náluahabaña lan Gefentiña danme nachülürün Inglatéra. Lau sun ariñaga nan lun nadügübei lan, sigitina lau luriban nibagari dan le nachülürünbei ñeinhin.

Aban weyu, aba narihin aban gefenti luagu Heowá apurichiha tau Garüdia Awisahatu tuma ¡Despertad! lidan aban üma le ñéingiñe lubéi hásügüra saragu gürigia Alundu. Aba naritaguni füramasei le nadügübei, ábati namuriahan aban aturiahani tídangiñeti Bíbülia luma.

Wéirigüda lumutu sun le nafurendeirubei nanigi. Kéiburi le naliihabei lidan 1 Huan 1:9, ñein lubéi lariñaga: “Anhein wagufesera wafigoun, gayaraabei wemenigidun luagu Bungiu luagu ladügübei lan le richaguabei feruduna lubéi wafigoun, harumagüda láwame”. Adügati dimurei burí le lun lasansirun nibagari, ladüga wíyeti meha nasandiragun nungua luagu sun katei wuribati le nadügübei. Lau lóufudagun, aba nagumeserun adamuridagua tidan Luban Hadamuridagun Gefentiña luagu Heowá ñein lubéi neresibirúa lau ínsiñehabuni. Dan le narihinbalin lubuidun hanaagun gürigia ha ñéinbaña houngua ani hínsiñegua hamá hámagua —aban katei le nayumahabei lúmagiñe niñüraü—, aba nabusenrun hádangiñe nan iduheñu ha lílanabaña damuriguaü ligía.

Maturóbulintina lun nígiruni düroga luma magíaguni; anati nasansiruni luriban nigaburi ligía güreweibei nun. Aba narihini mosu lan nafurendeirun óuseraña amu lau inebehabu, samina aume luagun le hemegeirubei. Anahagua áfaagua lun nasansiruni luriban nigaburi. Seremei lun Heowá, houcharáühali. Badiseitina kei gefenti luagu Heowá lidan irumu 1997, sisi hati lárigiñe nagumeserun aturiahoun Bíbülia.

KA BUITI NIBIHIBEI?

Lárigiñe nabadiseirun, aba namarieidun tuma aban nibureintu gíritu Bárbara, to meha málügilibei lúmagiñe tabadiseirún kei gefentu luagu Heowá. Gumeseti aban hádangiñe binadu numadagu aturiahoun Bíbülia dan le larihinbalin óunwenbu burí asansiruni le nadügübei. Guentó, dandu ligía kei litu gefentiña haaña luagu Heowá. Ligiaméme giñe tadügübei tíbugaña nagütü; gúnfuliharu meha 80 irumu dan le tagumeserunbei aturiahoun Bíbülia, lau lásügürün dan, aba tabadiseirún.

Guentó neseriwiduña kei wéiyaali lidan afiñeni lidan aban damuriguaü, ani nayusuruñein liibe-agei nidaani tuma nani weiriou apurichihei uganu buiti houn gürigia ha ayanuhabaña italíanu Alundu. Anihein dan, nasandirun óunwenbu íruni dan le naritaguni binadu nibagari, gama lumoun, súnwandan tíchugun Bárbara dǘgüdaguaü nun. Anati guentó, ibiha naali le meha wéiribei nayumahan: ibagari keisi iduheñu le derebuguti luma aban Úguchili le unbei nínsiñeda. Ábanrügüñein meha irumu lau ugundani luma darangilaü namuriaha luma Bungiu, ani rúhali lóugiñe nun.

Anati guentó, ibiha naali le meha wéiribei nayumahan: ibagari keisi iduheñu le derebuguti luma aban Úguchili le unbei nínsiñeda

^ par. 10 Aliiha huméi arütíkulu “Sansi tumuti Bíbülia habagari: Barǘ numutu meha nárumate le ñeinhin numuti”, labahüdahan Annunziato Lugarà, tidan Garüdia Awisahatu to lánina 1 lidan sedü-hati, irumu 2014, páhina 8 luma 9 (lídanñoun chumagü).