Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu (to lánina aturiahani)  |  Ǘrüwa-hati irumu 2017

Aban ágeidinaü le barühali 3.000 irumu lau aban abürühani kananna le ñein lubéi aban iri le áfuachubei tidan Bíbülia

Aban iri tídangiñeti Bíbülia luagu aban binadu ágeidinaü

Aban iri tídangiñeti Bíbülia luagu aban binadu ágeidinaü

Lidan irumu 2012, daritiña fiú akutihatiña libügürü binadu burí umegeguni fiú murusun lani aban ágeidinaü lauti múa le barühali 3,000 irumu. Wéiriti meha ugundani le hasandirubei. Ka uagu? Mámatima luagu fánreinti lani ágeidinaü ligía hagundaara, luagu abürühani le luágubei hagundaara.

Dan le hibihinbei hadunraguagüdüni fánreinti burí ligía lunya aban lan ageidinaü dayarüti, aba gayara lan haliihani abürühani kananna le luágubei. “Esbaal ben Bedá” meha liri luagu, mini lan le “Esbaal, liráü Bedá”. Anihán meha furumiñeti wéiyaasu hadariruni akutihatiña ha iri le bürüñu luagu aban ágeidinaü binaduhali.

Ayanuhatu giñe Bíbülia luagu aban wügüri gíriti Esü-baali. Aban meha hádangiñe lisaanigu urúei Saulu wügüri ligía (1 Krónikasi 8:33; 9:39). Máisturu meha Yosef Garfinkel aban hádangiñe wügüriña ha adarirubalin binadu ágeidinaü ligía. Ariñagati súdiniti lan luagu lídanrügüñein lan lidaani urúei Dawidi layusurúa iri le tidan Bíbülia luma luagu ladarirún luagu aban ágeidinaü lánina wadaani. Saminatiña fiú sásaamu lídanrügüñein lan meha dan ligía layusurúa iri le. Ábanya hénpulu le luagu úara tan siensia to aturiahabalin binadu burí umegeguni luma abahüdaguni burí le tídanbei Bíbülia.

Lidan burí amu fánreinti tidan Bíbülia, wáwati giñe lun Esü-baali Isü-bosetü (2 Samueli 2:10). Ka uagu layusurúa “bosetü” leweñeguame “baali” lidan iri le? Ariñagatiña akutihatiña háfuga lan mayusurún lan iri Esü-baali tidan tibiaman ligaradan Samueli ladüga haritaguagüda lániña ísüraelina luagun Baali, bungiu kananna le lánina liñawan dan. Gama lumoun dariwamémegili iri Esü-baali tidan líburu Furumiñeti Krónikasi.